Read Lashi ZEKHARIA 5 Bible Online

ZEKHARIA 5 - Lashi bible

ZEKHARIA 5

¹Ngoo doem yu" kaid ri lid tho' khyo" dang: yen" da" mougsoug" dadeing: ri ngoo myang.

²Moug: lagyoo: gi ngoo cenoem myang ziri myid:. Ngoo gi «Sheing: phyang" eigxi: dung"- lam: phyang" daxi: dung" bo da" mougsoug" dadeing: lid tho' khyo" dang: yen" ziri myang» ein: tid bye:.

³Houg: lang" nyang: ngoo ri tid zigi «He: zigi moug: gyab goin" jang" khyoo: thu lo" da" nheing" khoin" lhid" to" zi nghoid. Dashoid moo gi khoug" mo, gi he: mougmyid mo shoem" thu pyam' zi shoug" wa khyoo: lhid" to" lho: dashoid moo gi adeing amain" khyo" jham' tang: mo, yugkhang" moo" gi shoem" thu pyam' wa khyoo: lhid" to"» ga: tid nyid.

⁴Yoem: moo" bo da" ASEING gi hau: mougsoug" deing: ri nhang: kaid lang" gi khoug" mo, yugkhang" moo yhoem: yo' nga" myeing ri lang: lho: adeing amain" khyo" jham' tang: mo, yugkhang" moo" yhoem: khyoo: vang lo" lho: nyangnu" da" yhoem: joem ri byo, yoin" loo" nhang: pyam' wa nghoid» ga: tid.

⁵Ngoo yo' doem go" yu" bye: moug: lagyoo: gi nga" jang" moo doem thu lo lho: «Tho"- yu" we' gootu: daja: thu loo bye:» ga: tid.

⁶Ngoo gi «Hau: zi cenoem nghoid» ein: myid: kaid ri «He: zigi gyoin daloem: nghoid lho: wigi mougmyid gyab goin" jang" mo yooboo joem ri toin" shed to" zi nghoid» ga: tid.

⁷Gyoin nhoid mo anghoeb gi xoid: yo' koid to" zi nghoid wigi nyangnu" gi hau: anghoeb ri tu: shid kaid uri gyoin khoug: moo myiyi: dayug zhung: jo, da:.

⁸Moug: lagyoo: tid zigi «He: myiyi: myhi' gi agi ashoeb khyoo: gungthid khyo" toin" shed su: nghoid» ga: tid. Hau: thang: ri hau: myiyi: myhi' ri gyoin khoug: moo zhung" lhung kaid lho: xoid: anghoeb ri doem nghoeb kaid.

⁹Ngoo yu" kaid ri Voin yu dung yhang: ti" yoem: bo da" dung dab myiyi: eig yug nga" jang" moo dang: lo lho: nya: eig yug gi hau: gyoin ri dang: dang loo" khare".

¹⁰Houg: lang" ngoo gi moug: lagyoo: ri «Hau: da" gyoin ri khakhyoo: dang lo" lha"» ein: myid: ri.

¹¹«Babelon khyoo dang lo" lho: houg: moo nya: shid re" yhoem: moo" daloem: nyangnu" zhug boem wa nghoid. Hau: yhoem: moo" bain zhug lang" houg: moo noku wa shid re" gyoin ri to" too" wa zi nghoid» ga: tid.