Read Lashi GYUNG: SOO" 4 Bible Online

GYUNG: SOO" 4 - Lashi bible

GYUNG: SOO" 4

¹ASEING gi Moshe ri

²«Levi byumyu" Kohad kung: ri akung: ngi joem yo' yhoemkhung: joem ri kho' wigi zhayhen" koid: yu lho:

³ASEING da" Zoem" shidkhoin" moo moo" zei: ge" da" apyaid soem" xi: zain yo' wim: xi: zain agyoo: mo yuggi dangain" ri myeing koid: yu we'.

⁴Nyangnu" dei byid: wa moo" moo gyeung" shang: thang da" moo" bo nyid da» ga: tid.

⁵ASEING gi Moshe ri vhoo: moo: pyeing: to" da" gu: ri byid: da:. Dab ri phyo' yu wa da" ayo, ju" lang" Arun yo' nya: yuggi zoo: yigi Zoem" khyoo: vang yhe: wigi Dang: Theing Kuid: shidkhoin" mo yabkyo' pain" ruang: ri yu khyo' wigi hau: ziyo' Kuid: ri nghoeb wa nghoid.

⁶Nyangnu" gi hau: atho' moo: shooyid yo' nghoeb wigi adang moo: mougnyoug pain" cu nghoeb lho: hau: thang: dang wa da" keing: youg: joem jhui: zei wa zi nghoid.

⁷Nyangnu" gi ASEING ri shugbyid: to" da" zooyho' zoobui" dang moo: mougnyoug pain" myu" wigi hau: adang moo: bain khu joem shoem: nam pyo: ja: kaid to" da" jarung: joem xoin" to' jarung: joem yo' zabyid yhid: xoin" ngei" wa shid re" jhuang: joem ri too" wa zi nghoid. Hau: zoobui" tho' moo: zooyho' khanham we' to" too" wa zi nghoid.

⁸Nyangnu" gi he: gu: dangain" jang" moo: pain" ni yo' nghoeb lho: hau: adang moo: shooyid gi yo' nghoeb wigi dang wa shid re" keing: youg: joem ri jhui: zei wa zi nghoid ago".

⁹Nyangnu" gi mougnyoug pain" ri yu wigi myikug zeing- myikug joem nyab zi" joem phain joem yo' zhainloin: xu: kaid da" jonu" joem dangain" atho' moo: nghoeb wa zi nghoid.

¹⁰Nyangnu" gi hau: ziri deing: wigi hau: zi joem dangain" ri shooyid gi yo' thoeb lho: dang wa da" azuang moo: kaid wa zi nghoid.

¹¹Hau: thang: nyangnu" gi sheing: phoin: tho' moo: mougnyoug pain" nghoeb wigi hau: adang moo: shooyid gi yo' thoeb lho: dang wa keing: youg: joem jhui: zei wa zi nghoid.

¹²Nyangnu" gi gyeung" shang: da" joyoo moo ci: da" oug" khu lang: bain dangain" yu wigi hau: joem ri mougnyoug pain" yo' thoeb- shooyid gi yo' nghoeb lho: hau: joem ri dang wa da" azuang moo: kaid wa zi nghoid.

¹³Nyangnu" gi phoin: mo myiyab ri yu pyam wigi hau: atho' moo: khalham" void pain" yo' nghoeb wa zi nghoid.

¹⁴Nyangnu" gi phoin: moo: moo" zei: uri ci: da" zi joem nghoid da" myioug"- langhui"- cabbang" joem jarung: joem dangain" ziri hau: adang moo ki" wa zi nghoid. Hau: thang: nyangnu" gi hau: adang moo: shooyid gi yo' nghoeb wigi dang wa da" keing: youg: joem ri jhui: too" wa zi nghoid.

¹⁵Dab phyo' yo, ju" lang" Arun yo' nya: zoo: yigi hau: joem ri yo' nyangnu" jonu" joem dangain" ri bain nghoeb pyam thang: ri Kohad byumyu" kung: gi re" wigi hau: gyeung" shang: zi joem ri vu, wa zi nghoid. Kohad byumyu" kung: mo bang: gi hau: younglho' zi joem ri age tain" nghoid agoo". Tain" lang" nyangnu" shid: boem wa zi nghoid. He: joem gi zoem" shu" khang" moo" Kohad byumyu" kung: yi koid wa da" yoovoin joem nghoid da:.

¹⁶Khainjung Arun da" yuggi zoo: Eleaza gi Zoem" goin" shid re" yoovoin yoo" su: nghoid. Hau: joem gi myikug shid re" shooxu:- nam pyo: ja:- shivoo: shiloem xoin" joem main" kaid xu: yo' Zoem" moo ASEING ri shugbyid: to" da" gootu: ja: khang" moo" shid re" yoovoin yoo" su: nghoid ri" wa.

¹⁷ASEING gi Moshe yo' Arun ri

¹⁸«Kohad byumyu" kung: mo bang: ri hau: younglho' thang da" zi joem khyoo: tab yhe: da" khyo" wigi said pyam zi ashoug" nhang: goo". Hougsu" bui" wa jang" mo goo byid: wa shid re" Arun yo' nya: yuggi zoo: yigi hau: zoem" khoug: khyoo: vang yhe: wigi yugkhang" moo" ri nyang: nya: moo" ri kho' byid: lho: khasu" dang wa ein: ziri nyang: ri tid kyoo" goo" wa zi nghoid.

²⁰Nghoid loug we' Kohad byumyu" kung: yi Zoem" khyoo: vang yhe: wigi khainjung yi hau: younglho' zi joem ri shu" wa shid re" moo" kho' nyid ziri yhe: yu" nghoid rigi nyangnu" shid: zi shoug" wa nghoid» ga: tid.

²¹ASEING gi Moshe ri

²²Levi byumyu" Gershon kung: mo mo, ri byumyu" kung: ngi yo' yhoemkhung: joem ri byu zhayhen" koid: yu lho:

²³ASEING da" zoem" shidkhoin" moo moo" yo" voin wa da" apyaid soem" xi: yo' wim: xi: agyoo: mo yuggi dangain" bang: ri myeing koid: yu we"» ga: tid.

²⁴Nyangnu" gi vhoo: mo jonu" joem ri vu, wa yoovoin yoo" bang: nghoid wa.

²⁵Hau: joem gi Zoem"- Zoem" mo akhau: shoid anghoeb- Zoem" mo atho' shoid anghoeb- hau: adang moo nghoeb da" shooyid gi khoem" duang: mo khoem" goo pain".

²⁶Zoem" yo' phoin: lheing khab' moo yam to" da" yabkyo' pain" ruang: yo' tei" joem khyam khoem" duang: shid re" khoem" goo pain". He: zi joem ci: wigi dangain" nyeing" za: zhug wa shid re" yoovoin yoo" bang: nghoid. Nyangnu" gi he: joem shid re" ca" da" moo" dangain" ri zei wa shid re" moo" voin vu, wa nghoid.

²⁷Moshe yo' Arun gi Arun yo' nya: yuggi zoo: yi Gershon byumyu" yiri jung byid: wigi Gershon byumyu" yi koid da" moo" dangain" yo' ja: khang" moo" ri voin vu, da" moo" joem ri yu" wa zi nghoid.

²⁸He: joem gi Zoem" moo Gershon byumyu" kung: bang: voin vu, wa da" moo" nghoid da:. Nyangnu" gi khainjung Arun da" nya: yuggi zoo: Ithama wigi toin" shed da" akhoug: moo: nyid lho: hau: joem ri voin vu, wa zi nghoid.

²⁹ASEING gi Moshe ri Levi byumyu" Merari kung: mo bang: ri byumyu" kung: ngi yo' yhoemkhung: joem ri byu zhayhen" koid: yu lho:

³⁰ASEING da" Zoem" shidkhoin" moo moo" yo" voin wa da" apyaid soem" xi: yo' wim: xi: agyoo: mo yuggi dangain" bang: ri myeing koid: yu wa ga: tid.

³¹Nyangnu" gi Zoem" mo akhoem' joem keing: youg: joem zeing joem yo' akhyid: joem

³²Zoem" ri lheing khab to" da" khyam: mo zeing joem akhyid: joem dung" zeung joem yo' tei" joem yo' dage" hau: zi zhug uri ci: da" jonu" dangain" ri vu, wa yoovoin yoo" wa nghoid. Yugkhang" moo" gi nyang: nya: yoovoin ri voin yu wa shid re" yoovoin yoo" wa nghoid.

³³He: joem gi Zoem" khoug: moo: voin vu, wa shid re" Merari kung: bang: da" yoovoin nghoid da:. Nyangnu" gi hau: joem ri khainjung Arun da" yuggi zoo: Ithama wigi toin" shed da" vhoo: moo nyid wigi voin vu, wa zi nghoid.

³⁴ASEING da" amyeing" dang: ri cang wigi Moshe- Arun yo' shava phung: mo vhujhung: yigi Levi byumyu" kung: yi nghoid da" Kohad- Gershon- Merari soem" kung: mo byu zhayhen" ri koid: yu bye:. Nyangnu" gi he: ziri vhoo: moo: lhid" to" ziyo' dakhyo" byumyu" kung: ngi yo' yhoemkhung: joem mo byu zhayhen" koid: lho: ASEING da" Zoem" moo moo" yo" voin wa da" apyaid soem" xi: yo' wim: xi: agyoo: mo yuggi dangain" bang: ri myeing koid: yu bye:. [Akung] — [Nghab Youg] Kohad — 2,750 Gershon — 2,630 Merari — 3,200 dangain" — 8,580

⁴⁹Yugkhang" moo" gi ASEING wigi Moshe ri amyeing" byid: to" ziyo' dakhyo" myeing koid: yu zi shau" da:. Houg: lho: yugkhang" moo" gi Moshe khyo" wigi ASEING amyeing" dang: yo' dakhyoo" nyang: nya: moo" ri voin vu, wa shid re" jung byid: zi shoug" bye: ago".