Read Lashi HAGI 1 Bible Online

HAGI 1 - Lashi bible

HAGI 1

¹Persi mung" moo Dari gi Khokham khoo" zhoung: zi eig zain ein: zain lhammoo" khyug khyab xain" danyid" moo ASEING jang" mo mungdang: gi Lapi: Hagi khyo" wigi Shelati Yuda mung" zoug: Zerubabela yo' Yehozadag da" nya: zoo: khainjung moo" Yoshu eig yug shid re" ju" ri" bye:.

²Yoem: moo" bo da" ASEING gi Hagi ri tid- «He: byumyu" yigi Noku Yhoem: Moo" doem so' koid wa ayo, anghoid shi"» ga: tid nyid.

³Houg: lang" ASEING gi Lapi: Hagi khyo" wigi mung" byu yiri he: da" mungdang: ri tid kaid.

⁴Nga" byumyu" yi we" nga" yhoem: gi byo, yoin" jo, nyid uri nanu" gi yhoem: gi moo loung" jo, goo" wa la".

⁵Nanu" ce" noem thoung" shoug" nyid ziri amyang goo" la".

⁶Nanu" gi shivoo: myoo" sho' sho" too" nghoid loug we' dajhi' za: dashau" yham" yu boem. Zo: ri we' agyi:-shug wa da" zabyid yoo" loug we' atham: shoug boem- byimi yo" boem nghoid loug we' loem loem nyu: nyu: ashau" void boem- moo" zei: zoo: mo, we' kangso' dei wa shid re" atham: yoo" nghoid ago".

⁷Ce: noem wim lho: hid su" bue" nyid ziri ayo" myang goo" rhe".

⁸Akhid" nanu" gi boem khyoo: do, lo" lho: seig voo lo" yu gyoo" lo wigi Noku Yhoem: Moo" ri doem so' koid ge'. Houg: lang" ngoo gi nheigloem: tei" ziyo' ngoo kham: yu eung: da" no' pid khyoo: ri shoug" kham: yu wa zi nghoid.

⁹Nanu" gi myoo" sho' shau" yham" yu wa ga: myid too" goo" nghoid loug we' dajhi' za: date: shau" yham" yu boem- nanu" shoug" yhoem" yu da" shivoo: shiloem ri yhoem: moo: voin ju" lo" ri ngoo wigi doem moid sain" pyam byid: wa. Ciwim wigi ngoo hid: su" koid lha". Nga" yhoem: gi byo, yoin" jo, lho: nanu" gi nyang: yug nya: da" yhoem: ri yoem: kaid koid nyid boem yoomo nghoid.

¹⁰Hau: zigi moug: avoo lo: ziyo' myidjang moo we' shivoo: shiloem ayug loo lo khyoo: ayang: nghoid.

¹¹Ngoo gi myidjang ri kyug nhang: wigi boem tho' moo we' yoodam moo we' shivoo: khyam: moo we' zabyid khyam: yo' zhainloin: khyam: moo we' hau: lho: shoo" zoo: shoo" shug noem ce" ja: moo we' byu xangsu: shid re" we' gougnyhoug goug: do: tho' moo we' nanu" gyi: sheung: loo wa ga: yoem: kaid nyid moo" zoo" dangain" tho' moo we' kyug fo: loo" nhang: bye:» ga: tid.

¹²Hau: uri Babelon mung" khyoo: pyoung" she: loo" shoug" jang" mo doem tau" lo da" Zerubabela- Yoshu yo' byumyu" yi dangain" gi ASEING Mangsoo nyangnu" ri koid nhang: da" moo" ri koid bye:. Nyangnu" gi ASEING lapi: Hagi ri gyoug boem ziyo' tam" gyo: nyid boem.

¹³Houg: lang" Hagi gi mung" byu yiri ASEING da" lu dang: ri tid zigi «Ngoo gi nanu" yo' dage" nghoid nyid wa. Hau: zigi nga" dangsoo" khoin" nghoid.

¹⁴ASEING gi yhoem: moo" ri doem koid wa shid re" pyoung" she: loo" shoug" jang" mo doem tau" lo da" Yuda mung" zoug: Zerubabela khainjung moo" Yoshu yo' mung" byu yi dangain" da" nheigloem: ri tid nhau" to' kaid. Nyangnu" gi Dari khokham khoo" zhung: da" eig zain ein: zain lhammoo" khyug khyab eig xe: myid: nyid" moo yoem: moo" bo da" ASEING nyangnu" da" Mangso da" yhoem: moo" ri aseig doem koid shid" lo" boem bye:.