Read Lashi MATHE 11 Bible Online

MATHE 11 - Lashi bible

MATHE 11

¹Houg: su" wi nya: cangzoo: daxe: eig youg bang: ri dang: bain pyeing: to" thang: ri voogung joem moo cang jhoug" byid: wa shid re" mungdang: kho" kyoo" wa shid re" hau jo yoomo thu' lo.

²Khristu koid: da" moozoo" ri Yohan gi thung: khoug: mo shau" gyoo: lang" nya: cangzoo: yi ri nhang: kaid lho: «ASEING gi gyoo" loo wa Meshia nghoid deung la".

³Houg: su" anghoid lang" gi goo" yug ri lang" nyid shi" wa la"» ga: myed kaid.

⁴Yesu gi «Nanu" myang yu" da" khyoo: shoug" gyo: yu" bye da" khyoo: dangain" ri Yohan ri lo" tid kyoo" ge'.

⁵Myo, jed mo ri myo doem myang nhang: ago"- khyid: agi lo: mo gi khyoo doem yo" so" lo" boem- manggam: noo mo we' gyeungshang: lo" boem. Nujed mo, we' dang: shau" gyo: lo boem bye. shid: jo mo we' doem dei to'' lo ago"- ashau" ajhen: mo we gau yi mungdang: ri shau" gyo: boem ago".

⁶Ngoo yoomo nheigloem: aleing mo gi ngi lhoo wa"» ga: tid kyo" kaid.

⁷Houg: bang: loo" khare" thang: ri Yesu gi Yohan da" khyoo: ri vhu" zhug lho: wigi Meingbyu yi ri «nanu" gi ce: noem ri yu" wa ein: wigi kyoem khoug: moo yhi: go" led hau lhei, nyid da" jam deung" ri yu" wa ein: yhi: go" lha".

⁸Houg: su" anghoid lang" gi ce: noem ri yu" wa ein: yhi: go"- yhui yhui wim da" byimi void ci: su ri yu" wa ein: yhi: go" lha". yhui, yhui wim da" byimi void to" su gi kho kham" yhoem: moo dalhung nyid.

⁹Houg: su" anghoid lang" gi ci: yu" yhi: go" Lapi: phoo ri yu" wa ein: yhi: go" la". gyeing" nghoid rigi Lapi: phoo da" tho' moo je gyi: su: ri nanu" shau" myang bye"- ein: ngoo tid.

¹⁰Jhoem: mungdang: moo bo zigi Yu" ge' nang yhi: wa da" khyoo: ri yo" soin' nyheing da" nga" lagyoo: ri re" da" shid moo ngoo nhang: kaid- ga: da" dang: khoin" gi Yohan ri tid nau zi nghoid.

¹¹Ngoo jhug" jhug tid da" zigi Xangsu: mhoo: myid: moo Baptisma sara: Yohan tho' je gyi: da" zigi dayug we' abo yu" shi" nghoid loug mougkhoung: mungdain: moo nge thang yug gi Yohan tho' je gyi: su: nghoid.

¹²Baptisma sara: Yohan da" bidnyid mo wigi Akhid" nyid" ju" sho' Mougkhung: mungdain: gi agyoo: ayoid jhen" vang mo yo" zain: go" nyid yoomo yo" rhi, mo, za: hau mungdain: ri yo" yu sho' shakoid ago".

¹³Khasu" wim gari Yohan da" ayo, ju" sho' Lapi: yi dangain" mo, da" tarha" moo Mangso da" Mungdain: khyoo ri tid too" bye.

¹⁴Nanu" gi nyangnu" da" Mungdang: ri tam" gyo: nghoid rigi Yohan gi ju" ri" wa ga: tid to" da" Elia nghoid bye.

¹⁵Shoug" gyo: ja: nukhyab' dab mo hang" we' shau" gyoo: goo" baja".

¹⁶«Akhid" nyid" He: da" byumyu" ri ngoo ce: ja: dangtu' khyo" tid kyo" yu" shi" wa lha". Kid" vang" moo zhoung: yoin" to" da" zooshang: mi" gi nyang: cang" nyang: nyhoo: go" zoo" re.

¹⁷‹Nanu" da" shid re" loxo' pui" khalhang ri khayhi' moid nghoid loug we' nanu" ago" boem nghoid da. Ngoonu" gi kougshu: ngau nyid nghoid loug we' Nanu" abo ngoug abo kougshu: nghoid ago"› ga: tid nyid da" zooshang: mi" yo" dadu nyid boem da.

¹⁸Khasu" wim gari Yohan gi azo: ashug loo re" ri nyangnu" gi ‹he: yug gi yu vang su: nghoid nhung:› ga: tid boem ago".

¹⁹Byu da" nya: zoo: gi zo: shug lho: re" ri we ‹Yu" ge, he: yug gi zo: myo, no su:- zabyidd" shug lid: su: nghoid- Kheing" khyu: zoo: mo, yo' yooboo yoo" mo, da" bidnoem phoo nghoid› ga: doem tid ago". Nghoidsho' loug Mangso da" phajhi"- deung main" khyoo: rigi Hau: phajhi" zei: thu' lo da:- nya: ashi" yo" sagsi: toin" shid' nyid» ga: tid.

²⁰Yesu hau: uri mau" pho" yoem: myoo" sho' toin" shid' bye: da" voogung bang: gi nyang nya: yoo boo mo nheigloem: athid lo boem yoomo hau: da" voogung joem ri hid: su" ga: gyi koid da.

²¹«O" Kurazin we"- nang gi joem loo" wa O" Besaida we" nang joem: loo" wa. Khasu" wim ga ri re" eig yug ri toin" shid' da" moozoo" zeing joem ri Turu yo" Sidun eig voo moo toin" shid' nghoid rigi jid: moo" byi: ri gang" ci: lho: nheigloem: bain thid zi gye" myang wam: bye.

²²Houg: yoomo nanu" ri ngoo tid zi gi hau: Mangso da" dang: khoo' bidnyid moo Turu yo" Sidun kham: wa da" dam gi nanu" kham: wa dam tho' moo je soem" wa zi nghoid.

²³Kaperna-um we"- nang we moug: moo thug sho tu: to zi shau" wa la". Houg: su" anghoid lang" moo vo moug ju" sho' khyo kaid zi nang shau" wa nghoid. Khasu" wim gari nang ri toin" shid' da" moozoo" zeing gi Sodom moo koid: nghoid rigi Hau: voo gi akhid" nyid" ju" sho' dageing: jo wa zi nghoid.

²⁴Houg: yoomo nanu" ri ngoo tid da" zigi Tarha" dang: kho da" bidnyid moo Sodom voo kham: zoo: wa dam gi nang kham: zoo: wa dam tho' moo daje som" wa zi nghoid.»

²⁵Houg: lang" Yesu gi «Mougkhung: yo" myidjang ri vhoeb da" nga" phoo we"- Phajhi" byen ya yo" nheigloem: yeig kung mo jang" mo he: da" khyoo: ri nang yhoem" nghoeb to" lho: ci: asi mo, ri phang shug yoomo ngoo nang ri jeju" boin.

²⁶Nghoidbye: nga" phoo we"- Nang vho: da" khyoo: gi hid: su" nghoid nyid.

²⁷«Nga" phoo gi zi yoo jo, moo jo, ngoori ab, byid: pyam bye. Pho, tho' moo gootu: hau: nya: zoo: ri hang" we asi. Hau: nya: zoo: tho' moo gootu: Hau: nya: phoo ri hang" asi.

²⁸«Yoolid: voin myung: dau nyid mo, dangain" bang: we"- Nga" jhang khyoo loo ge'. Ngoo nanu" ri doug noo: nhang: wa.

²⁹Nga" da" kyoug: ri voin ge'. Nga" jang" mo jhau" yu ge'. Khasu" wim gari ngoo gi nu" nham' su: yo' nheigloem: nyhoem: su: nghoid. Houg: su" lang" nanu" doug shau" noo: wa zi nghoid.

³⁰Khasu" wim gari Nga" kyoug: gi voin yo' Nga" da" yoovoin we som" zi nghoid» ga: tid.