Read Lashi MIKHA 7 Bible Online

MIKHA 7 - Lashi bible

MIKHA 7

¹Nheig byu jang: ajo, loo: o". Ngoo gi shigam, moo ce: shi" we' azei: loo: yoomo zabyid nei moo zabyid shi" azei: lo zi shau" myang da" zooyoid su: yo' du byug bye:. Zabyid shi" dangain" yo' ngham" da" lafoem' shi" we' bain phyo' pyam abye: go".

²Hau: moug: moo deing byeung" da" byu dayug we' anyid loo:. Mangsoo ri jhug zug loem khau: da" byu dayug we' aboo loo. Yugkhang" moo" gi byu said wa shid re" akhyoo" ayo, akhyeing: ri dalang" nyid boem ago". Yugkhang" moo" gi yhoem: seing: byumyu" yiri cang khaid kuang yen" ago".

³Nyangnu" dangain" gi akhyeing" ashoeb moo" zei: wa shid re" gye" jhang: mo, nghoid ago". Mung" zoug: yi yo' tarha" agyi yi gi khoug: vhoeb jhungshug mho' zo: ago". Nyangnu" ri ung: zo: da" atho' mo zoug: ludaid yigi nyangnu" ri nyangnu" vho: zi mho' yu wigi dage" za: byen phyoo" coem' zain: nyid boem ago".

⁴Nyangnu" mo ge thang mo, yo' deing byeung" thang mo, lang" vu, fu" myo, joem yo' dakhyoo" ti" ce: phoug" adab boem nghoid ago". Hau: byumyu" yiri Mangsoo gi dam byid: wa da" bidnyid gi nyangnu" ri zung" yu" nyid da" lapi: yi khyo" tid poin" lid lo ziyo' dakhyoo" ti" bain ju" lo nyid abye:. Akhid" nyangnu" gi anhung akhoid zheung: bue" nyid boem bye:.

⁵Re" yhoem: kyoo" cang" ri aloem loo re" byencang" yiri we' amyid loem nyid. Re" yhoem: seing: myhi' anghoid lang" re" yhoem: seing: phoo rilang" nang da ja: ja: tid ri zid" lid nyid ca" wa zi nghoid.

⁶He: ayo, moo yuggi zoo: yigi nyangnu" da" nya: pho bi" ri koopyoid yo' dakhyoo" zoem" khau: lho: myiyi: zoo: yigi nyangnu" da" nya: myhi' bi" ri thougtheung ngeug he: ago". Dumoo" yigi nya: nid bi" yo' myeing" myo: byo, go" wigi nanu" da" gyivoo gi nanu" yhoem: byu yi nyang: nghoid nyid bye:.

⁷Hougsu" nghoid loug we' ngoo gi ASEING ri dazung" yu" nyid wa. Ngoo gi ngoo ri khyoid yu wa ein: myid loem da" Mangsoo ri dalang" nyid wa. Nga" Mangsoo gi ngoo ri tam" gyoo: byid: wa zi nghoid.

⁸Ngoonu" da" gyivoo yigi ngoonu" ri ciyu" juang" nyid boem wa khyoo: ajo, loo- ngoonu" gi gyoeb leung loo" bye:. Nghoid loug we' doem yo" to' loo wa zi nghoid. Akhid" ngoonu" gi moug: coid khoug: moo ju" nyid jo, nghoid loug we' ASEING gi ngoonu" ri bidbang byid: wa zi nghoid.

⁹Ngoonu" gi ASEING ri thougtheung yooboo yoo" bye: yoomo nyang: nheig yo: ziri dayo, zoo: kham zo: boem ca" bye:. Nghoid loug we' lo" thang moo nyang: gi ngoonu" ri goem loem byid: wigi ngoonu" tho' mo shoid vhang: khyoo: ri doem nyheung foin: byid: loo wa nghoid. Nyang: gi ngoonu" ri bidbang khyoo: khe: thu yu wigi nyang: ngoonu" ri khyoid yu khyoo: shau" myang wa nghoid.

¹⁰Nanu" da" Mangsoo ASEING ga: zigi khayoo: la" ga: tid juang" mo, ngoonu" da" gyivoo yigi he: ziri myang lang" myonhoo: shoem: lo" byug goo" wa nghoid. Nyangnu" gi joem: lo" boem wigi fu" moo" khyoo: joem mo thoem" boeb yo' dakhyoo" ti" nang pye" pyam boem ziri ngoonu" shau" myang wa.

¹¹Yerusalem voobyu yi we"- voomoo" vang khyam: doem zhug wa ayo, ju" lo nyid bye:. Hau: ayo, moo nanu" da" mougmyid gyi: lo zi shoug" wa.

¹²Re" da" byumyu" yigi bidthu shoid Asuri mo we' mougpyi: shoid Egutu mo we' Uphrad gyid gyung: moo jo, da" moug: mo we' moug: ve: panglai: joem yo' vi: moo jo, da" boem joem mo we' joyoo khyi' khang" moo" mo re" jhang khyoo: doem tau" loo goo" wa nghoid.

¹³Nghoid loug we' mougmyid gi hau: moo: nyid da" byu yi da" akhyeing" ashoeb moo" zoo" yoomo midcoo: boem" dain" pyoid yoo bue" loo" goo" wa nghoid.

¹⁴ASEING we"- nang nyang: khyen: yu to" da" re" byumyu" yi moo yang zung" su: bue" nyid we'. Nyangnu" gi siyoo dain" pyoid khung" moo yhe: nyid yen" boem nghoid loug we' nyangnu" da" ayam aqei: moo myid xu: ge da" mougmyid lheung khoem to". Nyangnu" ri goonham' gooco' pyaid mo wigi koid lo boem ziyo' dakhyoo" ti" Bashan yo' Gilead mo ge da" mhain" nu" yoo moo nyangnu" ri yhe: lham" zoo: nhang: we'.

¹⁵ASEING we" nang ngoonu" ri Egutu mung" mo shu" thu lo da" ayo, bidnyid moo nang zei: loo bye: ziyo' dakhyoo" ti" ngoonu" shid re" mau" pho" alhoo: again joem ri koid shug shi" we'.

¹⁶Byumyu" yigi he: da" khyoo: ri myang lang" nyangnu" gi yoem: boo nghoid loug we' vhooloo yu" kho" byug boem wa zi nghoid. Nyangnu" gi nheigloem: thang boem ziyo' nhoid myhid" ci: boem lho: nukhyab jhid ci: lo boem wa nghoid.

¹⁷Nyangnu" gi pheilhoug: boem moo lhangmyu joem yhang: ti" do: yu: yen" goo" wa. Nyangnu" gi gyoug nain" ziyo' nyangnu" da" gyi goo zung joem mo thu ri" goo" wa nghoid. Nyangnu" gi gyoug ziyo' ngoonu" da" Mangsoo ASEING jhang khyoo: lheung: lo boem wa zi nghoid.

¹⁸ASEING we" nang yo' du go" da" mangsoo gootu: khayoo: we' anyid loo: nghoid da:. Nang gi nyid deung jo, da" re" byumyu" yi da" yooboo ri khyoid pyam byid: nyid da:. Nang gi apyaid atoo: moo nheig jha" yo: nyid su: anghoid. Nang koem' gi ngoonu" ri re" geung: teung da" jhed khyeing: kang: khyeing: toin" shed nyid jang" moo nheugshid: nyid.

¹⁹Nang gi ngoonu" ri dalheing: doem nheig khyeug yu shi" wa zi nghoid. Nang gi ngoonu" da" yooboo joem ri khyid: yang: moo nang nhe" pyam wigi panglai: thoem" kang khyoo: du" kaid pyam byid: wa nghoid.

²⁰Nang gi goonham' gooco' ayo, mo wigi ngoonu" da" phoug" phyid" bi" ri dangsoo" too" bye: ziyo' dakhyoo" ti" Abraham yo' Yaku da" amyed ashen yi nghoid da" re" byumyu" yiri re" da" nheigloem: zung" khyoo: yo' geung: teing da" jhed khyeing: kang: khyeing: ri toin" shed wa zi nghoid.