Read Lashi GYUNG: SOO" 23 Bible Online

GYUNG: SOO" 23 - Lashi bible

GYUNG: SOO" 23

¹Nyang: gi Balag ri «Nga" shid re" phoin: nyhed loem: ri hid: moo: koid byid: lho: nuloo: nyhed du: yo' yang loo: nyhed du: ri nga" jhang khyoo: she: ri" byid: we'» ga: tid.

²Balag gi nyang: ri tid bye: ziyo' dayhang: ti" koid lho: nyang: yo' Balam gi phoin: daloem: moo: nuloo: dadu: yo' yang loo: dadu: du: ri shugbyid: ago".

³Hau: thang: Balam gi Balag ri «ASEING ngoo ri shoug" nau ashau" nau ziri se' yu wa shid re" ngoo yhe: yu" nyid uri nang gi re" nghe' ngei" xoin" nam moo: yab jo, shi" we'. Nyang: wigi ci: shug da" cinghoid loug we' nang ri ngoo tid kyoo" wa» ga: tid. Houg: yoomo nyang: dayug kyeing" boem gung khyoo: do, lo" lho:

⁴Mangsoo gi nyang: ri shoug" bye:. Balam gi nyang: ri «Ngoo gi phoin: nyhed loem: koid lho: phoin: khang" moo" moo nuloo: dadu: yo' yang loo: dadu: du: ngei" byid too" bye:» ga: tid.

⁵ASEING gi Balam ri citid wa ziri tid kyo" lho: pyeing: dang: lo" tid kyoo" wa shid re" Balag jhang khyoo: nhang: kaid bye:.

⁶Houg: yoomo nyang: doem tau" gyoo" lo" ri Balag gi nya: nghe' ngei" xoin" yam moo: Moba vhujhung: yi dangain" yo' yab jo, shi" ziri yhe: myang bye:.

⁷Balam gi he: lapi: dang: ri tid bye:. «Moba khokham Balag ngoo ri Suri mung" mo bidthu shoid boem joem mo shu" re" da:. Nyang: gi ‹Nga" shid re" dang: re" tid byid: la. Israela byumyu" yiri nheing" khoin" re" kaid byid: la› ga: tid.

⁸Mangsoo anheing" da" mo, ri ngoo khasu" yo" se' nheing" wa la". Anghoid lang" ASEING atid da" byo, yoin da" dang: ri ngoo khasu" yo" tid wa la".

⁹Myhang: da" lug pyo' mo nyangnu" ri ngoo myang. Ngoo gi nyangnu" ri bouggung mo yo" yu" nyid da:. Nyangnu" gi nyangnu" kyeing" nyid da" byumyu" nghoid da:. Nyangnu" gi gootu: byumyu" yi tho' mainkaid jeju" je yo" ziri se' ago".

¹⁰Israela byumyu" yi da" akung: ako' yigi zhoophei" yo' dayhang: ti" nghoid nyid da:. Nyangnu" gi atho' nghab loo: sho' gye" myo: nyid da:. Nga" bidnyid joem ri Mangso da" byu dayug khyo" thang nhang: la. Deungmain" da" byu dayug yo' dayhang: ti" myenjham" tung" ngoo ri shid: nhang: la» ga: lapi: pe: da:.

¹¹Hau: thang: Balag gi Balam ri «Nang ngoo ri cikoid bye: la". Ngoo gi nga" gyivoo joem ri nheing" khoin" kaid wa shid re" nang ri hid: khyoo: shu" re" zi nghoid. Nghoid loug we' nang tid zi dangain" gi nyangnu" ri mainkaid byid: zi kyeing" danghoid» ga: tid.

¹²Nyang: «Ngoo gi ASEING wigi tid nhang: gu: za: dayo" tid» ga: tid.

¹³Hau: thang: Balag gi Balam ri «Israela byumyu" dayham" ri za: nang shau" myang da" joyoo gootu: khyoo: ngoo yo' dage" re" we'. Houg mo wigi nga" shid re" nyangnu" ri nheing" khoin" kaid byid we'» ga: tid.

¹⁴Balag gi nyang: ri Pisga boem gung mo Zophim jang: pa: khyoo: shu" yhe: da:. Houg moo: we' nyang: gi phoin: nyhed loem: ri koid lho: phoin: khang" moo" moo: nuloo: dadu: yo' yang loo: dadu: du: xoin" ngei" byid: da:.

¹⁵Balam gi Balag ri «Re" nghe' ngei" xoin" moo yab jo, shi" we'. Ngoo thei: moo: Mangsoo yo' yhe: shoug" shi" ba» ga: tid.

¹⁶ASEING gi Balam yo' shau" wigi citid wa ein: ziri tid kyo" da:. Houg: lho: nya: pyeing: dang: Balag ri lo" tid kyoo" wa shid re" nhang: kaid bye:.

¹⁷Houg: yoomo nyang: doem tau" loo" bye:. Nyang: gi Balag ri nghe' ngei" xoin" joem ayam moo: Moba vhujhung: yi yo' dage" yab jo, shi" ziri myang. Balag gi ASEING citid kaid bye: ziri lhoem: myid:.

¹⁸Balam gi he: lapi: dang: ri tid bye:. «Zipora da" nya: zoo: Balag we" re" loo we'. Houg: lho: ngoo tid kyoo" wa ziri tam" gyoo: we'.

¹⁹Mangsoo gi se' mhau' da" byu yi yhang: ti" anghoid. Nyang: gi myid se' thid da" byu xangsu: ti" anghoid. Nyang: dangsoo" khoin" byid: to" zi cinghoid loug nyang: koid da:. Nyang: tid ziyo' dakhyo" bue" lo da:.

²⁰Main kaid byid: wa shid re" ngoo ri jhau" shed too" bye:. Mangsoo mainkaid byid: ziri ngoo ayo" doem tau" pyam.

²¹Israela da" ju" loo wa ayo, moo age da" vhu" pi: lo, kyo' yo' yau: khi" ri nyang: moo: abui" wa ziri ngoo myo, myang myang da:. Nyangnu" ASEING Mangsoo gi nyangnu" yo' dage" nghoid nyid. Nyang: gi nyangnu" khokham nghoid ziri nyangnu" tid nyid.

²²Mangsoo gi nyangnu" ri Egutu mo shu" thu lo da:. Nyang: gi nyangnu" shid re" kyang: da" nulam" yhang: ti" gyi koid byid: da:.

²³Israela byumyu" yiri yo" thougtheung pyam wa da" fa" wa main dain: ajo,- join: ajo,- akhid" koem' gi Israela byumyu" yi da" khyoo: ri Mangsoo koid kaid ziri yu" shi" we' ga: byumyu" yi coem tid goo" wa bye:.

²⁴Israela byumyu" gi yoem: so' bo da" khangkhyi yo' du da:. Hau: zigi nyang: wigi said pyam bang: da" shoo" ri: ayo" phyo' zoo: zoo: gi: atheing:. Suid" ashau" shug shug gi atheing: nghoid da"» ga: lapi: pe: dang: tid.

²⁵Hau: thang: Balag gi Balam ri «Nang gi Israela byumyu" yiri nheing" wa jang" mo he: pyam bye:. Nghoid loug we' main khyalang" gi ajen" kaid byid:» ga: tid.

²⁶Balam gi ASEING ngoo ri tid kyoo" nhang: da" ja: khang" moo" ri za: ngoo tid ca" ein: nang ri ngoo tid bye: anghoid rhe" ga: tid.

²⁷Balag gi «Nga" thang: cang ri" we'. Nang ri ngoo gootu: joyoo khyoo: shu" yhi: wa. Nga" shid re" nyangnu" ri hau: joyoo mo nang wigi nheing" wa akhang" nang ri Mangsoo byid: shi" abe» ga: tid.

²⁸Houg: yoomo nyang: gi Balam ri dain" pyoid yoo ri yo" myang kaid da" Peora boem gung khyoo: shu" yhe: da:.

²⁹Balam gi nyang: ri «Nga" shid re" hid: moo: phoin: nyhed loem: koid lho: nuloo: nyhed du: yo' yang loo: nyhed du: nga" jhang she: ri" we'» ga: tid.

³⁰Balag gi nyang: tid ziyo' dayhang: ti" koid bye:. Phoin: loem: khang" moo" moo nuloo: dadu: yo' yang loo: dadu: du: ngei" byid: bye:.