Read Lashi GYUNG: SOO" 31 Bible Online

GYUNG: SOO" 31 - Lashi bible

GYUNG: SOO" 31

²«Israela byumyu" yiri Midian byumyu" yi koid lid lo" da" moo" zoo" yoomo nyangnu" ri yooboo dam byid: we'. Hau: zi bain koid thang: nang shid: wa zi nghoid» ga: tid.

³Houg: yoomo Moshe gi byumyu" yiri «ASEING ri Midian koid lid lo da" khyoo: yoomo nyangnu" ri nanu" khaid zain: lho: nyangnu" ri yooboo dam yo" dab wa shid re" meing: zain: wa jen" jen" soin' we'.

⁴Israela byu kung: khang" moo" mo yuggi dakhyeing" khyeing" meing: zain: jang: khyoo: nhang: kaid ge'» ga: tid.

⁵Houg: yoomo byu kung: khang" moo" mo yuggi dakhyeing" khyeing" khyen: wigi byu damoin eig khyeing" bang: dangain" gi meing: zain: wa jen" jen" soin' nyid bye:.

⁶Moshe gi nyangnu" ri zei joem younglho' jonu" yo' asoo" ci: shug da" laboo" joem ri yu" coung: nyid da" khainjung Eleaza da" nya: yuggi zoo: Phineha da" vhoebkhang" akhoug: moo: meing: zain: jang: khyoo: nhang: kaid.

⁷Nyangnu" gi ASEING wigi Moshe ri amyeing" byid: too" bye: ziyo' dakhyo" Midian byu yiri khaid zain: lho: yuggi joem dangain" ri said pyam ago".

⁸Houg bang: moo: Midian khokham wim: yug nghoid da" Evi- Rekem- Zura- Hura yo' Reba bang: bo da:. Nyangnu" gi Beora da" nya: yuggi zoo: Balam ri we' bo said pyam boem ago".

⁹Israela byumyu" yigi Midian myiyi: yi yo' zooshang: yiri myheig yu lho: nyangnu" nu: kyung yang yo' coidbaid kyung joem ri she: yu ziyo' nyangnu" ziyoo joem dangain" ri lhoid yu ago".

¹⁰Nyangnu" da" voomoo" joem yo' dab joem dangain" ri nghe' pyam boem ago".

¹¹Nyangnu" gi thung: byu yi yo' gougnyhoug joem we' wigi nyangnu" shoug" myheig yu bye: da" lanyhoeb zi dangain" ci: lo ago".

¹²Houg: lho: nyangnu" gi hau: gu: ri Moshe yo' Eleaza we' wigi Yerikho mo Yodan gyid lang thei: tab Moba janggyoin: moo: dab koid lho: nyid boem da" Israela byumyu" shava phung: khyoo: shu" lo" boem bye:.

¹³Moshe- Eleaza yo' shava byu phung: yi da" gootu: vhujhung: dangain" gi gyiphung: ri tau yu wa shid re" dab mo to' yhe: lo" ago".

¹⁴Moshe gi meing: zain: jang: mo doem tau" lo da" gyi moo" voin bang:- gyidab ri vhoeb da" gyizoug: yi yo' gyi phung ri nheig yo: da:.

¹⁵Nyang: gi nyangnu" ri «Nanu" ciwim wigi myiyi: dangain" ri adei nyhid: too" go" lha".

¹⁶Hau: myiyi: yigi Balam da" jhau" shid khyoo: ri cang lho: Peora mo byumyu" yiri ASEING moo: aloem jeing" sho' vhu" she: lo ziri myid boin: ge'. Hau: zigi ASEING byumyu" yi atho' moo: noo phyoo" yu lo zi nghoid.

¹⁷Houg: yoomo gung shoo" zoem" da" yuggi zoo: yugkhang" moo" yo' myiyi: zoo: yugkhang" moo" ri akhid" nyang: said pyam ge'.

¹⁸Nghoid loug we' gung shoo" azoem" shi" da" myiyi: yi yo' zoomyi: gyeing" myiyi: yiri nanu" nya: shid re" teing too" ge'.

¹⁹Akhid" byu dayug yug ri said mo, yo' byu shid: gung moo zang" tain" mo, dangain" gi dab nghi: moo: nyhed nyid" nyid ca" da:. Soem" nyid" ein: nyid" yo' nyhed nyid" ein: nyid" moo: nanu" nyang: yo' nanu" shoug" myheig da" myiyi: yigi kyeing sain khyoo: koid ge'.

²⁰Nanu" gi byimi khyi khang" moo" yo' shooyid- coidbaid mau" anghoid lang" seig yo' koid to" da" ja: khang" moo" ri we' kyeing sain khyoo: koid ca" da» ga: tid.

²¹Khainjung Eleaza gi meing: zain: pa: mo doem tau" lo da" bang: ri «He: zigi Moshe ri ASEING byid: to" da" tarha" joem nghoid da:.

²²Sheing:- ngei- gyid: mid"- joto'- to' phyu:- xuid:- yhang: te" myi: anghe" da" zi ja: khang" moo" ri myi: khyo" lid nhang: wigi kyeing sain khyoo: koid pyam ca" wa. Gootu: rigi gyid yo' kyeing sain pyam byid: ca" wa zi nghoid.

²³

²⁴Nyhed nyid" ju" lang" nanu" da" byimi joem ri cid" pyam ca" wa. Hau: thang: nanu" gi thung" ri: khyo" kyeing sain pyam lho: dab khoug: khyoo: vang yhi: wa akhang" yoo" goo" wa» ga: tid.

²⁵ASEING Moshe ri -

²⁶«Nang yo' Eleaza gi shava byu yi da" gootu: vhujhung: yi yo' dage" thung: byu yi yo' goug nyhoug joem we' wigi shoug" myheig yu da" ja: khang" moo" ri nghab we'.

²⁷Shau" yu da" gu: ja: khang" moo" ri eig boem dago" yi" kho' wigi daboem ri gyizoo: yi shid re" gootu: daboem ri: deing da" shava byu yi shid re" kho' byid: we'.

²⁸Gyizoo: yi seing: da" boem mo thung: byu wim: shoo: yug mo dayug yo' nu:- loo zei:- yang yo' coidbaid joem ri we' houg: yo' dakhyo" kho' yu wigi ASEING shid re" kheing" kho' yu too" we'.

²⁹Hau: gu: ri ASEING shid re" gooki lid jhungshug khyo" khainjung Eleaza ri byid: we'.

³⁰Deing da" shava byu phung: yiri gam byid: da" boem mo thung: byu wim: xi yug mo dayug yo' nu:- loo zei:- yang yo' coidbaid joem ri we' houg: yo' dakhyo" kho' yu we'. Hau: gu: ri ASEING da" zoem" ri lhoug da" Levi bang: ri byid: ge'» ga: tid.

³¹Moshe yo Eleaza gi ASEING amyeing" byid: to" ziri koid bye:.

³²Vhoo: mo zhayhen" gi gyizoo: yi shoug" myheug yu da" zi tho' agoo" nyangnu" shid re" gam yu da" gu: joem nghoid da" yang yo' coidbaid 675,000 du: nu: 72,000 du: loo zei: 61,000 du: yo' zoomyi: gyeing" 32,000 yug nghoid ago".

³³

³⁴

³⁵

³⁶Gyizoo: yi shid re" agung dayi" gam byid: da" gamboem gi: yang yo' coidbaid 337,500 du:. Hau: gu: mo 675 du: gi ASEING shid re" kheing" nghoid da:. Gyizoo: yi shid re" nu: 36,000 du:. Hau: gu: mo 72 du: gi ASEING shid re" kheing" nghoid da:. Gyizoo: yi shid re" loo zei: 30,500 du:. Hau: gu: mo 61 du: gi ASEING shid re" kheing" nghoid da:. Gyizoo: shid re" zoomyi: gyeing" 16000 yug. Hau: mo 32 yug gi ASEING shid re" kheing" nghoid da:.

³⁷

³⁸

³⁹

⁴⁰

⁴¹Houg: yoomo ASEING amyeing" byid: to" da" ziyo' dayhang: ti" ASEING ri gooki lid jhungshug khyo" hau: kheing" ri Moshe gi Eleaza ri byid: bye:.

⁴²Shava byu yi da" gamboem ri we' gyizoo: yi da" gamboem yo' dayhang: ti" koid bye:. yang yo' coidbaid 337,500 du:. Nu: 36,000 du:. loo zei: 30500 du: yo' zoomyi: gyeing" 16000 yug nghoid ago".

⁴³

⁴⁴

⁴⁵

⁴⁶

⁴⁷Moshe gi hau: gamboem mo thung byu 50 yug mo dayug yug yo' gougnyhoug 50 du: mo dadu: du: ri yu wigi ASEING amyeing" byid to" ziyo' dayhang: ti" ASEING da" Zoem" lhoug da" Levi yiri byid: pyam bye:.

⁴⁸Hau: thang: gyiphung: ri vhoeb da" zoug: yi gi Moshe jhang yhe: lho:

⁴⁹Khyang" shed zigi ludaid phoo we" ngoonu" vhoo: mo gyizoo: yiri lo nghab yu" ri dayug we' abyug nghoid ago".

⁵⁰Houg: yoomo ngoonu" gi ngoonu" shoug" yu lo da" sheing: zi joem theing" joem lo, theing" joem lo, pain" joem nuxei" joem yo' yi: joem ri ci: lo boem bye:. Ngoonu" ri ASEING wigi lhoug zung" byid: wa shid re" ngoonu" da" kangso' aphoug" khyo" hau: ziri nyang: ri ngei" bye: da» ga: tid ago".

⁵¹Moshe yo' Eleaza gi sheing: dangain" ri sheing: zi khyo" khab yu to" ago".

⁵²Moo" voin zoug: yi byid: da" jhungshug dangain" gi dashoo: daxi: joid: jain" nghoid da:.

⁵³Moo" voin zoug: yi anghoid da" bang: gi nyangnu" shoug" lhoid yu da" lanyhoeb joem ri seing: yu boem ago".

⁵⁴Houg: lho: Moshe yo' Eleaza gi Israela byumyu" yiri ASEING wigi lhoug zung" byid: wa shid re" sheing: ri Zoem" khyoo: ci: yhe: ago".