Read Lashi GYUNG: SOO" 35 Bible Online

GYUNG: SOO" 35 - Lashi bible

GYUNG: SOO" 35

¹Yerikho mo zi Yodan gyid lang gu: dab da" Moba jang: pa: moo ASEING wigi Moshe ri

²«Nyangnu" shau" yu da" moug: mo voomoo" dayham" ri Levi byumyu" yi nyid wa shid re" byid: ca" da" khyoo: ri Israela byumyu" yiri tid kyoo" we'.

³Hau: voomoo" joem gi Levi byumyu" yi seing: da" voo nghoid wigi nyangnu" hougmoo: nyid wa zi nghoid. Mhain" yoo joem gi nyangnu" da" nu: kyung joem yo' nyangnu" da" gootu: gougnyhoug dangain" shid re" nghoid wa.

⁴Mhain" yoo gi voomoo" vang khyam: mo zi shoid khang" moo" khyoo: wim: shoo: gaid gaid jhen" yu wa.

⁵Voomoo" ri agung moo: to" wigi shoid khang" moo" moo: dakhyeing" gaid lheing khab too" wa zi nghoid.

⁶Byu dayug gi gootu: dayug ri asoo" lho: zang" said nghoid rigi nyang: yo" phang: goug" nyid da" voomoo" khyug voo nang gi Levi byumyu" yiri byid: wa zi nghoid.

⁷Hau: tho' agoo" dangain" myid: xe: shed voo nghoid wa khyo" mhain" yoo bo da" voomoo" myid: xe: eig voo ri we' byid: we'.

⁸Byumyu" kung: khang" moo" moo: Levi voomoo" joem khanhoo' too" wa ein: zigi mougmyid khayhi' nghoid ein: jang" mo cang wigi myid phyed byid: wa zi nghoid» ga: tid.

⁹ASEING gi Moshe ri

¹⁰Israela byumyu" yiri tid kyoo" wa shid re" «Nanu" Yodan gyid lang ri gu: dab wigi Khanan mung" khyoo: vang lo" uri

¹¹byu dayug yug ri pa: yhi: anghoid loo za: zang" said nghoid ri hau: yug yo" phang: goug" nyid wa da" phang: goug" nyid wa voomoo" joem ri nanu" khyen: yu goo" wa zi nghoid.

¹²Hougmoo: nyang: gi latoo: phug nau da" hau: shid: yug da" bidnoem lo, mo goem loem nyid wa zi nghoid. Byu said yooboo zhug da" yug ri shava byu shidkhoin" moo: ajoeb yu" loo: za: age said pyam nghoid da:.

¹³Voomoo" khyug voo ri khyen: ge'.

¹⁴Yodan gyid lang bidthu shoid moo: soem" voo yo' Khanan mung" moo: soem" voo nghoid wa.

¹⁵Hau: voomoo" joem gi Israela byumyu" yi yo' daso' dadam anghoid lang" yhoem: yang yoo yang yo' nyid da" tungbau byumyu" yi shid re" phang: goug" nyid wa da" voomoo" joem bue" loo wa. Dayug yug ri pa: yhi: akoid loo: za: zang" said pyam su: hang" nghoid loug we' hau: voomoo" joem mo davoo voo moo: yhe: yo" phang: loid nyid.

¹⁶Nghoid loug we' joto'- lugboem- thung" keing:- gyi jonu" ci: wigi byu dayug yug ri said da" yug gi byu said yooboo shau" da" yug nghoid lho: nyang: ri said pyam ca" da:.

¹⁹Shid: su: da" jhang thang bidnoem seing: gi byu said yug ri said wa yoovoin boo su: nghoid da:. Nyang: gi hau: yug ri myang lang" said pyam wa zi nghoid.

²⁰Byu dayug gi dayug yug ri ngheing" wigi doin: phyed khyo' khyo" anghoid lang" daja: ja: wigi du" khyo"

²¹anghoid lang" nya: lo, zhoeb yo' thung" khyo" nyang: ri said pyam nghoid rigi hau: yug gi byu said yooboo yo" ziyo' said pyam shoug" wa zi nghoid. Shid: su: da" jhang thang bidnoem seing: gi byu said yug ri said wa yoovoin boo su: nghoid da:. Nyang: gi hau: yug ri myang lang" said pyam wa zi nghoid.

²²Nghoid loug we' byu dayug gi nyang: angheing" da" byu dayug yug ri pa: yhi: akoid loo za: nyang: ri doin: phyed khyo' khyo" anghoid lang" daja: ja: wigi du" khyo" nghoid ri nghoid

²³anghoid lang" nyang: wigi dam atab nau yug yo' nya: gyivoo anghoid da" byu dayug yug ri ayu" loo: lugzeing du" kaid khyo" zang" said eung: shang

²⁴he: moo" zoo" moo shava byu yigi latoo: phug wa sho: nyid yug hau: shid: su: da" bidnoem shoid khyo" abo dab loo: za: byu said yug shoid khyo" dab wigi dang: phyed wa zi nghoid ago".

²⁵Shava phung: gi hau: byu said yooboo shau" da" yug ri hau: shid: yug da bidnoem pho lo, mo khyoid yu wa zi nghoid. Houg: lho: nyang: phang: loid nyid da" phang: goug" nyid wa voomoo" khyoo: nyangnu" gi nyang: ri doem de" kaid wa zi nghoid. Nyang: gi hau: voomoo" moo: hau: ayo, ri koid nyid da" khainjung moo" shid: da" ayo, ju" sho' nyid wa zi nghoid.

²⁶Hau: byu said yooboo shau" da" su: gi phang: goug" nyid da" voomoo" mo thu' lo" wigi

²⁷hau: shid: yug da" bidnoem phoo wigi shau" myang lho: nyang: ri said pyam nghoid rigi he: latoo: phug da" moo" gi byu said zi anghoid nghoid da:.

²⁸Byu said yooboo shau" da" yug gi hau: phang: goug" nyid wa voomoo" moo: khainjung moo" shid: da" ayo, ju" sho' nyid ca" zi nghoid. Nghoid loug we' hau: thang: rigi nyang: yhoem: khyoo: yo" tau" lo" da:.

²⁹He: tarha" joem gi nanu" yo' nanu" amyed ashen yi khamoo: nyid nyid cang ca" wa zi nghoid.

³⁰Byu said ga: yooboo zhug da" su: yooboo shoug" bye: ziri myang lang" sagse: eig yug yo' hau: tho' je myo: da" sagse: atho' moo: nghe: wigi za: ge said da:. Nghoid loug we' nyang: ri sagse: dayug da" dang: yo' za: gi ayo" said pyam nghoid da:.

³¹Byu said yug rigi said pyam ca" da:. Nyang: gi he: yooboo dam mo ngei byid: wigi age loid nghoid da:.

³²Byu dayug phang: goug" nyid wa voomoo" khyoo: phang: yhe: nghoid rigi khainjung moo" ashid: shi" ri yhoem: khyoo: doem tau" loo: wa shid re" aphoug" byid: wa akhang" ayoo" nghoid da:.

³³Nanu" hid: su" koid nghoid rigi nanu" gi nanu" nyid da" mungdain: ri aco' ajhoid bui" nhang: da:. Byu said zigi mungdain: ri aco' ajhoid bui" nhang: da:. Byu said yug shid: da" khyo" za: angoid rigi byu said da" mougmyid joyoo shid re" laloem lakhoug: thung" khyo" kyeing sain' pyam khyoo: koid wa gootu: ajo, nghoid da:.

³⁴Nanu" nyid nyid da" mungdain: moo: aco' ajhoid age koid ciwim gari: ngoo gi ASEING nghoid wigi Israela byu phung: gung moo ngoo nyid» ga: tid.