Read Lashi MATHE 12 Bible Online

MATHE 12 - Lashi bible

MATHE 12

¹Hau: ayo, moo ASEING Yesu gi Dougno: Bidnyid ri sung: soo: yoo khyo" so" lid: lo" uri nya: cangzoo: yi gi zoo so" yoid wigi sung: soo: nham: ri phyed yu lho: zo: ago".

²Pharishe" yi myang lang" «yu" ge' Yesu da" cangzoo: yi gi Dougno: Bidnyid ri akoid: eung: da" moo" re zheung: koid: boem bye» Ga: nyang: ri zheung: tid boem.

³Houg: lang" Yesu phougtu" da" zigi «David khokham" gi nya: byen cang" yi yo' nyang: zooyoid nyid da" uri khasu" shu" koid: zi nanu" anghab yu" goo" rhe"

⁴Mangso yhoem: moo" moo vang lo" lho: khainjung gyi: bang: yi za: date: ge zo: da" Mangso shid moo joung to" da" zooyho' ri nyangnu" age zo: ziri nghoid loug- nyang: yo' nya: byen cang" yi hau: zi yu zo: ago".

⁵Hau: tho moo khainjung agyi yi we' Noku yhoem: moo" moo nyid lho: Dougno: Bidnyid khang" nyid" labain tarha" ri shoid nyid nghoid loug we' yooboo afoin: da" khyoo: ri Moshe da" tarha" mougsoug" moo anghab yu" goo" la".

⁶Ngoo nanu" ri tid ba- He: joyoo moo Kyu" mho' yhoem: mo" tho' je gyi: su: nyid nyid.

⁷‹Xoin" to' byid: zi anghoid- nheig khyeig da" khyoo: ri ngoo vho:› ga: da" jhoem: dang: ri nanu" se gyo: boem nghoid rigi ce: yooboo ayoo" mo, ri yooboo foin: boem wa zi anghoid.

⁸Khasu" wim gari Byu da" nya: zoo: gi Dougno: Bidnyid da" ASEING nyang: nghoid bye.»

⁹Yesu hau: joyoo mo thu' lo" lho: Tarha" jung moo vang lo" ri

¹⁰Hau: tarha" jung moo lo, dalo, ajoem: shid: da" yuggi dayug nyid. Yesu ri yooboo foin noug mo, gi «Dougno: Bidnyid ri noo phyoo" ze: ge zigi Tarha" ri shoid zi anghoid la"» ga: myid: boem ago".

¹¹ASEING Yesu gi «nanu" da" yang dadu: du: Dougno: Bidnyid labain nyid" ri duang: khuang" moo to byid gyo" jo nghoid rigi alang: thoid yu wa su: dayug yug boo wa la".

¹²Byu gi yang tho' moo je phoug" dab anghoid goo" la". Houg: yoomo ngoonu" da" tarha" gi Dougno: Bidnyid ri byu gootu: ri pang" thoug wa da" akhang" byid: to.»

¹³Houg: lang" Yesu gi hau: da" lo, shid: su: ri «Re" lo, dain: kaid we'» ga: tid lang" hau: yug nya: lo, ri dain: kaid ri dashoid mo lo, yhangti" nyang: doem ge lo.

¹⁴Hau: thang ri Pharishe" zheung: thu' lo" wigi Yesu ri khasu" koid: said pyam wa khyoo: phajhi" khyoug" go" nyid boem.

¹⁵Nyang: ri said pyam wa phajhi" khyau" nyid ziri Yesu se' wigi joyoo gootu: khyoo: lo" ri Byu ajoem' ayo mo, gi nya: thang: moo cang lo ago". Yesu gi nyangnu" mo noophyoo" shau" mo, dangain" ri ze: ge pyam byid: bye.

¹⁶Nghoidloug we' nyangnu" gi Nya: lu dang: ri alhu pyo loo" wa shid re" toung: kaid.

¹⁷Hid: su" toung: kaid da" khyoo: gi Lapi: Esaia kho" kyo" to" da" dang: joeb byeung" loo wa shid re" nghoid. Hau: lapi: dang: gi

¹⁸«Ngoo khyen: yu da" nga" dei zooshang:- Ngoo vho: ngei da" jheddab su: nghoid. Nga" Venyi: nya: da" tho' moo ngoo kaid byid: to" wigi Tungbau byumyu" ri nya: da" deung main" da" mungdang: ri kho" kyoo" wa zi nghoid.

¹⁹Nghoidloug we' nyang: gi ngeig wa su: nyhoo: wa su: anghoid. nya: thui: ri meing: khyoo: cang hang" shau" gyoo: wa zi anghoid.

²⁰jab bye: da" jam phyeing" youg: ri anhe, khyoug" wa. shid: lo" nyid da" myi: bung: ri asaid pyam wa. Deung byeung" da" tarha" dang: khoo' bidnyid ju" sho' nyang: xo' yoem: kaid nyid wa.

²¹Byumyu" bain sho mo da" nheig nhei: jang: gi nyang: moo za: dajo, jo, wa.»

²²Hau: uri yu vang yoomo myo, jed lho: dang: ayo" tid da" yug gi dayug ri Yesu jhang shu" re" ago". ASEING gi hau: yug ri ge loo" nhang: lho: myo, myang loo nhang:- dang: we' yo" tid sho ge loo" nhang.

²³Byu phung: moo" zeing gi Yesu zei: da" moo" ri myang lang" gye" yu" mau" boem wigi «he yug gi David da" nya: zoo: nghoid wa la"» ga: tid go" nyid boem.

²⁴Pharishe yi shau" gyoo: lang" gi «he: yug gi yu zoug: Bezebula da" yoem: so' khyo" yu ri dayo" khaid thu' pyam eung:» ga: tid go" nyid boem.

²⁵Yesu gi houg: bang: da" nheigloem: ri si' byid: yoomo hid: su" ga: tid. Kha: Mungdain: moo nghoid loug we' nyang: cang" nyang: aveing" goo" loo: said go" nyid nghoid rigi amyang" ri hau: mungdain: byo, yoin" loo" wa zi nghoid. Houg: yo" dakhyoo" ti"- sham: ashoin" loo: byo, go" nyid da" Voogung- ikoin deungkhu: yi we' byo, yoin" loo" wa zi za: nghoid.

²⁶Houg: yoomo yu satan: da" mungdain: moo we' nyang: cang" nyang: dasaid go" nyid nghoid rigi hau: satan: da" mungdain: gi khasu" se' geing: teing jo, wa lha"

²⁷Ngoo gi Bezebula da" yoem: yo' yu ri da: khaid thu' deung nghoid rigi nanu" da" nya: zoo: yi gi hang" da" yoem: yo' yu ri yo" khaid thu pyam wa lha". Nanu" da" nya: myid: nya: zoo: yi zei: da" moozoo" gi nanu" gyo: shoid ziri toin" shid nyid.

²⁸Ngoo gi Bezebula da" yoem: yo' yu khaid thu' zi anghoid. Mangso da" Venyi: yoem: so' khyo" yu ri khaid thu zi danghoid. Houg: su" nghoid yoomo Mangso da" Mungdain: gi nanu" jang" moo ju" bye: ziri si' loo ge'.

²⁹«Yoem: bo da" sarhi' phoo ri shi" amyheig tei" to" rigi nya: yhoem: moo ceug vang yhe: lho: nya: ziyoo ri hang se' yo" lhoid yu wa la".

³⁰«Nga" tab adab su: gi nga" da" gyivoo tab' dab su: nghoid. Ngoo yo" dadeung: daloem: za: ashoin" too" su: gi abyi asain" nghoid nyid.

³¹Houg: yoomo ngoo tid da" zigi shoid vhang: da" yooboo- tid shoid sang: shoid da" yooboo- ce: ja: ri nghoid loug we' yo" khyoid pyam byid: wa da" akhyoo" jo,. Houg: su" nghoid loug we' gyeungshang: Venyi: ri age khyo" tid shoid su: gi yooboo yo" khyoid byid: wa khyoo: aboo loo.

³²Hang" nghoid loug we' Byu da" nya: zoo: ri nhoid yo" tid shoid da" yooboo gi yo" khyoid pyam byid:. Nghoidloug we' gyeungshang: da" Venyi: ri nhoid tid shoid da" yooboo rigi he: pyaid ri we' thang: phyang" pyaid ri we' yo" khyoid pyam byid: zi anghoid.

³³«Ashi" ge zi vho: ri agam ge zi zhung" too" ca. Age da" agam gi age da" ashi" ri zei: byid: zi nghoid. Ashi" ri myang lang" agam ri yo" se.

³⁴Myu no, byumyu" yi we"- nanu" akhyeing" ashoeb da" mo, khasu" wigi dang: gi yo" tid goo" wa lha". nheigloem: moo byeung" jo, ja: she, nhoid tho moo da tid thu' lo.

³⁵Ge da" byu gi nya: zi gi kaid to" da" boin" mo ge da" zi ri shau" thoid yu da:- akhyeing" ashoeb su: gi nya: da" akhyeing" ashoeb zi kaid to" da" boin" mo age zi za: dashau" thoid yu nyid.

³⁶«ASEING Yesu tid zigi tarha" dang: khoo' da" bidnyid moo byu yug khang" moo" gi nyang: tid da" age da" dang: yo" dakhyoo" ti"- tarha"

³⁷dang: khoo' zi shau" wa nghoid. Nang yooboo yo" ayo" zigi nanya: dang: khyo" cang lho: dang: khoo' zi shau" wa nghoid.»

³⁸Houg: lang" Tarha" sara: yi yo' Pharishe yi dayham" gi «Sara: we"- ngoonu" gi nang toin" shid da" alhoo: again daja: ja: ri myang nau ga: re" mho' ago".»

³⁹ASEING Yesu gi «Akhyeing" ziyo' Mangsoo: abo da" he: pyaid mo byu yi gi mau" pho" alhoo: again ri se' mho' boem nhung: lha". Lapi: Yona da" alhoo: again tho moo gootu: ce: alhoo: again we nanu" myang zi anghoid.

⁴⁰Yona gi ngoo: zeing da" voem: doug khoug: moo soem" nyid soem" myen, loung" jo, yhangti"- Byu da" nya: zoo: gi myidjang: khoug: moo soem" nyid" soem" myen, loung" jo, wa zi nghoid.

⁴¹Nineve" voo byu yi gi Yona kho" kyo" da" mungdang: yoomo:- nyangnu" da" yooboo mo nheigloem: thid lo ago". Houg: su" nghoid yoomo nyangnu" gi Tarha" dang: kho' da" bidnyid moo He: pyaid mo byu yi yo" to lo wigi nanu" ri yooboo foin: boem wa zi nghoid. Ngoo nanu" ri tid ba- akhid" he: khyi moo Yona tho' moo je gyi: su: dayug ju" nyid bye.

⁴²Moug: thang: mo, Sheba: khokham" myhi, gi-Khokham" Sholumon da" Phajhi" dang: ri gyo: yu wa shed re" gye" ve: da" moug mo ju" lo. Houg: su" nghoid yoomo tarha" dang: khoo, da" bidnyid moo nyang: gi he: pyaid mo byu yi yo" to lo wigi nyangnu" ri yooboo foin: wa zi nghoid. Yu" ge' akhid" he: khyi moo Sholumon tho' je gyi: su: dayug ju" nyid bye:- ga: wigi tid.

⁴³«Akhyeing" da" yu gi Byu da" yhoem: mo thu lo" lho:-kyug kyi ri da" joyoo moo so" lheing yen" wigi doug noo: wa da" joyoo ashau" shoo: loo.

⁴⁴Houg: lang" nyang: gi ngoo gi khasu" nghoid loug- akhang: yhoem: xoug" moo doem loo" wa" ga: tid nyid. Hau: da" yhoem: moo doem tau" lo" yu" rigi zhen" kain: yung" yung" shoem" san to" zi lo" myang.

⁴⁵Houg: lang" gi nya: tho mo yoem: je gyi: da:- akhyeing" da" yu nyhed yug ri doem khe: loung: lho: wigi hau: yhoem: moo vang zhoung: jo, boem bye. Hau: yu vang to" su: da" asam" aved gi xang: shid" tho re" je akhyeing" ashoeb bue" loo bye. He: da" pyaid mo akhyeing" da" byu yi moo we' houg: yo" dakhyoo" ti" bue" loo wa» ga: tid.

⁴⁶Yesu gi Byu phung: moo ri kho" kyo" nyid da" uri-nya: myhi' yo' nya: nhung" gi ju" re" boem. Nyang: yo" shau" doem goo" wa ga: nghe: shoid moo re" lang" nyid boem.

⁴⁷Houg: yoomo byu dayug gi «Yu" we' re" myhi, yo" re" no, nang yo" shau" doem goo" wa ga: nghe: shoid moo re" yab jo, ago"» ga: tid kyo.

⁴⁸Yesu phougtu" zigi «Nga" myhi gi hang" nghoid lha". Nga" mang: nhung" yi ga: zigi hang" nghoid lha"» ga: myid.

⁴⁹Hau: lho: nya: cangzoo: yi jhang khyoo lo, toin" kaid lho: «Yu" ge' hid: bang: gi nga" myhi, yo"- nga" mang: nga" nhoung" nghoid bye.

⁵⁰Mougkhung: tho' moo nyid da:- Nga" phoo vho: khyo" cang koid: mo, hang" we' Nga" mang: nga" nhung"- nga" nham" mo" yo' nga" myhi, nghoid bye:» ga: tid.