Read Lashi ZEKHARIA 7 Bible Online

ZEKHARIA 7 - Lashi bible

ZEKHARIA 7

¹Dari khokham" khoo" zhung: da" myid: zain ein: zain goug: khyab (Kisle lhammoo" khyab) lhoo' xain" myid: nyid" moo ASEING da" mungdang: gi nga" jang" moo ju" re".

²Hau: uri Bethela voo moo nyid mo, gi ASEING mo agyid asoo: mho' wa shid re" Sharezera yo' Regem- Meleg yo' nya: eig yug da" byu yiri yoem: moo" bo da" ASEING yhoem: moo" khyoo: nhang: kaid wigi

³Khainjung bi" yo' lapi: yiri «ASEING yhoem: moo" byo, yoin" loo" yoomo lid: lo da" myoo" sho' zain mo zoo: noem zeing: yhang: ti" akhid" ju" lo wim: khyab' moo zoo: noem zeing: shi" wa la" ein: yhe: myid: ge'» ga: nhang: kaid.

⁴He: zigi nga" jang" moo ju" lo da" ASEING mungdang: nghoid.

⁵Nyang: tid zigi «mungdain: mo mung" byu yi dangain" yo' khainjung yiri hidsu" ein: tid kyoo" we' lid: loo" bye: nyhed xi: zain- khau: moo lhammoo" 5 khyab yo' 7 khyab moo zoo: noem zeung: lho: ngoug khyang" fang" nyid zigi ngoo ri phoug" tab ngi: byid: khyoo: anghoid.

⁶Nanu" zo: shug uri nanu" nya: nheugshid: wa shid re" koid zi danghoid.

⁷Shid phyang" Yerusalem gi nyid gi nyid de: lho: byupug thu: ziyo' ayam aqei: mo voogung joem moo za: we' anghoid- moug: thang: jang: dam mung" yo' bidvang shoid mo boem khyid: moo ju" sho' byu myoo" sho' nyid shi" uri lapi: yi khyo" ASEING gi he: khyoo: ri tid too" bye:.

⁸ASEING gi Zekharia ri he: da" mungdang: byid: too" bye:.

⁹Yoem: moo" bo da" ASEING tid zigi «Nanu" gi deingmain" da" tarha" dang: kho' lho: yugkhang" moo" nya: mang: nya: nhung" ri nheig khyeug go" wigi hau: nheig khyeug nheigloem: toin" shed go" nyid we'.

¹⁰Cougmoo" myhi' anghoid lang" gi coug" zoo: anghoid lang" gi nanu" akhoug: moo nyid da" tungbau byu yi yo' sho" jhen: mo, ri adoin: zeig goo". Nanu" gi dayug yo' dayug noo nhang: go" da" khyoo: akoid goo"» ga: tid kyoo" bye:.

¹¹Hougsu" nghoid loug we" nga" byumyu" yigi atam" gyoo: loo: nukhyab jhid ci: ago". Nyangnu" gi nyangnu" da" nheigloem: khoem" myhid" to" lho:

¹²Nyangnu" gi nyangnu" nheigloem: ri lugzeing su" thain: nhang: to" ago". Khasu" wim ga: ri nyangnu" gi shid phyang" mo lapi: yi khyo" tid kaid da" nga" jhoug" myeing" ri acang yoomo ngoo gye" nheig yoo: nau loo bye:.

¹³Nyangnu" gi nga" mungdang: ri anau tam" gyoo: yoomo nyangnu" akyu" mho' ziri ngoo we' atam" gyoo:-

¹⁴Ngoo gi uglid zoo" mo wigi nyangnu" ri tungbau mung" khyoo: moid sain" pyam' bye:. Houg: yhi' ge da" moug: gi jham" coug: youg bue" lo" lho: houg: moo hang" we' anyid boem loo.