Read Lashi NAHUM 3 Bible Online

NAHUM 3 - Lashi bible

NAHUM 3

¹Lhoid yu phyo' yu wa da" jonu" joem byeung" jo, lho: mhoug zoo: fain" zo: ziyo' byu said nyid da" voomoo" gi byu xuid" vu yoem: loo" wa nghoid.

²Voo: si" yo' baid myheung nyid da" thui:- rheing" cab' so" myheung da" thui:- myang: joem tang" gei lo" myheung da" thui:- gyi myang: rheing" koin" myheung yen" da" thui: ri zheung: gyo: yu" we'.

³Myang: jui: mo, zain: go" nyid bye:. Shamcoin" bang kyi: bye:. Lham: toid joem yid yid wim bye:. Mang joem boem zang too" bye:. Nghab loo a ung: myo: da" shid: mang joem moo thung" thue: leung yen" boem bye:.

⁴Shava myhi' Nineve gi shen" yhen zi shoug" nyid bye:. Yu" yung" yu" ngei ziyo' shid: pho" fa" moo" zoo" wigi nyang: gi byumyu" yiri jhu' phyo' lo lho: nyangnu" ri jhu' phyo' lid loo bye:.

⁵Yoem: moo" bo da" ASEING gi tid nyid «Nineve we" nang ri ngoo shen" yhen loo wa. Ngoo gi nang ri shoocen: doem lang: shang: byid: loo wa nghoid wigi nang mo re" da" sho' ja: dangain" byu yiri myang nhang: wa nghoid.

⁶Ngoo gi nang ri aphoug" akhyoid koid lho: aco' ajhoid ziyo' foid gyoin: byid: loo wa. Meing: byu yigi nang ri yu" gyoug tung" yu" zhug too" goo" wa zi nghoid.

⁷Nang ri myang mo, dangain" nung zoid zoid goo" wa nghoid. Nyangnu" tid zigi ‹Nineve gi byo, yoin" jo, bye: nhung. Nyang: ri hang" wigi nheig khyeug shoo" myen shi" wa lha". Nyang: ri hang" nheig teing byid: noug shi" wa la'› ga: tid lo boem wa nghoid» ga: tid.

⁸Nineve we" nang gi Egutu meing: da" voomoo" zeing Thebe voo tho' re" je gi shi" wa la". Hau: voomoo" vang yhang: ti" nyang: ri goem loem byid: wa da" gyid moo" lang dalang jo, wigi Nila gyid moo" lang gi nya: da" khau: goo jang: nghoid nyid.

⁹Nyang: gi Etiopi yo' Egutu ri vhoeb zo: lho: nya: yoem: so' gi houg: moo thang ga: zi ajo. Libya gi seing" tain" bidnoem mungdain: bue" lid loo" bye:.

¹⁰Akhid" koem' gi Thebe mung" byu yigi goo" moug: khyoo: pyoung" lo" zi shau" ago". Khyoo: kang" khang" moo" moo nyangnu" da" zooshang: yigi baid said to" zi shau" boem bye:. Nyangnu" da" vhu" she: ludaid yigi jangcoo" wigi tei" she: lo" zi shoug" lho: nyangnu" ri re" tei" shi: mo, gi gam go" lo boem bye:.

¹¹Nineve we" nang we' yhid: yed su: yhang: ti" bue" loo wa. Nanyang: we' re" gyivoo lo, mo loid khyoo: sho: loo wa nghoid.

¹²Re" da" gyi khau: zung: joem dangain" gi ashi" myheung jo, da" lafoem' gam joem yhang: ti" bue" loo wa. Shi" gam joem moo yhe: nhoid kaid ri ashi" gi re" nhoin khoug: moo nyang: gyo" vang loo wa nghoid.

¹³Re" gyizoo: yigi myiyi: yi yhang: ti" bue" jo, lho: re" mungdain: gi re" gyivoo yi da" shidkhoin" moo khoug: goo jang: ayoo" bue" jo, bye:. Re" voomoo" khoem" duang: joem mo khoem kyang joem gi myi: nge" byug wa zi nghoid.

¹⁴Gyivoo joem re" vang: to" da" bidnyid shid re" gyid she: too" we'. Re" gyi khoug zung joem ri geing: geing: koid we'. Zhoothung" yo' koid wa shid re" myid vhu" nug ri nang: nhe" lho: zhoothung" azuang ri goolhoo: koid too" we'.

¹⁵Nang khasu" koid too" nghoid loug we' nge" shid: zi shoug" wa anghoid lang" meing: zain: jang: moo shid: shoug" wa nghoid. Jhenkhyeug joem gi shivoo joem ri zo: pyam yhang: ti" nang gi shoem" shoung: pyam zi shoug" wa. Nang gi jhenkhyeug joem yhang: ti" myo: lid lo yu" bye:.

¹⁶Re" da" phaga byu yiri mougkhung: mo kyi: joem tho' re" nang myoo: nhang: bye:. Nghoid loug we' jhenkhyeug joem gi dung ri pyo: lho: dang: phang: lo" yhang: ti" nyangnu" gi akhid" phang: byug bye:.

¹⁷Ngam" da" ayo, moo jhenkhyeug phung: moo" gi vang" xiyam joem moo foem: dab jo, yhang: ti" re" da" gyizoug: yi nyid boem nghoid loug we' bid xain" loo lang" nyangnu" gi dang: phang: lo" yhang: ti" nyangnu" gi khakhyoo: yhe: lo" byug boem ziri hang" we' ase' boem loo.

¹⁸Asuri khokham moo" we" re" da" mung" zoug: yigi shid: lo" byug boem lho: re" da" nheig bo ludaid yigi apyaid atoo: moo yhoeb jo, boem bye:- re" da" mung" byu yigi boem moug: cang byo, sain" lo" zi shoug" lho: nyangnu" ri yhoem: khyoo: doem shu" tau" loo wa byu hang" we' anyid boem loo.

¹⁹Nang shau" da" gooduang dam moo" ri yo" ge loo" nhang: wa khyoo: ajo, loo wigi re" da" dam joid ri ayo" ze: gi loo re" da" byo, yoin" lo" lu dang: shoug" gyoo: mo, dangain" gi ngei bu gau yi lo, baid baid nyid ago". Re" da" anoo: ayab loo: za: shen" yhen moo" zoo" mo, hang" yo" loid lo" yu" lha".