Read Lashi ZEKHARIA 12 Bible Online

ZEKHARIA 12 - Lashi bible

ZEKHARIA 12

¹He: zigi Israela da" khyoo: ASEING pang shug da" mungdang: nghoid wigi mougkhung: ri phain" myhu: to" da" ASEING- mougmyid ri ayang: zhug su:- byu ri kangso' byid: da" ASEING tid zi nghoid.

²«Ngoo gi Yerusalem rigi zabyid goem yhang: ti" koid wa. Nya: ayam aqei: mo byumyu" joem gi hau: ziri shug lho: yhid: yed mo, yhang: ti" leung yu: yen" boem wa. Hougsu" nyangnu" gi Yerusalem voomoo" ri vang: ci: uri Yuda mung" mo gootu: voogung joem ri we' vang: to" zi shoug" wa.

³Hau: da" bidnyid ju" lo ri ngoo gi Yerusalem ri gye" lid: da" lugzeing su" bui" loo" nhang: wa. Hau: voomoo" vu, wa ga: yoem: kaid mo, kha: mungdain: bang: we' dam dab boem wa nghoid. Moug: gyab mo mungdain: dangain" gi hau: myo, ri gyi zain: wa ga: zeung: foem: lo boem wa nghoid.

⁴Hau: bidnyid ri gyivoo joem da" myang: joem dangain" ri ngoo kyug tain' wigi nyangnu" myang: jui: mo, dangain" ri ko" fang: lo" byug nhang: boem wa. Yuda mung" byu yi tho' moo ngoo lhoug zung" wa. Nyangnu" gyivoo yi da" myang: joem rigi myo, zheung: jid lo" byug nhang: wa nghoid.

⁵Houg: lang Yuda kung: mo mo, gi nyang: nya: gung ri ‹Yoem: moo" bo da" ASEING Mangsoo gi Yerusalem moo nyid da" nya: byumyu" yiri yoem: byid: da› ga: tid lo boem wa nghoid.

⁶«Hau: ayo, moo ngoo gi Yuda kung: mo vhujhung: yi rigi siyoo moo nge" joem: lo" da" myi: yhang: ti" shivoo myeung jo, da" gug yoo mo myi: yo' dakhyoo" ti" bui" nhang: wa. Nyangnu" da" ayam aqei mo da" mungdain: dangain" ri phyo' shoin' pyam' boem wa. Yerusalem voomoo" bang: gi myen myenjham" jham" hau: vookhoug: moo goem loem za: shau" nyid boem wa zi nghoid.

⁷Ngoo ASEING gi Yuda gyizoug: yiri xang: shi" oung: loo" nhang: wa zi nghoid. Houg: lang" David nya: myid: nya: zoo: yi yo' Yerusalem voobyu yi phoug" tab ngi: shab khyoo je" gyi: wa zi nghoid.

⁸Hau: ayo, moo ASEING gi Yerusalem moo nyid mo, ri lhoug zung" lho: wigi nyangnu" khoug: mo yoem: neing: thang loug we' David yhang: ti" yoem: bo loo wa. David da" nya: myid: nya: zoo: yigi nyangnu" rilang" gi ASEING da" lagyoo: yhang: ti" Mangsoo nyang: yhang: ti" David nya: myid: nya: zo: wigi shu" vhu" shi: wa zi nghoid.

⁹Hau: ayo, moo ngoo gi Yerusalem ri zain: wa ga: soin' da" byumyu" ja: khang" moo" ri phyo' shoin' pyam' wa.

¹⁰Hougsu" ngoo gi David da" nya: myid: nya: zo: bang: yo' Yerusalem voomoo" moo nyid bang: ri nheig se' khyeug ziyo' akyu" se' mho' da" Venyi: kaid pyeing byid: wa. Nyangnu" thau" said pyam' su: ri coem' yu" lho: nyangnu" gi nyang: nya: zooti" zoo: anghoid lang" zooshid" zoo: shid: lo" yhang: ti" nyang: soo" soo" koug ngau nyid goo" wa zi nghoid.

¹¹Hau: ayo, moo Yerusalem moo koug ngau zigi shid phyang" Mekido koo' lhang moo Hada Rimon shid re" ngau yu" yhang: ti" ngoug zeing nyang: shau" ngoug boem wa nghoid.

¹²Hau: mung" goin" jang" moo yhoem: khang" moo" ngougmyeing" shuthui: to" nyid boem wa. David akung: bang:- Nathan kung: bang:- Levi kung: bang:- Shime kung: bang: yo' goo" kung: mo byo loo mo, dangain" we' koug ngoug lo boem wa. Yhoem: khang" moo" gi nyang: kung: nyang: koug ngoug lo boem wa. Kung: khang" moo" mo yuggi gootu: myiyi: gootu: ngoug nyid boem wa nghoid ga: tid.