Read Lashi GYUNG: SOO" 30 Bible Online

GYUNG: SOO" 30 - Lashi bible

GYUNG: SOO" 30

¹Moshe gi Israela byu kung: yi da" vhujhung: yiri vhoo: moo bo ziyo' dakhyoo" ti" tid shed byid: bye:.

²Yuggi dayug gi ASEING ri daja: ja: byid: wa ga: dang: theing too" nghoid nghoid daja: ja: ri khyen" loo: wa ga: jham' tang: nghoid nghoid nya: dangsoo" ri ayo" phyo' pyam wa. Nyang: tid to" da" ja: khang" moo" ri koid ca" da:.

³Myiyi: zoo: dayug gi nya: pho yhoem: moo: nyid shi" uri ASEING ri daja: ja: byid: wa ga: dang: theing too" nghoid nghoid daja: ja: ri khyen" loo: wa ga: dangsoo" byid: nghoid nghoid

⁴hau: ziri nya: phoo shau" gyo: lho: za: angeug toem' pyam rigi nyang: to" da" dang: theing anghoid lang" dangsoo" ja: khang" moo" ri koid ca" da:.

⁵Nghoid loug we' nya: phoo hau: ziri shau" gyo: wigi hau: dang: theing ri pyeing wa ziri nya: phoo ngeug pyam nghoid rigi nyang: gi hau: ziri acang pyeing ca" wa nghoid. Nyang: hau: ziri koid wa jang" mo nya: phoo datoem' pyam byid: yoomo ASEING gi: nyang: ri yooboo khyoid byid: loo wa.

⁶Yhoem: ayoo" shi" myiyi: myhi' dayug gi dang: theing daja: ja: anghoid lang" daja: ja: ri khyen" loo: wa ga: dangsoo" to" ziri pa: yhi: nghoid nghoid azid" wigi nghoid nghoid to" to" lho: yhoem: yo" lo" nghoid rigi

⁷hau: ziri nya: yhoem: seing: phoo shau" gyo: lho: za: angeug toem' pyam rigi nyang: to" da" dang: theing yo' dangsoo" ja: khang" moo" ri koid pyeing ca" da:.

⁸Nghoid loug we' nya: yhoem: seing: phoo hau: ziri shau" gyo: wigi hau: dang: theing ri pyeing wa ziri nya: yhoem: seing: phoo toem' pyam nghoid rigi nyang: gi hau: ziri acang pyeing ca" wa nghoid. ASEING gi nyang: ri yooboo khyoid byid: wa.

⁹Cougmoo" myhi anghoid lang" yuggi yo' gang: lho: nyid da" myiyi: myhi' gi nyang: koid to" da" dang: theing yo' daja: ja: ri khyen" loo: wa ga: da" dangsoo" ja: khang" moo" ri koid ca" da:.

¹⁰Yhoem: yoo" bye: da" myiyi: dayug gi dang: theing nghoid nghoid daja: ja: ri khyen" loo: wa ga: dangsoo" nghoid nghoid byid: to" nghoid rigi

¹¹hau: ziri nya: yhoem: seing: phoo shau" gyo: wigi atoem' pyam rigi nyang: koid to" da" dang: theing anghoid lang" dangsoo" ja: khang" moo" ri koid pyeing ca" da:.

¹²Nghoid loug we' nya: yhoem: seing: phoo hau: ziri shau" gyo: wigi hau: dang: theing ri pyeing wa ziri nya: yhoem: seing: phoo toem pyam nghoid rigi nyang: gi hau: ziri acang pyeing ca" wa nghoid. Nyang: dang: theing koid to" jang" mo nya: yhoem: seing: phoo datoem' pyam byid: yoomo ASEING gi nyang: ri yooboo khyoid byid: wa.

¹³Nya: yhoem: seing: phoo gi nyang: koid to" da" dang: theing anghoid lang" dangsoo" ciri we' geing: nhang: wa ziyo' phyo' pyam wa akhang" yo" da:.

¹⁴Nghoid loug we' nya: yhoem: seing: phoo shau" gyo: thang: danyid" ju" sho' ci: angeug toem' pyam nghoid rigi nyang: koid to" da" dang: theing anghoid lang" dangsoo" ja: khang" moo" ri koid ca" da:. Nyang: gi hau: ziri shau" gyo: da" bidnyid ri angeug pyam byid: da" khyo" hau: ziri geing: nhang: bye:.

¹⁵Nghoid loug we' yhoem: seing: phoo gi thang: ri dang: theing ri phyo' pyam nghoid ri bue" lo da" akyu" nyang: loem zoo: ca" wa nghoid. Ciwim gari: nyang: gi dang: theing ri ayo" cang pyeing nghoid da:.

¹⁶He: zigi yhoem: ayoo" shi" za: nya: pho yhoem: moo: nyid da" myiyi: myhi' dayug anghoid lang" yhoem: yoo" bye: da" myiyi: myhi' dayug ASEING ri byid: dang: theing yo' sen: wigi ASEING wigi Moshe ri byid: to" da" tarha" joem nghoid.