Read Lashi GYUNG: SOO" 34 Bible Online

GYUNG: SOO" 34 - Lashi bible

GYUNG: SOO" 34

¹ASEING gi Moshe ri

²Israela byumyu" yi shid re" vhoo: mo jhau" shid dang joem ri byid: da:. «Ngo wigi nanu" ri byid: da" Khanan mung" khyoo: nanu" vang yhe: lo" uri nanu" da" mougmyid mo mougkyoo" joem gi vhoo: mo ziyo' dakhyo" nghoid wa.

³Mougpyi: shoid mo mougkyoo" gi Zin dain" pyoid yoo mo zi Edom mougkyoo" ju" sho' ce" loo" wa zi nghoid. Hau: zigi bidthu shoid thoem" shid: mougpyi: mo shid" wa zi nghoid.

⁴Houg: mo mougpyi: shoid khyoo: Akarabim koolhang khyo" lid lo" wigi Zin khyo" xo' lid lo" zi mougpyi: shoid Kadesha Berea ju" sho' nghoid da:. Houg: mo bidvang mougzhung: shoid Hazara Adara yo' Azmon ju" sho' nghoid wa.

⁵Houg: zigi Meing: gung panglai: thang: yo' Egutu mung" mougkyoo" janggyoin: ju" sho' nghoid.

⁶Bidvang shoid mougkyoo" gi Meing: gung panglai: nghoid.

⁷Mougzhung: shoid mougkyoo" gi Meing: gung panglai: yam khyo" cang do, lo" zi Hora boem ju" sho'

⁸hau: joyoo mo zi Hamad koolhang ju" sho'. Houg: mo zi Zedad

⁹Zephran ju" lo" wigi Hazara Enan moo: lo" thang wa zi nghoid.

¹⁰Bid thu shoid mo mougkyoo" gi Hazara Enan mo Shepham ju" sho' nghoid wa.

¹¹Hau: zigi mougpyi: shoid Ain da" bidthu shoid Habela ju" sho' yo' Galile thoem" bidthu shoid bouggung joem ju" sho

¹²Houg: mo mougpyi: shoid khyoo: Yodan gyid lang cang wigi Thoem" shid: ju" sho' nghoid wa. He: zigi nanu" mung" da" myid: shoid goin" mo mougkyoo" joem nghoid»

¹³Houg: yoomo Moshe gi Israela byumyu" yiri «He: zigi nanu" gamboem kho' lho: gam yu wa da" mougmyid nghoid. ASEING wigi byumyu" gau kung: dakhyam" ri gam byid: to" da" mougmyid nghoid.

¹⁴Ruben- Gad yo' bidthu shoid mo Manashe kung: agung dago" yi" gi nyangnu" gamboem ri nyangnu" da" yhoemkhung: khyo"

¹⁵Yerikho thei: tab Yodan gyid lang bid thu' shoid tab moo: shoug" seing: yu abye: go"»

¹⁶ASEING gi Moshe ri

¹⁷«Khainjung Eleaza yo' Nun da" nya: yuggi zoo: Yoshu gi byumyu" yiri hau: mougmyid ri gam byid: wa.

¹⁸Mougmyid kho' uri nya: tang: ri pang" thoug wa shid re" byumyu" kung: khang" moo" mo vhujhung: dayug yug ri we' shu" yu we'» ga: tid.

¹⁹Hid: bang: gi ASEING khyen: to" da" bang: nghoid. [Akung:] — [Vhujhung:] Yuda — Yephune da" yuggi zoo: Khaleb. Simun — Amihuda da" yuggi zoo: Shelumila Benyamin — Khinslora da" yuggi zoo: Elida Dan — Yogli da" yuggi zoo: Bukki Manashe — Ephod da" yuggi zoo: Haniela Ephrim — Shiphtan da" yuggi zoo: Kemuela Zebulun — Parnag da" yuggi zoo: Elizaphan Ishakha — Azzan da" yuggi zoo: Paltiela Ashe — Shelomi da" yuggi zoo: Ahihuda Napthali — Amihuda da" yuggi zoo: Pedahela

²⁹Hid: bang: gi Khanan mung" moo: Israela byumyu" yi shid re" agyid aso moug: kho' gam wa ASEING wigi moo" foin: too" shoug" bang: nghoid ago".