Read Lashi MATHE 14 Bible Online

MATHE 14 - Lashi bible

MATHE 14

¹Hau: uri Galile mung" ri vhoeb ci: su:- Herod khokham" gi ASEING Yesu da" khyoo: ri shau" gyoo: lang"

²«He: yug gi Baptisma sara: Yohan danghoid. Gyeing" nyang: shid: da" jang" mo doem dei to' loo eung: bye. Houg: yoomo mau" pho" alhoo: again yo" toin" shid'» ga: nya: vhoo: mo moo" voin mo ri tid kyo.

³Ciwim gari he: shid mo Herod gi nya: nhung" Philib da" yhoem: seing: myhi' Herodi yoomo Yohan ri myheig lho: thung: tei" lhung nhang: too" bye.

⁴Khasu" wim gari Yohan gi Herod khokham" ri «hau: myiyi: ri re" yhoem: seing: myhi' koid: wa zigi atarha"» ga: tid byid: nyid yoomo nghoid.

⁵Herod gi Yohan ri said pyam noug nghoid loug we' Yuda byumyu" yi ri gyoug yoomo avoem" said, pyam. Khasu" wim gari houg: bang: gi Yohan ri Lapi: dayug ga: zheung: loem yoomo nghoid.

⁶Hau: thang: ri Herod da" khu: lo pui" koid: da" bidnyid moo Herodi da" zoomyi: zoo: gi mung" byu yi da" shed moo go" shug lang" Herod gi soo" soo" nheigloem: pyo: wigi

⁷Hau: zoomyi: zoo: ri «Ce: noem nghoid loug we' nang mho' zi byid: wa» ga: dang: byid: to".

⁸Hau: da" myiyi: zoo: gi nya: myhi' joug jhoin" ziyo' dakhyoo" ti"- Baptisma sara: da" vhuloem ri he: da" bain moo akhid" kaid byid: we' ga: lo" mho'.

⁹khokham" gi myid apyoo: loo: nghoid loug we' being" voo yi da" shid khoin" moo nheung" too" bye: yoomo hau: myiyi: zoo: mho' ziri byid: wa shed re" amyeing" khyo kaid bye.

¹⁰Houg: yoomo byu nhang: kaid lho: Yohan da" vhuloem ri thung: khoug: moo kho" pyam bye.

¹¹vhuloem ri bain moo kaid ci: lho: myiyi: nu" ri byid: bye. Nyang: we hau: vhuloem ri nya: myhi' jhang khyoo ci: lo.

¹²Yohan da" cangzoo: yi gi Yohan da" mang ri re" yu myhoeb shoung: pyam boem. Hau: thang: ri Yesu jhang lo" tid kyo" ago".

¹³Yesu gi Yohan da" khyoo: shau" gyoo: lang" nyang: kyeing" lhid zhoung: lho: ci: sam: aso" da" joyoo khyoo thu' yhe: lo" da" khyoo: byu phung: yi shau" gyoo: lang" voo mo, thu' lho: tung khyoo khyo" nya: jang" moo cang yhe: lo" boem.

¹⁴Yesu gi lhid' mo tung gung khyoo lo" ri byu phung: moo" ri nyang: myang lang" nyangnu" ri nheig yu khyeig yoomo noo da" byu dangain" ri ge loo" nhang: bye.

¹⁵Myenthang: ju" loo lang" nya: cangzoo: yi zheung: lo boem wigi «he: joyoo gi ci: we ajo, da" joyoo nghoid. Moug: we coid loo bye. Byu phung: moo" yi ri voogung khyoo zoo: noem zheung: qei zoo: nhang: kaid we'» ga: re" tid boem.

¹⁶Yesu gi «hid: bang: voogung khyoo loo" aca"- nanu" nyang: nyangnu" ri zoo: noem byid: ge'» ga: tid.

¹⁷Nya: cangzoo: yi we' ngoonu" zooyho' wim: loem: yo' ngoodo, eig du: date: yo" the, ga: doem tid boem.

¹⁸Houg: lang" Yesu gi «nga" jhang ci: loo ge'» ga: wigi doem tid.

¹⁹Houg: lang" byu phung: moo" ri vu, fu" yoo moo zheung: zhoung: jo, nhang. Hau: thang: ri zooyho' wim: loem: yo"- ngoo: zoo: eig du: ri yu lho: wigi Moug: khyoo yu" lho: Mangso jeju" ri coung" byid. Hau: thang: ri zooyho' ri lang: phe, yu wigi nya: cangzoo: yi ri byid. Nya: cangzoo: yi gi byu phung: moo" yi ri gam, byid: ago".

²⁰Byu dangain" mo, gi gye" gyi: shau" zo: boem thang: ri zo: teing da" adu atoem- doem koid: zheung" boem ri daxe: eig kyang daceung byeung" shi".

²¹Zo: da" byu- myiyi: yi yo" zooshang: mi" ri abo soin: ri zooyho' zo: da" byu yuggi za: wim: khyeing" koo: su" bo.

²²Yesu gi Byu phung: moo" ri nhang: kaid da" uri nya: cangzoo: yi rigi lhid zhung: nhang: lho: gyid nung" goo" tab nya: shid khyoo: gu: loo" lang" nhang.

²³Byu phung: moo" yi ri nhang: kaid thang: ri Akyu" mho' wa shid re" boug tho' khyoo do, lo. Myenthang: coid shoem zoo" ri houg: moo ASEING nyang: kyeing" nyid nyid.

²⁴Hau: uri lhid gi gyid yam yo" gye" ve: da" thoem" gung moo ju" lo" nyid uri lid tau" hau: lo wigi being: moid gi hau: lhid moo lo baid nyid yoomo lhid gi moug lo" nyid.

²⁵Nabsoin: myo, myang yid ri ASEING Yesu gi gyid thoem" tho' khyo" cangzoo: yi jhang khyoo so" lo.

²⁶Gyid dang moo so" lo zi nya: cangzoo: yi lhoem: myang lang" dain ziyo' «thei: zigi soo" byoo danghoid» ga: gyoug ziyo' lhoem: nyho: boem.

²⁷Yesu dalheing: dam tid zigi «seing" yang" ge'- agyug goo" ngoo danghoid» ga: tid.

²⁸Houg: lang" Petru gi «ASEING nang nghoid deung rigi ngoori gyid dang khyo" re" jhang khyoo so" ri" wa amyeing" byid: we'» ga: tid.

²⁹«Ri" we'» ga: Yesu tid. Houg: lang" Petru gi lhid' tho' mo gyo" lho: Yesu jhang khyoo gyid tho' khyo" so" yhe: lo.

³⁰Nghoidloug we' ug lid ri myang lang" gi nyang: gyoug lo wigi gyid khoug: moo noeb vang lo" nyid da" uri «ASEING we"- khyoid yu shi" we' o"» ga: yoid nyho.

³¹Houg: lang" Yesu gi nya: lo, ri Petru jhang myab myab yhoin" kaid lho: zei: wigi tid zigi «loem" jeung" da" yoem: neing: su: we" ciwim wigi loem gyam nyid lha"» ga: tid.

³²Nya: eig yug gi lhid' khoug: moo ju" vang loo" lang" uglid we' noem: lo" byug bye.

³³Houg: lang" lhid' khoug: moo nyid da" cangzoo: yigi «Nang gi Mangso da" nya: zoo: gyeung" nyang nghoid bye:» ga: Nyang: ri noku boem ago".

³⁴Nyangnu" gyid thei: tab' gu: dab lo" boem lho: Genesared meing: moo ju" vang lo" boem.

³⁵Houg: mo da" byu yi gi Yesu ri se' yu" boem yoomo:- noo mo, ri zheung: shu" nhang: kaid lho: noo phyoo" shau" mo, dangain" ri zheung: khe: shu" re" boem ago".

³⁶Nya: da" byi: thang: mo da" bain: byug moo khyalhang"- shau" tain" sho' ga: re" mho' boem. Shau" tain" mo, dangain" we' noo phyoo" mo ge lo" boem.