Read Lashi GYUNG: SOO" 20 Bible Online

GYUNG: SOO" 20 - Lashi bible

GYUNG: SOO" 20

¹Xang: shi" lhammoo" khyab ri Israela shava byu phung: goin" gi Zin dain" pyoid yoo khyoo: ju" lo lho: Kadesha moo dab lo koid lho: theing: nyid ago". Houg moo: Miriam shid: wigi myhoeb pyam bye:.

²Nyangnu" theing: nyid da" joyoo moo: gyid ajo, nghoid da:. Hougsu" yoomo byumyu" yigi Moshe yo' Arun eig tang: ri lheing khab zeing: foem: wigi

³myeing" myo zigi «Ngoonu" hau: ASEING shidkhoin" Zoem" shid moo ngoonu" da" Israela mang: nhung" yi yo' dage" bo shid: lo" byug bye: nghoid rigi je gi wa zi nghoid bye: nhung.

⁴Re" eig yug ciwim yoomo ngoonu" ri he: dain" pyoid yoo khyoo: shu" thu loo go" lha". Hougsu" ngoonu" gi ngoonu" gougnyhoug joem yo' dage" hid: moo: shid: baja" ein: go" rhe".

⁵Re" eig yug ciwim yoomo he: ciwe' ayo" shoo" zoo: yau: khi" jo, da" joyoo khyoo: ngoonu" ri Egutu mung" mo shu" thu' lo go" lha". Hid: moo: gugshi" meishi" ajo,- lafoem shi" ajo,- zabyid shi" ajo,- lamei cab shi" ajo, nghoid da:. Shug gyid lang" ajo, nghoid da» ga: myeing" myo: ago".

⁶Moshe yo' Arun gi byu phung: mo thu lo" wigi Zoem" khoem" duang moo yhe: yab jo, boem. Nya: tang: gi nya: tang: myonhoo: ri myidgung khyoo: goeb khyo wigi ASEING da" phung" yoeb gi nya: tang jang" moo yi yi bang thu loo bye:.

⁷ASEING gi Moshe ri

⁸«Dang: Theing Kuid: shid moo jo, da" lhamdung: ri yu wigi nang yo' Arun gi shava byu phung: goin" ziri khe: zheing" too" ge'. Nyangnu" dangain" da" shidkhoin" hau: joyoo mo jo, da" lug moo" zeing ri gyid yau thu ri" wa shid re" tid we'. He: khyoo: khyo" re" eig tang: gi byumyu" yi shid re" lug moo" zeing mo gyid yo" byid: wa zi nghoid. Nyangnu" yo' nyangnu" gougnyhoug shid re" shug gyid nghoid loo wa» ga: tid.

⁹Moshe gi ASEING amyeing" dang: yo' dakhyoo" ti" lhamdung: ri lo" yu bye:.

¹⁰Nyang: yo' Arun gi shava byu phung: dangain" ri lug moo" zeing shidkhoin" moo: khe: zheing" to" wigi Moshe gi «Thougtheung gyi koid mo, we" tam" gyoo: ge'. Nga" eig tang: he: lug moo" zeing mo nanu" shid re" gyid yau thu' nhang: byid: ca" rhe"» ga: myid:.

¹¹Hau: thang: Moshe gi lhamdung: ri tu: yu wigi hau: lug moo" zeing moo: eig dam baid kaid da:. Houg: lang" gyid moo" lang yau thu re" da:. Byumyu" yi dangain" yo' gougnyhoug joem shug ago".

¹²Nghoid loug we' ASEING gi Moshe yo' Arun ri gyi koid. Nyang: gi «Re" eig tang: gi Israela byumyu" yi shidkhoin" moo nga" gyeung" shang: yoem so' ri loem" jeing" wa loem khoug: myid atham: boo goo" yoomo nyangnu" ri byid: wa ein: ngoo dangsoo" byid: to" da" mung" khyoo: re" eig tang: gi nyangnu" ri ayo" shu" vang yhi: wa zi nghoid» ga: tid da:.

¹³He: zigi Meriba joyoo moo: bue" da" zi nghoid. Hougmoo: Israela byumyu" yigi ASEING ri thougtheung myeing" myo: wigi nyang: gi gyeung" shang: yug nghoid ziri nyangnu" ri ci: shug bye:.

¹⁴Moshe gi Kadesha mo Edom Khokham jang" khyoo: lagyoo: yiri nhang: kaid da:. Nyangnu" gi «He: mungdang: gi re" byumyu" Israela byumyu" yi da" mungdang: nghoid. Ngoonu" yau: khi" shau" ziri we'

¹⁵Ngoonu" phoug" phyid" yi Egutu khyoo: khasu" ju" yhe: wigi houg moo ngoonu" gye" myang" sho' nyid ziri we' nang se' bye:. Egutu byu yigi ngoonu" da" phoug" phyid" yi yo' ngoonu" ri shen" yhen lo ago".

¹⁶Houg: lho: ngoonu" gi bo pang" wa shid re" ASEING ri mho' yoid bye:. Nyang: gi ngoonu" mho' yoid ziri shau" gyo: wigi ngoonu" ri Egutu mo shu" thu' loo wa da" moug: lagyoo: dayug ri nhang: byid: bye:. Akhid" ngoonu" gi nanu" da" mougkyoo" voomoo" nghoid da" Kadesha moo nyid to" boem.

¹⁷Jeju" mo re" mougmyid khyo" ngoonu" ri lid wa akhang byid we'. Ngoonu" yo' ngoonu" gougnyhoug joem gi khyoo: thung avang wa. Nanu" da" yoo yo' zabyid khyam: joem khyoo: avang wa. Houg: lho: ngoonu" gi nanu" da" gyid thung" mo gyid ashug wa. Ngoonu" gi nanu" da" moug: mo bain thu' lo" da" ayo, ju" sho' khyoogung moo kyeing" danyid wa» ga: tid.

¹⁸Nghoid loug we Edom byumyu" yigi «Ngoonu" moug: khyo" nanu" lid wa akhang" ayo" byid:. Nanu" so" lid: wa soin' nghoid rigi ngoonu" thu re" wigi gyi re" zain: wa zi nghoid» ga: tid.

¹⁹Israela byumyu" yigi «Ngoonu" gi khyoogung moo kyeing" danoo: wa. Ngoonu" yo' ngoonu" gougnyhoug joem nanu" gyid dakhyi khyi mo shug nghoid rigi hau: shid re" aphoug" byid: wa. Ngoonu" vho: zigi lid phyed loo" wa zi danghoid» ga: tid.

²⁰Edom byumyu" yigi «Ngoonu" akhang" ayo" byid:» ga: doem phoug tid lho: nyangnu" gi Israela byumyu" yiri khaid zain: wa shid re" yoem: so' moo" bo da" gyiphung moo" zeing yo' to' yhe: lo" boem bye:.

²¹Edom byumyu" yigi Israela byumyu" yiri nyangnu" mougmyid khyo" alid loo" nhang: yoomo Israela byumyu" yigi doem tau" wigi gootu: khyoo: khyo" jang" yhe: lo" ago".

²²Israela shava byu phung: goin" gi Kadesha mo thu wigi Edom mougkyoo" mo Hora boem khyoo: ju" lo" ago".

²³Houg moo: ASEING gi Moshe yo' Arun tang: ri

²⁴«Arun gi Israela byumyu" yiri byid: wa ein: ngoo dangsoo" byid: to" da" mung" khyoo: ashau" vang yhi: wa zi nghoid. Re" eig tang: ngoo ri Meriba moo: nga" amyeing" dang: ri thougtheung gyi koid yoomo Arun gi shid: wa zi nghoid da:.

²⁵Arun yo' nya: zoo: Eleaza ri Hora boem khyoo: shu" do, lo" wigi

²⁶hougmoo: Arun da" Khainjung byisheing: ri khyoid yu wigi hau: joem ri Eleaza ri foid byid: we'. Arun gi houg moo shid: lo" wa zi nghoid» ga: tid.

²⁷Moshe gi ASEING amyeing" byid: ziyo' dayhang: ti" koid bye:. Nyangnu" gi shava byu phung: goin" myang jang" mo nyang: Hora boem khyoo: do, lo" boem bye:.

²⁸Moshe gi Arun da" khainjung byisheing: ri khyoid yu lho: Eleaza ri foid byid: bye:. Hau: boem gung moo: Arun shid: bye: ziyo' Moshe yo' Eleaza doem tau" gyoo" loo: bye:.

²⁹Shava byu phung: goin" gi Arun shid: bye: ziri se' wigi nyangnu" dangain" mo, gi nya: shid re" soem" xi: nyid" koug ngau boem bye:.