Read Lashi ZEPHANI 1 Bible Online

ZEPHANI 1 - Lashi bible

ZEPHANI 1

¹He: zigi Amon da" nya: zoo: Yoshia gi Yuda mung" moo khokham koid nyid da" ayo, Zephania jang" moo ju" re" da" ASEING mungdang: nghoid. Khokham Hezekia da" phoug" ki" nghoid. Zephania gi Khushi nya: zoo:. Khushi' gi Gedali nya: zoo:. Gedali gi Amari nya: zoo:. Amari gi khokham Hezekia nya: zoo: nghoid.

²ASEING tid zigi «Ngoo gi mougmyid tho' moo nyid moonyid ri phyo' shoin' pyam loo wa.

³Xangsu: byu yi yo' gougnyhoug gougdoo:- ngho' joem: yo' wimdo, joem dangain" ri phyo' shoin' pyam loo: wa. Age da" byugang: yi nyangnu" ri we' gyoeb gyo" loo" nhang: wa. Ngoo gi byu xangsu: yi dangain" ri phyo' shoin' pyam lho: hang" ri we' ateung too" loo: wa» ein: ngoo ASEING gi gyeing" nyang: hidsu" tid bye:.

⁴Ngoo gi Yerusalem voomoo" yo' Yuda mung" byu dangain" ri we' shen" yhen loo" wa nghoid. Ngoo gi Bala soolhoo: yu phara" no' mo, ri we' dayug we' adeing loo: sho' phyo' shoin' pyam lho: houg: mo nya: moo" voin da" yu phara" khainjung yiri hang" we' ayo" boin: loo sho' mhoin' pyam wa.

⁵Yhoemkhung: tho' khyoo: do, lo" lho: bid kyi: lhammoo" joem ri noku bang: hang" ri we' ngoo phyo' shoin' pyam wa. Ngoo ri noku zi jhug zug ga: jham' tang: too" nghoid loug we' Moleg yu phara" da" myeing ri yu lho: jham' doem tang: bang: ri we' phyo' shoin' pyam loo wa zi nghoid.

⁶Ngoo gi nga" jang" moo acang loo: doem tau" loo" bang: ngoo ri acang shoo: bang: anghoid lang" nyangnu" ri khyoo: shid wa shid re" akyu" amho' bang: dangain" ri phyo' shoin' pyam wa nghoid.

⁷ASEING dang: phyed wa da" bidnyid gi ju" lo nyid bye:- houg: yoomo nya: shidkhoin" moo sam: zoo: nyid we'. Xoin" said ngei" yhang: ti" ASEING gi nya: byumyu" yiri said ngei" byid: wa zi soin' nyid wigi Yuda mung" ri zain: loo wa da" gyivoo joem ri khe: zheung" too" bye:.

⁸ASEING tid zigi hougsu" said wa da" bidnyid moo zoug: koid mo, yo' khokham zoo: yi yo' tungbau byumyu" yi da" thung" khin bo cang mo, dangain" ri yooboo dam byid wa zi nghoid.

⁹Ngoo gi tungbau byumyu" yi da" yu phara" bo no' mo, yo' nyangnu" yhoem: seung: yhoem: shid re" jonu" byeung" jo, wa shid re" khoug" lho: byu said bang: ri shen" yhen wa nghoid.

¹⁰ASEING tid zigi hau bidnyid moo nanu" gi Yerusalem wimdo, khoem" mo" duang: mo ngoug thui: shau" gyo: boem wa. Voomoo" da" aseig du: to" khyoo: moo kougshu: da" ngoug khyang" fang" thui: yo' bouggung tho' mo yoem: shoin: ngoug thui: ri nanu" shoug" gyoo: wa.

¹¹Voomoo" mo ung" zoo: ung" shug da" joyoo moo nyid mo, nanu" we' ngoug nyid loo: we'. Ciwim gari nanu" da" phaga: byu yi dangain" shoem" shoung: pyam zi shoug" wa.

¹²«Hau: bidnyid moo ngoo gi myibung tab ci: lho: Yerusalem voomoo" ri cang shoo: wa. Nyang: yug nya: gung ri loem wigi nyang: nya: nheigloem: moo ASEING gi ge ziwe' age zi we' yo" koid byid: zi anghoid ga: tid nyid da" byu yiri dam byid: wa zi nghoid.

¹³Nyangnu" da" ziyoo jonu" joem gi subi" lhoid ci: lo" zi shoug" wa. Nyangnu" da" yhoem: joem we' phyo' sain" pyam zi shoug" goo" wa. Nyangnu" gi yhoem: ri koid nyid nghoid loug we' shoug" nyid goo" wa zi anghoid. Zabyid khyam: joem ri sho" to" boem nghoid loug we' zabyid yhid: ri shoug" shug goo" wa zi anghoid» ga: tid.

¹⁴ASEING da" gyi: thang bidnyid gi jhang loo bye:. Hau: bidnyid gi jhang lo ziyo' myab myab ju" re" nyid bye:. Hau: bidnyid gi gye" khoo" wa da" bidnyid nghoid. Khasu" wim gari gye" yoem: bo ziyo' gye" voem" thang da" gyizoo: yi lang" nheigloem: gyau: ziyo' ngoug wa zi nghoid.

¹⁵Hau: bidnyid gi nheig joem: yo: lo da" bidnyid yau: khi" da" bidnyid phyo' sain" byo, bei da" bidnyid moug: coid teing: no, ziyo' moug: doeb lho: jhoemmoug" thu: no, lo da" bidnyid nghoid.

¹⁶Geung: teung" da" voomoo" vang khyam: yo' myhang: da" gyi pyu zung ri zain: lo da" gyizoo: yi gyi to' lo da" thui: zeing- gyi laboo" moid thui: yo' byeung" da" bidnyid nghoid.

¹⁷ASEING tid zigi «Ngoo gi xangsu: byu yi da" tho' moo myo, jid bang: yhang: ti" soeb yab yen" jang" moo: ju" sho' da" kyi" khyeug ri ngoo yu" ci: ri" wa. Nyangnu" gi ngoo ri thougtheung yooboo koid yoomo akhid" nyangnu" gi xangsu: suid" tung: byung: youg wa. Nyangnu" mang gi myidjang moo boeb yu: loo" goo" wa nghoid»

¹⁸ASEING gi nya: da" nheig joem: yo: lo bidnyid moo gi nyangnu" yo" da" ngei sheing: we' nyangnu" ri yo" khyoid yu wa zi anghoid. ASEING nheig yo: myi: yo' moug: gyab goin" ziri nghe' pyo' sain" pyam wa zi nghoid. Nyang: gi mougmyid tho' moo nyid mo, yugkhang" moo" ri dalheing: dam nyeigdain tung" myab za: doem: thang loo" nhang: wa zi nghoid.