Read Lashi OBEDIA 1 Bible Online

OBEDIA 1 - Lashi bible

OBEDIA 1

¹He: zigi myhang: thang yoem: so' ASEING gi Edom yi da" khyoo: cisu" ga: tid to" ziri Obedia gi lapi: pe: to" zi nghoid. ASEING gi nya: lagyoo: ri byumyu" yi jhang khyoo: nhang: kaid byid: bye: wigi «Soin' ge' too' loo shang- nyhang" Edom ri gyi zain: boem loo: shang» ga: da" nya: mungdang: ri ngoonu" shoug" gyoo: bye:.

²Edom ri ASEING tid zigi «Ngoo gi nang ri yoem: neing: loo" nhang: wa yugkhang" moo" gi nang ri aphoug" akhyoid koid loo boem wa nghoid.

³Re" da" nghoid boin: khyoo: gi nang ri mhoid" jhoem" pyam, bye:. Re" da" voomoo" zeing gi lug moo" boem su" geung: jo, da" gyidab nghoid- re" da" yhoem: gi boem joem tho' moo jo, wigi nang nanya: gung ri nanyang: tid nyid zigi «Ngoo ri hang" wigi yo" lang: khyo' wa la"» ga: tid nyid.

⁴Zoin bung: da" soid yo' dakhyoo" ti" myhang: joyoo moo re" yhoem: ri koid to" lho: hau: zigi kyi: joem da" agung moo jo, to" ti" du nyid nghoid loug we' ngoo gi nang ri she: khyo' pyam wa zi nghoid.

⁵Myen" ayo, moo khoug" mo, re" uri nyangnu" vho: ja: ri za: yu lo" ago". Voobyu yi we' zabyid shi" phyo' zeung" uri nyangnu" gi khanham we' da jhi' dathang: teung too" kho'. Nghoid loug we' re" gyivoo joem gi nang ri jhoid shang sho' shoem" thu pyam loo" wa.

⁶Eso da" amyed: ashen' yi we' nanu" da" jonu" joem gi lhoid yu pyam zi shau" boem bye:.

⁷Re" da" seing" tain" bidnoem yi dangain" gi nang ri mhoid" jhoem" pyam bye:. Nyangnu" gi re" da" mungdain: mo wigi nang ri khaid thu pyam loo bye:. Nang yo' myenjham" za: danyid nyid da" byumyu" yigi akhid" nang ri zain: oung: yu pyam bye:. Nang yo' dazoo: dashug danyid da" byencang" yigi nang ri myhi wa shid re" lhid thung: to" boem abye: go". Nyangnu" gi re" khyoo: ri «Nya: nheigboo oung: gyeung: zigi khayoo: lha"» ga: tid.

⁸Edom ri ngoo shen" yhen da" bidnyid moo ngoo gi nyangnu" da" se'- koung- byu yiri phyo' shoin' pyam loo wa nghoid lho: nyangnu" da" phajhi" juyhi: dangain" ziri shoem" thu pyam loo wa nghoid.

⁹Teman da" gyi zain: bang: gi gyoug nain" zi shoug" lo wigi Edom mo gyizoo: yi dangain" we' said pyam zi shau" boem wa nghoid.

¹⁰Nang gi Yaku da" amyed ashen re" da" mang: nhung" yiri lhoid yu lho: said loo bye: yoo mo nang rigi apyaid atoo: moo phyo' shoin' pyam zi shau" wigi asho' ashid: bue" zi shoug" loo" wa nghoid.

¹¹Gyivoo joem gi nyangnu" da" voogung khoem" moo" duang: joem ri yhe: baid phyo' pyam da" bidnyid moo nang gi ayam moo bo yab jo, abye:. Yerusalem da" ziyoo jonu" joem ri pyoung" thu lo" lho: hau: ziri nyangnu" kho' gam yu go" lo" da" tungbau byu yi yhang: ti" nang gi areing nghoid da:.

¹²Yuda mung" mo re" mang: nhung" yi da" nheig byu jang: ajo, loo bue" lo" ziri nang gi yu" gau nyid wa zigi a eung: nghoid da:. Nyangnu" byo, yoin" lo" da" bidnyid moo nang gi age yu" gau nyid nghoid da:. Nyangnu" da" nheigloem: gi yoem: shoin: zi shoug" nyid jang" moo nang gi nyangnu" da" atho' moo yi juang" wa zigi a eung: nghoid da:.

¹³Nyangnu" gi yau: khe" kyi" khyeug zi shoug" nyid da" bidnyid moo nyangnu" da" yau: khe" kyi" khyeug shoug" ziri yu" gau lho: ziyoo jonu" joem ri yhe: lhoid yu wa shid re" nang gi nga" byumyu" yi da" voomoo" khyoo: vang yhi: wa a eung: nghoid da:.

¹⁴Nang gi phang: thu loo" wa ga: lu: nyid bang: ri myheig yu wa shid re" khyoo: kang" khang" moo" moo yab jo, lho: lang" nyid zigi azei: eung: da" moo" nghoid nyid. Nyangnu" da" nheigloem: gi yoem: shoin: zi shoug" nyid da" bidnyid moo nang gi nyangnu" ri gyivo lo, khyoo: age kaid byid:.

¹⁵Ngoo ASEING gi byumyu" yi bain sho' bang: ri dang: phyed loo wa da" bidnyid gi jhang loo bye:. Edom we" nang koid lid loo bye: ziyo' dakhyoo" ti" nang moo doem bue" loo wa zi nghoid. Nang byid: pyam bye: ziyo' dakhyoo" ti" nang doem shoug" yu wa zi nghoid.

¹⁶Nga" byumyu" yigi nga" da" gyeung" shang: bouggung tho' moo shen" yhen da" khu khoo" ri shoug" nyid boem abye: go". Nghoid loug we' loem: lheing khab' mo da" byumyu" yi dangain" gi je" kho" da" shen" yhen khu khoo" ri shoug" shau" boem goo" wa nghoid. Nyangnu" gi hau: khu ri bain sho' shug wigi doem thang loo" nhang: wa zi nghoid.

¹⁷Nghoid loug we' Ziun boem tho' moo dayham" gi yo" phang: loid loo" wa nghoid wigi hau: joyoo gi gyeung" shang: joyoo daloem: bue" loo wa. Yaku byumyu" yigi nyangnu" yoo" eung: da" mungdain: ri shoug" seung: lo" boem wa zi nghoid.

¹⁸Yaku yo' Yoseb da" byumyu" yigi myi: yhang: ti" bue" loo" wa. Myi: gi khoofoo: nghoid joem ri nge" pyam yhang: ti" nyangnu" gi Eso da" byumyu" yiri phyo' shoin' pyam loo wa nghoid. Eso da" amyed ashen yigi nyid deing loo wa zi anghoid ein: ngoo ASEING gi tid nyid bye:.

¹⁹Moug: pyi: shoid mo da" Yuda mung" byu yigi Edom ri zain: oung: yu wa zi nghoid. Bidvang shoid boem khyid: cang nyid mo, gi Philisti byu yiri zain: oung: yu pyam boem wa nghoid. Israela byumyu" yigi Ephrim yi' Samari yi da" mougmyid joem ri seung: pyam lho: Benyamin byumyu" yigi Gilead ri yo" yu pyam loo" wa nghoid.

²⁰Mougzhung: shoid Israela mungdain: mo pyoung" she: loo" shau" da" gyizoo: yi doem thu lo lho: Phonisha mo moug: zhoung: shoid khyoo: jo, da" Zarephaid moo ju" sho' zain: oung: yu loo" wa zi nghoid. Yerusalem mo pyoung" loo" shoug" lho: Sardi moo nyid nyid mo, gi Yuda mung" mougpyi: shoid mo voogung joem ri zain: seung: yu lo" boem wa nghoid.

²¹Yerusalem mo meing: zain: oung: loo" mo, gi Edom ri zain: oung: lho: vhoebkhang" nyid boem wa zi nghoid. Hau: lho: ASEING nyang: gi khokham bue" loo wa zi nghoid.