Read Lashi ZEKHARIA 9 Bible Online

ZEKHARIA 9 - Lashi bible

ZEKHARIA 9

¹He: zigi ASEING da" pang shug da" mungdang: nghoid. ASEING gi Hadrag yo' Damasku ri dang: phyed wa zi myid phyed too" bye:. Israela byumyu" yi za: anghoid. Suri voomoo" ri we' ASEING seung: nyid zi nghoid.

²Hadrag yo' mougkyoo" xo' go" to" da" Hamad voo we' nya: shid re" nghoid. Turu yo' Sidon voomoo" moo nyid da" cang: joeb phajhi" si' mo, dangain" ri we' seung: nyid da:.

³Turu gi nya: shid re" gyidab daloem: ri zhug lho: ngei yo' sheing: gi myidzhoo" phei" su" shoin" zhug to".

⁴Nghoid loug we' ASEING gi nyang: yoo" mayoo" dangain" ri shoem" yoeb pyam' wa zi nghoid. Nammugdara khyoo: nya: jonu" ziyoo joem ri du" khyo' pyam' lho: voomoo" gi myid jang moo nghe' jhoem" tab pyam' zi shau" loo wa nghoid.

⁵Hau: ziri Ashkelon voo bang: myang wigi gyoug boem wa. Gaza: mung" bang: myang ri we' nain" nyid boem wa nghoid. Houg: yoomo Ekron voomoo" gi nya: nheig byu jang: ci: phyug pyam' zi shoug" wa nghoid. Gaza: khokham phoo we' joem: loo" wa zi nghoid- Ashkelon voo we' joem: thang loo" wa zi nghoid.

⁶Ashdod voomoo" we' byupyeug damyu" nyid thu loo wa. ASEING tid zigi «Nghoid boin: da" Philisti byu yi dangain" ri ngoo gi nyhoem: gyo" loo" nhang: wa zi nghoid.

⁷Nyangnu" gi deung nyid da" byu yi we' Mangsoo seung: wigi Yuda byu yhang: ti" bue" loo wa nghoid. Ekron gi Yebusi yang: ti" bue" loo wa.

⁸Ngoo gi nga" mungdain: ri lhoug zung" nyid wigi cenoem gyiphung: yi we' ayo" lid loo". Nya: mung" byu yiri shen" yhen doin: zeig nyid ziri ngoo khanham we' akhang" byid: wa zi anghoid. Ciwim gari akhid" mo wigi nga" byu yiri yhe: zung" yu" nyid wa.

⁹Ziun mung" byu yi we" gye" gau yi ngei bu: nyid ge'. Yerusalem bang: we" yoid nyho: loo ngei bu we'. Yu" we'- re" da" khokham phoo gi re" jang" moo ju" re" da:. Nyang: gi ung: pui" oung: myug ziyo' ju" re". Nghoid loug we' nyang: gi nu" nham' lho: loo zei: tho' moo zhung: wigi re" bye:. Nghoid- Loo zei: nu" dadu: atho' moo zhung: lho: wigi re" da:.

¹⁰ASEING gi hidsu" ga: tid «Ngoo gi Israela yi da" gyimyang: rheing" ri yu pyam' byid: wa nghoid. Yerusalem mo gyi zain: myang: joem ri we' shoem" pyam' byid: wa. Gyipui" moo ci: da" lo, lid: joem ri we' khyau" pyam' byid: wa nghoid. Nyangnu" da" khokham ri ngoo gi byumyu" yi veing" go" da" lu dang: ri tid fu" loo" nhang: wa. Nyang: gi panglai: dathoem" mo zi thei: dathoem" khyoo: ju" sho' Uphrad gyid lang mo wigi mougmyid thang sho' moo vhoeb wa nghoid» ga: tid.

¹¹Hau: lho:ASEING Mangsoo gi «Ngoo gi nanu" yo' dang: thang" cab' koid to" da" suid" yoomo nanu" mo wigi pyoung" lo" zi shoug" mo, ri Ngoo gi gyid ajo, gyoin: yhang: te" pyoung" shu" to" joyoo mo nanu" lhoid pyoin kaid wa nghoid.

¹²Nheig byu joyoo yoo" mo, ri oung: lo" gyidab moo doem tau" loo ge' nanu" da" goem loem joyoo khyoo: doem tau" loo ge' akhid" nyid" nanu" ri ngoo tid kyoo" wa Ngoo gi nanu" da" sho" jhen: yau: khi" tho' moo eig zhang agyid asoo: doem xab byid: wa nghoid.

¹³Yuda rigi gyizoo: pho lo, lid: yo' dakhyoo" ti" Israela rigi myoo: khaid joem yo' dakhyoo" ti" ngoo ci: wa nghoid. Ziun rigi shamcoin" yo' akhyoo" ti" ci: lho: Greek byumyu" yiri gyi zain: wa» ga: tid.

¹⁴Hau: uri ASEING gi nya: byumyu" tho' moo thu shug wa zi nghoid. Nya: myoo: kaid joem gi lhab' myheug yhang: ti" thu loo" khari" wa ASEING Mangsoo gi laboo" moid kaid wigi mougpyi: uglid zoo" yo' dage" gyi jen" jen" do, to' loo wa zi nghoid.

¹⁵Yoem: moo" bo da" ASEING Mangsoo gi nya: mung" byu yiri goem loem byid: nyid yoomo nyangnu" gi gyivoo joem ri yo" phyo' pyam' boem wa zi nghoid. Nyangnu" gi yhid: yed mo, yhang: ti" meing: zain: jang: moo nyho: lo wigi nyangnu" da" gyivoo joem da" suid" ri jarung: mo phoin: khyoo: foid sain" da" xoin" du: suid" yhang: ti" gyivoo joem da" suid" yau loo" wa nghoid.

¹⁶Hau: da" bidnyid ju" lo uri yang zung" su: gi nya: yang phung: ri gyoug pho" jang" mo khyoid yu yhang: ti" ASEING gi nya: byumyu" yiri khyoid yu wa nghoid. Nyangnu" gi bidmug mo lug nyoug joem yhang: ti" nyangnu" da" mougmyid moo lo, lo, bang nyid boem wa zi nghoid.

¹⁷Nyangnu" mung" gi gye" ge ziyo' yu" yung" zi bue" loo wa. vedyam" yi gi hau: moug: mo thu da" shivoo: shiloem yo' zabyid yhid: ri zo: shug wigi yoem: bo gyi: sheung: loo wa zi nghoid.