Read Lashi YONA 1 Bible Online

YONA 1 - Lashi bible

YONA 1

¹Danyid" ri Amitai da" nya: zoo: Yona jang" moo ASEING mungdang: ju" re".

²Nyang: tid zigi «Gyi: sheung: da" Nineve voomoo" khyoo: yhe: lho houg: bang: khayhi' akhyeing" ashoeb da" khyoo: ri ngoo si' bye: khyoo: ri yhe: tid kyoo" we'» ga: tid.

³Nghoid loug we' Yona gi ASEING nhang: khyoo: ayhi: loo: za: nya: jang" mo phang: byug da:. Nyang: gi Yopa khyoo: yhe: lo". Houg: mo gukhuang" moo Spain khyoo: gu: loo" wa gyid sangphoo ri yhe: myang. Nyang: gi gukhoo' ri kaid lho: ASEING yo' vi: wa bye: ga: Sangphoo moo" voin mo, yo' dage" Spain khyoo: yhe: loo" wa shid re" sangphoo moo vang lo".

⁴Nghoid loug we' ASEING gi panglai: tho' moo uglid zeing ri nhang: kaid. Houg: yoomo hau: sangphoo gi alug lug gyoeb moin" loo" sho' panglai: gyid thoem" tho' moo gye" gyoug pho" da" uglid moo" hau' vang loo bye:.

⁵Houg: yoomo sangphoo moo" voin mo, gi gyoug dain wigi pang" thoug yu wa shid re" yugkhang" moo" nyang: nya: da" yu phara" ri yoid nyho: nyid. Hau: thang: ri gye" gyoug ca" loo yoomo ziyoo joem ri we' sangphoo tho' moo de" khyo' pyam ago". Hau: uri Yona gi sangphoo akhau: yab moo yhe: vang yhoeb pyo: nyid.

⁶Sangphoo khang" su: gi nyang: ri houg: moo yhe: myang lho: tid zigi «Nang khasu" wigi yhoeb pyo: nyid lha". Too' we' pang" thoug yu zi shoug" wa shid re" re" yu phara" ri mho' we' nyang: gi nyhang" ri nheig khyeug lho: yha" kangso' ri to' lhoid pyoin kaid shi" abe» ga: tid.

⁷Sangphoo moo" voin mo nyang: cang" nyang: tid go" nyid zigi «Hang" yooboo yoomo nyhang" hidsu" bue" lo" la' si' wa shid re" me" lab yu" shang» ga: tid ago". Hau: me" gi Yona moo eung: lo" da:.

⁸Houg: yoomo nyangnu" Yona ri tid zigi «Ce: yooboo mo he: khyoo: bue" lo lha". Nang cire" koid nyid. Nang kha: moug: bang: nghoid- ce: noem byumyu" nghoid. Akhid" ngoonu" ri tid kyoo" we'» ga: zheung: myid: nyid.

⁹Yona gi «Ngoo gi Hebre" byumyu" nghoid. Ngoo gi mougkhung: myidjang yo' panglai: ri phain" so: su: moug: di tho' mo ASEING Mangsoo ri no' ku" su: nghoid.

¹⁰Nyang: gi «Hau: ASEING jang" mo phang: su: nghoid» ga: tid. Houg: yoomo sangphoo moo" zei: bang: gi gyoug dain ziyo' nyang: ri hougsu" koid zigi «Gyug pho" moo" danghoid» ga: tid ago".

¹¹Uglid moo" gi je" je thain: lo nyid yoomo sangphoo moo" voin mo, gi nyang: ri «He: da" uglid tam" loo" wa shid re" ngoonu" nang ri khasu" koid wa» ga: myid: boem.

¹²Yona gi «Ngoo ri panglai: khyoo: dang: khyo' pyam we'. Houg: lang" he: uglid noem: loo" wa. He: gyoug pho" uglid gi nga" yooboo yoomo bue" nyid zi ngoo si' bye:» ga: phug tid.

¹³Nghoid loug we' sangphoo khang" bang: gi tunggung khyoo: ju" sho' ga: gye" yoem: kaid lho: gu: lo" boem ri we' panglai: gi je" dadoin: lhoin" lo nyid lho: nyangnu" nooyoo amyang nghoid da:.

¹⁴Houg: yoomo nyangnu" gi ASEING ri «O" ASEING we" he: yug kangso' yoomo ngoonu" ri shid: wa yooboo dam ajen" byid:-ASEING we" nang koem' gi nanyang: Koid eung: ziyo' dakhyoo" ti" koid abye:» ga: mho' yoid boem.

¹⁵Hau: thang: ri nyangnu" gi «Yona ri dang lho: panglai: moo du" zei kaid boem. Houg: lang" panglai: being: mhoid joem we' tam" loo" khari" bye:.

¹⁶Hougsu" nghoid yoomo sangphoo moo" voin mo, gi ASEING ri atho' tid sho' gyoug phau" boem wigi ASEING ri xoin" to' byid: lho: nya: moo" ri kyeing" voin nyid wa ga: dangsoo" byid: boem.

¹⁷Mangsoo amyeing" byid: yoomo wimdo, zeing gi: Yona ri myhau: pyam bye:. Yona we' wimdo, moo" zeing voem: doug: khoug: moo soem" nyid" soem" myen loung" jo da:.