Read Lashi GYUNG: SOO" 28 Bible Online

GYUNG: SOO" 28 - Lashi bible

GYUNG: SOO" 28

¹ASEING gi Moshe ri

²Tu' to" da" ayo, moo: shug byid: ca" da" nyang: vho: ngei da" zoo: noem xoin" ri Mangsoo ri shugbyid: wa shid re" Israela byumyu" yiri tid shed nhang: da:.

³He gu: gi ASEING ri shug byid: ca" da" zoo: noem xoin" nghoid da:. Nyid" khang" moo" nghe' ngei" da" xoin" khyo" dam abo da" dazain byeung" yang loo: eig du:.

⁴Xang: shi" du: ri nab soin: ngei" byid: wigi thang: mo du: rigi myen" thang: ngei" byid: wa zi nghoid.

⁵Du: khang" moo" ri ge thang da" zhainloin: xu: 2 parheing" yo' lheug to" da" cen: moin" xoin" dakyen" yo' dage" shug byid: wa zi nghoid.

⁶He: zigi ASEING ri ngei nhang: da" main shoem: zoo: noem xoin" khyo" Sina boem moo bain sho' ngei" shid" da" nyid" khang" nyid" mo xoin" nghoid da:.

⁷Xang: shi" yang nu" yo' dage" zabyid yhid: xoin" to' uri zabyid yhid: 2 parheing" ri phoin: moo: foid gyoin: we'.

⁸Yang eig du: ein: du: ri nab soin: ri ngei" byid: ziyo' dayhang: ti" zabyid yhid: xoin" yo' dage" myen" thang: ri shugbyid: we'. Hau: zi we' ASEING ri vho: ngei nhang: da" main shoem: zoo: noem xoin" nghoid da:.

⁹Dougno: Bidnyid Xoin" ri shivoo: xoin" khyo" zhainloin: xu: yo' lheug to" da" cen: moin" dajoid: jain" yo' ce: noo dam abo da" dazain byeung" yang nu" eig du: yo' zabyid yhid: ri shug byid: wa zi nghoid.

¹⁰Nyid" khang" nyid" mo xoin" ri zabyid yhid: xoin" yo' dage" shugbyid: tho' mo gootu: he: nghe' ngei" xoin" ri Dougno: Bidnyid khang" moo" shugbyid: we'.

¹¹Lhammoo" xain" khang" moo" ASEING ri nghe' ngei" byid: da" xoin" khyo" noo abo da" nuloo: eig du: yang loo: dadu: yo' dazain byeung" yang loo: nu" nyhed du: ri shugbyid: we'.

¹²Shivoo: xoin" khyo" zhainloin: xu: yo' lheug to" da" cen: moin" ri shugbyid: ge'. Nuloo: du: khang" mo" yo' cen: moin" soem: kyen" jain" yang loo: dadu: yo' cen: moin" dajoid: jain"

¹³Yang nu" du: khang" moo" yo' cen: moin" dakyen" jain" shugbyid: we'. He: nghe' ngei" xoin" joem gi ASEING ri vho: ngei nhang: da" xoin" shoem: joem nghoid da:.

¹⁴Zabyid yhid: xoin" koem' gi nuloo: du: khang" moo" yo' zabyid yhid: myid: parheing" yang loo: yo' zabyid yhid: soem" parheing" yang nu" du: khang" moo" yo' zabyid yhid: eig parheing" nghoid wa. He: gu: gi dazain goin" mo lhammoo" xain" xang: shi" nyid" nyid" khang" moo" moo: main: main: koid wa da" nghe' ngei" xoin" shid re" tarha" nghoid.

¹⁵Houg: lho: nyid" khang" nyid" da" nghe' ngei" xoin" yo' zabyid yhid: xoin" tho' gootu: yooboo khyoid xoin" khyo" coidbaid loo: dadu: ri shugbyid: ge'.

¹⁶Zain seig khyab daxe: myid: nyid" nyid" ri ASEING ri phoug" tab ngi: shab khyo" lhid: kaid pui" ri koid ca" da:.

¹⁷Daxe: wim: nyid" mo loem khau: pui" ri nyhed nyid" ju" sho' hau: agyoo: moo: doocid" abo da" zooyho' ri zo: wigi koid wa zi nghoid.

¹⁸Pui" xang: shi" nyid" moo: nanu" gi noku wa shid re" phung: foem: ca" goo" wa. Ce: moo" we' age zei: goo" wa.

¹⁹ASEING ri shivoo: xoin" khyo" nghe ngei" xoin" shugbyid: ge'. Ce: noo dam abo da" nuloo: nu" eig du: yang loo: dadu: yo' dazain byeung" yang nu" nyhed du: nghoid ca" da:.

²⁰Zhainloin: xu: yo' lheug to" da" cen: moin" ri shivoo: xoin" khyo" nuloo: du: khang" moo" ri soem: kyen" jain" yang loo: dadu: yo' dajoid: jain"

²¹Yang loo: nu" du: khang" moo" ri dakyen" jain" koid lho: shugbyid: ca" da:.

²²Coidbaid loo: dadu: ri we' yooboo khyoid xoin" khyo" shugbyid: ge'. Hid: su" khyo" byumyu" yi shid re" laloem lakhoug khyo" younglho' khyoo: koid ca" da:.

²³Nab soin: main: main: koid da" nghe ngei" xoin" moo: he: ziri loung: wigi shugbyid: we'.

²⁴Houg yo' dakhyo" nyhed nyid" goin" ASEING ri vho: ngei nhang: da" shoem:- zoo: noem xoin" nyang: ri ngei" byid: we'. Nyid" khang" moo" mo nghe' ngei" xoin" yo' zabyid yhid: xoin" moo: he: ziri lung: lho: shugbyid: we'.

²⁵Nyhed nyid" ein: nyid" moo: noku wa shid re" zeing: foem: nyid ge'. Moo" azei: wa.

²⁶Shivoo: yham" pui" xang: shi" nyid" moo: nanu" ASEING ri shivoo: seig xoin" shugbyid: uri noku wa shid re" nanu" zeing: foem: nyid ge'. Moo" azei: goo".

²⁷ASEING ri vho: ngei nhang: da" shoem: khyo" nghe' ngei" xoin" ri noo abo da" nuloo: eig du: yang loo: dadu: yo' dazain byeung" da" yang loo: nu" nyhed du: shugbyid: we'.

²⁸Zhainloin: xu: yo' lheig to" da" cen: moin" phei" shivoo: xoin" koem' gi nuloo: du: khang" moo" yo' cen: moin" soem: kyen" jain" yang loo: dadu: yo' cen: moin" dajoid: jain" yo'

²⁹yang nu" khang" moo" yo' cen: moin" dakyen" jain" nghoid wa.

³⁰Yooboo khyoid xoin" khyo" coidbaid loo: dadu: ri we' shugbyid: wigi byumyu" yiri laloem lakhoug: thung" khyo" younglho' pyam byid: we'.

³¹Nyid" khang" nyid" mo nghe' ngei" xoin" yo' cen: moin" xoin" tho' moo lung: lho: he: joem yo' zabyid yhid: xoin" ri bo shugbyid: we'.