Read Lashi GYUNG: SOO" 3 Bible Online

GYUNG: SOO" 3 - Lashi bible

GYUNG: SOO" 3

¹He: zigi Sina boem tho' moo: ASEING wigi Moshe ri dang: tid da" ayo, mo Arun yo' Moshe tang: da" yhoem: byu yi nghoid.

² Arun gi nya: yuggi zoo: myid: yug yo" da:. Mang: moo" Nadab- Abihu- Eleaza yo' Ithama ga bang: nghoid.

³Nyangnu" gi khainjung yi yhang: ti" mainkaid xu: joid wigi lo, ki" aya: kham: yu shoug" bang: nghoid.

⁴ Nghoid loug we' Nadab yo Abihu tang: gi Sina dain" pyoid yoo moo: ASEING ri agyeing" ashang: da" myi: shugbyid: uri said pyam shoug" bye:. Nya: tang: gi zooshang: ayoo" nghoid da:. Houg: yoomo Eleaza yo' Ithama tang: gi Arun da" apyaid moo khainjung khyo" wigi dei byid: bye:.

⁵ASEING gi Moshe ri

⁶«Levi akung: ri shid khyoo: shu" lo wigi khainjung Arun da" dei zoo: yi khyo" moo" foin: byid: we'.

⁷Nyangnu" gi nga" shidkhoin" Zoem" moo ca" da" moo" yo' khainjung yi shid re" dei byid: wa moo" yo' byu phung: goin" ri dei byid: wa moo" ri zei: wa zi nghoid.

⁸Nyangnu" gi zoem" mo jonu" dangain" ri yoovoin yu wigi deing da" Israela byu yi shid re" dei byid: moo" ri koid wa zi nghoid.

⁹Levi byumyu" da" yoovoin daloem: gi Arun yo' nya: yuggi zoo: yiri dei byid: wa moo" nghoid.

¹⁰Nang gi Arun yo' nya: yuggi zoo: yiri khainjung moo" ri voin wa shid re" yoo voin foin: we'. Hougsu" koid wa soin' bang: gootu: hang" nghoid loug we' said pyam zi shoug" wa nghoid» ga: tid.

¹¹ASEING gi Moshe ri

¹² «Akhid Levi byumyu" yigi ngoo seing: bang: nghoid. Egutu byumyu" yi da" zooshid" dangain" mo, ri ngoo said pyam uri ngoo gi Israela byumyu" yi ikoin deungkhu: dangain" mo zooshid" yuggi zoo: yi yo' gougnyhoug ja: khang" moo" mo xang: shi" xang" da" ziri nga: shid re" khyo" ngoo khyen: too" bye:. Akhid" nga" shid re" khyo" Israela byumyu" yi da" zooshid" yuggi zoo: yi gungthid khyo" ngoo gi Levi byumyu" yiri yo" too" bye:. Nyangnu" gi ngoo seing: mo, nghoid goo" wa. Ngoo gi ASEING nghoid» ga: tid.

¹³

¹⁴Sina dain" pyoid yoo moo: ASEING wigi Moshe ri

¹⁵Levi byumyu" yiri akung: yo' yhoem: khoung: joem ri kho' wigi lhammoo" dakhyab byeung" yug yo' je gyi: da" yuggi yugkhang" moo" ri myeing koid: yu wa shid re" amyeing" byid to" da:.

¹⁶Moshe we' Hougsu" koid bye:.

¹⁷Levi gi yuggi zoo: soem" yug yo". Gershon- Kohad- Merari ga bang: nghoid. Nyangnu" gi nyangnu" myeing voin da" akung: yi da" phoug" phyid" yi nghoid ago". Gershon gi Libni yo' Shimi ga: da" yuggi zoo: eig yug yo" da:. Kohad gi Amram- Izhara- Hebron- Uziela ga: da" yuggi zoo: myid: yug yo" da:. Merari gi Mali yo' Mushi ga da" yuggi zoo: eig yug yo" da:. Nyangnu" gi nyangnu" myeing voin da" yhoemkhung: yi da" phoug" phyid" yi nghoid ago".

¹⁸

¹⁹

²⁰

²¹Gershon akung gi Libni yo' Shimi yhoemkhung: ri de: too" byid: da" akung: nghoid.

²²Myeing kaid to" da" lhammoo" dakhyab byeung" bye: bang: yo' hau: tho' je gyi: da" yuggi dangain" gi 7,500 yug nghoid da:.

²³He: akung: gi byumyu" vhujhung: nghoid da" Laela da" nya: yuggi zoo: Eliasab yo' dage" zoem" nungthang bidvang shoid moo dab koid wa zi nghoid.

²⁴

²⁵Nyangnu" gi zoem" shid re" yoovoin boo mo, nghoid. Hau: joem gi akhoug: shoid mhang" moug: pain" ruang: atho' shoid mhang" moug: pain" ruang:- khoem" moo" akyo' pain" ruang:

²⁶Zoem" yo' phoin: lheing khab moo yam to" da" yabkyo' pain" ruang: yo' zoem" khoem" duang: mo akyo' pain" ruang: joem ri zoem: wa moo" yoo" bang: nghoid da:. Nyangnu" gi he: zi joem yo' xo' tei" to" da" moo" zoo" dangain" ri voin vu, wa yoovoin yoo" bang: nghoid ago".

²⁷Kohad akung: gi Amram- Izhara- Hebron- Uziela yhoemkhung: joem ri de: too" byid: da" akung: nghoid.

²⁸Myeing kaid to" da" lhammoo" dakhyab byeung" bye: bang: yo' hau: tho' je gyi: da" yuggi dangain" gi 8,600 yug nghoid.

²⁹He: akung: gi byumyu" vhujhung: nghoid da" Uziela da" nya: yuggi zoo: Elizaphan yo' dage" zoem" da" mougpyi: shoid moo dab koid wa zi nghoid.

³⁰

³¹Nyangnu" gi Dang: Theing Kuid:- Zoobui"- Myikug zeing- Phoin: joem Gyeung" shang: joyoo moo khainjung phoo ci: wa da" oug" khu lang: bain yo' gyeung" shang: thang da" yab khoem" duang: shid re" yabkyo' pain" ruang: joem ri zoem: wa moo" yoo" bang: nghoid ago". Nyangnu" gi he: zi joem yo' xo' tei" to" da" moo" zoo" dangain" ri voin vu, wa yoovoin yoo" bang: nghoid ago".

³²Levi byumyu" yi da" vhujhung: gi khainjung phoo Arun da" yuggi zoo: Eleaza nghoid da:. Nyang: gi hau: gyeung" shang: joyoo moo voin vu, ca" da" moo" ri zei: nyid da" bang: ri gung" su: nghoid.

³³Marari akung: gi Mali yo' Mushi yhoemkhung: eig loem: ri de: too" bye: da" akung: nghoid.

³⁴Myeing kaid to" da" lhammoo" dakhyab byeung" bye: bang: yo' hau: tho' je gyi: da" yuggi dangain" gi 6,200 yug nghoid.

³⁵He: akung: gi byumyu" vhujhung: nghoid da" Abihila da" nya: yuggi zoo: Zurela yo' dage" zoem" da" mougzhung: shoid moo: dab koid wa zi nghoid.

³⁶Nyangnu" gi zoem" seig pyi" joem keing: pyi: joem zeing joem zeing khyid: joem yo' zhug da" moo" dangain" ziri voin vu, wa shid re" yoovoin yoo" bang: nghoid ago". Nyangnu" gi he: zi joem yo' xo' tei" to" da" moo" zoo" dangain" ri voin vu, wa da" yoovoin yoo" bang: nghoid da:.

³⁷Nyangnu" gi zeing joem zeing khyid: joem dung" zeing joem yo' tunggung shoid mo tei" joem shid re" we' yoovoin boo bang: nghoid ago".

³⁸Moshe- Arun yo' nya: yuggi zoo: yigi zoem" shidkhoin" bidthu shoid moo: dab koid wa zi nghoid. Nyangnu" gi Israela byumyu" yi shid re" gyeung" shang: joyoo moo zei: ca" da" moo" zoo" ri voin vu, wa yoovoin yoo" bang: nghoid ago". Hougsu" koid wa shid re" gootu: dayug yug soin su: hang" nghoid loug we' said pyam zi shoug" wa nghoid.

³⁹ASEING amyeing" khyo" byumyu" akung: kho' lho: lhammoo" dakhyab byeung" ziyo' hau: tho' je" gyi: da" Levi byumyu" yuggi yiri Moshe myeing koid: da" gu: dangain" gi 22,000 yug nghoid.

⁴⁰ASEING gi Moshe ri «Israela byumyu" yi da" yuggi zoo: zooshid" gi nga" shid re" nghoid da:. Hougsu" yoomo lhammoo" dakhyab byeung" bye: ziyo' hau: tho' je gyi: da" yuggi zoo: zooshid" yugkhang" moo" ri myeing yo' toeb toeb koid: too" we'. Nghoid loug we' houg bang: da" joyoo moo: Levi byumyu" dangain" ri nga" byumyu" khyo" ngoo mho' yu wa. Ngoo gi ASEING nghoid. Ngoo gi Levi byumyu" yi da" gougnyhoug joem ri we' gougnyhoug dangain" mo xang: shi" xang" da" gougnyhoug gungthid ngoo mho' yu wa zi nghoid» ga: tid.

⁴¹

⁴²Moshe gi dang: tam" gyo: wigi lhammoo" dakhyab byeung" bye: bang: yo' hau: tho' je gyi: da" zooshid" yuggi zoo: dangain" ri zhayhen" koid: yu ri 22,273 yug nghoid.

⁴³

⁴⁴ASEING gi Moshe ri

⁴⁵«Akhid"- Levi byumyu" yiri Israela byumyu" zooshid" dangain" bang: da" gungthid nga" re" nghoid khyo" shugbyid: ge'. Houg: lho: Israela byu yi gougnyhoug mo xang: shi" xang" da" gougnyhoug gungthid nga" re" nghoid khyo" Levi byu yi da" gougnyhoug ngoo ri shugbyid: we' ga: tid.

⁴⁶Israela byumyu" zooshid" yuggi zoo: yigi Levi byu yi tho' 273 yug jain" jo, yoomo nang gi hau: jain" jo, da" yuggi zoo: yiri doem tau" qei yu ca" da:.

⁴⁷Tarha" vang da" azhang ri cang lho: yugdu: ngab ri ngei wim: pyi" yo' qei yu wigi

⁴⁸Hau: ngei joem ri Arun yo' nya: zoo: yiri byid: we'» ga: tid.

⁴⁹Moshe gi dang: tam" gyo: wigi

⁵⁰ngei 1,365 pyi" yu lho:

⁵¹hau: joem ri Arun yo' nya: zoo: yiri byid: bye:.