Read Lashi GYUNG: SOO" 27 Bible Online

GYUNG: SOO" 27 - Lashi bible

GYUNG: SOO" 27

¹Mala- Noa- Hogla- Mikha yo' Tirza bang: gi Zelophehad da" myiyi: zoo: yi nghoid ago". Zelophehad gi Hephera da" yuggi zoo:- Hephera gi Gilead da" yuggi zoo:- Gilead gi Makhira da" yuggi zoo:- Makhira gi Manashe da yuggi zoo:- Manashe gi Yoseb da" yuggi zoo: nghoid.

²Nyangnu" yhe: wigi ASEING shidkhoin" Zoem" khoem" duang: mo Moshe- khainjung Eleaza- Vhujhung: yi Shava byu dangain" da" shidkhoin" moo yab jo, wigi

³«Nga" tang: ho' da" phoo gi yuggi zoo: akhu: loo: siyoo moo shid: loo" khoo' bye:. Nyang: gi ASEING ri thougtheung gyi koid da" Kora da" thang: cang mo, moo abo boo nghoid da:. Nyang: gi nya: yooboo yoomo shid: lo" zi nghoid.

⁴Nyang: yuggi zoo: yi ayoo" yoomo za: gi ciwim yoomo Israela byumyu" yi mo nya: myeing ge byug wa la". Nga" tang: ho' nya: ba" da" bidnoem yi yo' dage" nga" tang: ho' ri ziyoo jonu" bo gam byid: goo" la» ga: tid boem.

⁵Moshe gi nyangnu" da" moo" ri ASEING jang" khyoo: tid kyo" uri

⁶ASEING gi nyang: ri

⁷«Zelophehad da" myiyi: zoo: yi mho' da" khyoo: gi jo da:. Nya: nham: ho' nya: pho da" bidnoem yiri ziyoo jonu" gam byid: we'. Nya: mid ri we' nya: tang: ho' ri gam byid: we'.

⁸Yuggi dayug gi yuggi nu" ayoo" loo: za: shid: lo" nghoid rigi nya: myiyi: zoo: gi nya: ziyoo jonu" ri mid khyo" yo" yu ziri Israela byumyu" yiri tid kyoo" we'.

⁹Nyang: gi myiyi: zoo: we' ayoo" nghoid rigi nya: mang: nhung" yigi hau: mid ri seing: yu wa zi nghoid.

¹⁰Nyang: gi nya: mang: nhung" we' anyid nghoid rigi nya: pho mang: nhung" yigi hau: mid ri seing: yu wa zi nghoid.

¹¹Nyang: gi nya: mang: nhung" yi anghoid lang" nya: laid bang: anyid loo: nghoid rigi nya: jhang thang da" bidnoem seing: yug gi hau: mid ri seing: yu wigi nya: ziyoo jonu" khyo" yo" seing: too" wa zi nghoid. Ngoo ASEING nang ri amyeing" byid: bye: ziyo' dayhang: ti" Israela byumyu" yigi he: ziri tarha" vang moo" khyo" cang koid yhi: wa zi nghoid»

¹²ASEING gi Moshe ri «Abarim boem khyoo: do, lo" lho: ngo wigi Israela byumyu" ri byid: wa mougmyid ri lo" pyu yu" kaid we'.

¹³Hau: ziri nang bain myang thang: ri re" mang: Arun bui" bye: ziyo' dakhyo" nang shid: wa zi nghoid.

¹⁴Ciwim gari: re" eig tang goin" gi Zin dain" pyoid yoo moo: nga" amyeing" dang: ri thougtheung boem yoomo nghoid. Meriba moo: shava byu phung: goin" gi Ngoo ri thougtheung boem uri nyangnu" shidkhoin" moo: nga" gyeung" shang: da" yoem: so' ri re" eig tang yhen: yu wa ziri he: ngeug pyam da» ga: tid. (Meriba gi Zin dain" pyoid yoo mo Kadesha gyid bug nghoid da:.)

¹⁶«ASEING Mangsoo kangso' apoem: we" ngoo akyu" mho'- byumyu" yiri yo" shu" vhu" she: wigi

¹⁷re" shava byu phung: yi yang zung" yug abo da" yang joem yo' dakhyo" abui" goo" baja" gyi khaid jang: moo amyeing" yo" byid: da" byu dayug khyen: too" byid: la'» ga akyu" mho'.

¹⁸ASEING gi Moshe ri «Nun nya: yuggi zoo bui" doid da" Yoshu ri shu" yu lho: nya: vhuloem tho' moo: lo ki" byid: we'.

¹⁹Nyang: ri khainjung Eleaza yo' shava phung: goin" shidkhoin" moo: yab jo, nhang: lho: hau: nyangnu" dangain" shidkhoin" moo: nyang: ri re" moo" xo' voin wa su: khyo" tid fu" kaid we'.

²⁰Israela shava byu phung: goin" gi nya: dang: tam" gyoo: goo" baja" re" amyeing" akhang" dayham" nyang: ri gam byid: we'.

²¹Nyang: gi khainjung Eleaza ri khau: nghi: wa. Eleaza gi Urim yo' Thumin ri ci: yhung: lho: nga" myid vho: ziri jhau" yu loo wa. Hid khyo" wigi Eleaza gi Yoshu yo' Israela shava byu phung: goin" da" nyangnu" moo" zoo" dangain" ri khyoo: shed byid: ri" wa» ga: tid.

²²Moshe gi ASEING wigi nyang: ri amyeing" byid: ziri koid bye:. Nyang: gi Yoshu ri khainjung Eleaza yo' shava phung: goin" shidkhoin" moo: yab jo, nhang: da:.

²³ASEING amyeing" dang: yo' dakhyo" Moshe gi Yoshu vhuloem tho' moo: nya: lo, ri ke" lho: nyang: ri nya: khoo: moo: moo" xo' zei: wa su: khyo" tid fu" kaid bye: da:.