Read Lashi GYUNG: SOO" 12 Bible Online

GYUNG: SOO" 12 - Lashi bible

GYUNG: SOO" 12

¹Moshe gi Khusha myiyi: dayug yo' lo, xo' yu da:. Miriam yo' Arun tang: gi houg: yoomo nyang: ri yooboo foin: dang: tid ago".

²Nya: tang: gi «ASEING gi Moshe khyo" za: dang: tid ga rhe". Nyang: gi nga" eig yug khyo" we' dang: atid ga: rhe"» ga: tid ago". ASEING gi nya: eig tang: tid zi shau" gyo: da:.(

³Moshe gi nheigloem: nyhoem: khyoo' su: nghoid da:. Mougmyid tho' moo: gootu: bang: tho' je wigi nheigloem: nyhoem: khyoo' su: nghoid da:.)

⁴ASEING gi nyeigdain tung" Moshe- Arun yo' Miriam bang: ri «Nanu" soem" yug nga" shidkhoin" Zoem" moo: ri" goo" wa zi ngoo vho: nyid» ga: tid da:. Nyangnu" we' yhe: bye:.

⁵ASEING gi jhoemmoug" thei" zeing bung: yo' gyoo" re" wigi Zoem" khoem" duang: moo re" yab jo, lho: «Arun we"- Miriam we"» ga: khe: kaid da:. Nya: tang: gi shid khyoo: byi ce" yhe: lo" da:.

⁶Houg: lho: ASEING gi «Akhid" ngoo tid wa da" dang: ri tam" gyoo: ge'. Nanu" phung: gung moo lapi: yi nyid uri ngoo gi nyangnu" ri myo, myang myang jang" moo: ngoonya: gung ri ci: shug byid: wa zi nghoid. Yhoebmo, moo: nyangnu" ri dang: tid wa.

⁷Nga" dei zoo: Moshe yo' ngoo dang: tid zigi gootu: yo' adu goo". Ngoo gi nyang: ri nga" byumyu" Israela dangain" bang: ri vhu" shi: wa vhujhung: koid nhang: to" zi nghoid.

⁸Houg: yoomo ngoo gi nyang: yo' myonhoo: shu: go" to" lho: bang bang za: dang: tid. Qei" shoem' khyoo: aboo. Nyang: gi nga" gung yoeb rilang" myang bye: su: nghoid. Re" eig tang: gi nga" dei zoo: Moshe ri thougtheung dang: voem" tid go" rhe"» ga: tid da:.

⁹ASEING gi nya: tang: ri nheig yo: da:. Houg: yoomo nyang: to' lo" wigi

¹⁰Jhoemmoug" thei" Zoem" mo to' lo" uri Miriam da" shooyid moo: houg: jang: manggam dab re" wigi gyu: yhang: ti" phyu: lo" byug da:. Arun gi nyang: ri yu" wigi nyang: gi noo dab ziri myang lang"

¹¹Arun gi Moshe ri «Nheigboo phoo we" jeju" khyo" nga" eig yug da" koo" moo" zei: yooboo yoomo he: yooboo dam ri nga" eig yug ri ajen" zang" nhang:.

¹²Nya: gung shoo" ri agung dayi" zo: pyam wigi ashid: khu: re" da" yug yhang: ti" nyang: ri abui" nhang:» ga: tid.

¹³Houg: yoomo Moshe gi ASEING ri «O" Mangsoo we"- nyang: ri gi nhang: la o"» ga: mho' yoid bye:.

¹⁴ASEING gi «Nya: phoo gi nya: myonhoo: moo: shakain" byi" gyoin: nghoid rigi nyang: gi nya: da" sho' phu" khyoo: ri nyhed nyid" kham zoo: ca" da:. Houg: yoomo nyang: ri dab tunggung khyoo: nyhed nyid" yhe: to" too" wa nghoid lho: hau: thang: ri doem yhe: yo" shu" tau" loo wa nghoid» ga: tid.

¹⁵Miriam gi dab tunggung khyoo: nyhed nyid" yhe: nyhid: to" zi shoug" bye:. Miriam ri ayhe: shu" vang yu yu gi byumyu" yi ato' yhe: lo" goo" nghoid da:.

¹⁶Hau: thang: nyangnu" gi Hazerod mo to' yhe: lo" wigi Paran dain" pyoid yoo moo dab doem koid boem ago".