Read Lashi MIKHA 6 Bible Online

MIKHA 6 - Lashi bible

MIKHA 6

¹Israela yiri ASEING gi thougtheung nyid khyoo: ri tam" gyoo: ge' o". ASEING we" to' lho: re" da" moo" ri tid yu" we'. Nang tid ziri boem yo' bouggung joem gi shoug" gyoo: goo" baja".

²Boem joem yo' apyaid atoo: geung: teing jo, da" mougmyid apoem: ayang: joem we' ASEING da" moo" ri tam" gyoo: we'. ASEING gi nya: byumyu" yiri yooboo foin: lho: tid nyid da:. Nyang: gi Israela ri yooboo foin: zi nghoid bye:.

³ASEING tid zigi «Nga" byumyu" yi we" ngoo gi nanu" ri cikoid byid: bye: la". Ngoo gi nanu" shid re" yoolid: bue" lid loo bye: la". Phuid: kyo" yu" shi" we'.

⁴Ngoo gi nanu" ri Egutu mung" mo shu" thu lo yu" bye:. Ngoo gi nanu" ri join, bue" nyid jang" mo khyoid yu bye:. Ngoo gi nanu" ri shu" vhu" shi: wa shid re" Moshe- Arun yo' Miriam ri nhang: kaid byid: bye:.

⁵Nga" byumyu" yi we"- Moba khokham Balag wigi nanu" ri khasu" koid wa ga: soin' bye: ziyo' Beora da" nya: zoo:- Balam wigi nyang: ri khasu" phuid: kyo" ziri myid boin: ge'. Shug theung: jang: mo zi Gilgala ju" sho' khyoo: moo bue" lo da" gyung: khyoo: ri we' myid boin: we'. He: gu: ri myid boin: nghoid rigi nanu" ri khyoid yu wa shid re" ngoo ce: noem koid loo bye: ziri nanu" boin: so" boem wa zi nghoid»

⁶Ngoo gi ASEING ri noku yhe: uri mougkhung: moug: de ASEING Mangsoo jhang khyoo: ce: noem se' ci: yhi: wa lha". Nyang: ri myi: nghe' xoin" to' byid: wa shid re" ge thang da" nujung nu" ci: yhi: wa lha".

⁷Yang khyeing" khyeing" moin moin yo' athang agoin yau nyid da" gyid zoo: gyung: joem ti" zhainloin: xu: ri ci: yhe: ri ASEING gi vho: ngei wa la". Nga" yooboo joem da" aphoug" xab wa shid re" nga" zooshid" ri nya: jhang xoin" yhe: ngei" byid: wa la".

⁸Anghoid- ASEING gi ngoonu" ri ge da" khyoo: ri toin" shed too" bye:. Nyang: ngoonu" mo vho: nyid zigi tarha" dain: khyo" zei: so' khyoo:- geung: teing jheddab khyoo: ri toin" shed wa ziyo' nheigloem: khyo' nyhoem: khyoo: Mangsoo yo' zoem" khau: wa khyoo: nghoid.

⁹ASEING ri gyoug phau" zigi phajhi" da" apoem: nyang: nghoid. Nyang: voomoo" ri tid zigi «Voomoo" khoug: moo zheung: foem nyid da" mung" byu yi tam" gyoo: ge'.

¹⁰Akhyeung" ashoeb mo, da" yhoem: khoug: moo adeing amain" khyo" yo" yu to" da" jonu" joem jo, da:. Nyangnu" gi ngoo ngheung" da" amain" jang lug laki ci: ago".

¹¹Amain" da" jang lug laki joem ci: mo, ri ngoo khasu" koid yooboo yo" khyoid byid: wa lha".

¹²Nyangnu" mo yoo" zoo: yoo" shug bang: gi myung mo, ri doin: zeig zoo: goo" yoomo nanu" dangain" bang: gi mhoug mo, za: nghoid ago".

¹³Houg: yoomo nanu" da" yooboo yoomo nanu" da" byo, yoin" byo, bei: lo" khyoo: ri ngoo koid shed too" byid: bye:.

¹⁴Nanu" gi voem: zo: nghoid loug we' agyi: wa gyeing" nyang: nanu" gi zoo za: dayoid nyid shi" goo" wa nghoid. Nanu" gi ziyoo joem yo' de" loo" goo" nghoid loug we' ashau" seung: ci: boem wa. Nanu" gi yo" seung: ci: boem nghoid loug we' ngoo wigi meing: zain: jang: moo phyo' shoin' pyam byid: wa nghoid.

¹⁵Nanu" gi shivoo: sho" boem nghoid loug we' ashi" ri ashau" yham" yu boem wa. Nanu" gi zhainloin: xu: ri pyeug nghoid loug we' ashau" yhung: wa. Zabyid yhid: ri pyeug nghoid loug we' khanham we' ashoug" shug wa.

¹⁶Nanu" gi Omri khokham yo' nya: zoo: Ahab khokham da" akhyeing" ashoeb da" moo" zoo" moo bo cang yoomo hid: su" bue" loo" goo" wa. Nanu" gi nya: phatang: da" akhyoo" joem moo xo' koid nyid boem yoomo ngoo gi nanu" ri byo, yoin" nhang: lho: yugkhang" moo" gi nanu" ri aphoug" akhyoid koid lo boem wa nghoid. Khyi' khang" moo" mo byu joem gi nanu" ri anoug akhyoid zoem" khau: lo boem wa nghoid.