Read Lashi GYUNG: SOO" 8 Bible Online

GYUNG: SOO" 8 - Lashi bible

GYUNG: SOO" 8

¹ ASEING gi Moshe ri

²Myikug ki" zeing moo myikug nyhed loem: ri to" uri shidkhoin" khyoo: myi: bang wa shid re" nyheing too" ca" da ein: Arun ri tid we' ga: tid.

³Arun we' tid dang: tam" gyo: wigi myibung: joem ri myibung: ki" zeing shidkhoin" khyoo: myonhoo: shu: wigi to" too" bye:.

⁴Hau: myibung: ki" zeing ri ASEING wigi Moshe ri ci: shug da" alhoo: khyo" cang wigi aphyoo" mo akhyid: ju" sho' ri sheing: gi yo' baid thoeb to" da:.

⁵ASEING gi Moshe ri

⁶Levi byumyu" yiri gootu: Israela byumyu" yi jang" mo kho' yu lho: vhoo: moo: tid to" yhang: ti" nyangnu" ri kyeing sain' byid: we'.

⁷Kyeing sain' da" gyid yo' nyangnu" ri peig zhain' gyoin: we'. Houg: lho: nyangnu" gung goin" ri yed pyam nhang: we'. Nyangnu" da" byimi dangain" ri we' cid" nhang: we'. Houg: lang" nyangnu" gi thung" khyo" younglho' mo, bue" lo boem wa nghoid.

⁸Hau: thang: nyangnu" gi nuloo: nu" dadu: yo' ca" da" zhainloin: xu: yo' lheug to" cen: moin" phei" ri shivoo: xoin" khyo" yu wa zi nghoid. Houg: lho: nang gi yooboo khyoid xoin" shid re" nuloo: gootu: dadu: ri yu wa zi nghoid.

⁹Hau: thang: Israela byumyu" shava yiri zheing" yu wigi Levi byumyu" yiri nga" shidkhoin" Zoem" shid moo yab jo, nhang: we'.

¹⁰Israela byumyu" yi da" lo, joem gi Levi byumyu" yi da" vhuloem moo ki" wa zi nghoid.

¹¹Hau: thang: nyangnu" nga" moo" ri yo" zei: soo" wa shid re" Israela byumyu" yi da" gooki lid jhungshug khyo" Arun gi Levi byumyu" yiri nga" jhang shugbyid: wa zi nghoid.

¹²Houg: lang" Levi byumyu" yigi nuloo: eig du: da" vhuloem dang moo: nyangnu" lo, ri ki" wa zi nghoid. Levi byumyu" yi shid re" thung" khyo" younglho' moo" ri koid wa shid re" dadu: ri yooboo khyoid xoin" khyo" shugbyid: wigi dadu: rigi nghe' ngei" xoin" khyo" shugbyid: wa zi nghoid.

¹³Nga" shid re" gooki lid jhungshug khyo" Levi byumyu" yiri shugbyid: wigi Arun yo' nya: zoo: yiri houg: bang: da" vhujhung: koid nhang: we'.

¹⁴Atho' mo ziyo' dakhyo" Levi byumyu" yiri gootu: Israela byumyu" yi mo kho' yu we'. Houg: lang" nyangnu" gi ngoo seing: da" byumyu" bui" loo wa.

¹⁵Nang Levi byumyu" yiri kyeing sain' pyam ziyo' shugbyid: thang: ri nyangnu" gi Zoem" moo moo" ri yo" zei: lo boem goo" wa.

¹⁶Ngoo gi Israela byumyu" yi da" zooshid" yuggi zoo: dangain" da" joyoo moo: nyangnu" ri mho' yu bye:. Houg: lho: nyangnu" gi ngoo nyang: kyeing" seing: da" bang: nghoid.

¹⁷Egutu mung" moo: zooshid" yuggi zoo: dangain" ri ngoo said pyam uri Israela byumyu" yi ikoin deungkhu: khang" moo" mo zooshid" yi yo' xang: shi" xang" da" gougnyhoug du: khang" moo" ngoo seing: khyo" khyen: kho' yu bye:.

¹⁸Akhid" ngoo gi Israela byumyu" yi da" zooshid" yuggi zoo: yi gungthid Levi byumyu" yiri ngoo yu" nyid zi nghoid.

¹⁹Houg: lho: nyangnu" hau: gyeung" shang: joyoo khyoo: sung tab ri" lang" kyi" khyeug zi yo' nyangnu" ri said toem" pyam wa jang" mo Israela byumyu" yiri goem loem byid: wa yo' Israela byumyu" yi shid re" Zoem" moo moo" zei: goo" wa shid re" Israela byumyu" yi mo jhungshug khyo" ngoo gi hau: Levi byumyu" yiri Arun yo' nya: yuggi zoo: yiri moo" foin: too" bye:» ga: tid.

²⁰Houg: yoomo ASEING wigi Moshe ri amyeing" byid: ziyo' dakhyoo" Moshe- Arun yo' Israela shava byu yi dangain" gi Levi byumyu" yiri shugbyid: ago".

²¹Levi byumyu" yigi nyangnu" nya: gung ri kyeing sain' zi koid wigi nyangnu" byimi joem ri cid" ago". Hau: thang: Arun gi ASEING ri byid: da" gooki lid jhungshug khyo" nyangnu" ri shugbyid: da:. Nyang: gi nyangnu" shid re" thung" khyo" kyeing sain' khyoo: ri we' koid da:.

²²Shava byu yigi Levi byumyu" yi yo' sen: wigi ASEING wigi Moshe ri byid: to" da" amyeing" ja: khang" moo" ri koid ago". Houg: yoomo Levi byumyu" yigi Arun yo' nya: yuggi zoo: yi lo, khoug: moo: Zoem" mo moo" zei: wa ge" nyid mo, nghoid ago".

²³ASEING gi Moshe ri

²⁴Levi byumyu" yi mo yugkhang" moo" gi nga" shidkhoin" mo Zoem" moo" zei: da" nya: yoovoin ri apyaid 25 zain mo zei: shid" wigi

²⁵Nyang: gi apyaid 50 zain ri hau: moo" mo theing: wa zi nghoid.

²⁶Hau: thang: ri nyang: gi nya: Levi byumyu" byencang" yi Zoem" moo nyangnu" moo" voin vu, jang" moo yo" bo pang" wa. Nghoid loug we' nyang: nya: khyo" ce: moo" moo we' age zei: loo. He: zigi Levi byumyu" yi da" yoovoin: ri main: main: khasu" koid wa ein: da" zi nghoid.