Read Lashi ZEKHARIA 1 Bible Online

ZEKHARIA 1 - Lashi bible

ZEKHARIA 1

¹Pasha mung" moo Dari gi Khosen koid nyid zi eig zain lhammoo" shid khyab moo Berekhia da" nya: zoo:- Yido da" nya: myid: Lapi: Zekharia jang" moo ASEING jang" mo he: mungdang: ju" re" da:.

²Meing: byu yiri tid kyoo" wa shid re" Zekharia ri myhang: thang da" yoem: moo" bo da" ASEING tid zigi «Ngoo ASEING gi nanu" da" phoug" phyid" yiri gye" nheig yoo: nau nyid.

³Nghoid loug we' ngoo nanu" ri tid nau zigi nga" jhang khyoo: lheing: loo ge'-hougsu" nghoid lang" gi ngoo we' nanu" jhang khyoo: lheung: loo wa.

⁴Nanu" da" phoug" phyid" yi yhang: ti" akoid goo"- shid phyang" mo lapi: yigi nyangnu" ri ‹Akhyeing" khyoo: moo anyid goo"- yooboo moo" azei: goo"› ga: nga" mungdang: ri tid kyo" boem nghoid loug we' nyangnu" gi atam" gyoo: acang yhi: nghoid ago".

⁵Nanu" da" phoug" phyid" yi yo' nyangnu" pyaid moo lapi: pi: mo, gi bain shid: lo" boem bye:.

⁶Nga" dei zoo: lapi: yi khyo" wigi nanu" da" phoug" phyid" yiri amyeing" byid: dang: yo' lhid zid" wa shid re" ngoo byid: bye:. Nghoid loug we' nyangnu" gi atam" gyo: boem wigi yau: khi" shau" boem. Houg: lang" ‹Yoem: moo" bo da" ASEING gi nya: phajhi" khyau" ziyo' ngoonu" ri kham: moin: da" dam byid: bye:› ga: nung myid yo" boem bye:.

⁷Dari Khosen kho" zhung: da" eig zain ein: wa daxe: dakhyab ga: da" (Shebad lhammoo" khyab) eig xe: myid: nyid" myen moo ASEING ngoo ri byid: da" yoeb myang mungdang: nghoid.

⁸ASEING da" moug: lagyoo: dayug gi myang: ni tho' moo zhung: jo, ziri ngoo myang. Nyang: gi maithen" seig moo" yoo moo yab jo, da:. Nya: da" thang: moo gi ne zi atuang tuang ziyo' phyu: da" gootu: myang: joem we' bo yab jo.

⁹Houg: lang" ngoo gi «ASEING we" he: zigi ce: noem ri toin" shed zi nghoid lha"» ein: myid: yu" bye:. Nyang: phug tid zigi «He: myang: joem ri ci: ein: nau zi ngoo nang ri tid kyoo" ba.

¹⁰Hid: bang: gi mougmyid goem: sho' moo ca: yu" yen" wa ASEING nhang: kaid mo, nghoid» ga: tid.

¹¹ASEING da" lagyoo: ri nyangnu" hid su" ga: tid «Ngoonu" gi mougmyid gyab goin" moo cang ca: koem" yu" bye:- yu" ge' mougmyid gyab goin" gi ngei pyoo: yug yoo tung" sam: zoo: tam" to" boem ago"» ga: tid.

¹²Houg: lang" ASEING da" moug: lagyoo: tid zigi «Myhang: thang da" ASEING nang gi Yerusalem yo' Yuda mung" mo voozoo: voozeing ri nheug yo: zi akhid" nyhed xi: zain nghoid bye:. Khamyhang ju" sho' nang nyangnu" ri re" da" nheig khyeug khyoo: atoin" shid loo: za: nyid nyid wa la"».

¹³Ngoo yo' doem go" nyid da" moug: lagyoo: ri ASEING gi ge ziyo' nheig teing dang: phug tid lho:

¹⁴Houg: lang" ngoo yo' doem go" nyid da" moug: lagyoo: gi ngoo ri hid su" ga: tid. «Yoem: moo" bo ASEING tid ziri tid fu" loo" we'. Ngoo gi nga" younglho' da" Yerusalem voomoo" ri gyi" sho' jheddab lho: nheig khyeug nyid.

¹⁵Ngoo gi nga" da" byumyu" yi adang moo ju" loo wa da" nheig joem: yo: khyoo: ri zeing: kham nyid uri yug yoo thung" nyid da" byumyu" yigi nga" byumyu" yi kham zo: da" kyi" khyeug khyoo: ri je" gyi: sho' koid boem

¹⁶Houg: yoomo ngoo gi nheig khyeug ziyo' Yerusalem shoid khyoo: doem phug loo bye:. Nga" yhoem: gi houg: moo zhug shi" wa zi nghoid. Yerusalem voomoo" ri we' nyheung koid shi" wa» ga: tid.

¹⁷Moug: lagyoo: gi ngoo ri hidsu" ga: tid fu" nhang: shi" «Yoem" moo" bo ASEING Mangsoo gi nya: voomoo" joem ri doem nyid pyo loo nhang: lho: nyang: gi Yerusalem ri doem pang" thoug wigi nya: voomoo" bue" loo nhang: ga: tid loo wa» ga: tid.

¹⁸Gootu: yoeb myang moo ngoo gi nulo: khyoug: myid: loem: ri myang.

¹⁹Ngoo yo' doem go" nyid da" moug: lagyoo: ri «He: khyoug: gi ci: ein: nau zi nghoid lha"» ein: myid: bye:. He: zigi Yuda mung"- Israela mung" yo' Yerusalem mo bang: ri khaid sain" kaid da" mougmyid yoem: so' joem nghoid» ga: tid kyo".

²⁰Hau: thang: ri ASEING gi ngoo ri baid du ci: da" moo" koid mo, myid: yug ri toin" shid.

²¹«Hid: bang: gi ce: noem koid wa bang: nghoid lha"» ein: ngoo myid: yu" ri nyang: tid zigi «Nyangnu" gi Yuda mung" ri mhoin' pyam lho: hau: byumyu" yiri khaid thu pyam wa ga: ri" mo, ri kyug nhain' lho: ung: zoo: wa ga: ri" mo, nghoid» ga: tid.