Read Lashi GYUNG: SOO" 21 Bible Online

GYUNG: SOO" 21 - Lashi bible

GYUNG: SOO" 21

¹Khanan mung" mougpyi: shoid mo Khanan khokham Arad gi Israela byumyu" yi Atharim khyoo: ju" da" khyoo: moo: re" lo nyid boem ga: ziri shoug" gyoo: lang" nyang: gi nyangnu" ri yhe: zain: wigi nyangnu" mo dayham" ri myeug yu pyam da:.

²Hau: thang: Israela byumyu" yigi ASEING ri jham' tang: wigi «Nang ngoonu" ri he: byumyu" yiri oung: nhang: wa nghoid rigi ngoonu" gi nyangnu" ri yo' nyangnu" voomoo" joem ri ateing too" loo: sho' nang ri shugbyid: wa. Houg: lho: nyangnu" ri phyo' sain" pyam wa» ga: tid ago".

³ASEING gi nyangnu" ri tam" gyoo: byid: wigi nyangnu" ri pang" thoug lho: Khanan byumyu" yiri oung: yu bye:. Houg: yoomo Israela byumyu" yigi nyangnu" yo' nyangnu" voomoo" joem ri bain sho' phyo' sain" pyam bye:. Houg joyoo ri Horma ga: myheing ago".

⁴Israela byumyu" yigi Edom mung" ri lheing pyam wa shid re" Hora boem mo thu wigi Thoem" Ni khyoo: ju" da" khyoo: khyo" yhe: lo" ago". Nghoid loug we' byumyu" yigi khyoo: moo: nheigloem: so" thang wigi

⁵Mangsoo yo' Moshe ri myeing" myo: dang: tid lo boem. Nyangnu" myeing" myo: zigi «Zoo: noem ajo,- gyid ajo, da" he: dain" pyoid yoo moo shid: wa shid re" ciwim yoomo re" eig yug ngoonu" ri Egutu mung" mo shu" thu loo go" lha". Ngoonu" gi hid: yhang: ti" main abo da" zoo: noem ri atho' zoo: lho:» ga: myeing" myo: boem.

⁶Houg: lang" ASEING gi byu phung: gung khyoo: dug thain: da" lhangmyu joem ri nhang: kaid wigi Israela byu myoo: sho' ri thei" said pyam da:.

⁷Byumyu" yigi Moshe jang" khyoo: re" wigi ngoonu" gi «ASEING yo' nang ri myeing" myo: dang: tid yoomo yooboo shoid bye:. He: lhangmyu joem ri yu pyam byid: wa shid re" ASEING jhang akhid" akyu" mho' byid: la» ga: tid. Houg: yoomo byumyu" yi shid re" Moshe akyu" mho' byid: bye:.

⁸Hau: thang: ASEING gi lhangmyu wigi thei" byid: mo, hau: ziri yu" wigi ge loo" wa shid re" gyid: wigi lhangmyu lhoo: koid lho: zeing moo tab too" wa shid re" Moshe ri tid.

⁹Houg: yoomo Moshe gi gyid: mid" lhangmyu koid wigi zeing phyoo" moo hau: ziri tab too" bye:. Lhangmyu thei" byid: da" yugkhang" moo" hau: gyid: mid" lhangmyu lhoo: ri yu" wigi ge lo" boem ago".

¹⁰Israela byumyu" yi to' wigi Obod moo: yhe: theing: nyid da:.

¹¹Hau: joyoo mo doem to' thang: nyangnu" gi Moba moug: bidthu shoid mo dain" pyoid yoo moo jo, da" byo, yoin" jo, da" Abarim joyoo moo: yhe: theing: nyid ago".

¹²Hau: thang: nyangnu" gi Zered jang: gyoin moo: yhe: theing: nyid ago".

¹³Houg: mo nyangnu" doem to' wigi Amori mougkyoo" ju" sho' nghoid da" dain" pyoid yoo moo yau nyid da" Arnon gyid gyung: mougzhung: shoid moo: yhe: theing: nyid ago" (Arnon lang gi Moba yo' Amori moug: agyoo: moo: mougkyoo" nghoid da:.)

¹⁴Houg: lho: ASEING da" gyi khaid mougsoug" bug moo: «Supha moug: mo Vaheb voogung yo' lang khung"- Arnon gyid lang.

¹⁵Ara voogung yo' Moba mougkyoo" shoid khyoo: ju" sho' dam lo" da" langkhung" jo,» ga lhid" to" da:.

¹⁶Nyangnu" gi hau: joyoo mo gyid thung" joem ga: myheing da" joyoo- ASEING wigi Moshe ri «Byumyu" yiri khe: zheing" too" we' ngoo nyangnu" ri gyid byid: wa» ga: tid da" joyoo khyoo: yhe: loo" bye:.

¹⁷Hau: uri Israela byumyu" yigi he: jikhoin" ri khoin" ago". «Gyid thung" joem we"- nanu" gyid ri thu ri" nhang: we'. Houg: lho: hau: ziri ngoonu" jikhoin" khoin" wigi coung" wa.

¹⁸Khokham zoo: yi du: to" da" gyid thung" byumyu" yi da" vhujhung: yi du: to" da" gyid thung" khokham zungbang" yo' nyangnu" lhamdung: yo' du: to" da" gyid thung" nghoid. Nyangnu" gi dain pyoid yoomo Matana khyoo: yhe: lo" ago"»

¹⁹Houg: lho: hau: joyoo mo Nahaliela khyoo: yhe: ago". Hau: Nahaliela mo Bamod khyoo: yhe: ago".

²⁰Houg: lho: Bamod mo zi: dain" pyoid yoo ri dang khyo" myang kaid da" Moba moug: Pisga boem nyug vhoo: moo jo, da" janggyoin: khyoo: yhe: lo" ago".

²¹Hau: thang: Israela byumyu" yigi Amori khokham Sihon jhang lagyoo: joem ri nhang: kaid lho:

²²«Re" mougmyid khoug: khyo" ngoonu" ri lid nhang: lha. Ngoonu" gi ngoonu" da" gougnyhoug joem yo' khyoomoo" mo aqei: ayam khyoo: ayhi: lho: nanu" da" yoo thung" yo" zabyid khyam: joem khyoo: avang wa. Nanu" da" gyid thung" joem mo we' gyid akham: shug byid: wa. Nanu" da" mougkyoo" mo athu loo" loo" gi khyoomoo" moo za: nyid nyid wa» ga: tid nhang: ago".

²³Nghoid loug we' Sihon gi Israela byumyu" yiri nya: da" mougmyid khoug: khyo" lid loo" wa akhang" abyid: nghoid da:. Nyang: gi nya: gyizoo: yiri zheing" yu wigi dain" pyoid yoo mo Yahaza khyoo: thu yhe: lho: Israela byu yiri meing: zain: da:.

²⁴Nghoid loug we' Israela byumyu" yigi meing: zain: pa: moo: gyivoo yi myoo" sho' ri said pyam wigi nyangnu" moug: ri Arnon gyid gyung: mougzhung: shoid mo zi Yabug gyid gyung: ju" sho' lhoid seing: yu ago". Hau: zigi Amori byumyu" yi moug: ju" sho' nghoid da:. Ciwim gari Amori mougkyoo" gi teing za: lhoug zung" to" ago".

²⁵Houg: yoomo Israela byumyu" yigi Heshbon yo' hau: aqei: ayam mo Amori voomoo" dangain" ri lhoid pyam wigi nyangnu" hau: moo: nyid boem.

²⁶Heshbon gi Amori khokham Sihon da" voomoo" nghoid. Nyang: gi shid mo Moba khokham ri zain: oung: pyam lho: Arnon gyid gyung: ju" sho' gyi: lam: da: nya: mougmyid ri lhoid yu bye: zi nghoid.

²⁷Houg: yoomo dang: zhoem' zhoem' su: jikhoin" khoin" zigi «Khokham Sihon da" voomoo" Heshbon khyoo: ri" we'. Hau: ziri doem so' koid lho: doem so' zoem: wa ziri ngoonu" myang nau da:.

²⁸Shid phyang" dalheing: he: Heshbon voomoo" mo Sihon da" gyizoo: yi myi: yhang: ti" to' yhe: lo" ago". Hau: gyidab gi Moba mung" mo Ara voomoo" ri phyo' pyam lho: Arnon gyid moin mo bau gung joem ri myhau: pyam bye:.

²⁹Moba byumyu" yi we"- nanu" shid re" gye" gyoug pho" zi nghoid da:. Kemosha ri noku bang: nanu" gi byo, yoin" lo" zi shau" abye:. Nanu" da" yu phara" gi yuggi yiri gyi phang: phang: gau" yen" nhang: bye:. Houg: lho: myiyi: yigi Amori khokham da" thung: byu yi bue" lo boem bye:.

³⁰Nghoid loug we' akhid" koem' gi nyangnu" da" amyed ashen yiri phyo' shoin pyam bye:. Heshbon mo Dibon ju" sho' Nashim mo Medeba nam mo Napha ju" sho' said toem" pyam zi shoug" ago"» ga: khoin" da:.

³¹Houg: yoomo Israela byumyu" yigi Amori yi da" moug: moo: nyid boem ago".

³²Houg: lho: Moshe gi Yazera voomoo" ri khaid zain: yu wa shid re" ge thang da" khyoo: ri yhe: yu" wa byu nhang: kaid da:. Israela byumyu" yigi hau: voomoo" yo' hau: aqei: ayam mo voogung joem ri khaid zain: yu wigi hougmoo: nyid da" Amori byumyu" yiri khaid thu pyam ago".

³³Hau: thang: Israela byumyu" yi doem lheing: lo wigi Bashan moug: khyoo: ju" da" khyoo: khyo" lo ago". Houg: lho: Bashan Khokham Oga gi nya: da" gyizoo: yiri shu" wigi Edrei moo: nyangnu" ri lhoem: zain: wa ga: re" lo ago".

³⁴ASEING gi Moshe ri «Nyang: ri Agyug noo". Ngoo gi nang ri nya: adang moo we' nya: byumyu" yi yo' nya: mung" ri we' oung: yu nhang: wa. Heshbon moo: vhoeb lid lo" da" Amori khokham Sihon ri nang wigi koid ziyo' dayhang: ti" nyang: ri we' koid we'» ga: tid da:.

³⁵Houg: yoomo Israela byumyu" yigi Oga ri we' nya: yuggi zoo: yiri we' nya: byumyu" yi dangain" ri we' byu dei adeing loo: sho' said toem" pyam wigi nya: mung" ri we' seing: pyam da:.