Read Lashi ZEKHARIA 6 Bible Online

ZEKHARIA 6 - Lashi bible

ZEKHARIA 6

¹Ngoo doem yu" nyid ri gyid: mid" boem eig boem da" agyoo: mo gyi myang: rheing" myid: loem: thu lo ziri myang.

²Xang: shi" da" myang: rheing" gi myang: ni joem she:- eig loem: ein: wa loem: rigi myang: no, joem she:-

³Soem" loem: ein: wa loem: ri she: zigi myang: phyu: joem she: lho: myid: loem: ein: wa myang: rheing" rigi myang: tug joem wigi she:.

⁴Houg: yoomo ngoo gi moug: lagyoo: ri «Ludaid phoo we" he: zigi cenoem ri tu' to" lha"» ein: myid: kaid ri

⁵«He: zigi mougmyid gyab goin" da" ASEING shidkhoin" mo thu lo" da" lid myid: loem: nghoid» ga: tid.

⁶Myang: no, joem she: da" myang: rheing" gi mougzhung: Babelon khyoo: thu yhe: lo- Myang: phyu: joem gi bidvang khyoo: she: lo" lho: myang: tug joem gi moug: thang: khyoo: thu lo".

⁷Hougsu" wigi myang: tug joem gi mougmyid gyab goin" jang" khyoo: koem" yen" wa akhid" yhe: loo" nau boem yoomo thu lo" da:. Houg: lang" moug: lagyoo: gi «mougmyid gyab khyoo: yhe: lho: koem" yu" ge'» ga: tid yoomo nyangnu" gi yhe: lo" boem bye:.

⁸Houg: lang" hau: moug: lagyoo: gi ngoo ri «Mougzhung: Babelon khyoo: yhe: lo" da" myang: joem gi ASEING da" nheig yo: nheigloem: ri tam" loo" nhang: bye:» ga: nyho: tid.

⁹ASEING gi ngoo ri «He: mungdang: byid: kaid bye:.

¹⁰Nang gi Babelon voomoo" mo doem lheing loo da" pyoung" she: loo" shoug mo, Heldai- Tobiya yo' Yedaia byu yi jang" mo jhungshug joem ri yu lho: hau: nyid" nyang: Zephania da" nya: zoo: Yoshia yhoem: khyoo: vang yhi: we'.

¹¹Nyangnu" alu kaid da" ngei yo' sheing: ri bidmug dakhyab' koid lho: wigi Yehozadag da" nya: zoo:- khainjung moo" Yoshua da" vhuloem moo zhung" byid: we'.

¹²Hau: lho: hidsu" ein: tid ge' ‹Yoem: moo" bo da" ASEING gi hidsu" ga: tid nyid. He yug gi akung: ako' ga: myheing too" su: nghoid. Hau: yug gi nya: joyoo moo gyi: myhang: lo lho: ASEING da" yhoem: moo" ri doem nyheing zhug wa zi nghoid.

¹³Nyang: gi ASEING da" yhoem: moo" ri zhug loo wa su: nghoid lho: khokham" myonhoo: phung" yoeb yo" wigi mung" byu yiri vhoebkhang" loo wa nghoid. Nyang: gi zhungtang tho' moo zhung: lho: khainjung yo' khokham nghoid wigi hau: moo" eig ja: goin" ri dage" zei: lo wigi myenjham" ziyo' veing" goo" wa nghoid.

¹⁴Hau: bidmug gi ASEING da" younglho' yhoem: khoug: moo Hedai- Tobiya- Yedaia yo' Yoshia shid re" phoug" tab ngi: byid: da" ASEING yhoem: moo" khoug: mo myid boin: laxoem" sagse: bue" jo, wa zi nghoid.

¹⁵Moug: vi: moo nyid mo, we' re" lho: ASEING da" yhoem: moo" ri bo pang" koid boem wa nghoid. Hau: lho: hau: yhoem: koid lang" yoem: moo" bo da" ASEING gi ngoo ri nanu" jhang khyoo: nhang: kaid ziri se' lo boem wa zi nghoid. Nanu" gi nanu" ASEING da" amyeing" dang: joem ri goolho' phau" cang lo" boem nghoid rigi hid: dangain" nanu" moo bue" loo wa zi nghoid.