Read Lashi MIKHA 4 Bible Online

MIKHA 4 - Lashi bible

MIKHA 4

¹Lo" thang da" bidnyid ayo, moo gi Noku Yhoem: Moo" jo, da" boem gi bouggung dangain" atho' moo myhang: thang boem nghoid wa byumyu" yi myoo" sho' bang: gi houg: khyoo: lo" boem wa zi nghoid.

²Nyangnu" da" byu yigi «Israela da" Noku Yhoem: Moo" jo, da" ASEING bouggung khyoo: nyhang" do, yhi: shang. Nyang: gi nyhang" ri koid nhang: nau da" khyoo: joem ri jhau" byid: lho: nyhang" gi nyang: khyen: byid: to" da" khyoo: moo: so" yhe: lo" boem wa zi nghoid. Khasu" wim gari ASEING da" jhau" mho' da" khyoo: gi Yerusalem mo ju" re" wigi nyang: gi nya: da" byumyu" yiri Ziun boem mo tid kaid» ga: tid go" nyid wa.

³Nyang: gi byumyu" yi da" agyoo: moo we' Moug: ve: mung" yo' jang" mo yoem: so' gyi: bang: da" agyoo: moo we' tarha" dang: phyed byid: wa zi nghoid. Nyangnu" gi nyangnu" da" shamcoin" joem ri khoin' cam" baid lho: nyangnu" da" lham: toid joem ri bainren" baid pyam goo" wa nghoid. Byumyu" yigi khanham we' meing: zain: ayhi: noo" loo wa meing: zain: go" wa shid re" we' khanham we' asoin' ca" loo: wa.

⁴Byu yugkhang" moo" gi nyang: nya: da" zabyid khyam: yo' lafoem' khyam: khoug: moo yug yo myenjham" za: yo" nyid loo" goo" wa. Nyangnu" ri kyoug: nhain wa byu aboo loo. Yoem: moo" bo da" ASEING gi he: da" dangsoo" khoin" ri byid: too" bye:.

⁵Byumyu" yi ja: khang" moo" gi nyang: nya: da" yu phara" joem ri coung" pid boem wigi tam" gyo: nyid ago". Nghoid loug we' ngoonu" koem' gi ngoonu" da" ASEING Mangsoo ri apyaid atoo: moo coung" pid lho: nya: ji dang: ri tam" gyo: nyid boem wa nghoid.

⁶ASEING tid zigi «Ngoo wigi shen" yhen to" da" nga" byumyu" yiri tungbau moug: moo dage" pyoung" nyhed: to" lho: yau: khi" phu" zo: nyid jang" mo doem shu" zheung" yu wa da" ayo, gi ju" lo nyid bye:.

⁷Nyangnu" gi khyid: yoin" wigi yhoem: moug: mo ve: gang: nyid boem nghoid loug we' nyid deing bang: mo ngo wigi aseig doem nyheing lho: nyangnu" gi gyi: sheung: da" byumyu" doem bue" loo goo" wa. Hau: ayo, mo thang: phyang" apyaid atoo: moo ju" sho' ngoo gi nyangnu" ri Ziun boem tho' moo vhoeb nyid loo wa» ga: tid.

⁸Hougsu" wigi yang zung" su: yo' dakhyoo" ti" Mangsoo gi nya: byumyu" yiri lhoug zung" nyid da" joyoo Yerusalem we"- nang gi re" khokham mung" bue" lid lo yu" bye: da" voomoo" zeing dalheing: doem bue" loo wa nghoid.

⁹Nang ciwim wigi houg: yhi' kyi: ngau nyid lha". Ciwim wigi zookhu: no nyid da" myiyi: yhang: ti" no nyid lha". Hau: zigi nang khokham ayo" ziyo' re" da" phajhi" byid: nheigboo yi shid: byug yoomo anghoid la".

¹⁰Yerusalem voobyu yi we"- zookhu: wa soin' nyid da" myiyi: myhi' yo' dakhyoo" ti" lang: yhen lho: koug ngau nyid we'. Khasu" wim gari akhid" nanu" gi voomoo" mo phang: thu lo" lho: jang: dam pa: moo nyid ca" goo" wa. Nanu" gi Babelon khyoo: yhe: loo" goo" wa nghoid. Nghoid loug we' ASEING gi nanu" ri hau: jang" mo nanu" da" gyivoo joem da" lo, mo nanu" ri khyoid shu" loo wa zi nghoid.

¹¹Byumyu" myoo" sho' mo, gi nanu" ri khaid zain: wa shid re" zeung: foem: nyid boem ago". Nyang: tid zigi Yerusalem ri phyo' shoin' pyam ca". Ngoonu" gi «He: voomoo" byo, yoin" jo, ziri myang wa» ga: tid ago".

¹²Nghoid loug we' he: byumyu" yigi ASEING da" nheigloem: moo cenoem bo ziri asi' nghoid ago". Gug shi"- Lamei shi" nang: wa shid re" vu, boem to" yhang: ti" ASEING wigi nyangnu" ri yooboo dam kaid wa shid re" dage" zheung" boem too" wa ziri nyangnu" aboin: goo" nghoid da:.

¹³ASEING tid zigi «Yerusalem voobyu yi we"- nanu" da" gyivoo yiri yooboo dam yhe: kaid ge'. Ngoo gi nanu" ri joto' khyoug: yo' gyid: mid" khoodo, dab da" nujung loo: yo' dakhyoo" ti" yoem: boo nhang: wa zi nghoid. Nanu" gi byumyu" yi myoo" sho' ri mhoin pyam lho: athoug" akhyoug: khyo" nyangnu" yo" yu to" da" ziyoo jonu" joem ri moug: gyab goin" da" ngoo ASEING ri nanu" lo jung byid: boem wa nghoid.