Read Lashi GYUNG: SOO" 13 Bible Online

GYUNG: SOO" 13 - Lashi bible

GYUNG: SOO" 13

¹ASEING gi Moshe ri

²«Byumyu" daxe: eig kung:- kung: khang" moo" mo vhu" shi: wa bang: dayug yug khyen: yu wigi Israela byumyu" yiri ngoo byid: wa nghoid da" Khanan mung" khyoo: joo" yhe: yu" wa shid re" jooyu" bang: khyo" nyangnu" ri nhang: kaid we'» ga: tid.

³Moshe gi tid dang: tam" gyo: lho: vhoo: moo: lhid" to" ziyo' dayhang: ti" Paran dain" pyoid yoo mo hau: vhu" shi: bang: ri nhang: kaid bye:. [Akung:] — [Vhujhung:] Ruben — Zakhura da" nya: yuggi zoo: Shammua Simun — Hori da" nya: yuggi zoo: Shaphad Yuda — Yephune da" nya: yuggi: zoo: Khaleb Ishakha — Yoseb da" nya: yuggi zoo: Igala Ephrim — Nun da" nya: yuggi zoo: Hoshea Benyamin — Raphu da" nya: yuggi zoo: Palti Zebulun — Sodi da" nya: yuggi zoo: Gaddiela Manashe — Susi da" nya: yuggi zoo: Gaddi Dan — Gemali da" nya: yuggi zoo: Ammiela Ashe — Mikhaela da" nya: yuggi zoo: Sethura Nabthali — Vophsi da" nya: yuggi zoo: Nabi Gad — Makhi da" nya: yuggi zoo: Guela bang: nghoid.

¹⁶Hid bang: gi Moshe wigi mungdain: ri joo" yhe: yu" wa shid re" nhang: kaid da" jooyu" bang: nghoid ago". Nyang: gi Nun da" nya: yuggi zoo: Hoshea ri Yoshu ga: myeing thid myheing da:.

¹⁷Moshe nyangnu" ri nhang: kaid uri nyang: gi nyangnu" ri «Hid mo zi mougzhung: khyoo: yhe: wigi Khanan mung" da" mougpyi: khyoo: vang yhe: lho: hau: thang: ri boem khyoo: do, yhi: ge'.

¹⁸Hau: mungdain: gi cite" zi nghoid ziri we' hougmoo: byu khamyhoo' nyid ziri we' nyangnu" yoem: khayhi' bo ein: ziri we' yhe: yu" loo ge'.

¹⁹Hau: mougmyid ge age ziri we' byu yigi vang khyam abo voogung moo nyid go" la'- vang khyam jo, da" voomoo" moo nyid go" la' ein: ziri yhe: yu" loo ge'.

²⁰Mougmyid nu" la'- seig moo" yoo nghoid la' ein: ziri yhe: yu" loo ge'. Houg: lho: hougmoo: sho" to" da" shi" dayham" ri si wa shid re" yoo" yoo" ci: loo ge'» ga: tid. (Hau: ayo, gi zabyid myheing shid" re" da" ayo, nghoid.)

²¹Houg: yoomo houg bang: gi mougzhung: khyoo: yhe: lo" wigi mougpyi: shoid Zin dain" pyoid yoo mo zi mougzhung: shoid Hamad nham khyoo" lid lo" da" Rehob moo ju" sho' joo" yhe: yu" yen" ago".

²²Nyangnu" gi hau: mung" da" mougpyi: shoid khyoo: xang: shi" yhe: wigi Hebron khyoo: doem lo" ago". Houg moo: Anakim ga: myheing da" byuzeing myu" yi da" amyed ashen nghoid da" Ahiman- Sheshai- Talamai kung: bang: nyid ago". (Hebron voogung gi Egutu mung" Zoan voogung tho' moo: nyhed zain shid" lho: tam: to" da" voogung nghoid.)

²³Nyangnu" Eshkola janggyoin: ju" lo wigi nyangnu" gi zabyid ajhung: dajhung: za: dadab da" zabyid kung: dakung: ri phe' yu da:. Sung lid: yoomo byu eig yug keing youg: yo' hau: ziri dang ago". Nyangnu" gi lamei shi" cab yo' lafoem shi" dayham" ri we' phyo' ci: lo ago".

²⁴(Hau: joyoo ri Eshkola janggyoin: ga: myheing ago". Ciwim gari: hau: joyoo moo: Israela byumyu" yi zabyid jhung: ri phe' yu yoomo nghoid da:.)

²⁵Hau: mung" ri myid: xi: nyid" bain jooyu" thang: ri jooyu" bang: gi

²⁶Paran dain" pyoid yoo mo Kadesha moo nyid da" Moshe- Arun yo' Israela shava byu yi jang" khyoo: doem tau" lo" ago". Nyangnu" gi nyangnu" yhe: myang bye: gu: ri lo tid kyo" lho: nyangnu" yu lo da shi" joem ri we' lo ci: shug bye:.

²⁷Houg: bang: Moshe ri «Ngoonu" hau: mougmyid ri jooyu" lo ziyo' mougmyid nu"- myid xu: bo ziri myang boem bye:. Houg mo shi" dayham" gi he: zi nghoid.

²⁸Nghoid loug we' hougmoo: nyid da" byumyu" yigi yoem so' boo mo, nghoid. Nyangnu" voomoo" joem gi gye" gyi: ziyo' gye" ge da" vang khyam: koid to" boem ago". Hau: tho' agoo" byu zeing yi da" amyed ashen yiri ngoonu" houg moo yhe: myang too" khoo' bye:.

²⁹Mungdain: da" mougpyi: shoid moo: Amaleg byumyu" yi nyid wigi boem moug: moo gi Hiti- Yebusi- Amori bang: nyid boem ago". Meing: gung Panglai: yo' Yodan gyid lang yam cang gi Khanan byumyu" yi nyid boem ago"» ga: tid.

³⁰Khaleb gi Moshe ri thougtheung myeing" myo: nyid da" byumyu" yiri sam: zoo: nyid nhang: wigi «Nyang" akhid" yhe: zain: lho: mungdain: ri seing: pyam shang. Nyhang" moo: hau: ziri oung: yu wa da" yoem: gi bo jo, shi"» ga: tid.

³¹Nghoid loug we' Khaleb yo' dage" yhe: da" byu yi gi «Anghoid wa. Nyangnu" ri meing: zain: wa shid re" ngoonu" moo: yoem: bo nyid zi anghoid. Houg moo: nyid da" byu yi gi ngoonu" tho' yoem: je bo da» ga: tid.

³²Houg: yoomo nyangnu" gi nyangnu" hau: mung" ri jooyu" da" khyoo: ri Israela byumyu" yi phung: moo: ajoo aeung: da" khyo" lu dang: fu" byid: kaid da:. Nyangnu" gi «Hau: mung" gi hougmoo: nyid da" byumyu" yi shid re" gi" koo: nyang" gug zoo athu' nghoid da:. Ngoonu" myang da" yugkhang" moo" gi gye" myhang: ziyo'

³³Anag da" amyed ashen yi nghoid da" gyi: sheung: da" byumyu" yiri lang" ngoonu" myang bye:. Ngoonu" gi jhenkhyeug yhang: ti" nge byug ti" ga: kham zo: wigi he: zigi houg: bang: ri ngoonu" shau" myang khyoo: nghoid» ga: tid.