Read Lashi MATHE 21 Bible Online

MATHE 21 - Lashi bible

MATHE 21

¹ASEING yo" cangzoo: yi gi Yerusalem voo moo jhang lo boem ri Zhainlun boem mo Bedphage voo moo ju" lo" boem.

²Yesu gi cangzoo: eig yug ri «re" eig yug shid mo voo gung khyoo: loo" ge'- houg: ri nya: zoo: yo' tei" to" da" loozei: dadu: ri lo" myang goo" wa. Hau: zi nga" jhang lo" phoid: she: loo ge'.

³Byu dayug yug re" eig yug ri daja: ja: ga: myid: nghoid rigi ‹ASEING ci: ca" ga:› ein: tid kyoo" ge'. Houg: lang" nyang: gi loozei: ri kho ga: phoid: she: loo" nhang: zi nghoid» ga: tid kaid.

⁴Hid: su" bue" lo da" khyoo: gi Lape: dang: byeung" loo wa shid re" nghoid.

⁵Hau: da" Lape: dang: gi «Zion voo zeing: ri tid kyoo" ge' Yu" ge' re" da" khokham" gi Nu" nham da" nheigloem: yo' loozei: zoo: dang: khung: moo zhoung: wigi Nghoidbye: loozei: nya: myhi' da" nya: zoo: dang: moo zhoung wigi Re" jhang juri" bye:» ga: tid to.

⁶cangzoo: eig yug gi thu' lo" lho: ASEING Yesu tid ziyo' dakhyoo" koid: ago".

⁷Nyangnu" nyang: gi loozei: zeing yo" loozei: zoo: ri she: lho: nyangnu" nya: da" byisheing: ri loozei: atho' moo khyoid ke" boem ago". Yesu gi loozei: moo zhung: bye.

⁸Byu phung: moo" yi we' nyang: tu: nya: da" byi: ri khyoo: moo khyoid myhu" byid: boem ago". Byu dayham" we seig kung: joem ri zheung: khyau" yu boem lho: khyoo: moo myhu" byid: ago".

⁹Yesu da" shid' khyoo: thang: khyoo: cang lo da" byu myoo" sho' mo, gi «David nya: zoo: myonhoo: ngeilang: ri coung" byid: ge". ASEING da" myeing yo' ju" ri" su: gi ngi lho, nyid baja". Mangsoo ri coung" ge'» ga: tid boem.

¹⁰Yerusalem voo moo Yesu vang loo" lang" davoo goin" nhoin: nhoin: bue" lo lho: «he: yug gi hang" nghoid lha"» ga: myid: boem ago".

¹¹Byu phung: moo" yi gi «He: yug gi Galile mung" Nazared voo mo Yesu ga: da" Lapi: nghoid» ga: tid go" nyid.

¹²ASEING Yesu gi Mangso yhoem: moo" moo vang lo" ri yhoem: khoug: mo kid" ung" kid" qei mo ri lo" khaid thu' pyam' Ngei thid' mo da" zoobue" joem yo"- pheing" kyoug" ung" mo da" zhungtang joem ri tu: sain" pyam byid.

¹³Nyang: nyangnu" ri «Mangsoo tid jhoem: mougsoug" moo lhid" to" zigi ‹nga" da" yhoem: ri Mangso yhoem: ein: wa› ga: nghoid loug we' hau: yhoem: ri nanu" gi khyangtoug: lug ug dakoid: nyid ago"» ga: tid.

¹⁴Mangso yhoem: moo" moo myo, amyang mo, yo"- khyid: agi mo, ge:- ASEING jang" moo ju" re" boem. ASEING gi nyangnu" da" noophyoo" ri ge loo" nhang.

¹⁵Nghoidloug we' Khainjung moo" yi yo"- tarha" sara: yi gi ASEING koid: da" mau" pho" moo" ri zheung: myang ziyo' «David da" nya: zoo: ri coung" nghei byid: ge'» ga: zooshang mi" akyu" mho' yhoem: khoug: moo nyho: yoid nyid da" thui: ri shau" gyo: boem lang" gi nheig zheung: gyo: yo: ago".

¹⁶«He: zooshang: yi khasu" ga: nyho: nyid zi nang shau" gyoo: la"» ga: Yesu ri zheung: myid: boem. Yesu gi «ngoo shau" gyoo: bye:» ASEING gi «zooshang: yi nhoid' yo' nya: myhi noug" shug zoonu" gi ‹Nang ri coung" byid: nhang: wa shid re" jhoug" byid: bye: ga: da" Jhoem: dang: ri nanu" gi shedphyang" we ashau" nghab' yu" goo" la"»› ga: myid.

¹⁷Hau: thang: ri ASEING Yesu gi nyangnu" jang" mo gang: lho: voomoo" mo thu' lo" wigi mau myen Bethani khyoo: yhe: theung:

¹⁸Nab' kyoo no" re Yerusalem voo khyoo doem lo" da" uri Yesu gi zoo so" yoid nyid.

¹⁹Khyoo: yam moo lafoem dagam' ri myang yoomo hau: seig gam poem: khyoo yhe: lho: seig gam moo afu' tho' moo gootu: ci" we' amyang lang" ASEING tid da" zigi «Nang moo khanham we' ashi" azei: loo: baja"» ga: tid. Houg: lang" lafoem gam gi kyoug shid: loo" khari" bye.

²⁰Hau: da" khyoo: ri cangzoo: yi myang lang" gye" yu" mau" boem lho: He: lafoem gam gi khasu" wim wigi dalheing: dam kyoug shid: lo" lha"» ga: ASEING ri zheung: myid: boem.

²¹Yesu gi «gyeing" gyeing" nanu" ri ngoo tid ba. Nanu" we' loem" shoid zi aboo loo: loem" jeung" nheigloem: bo nghoid rigi he: lafoem gam ri ngoo koid: ti" yo" koid: boem wa. Houg: za: anghoid ‹he: boem ri Panglai gyid mung" khyoo: thoid loo" we'› ga: tid ri lang" houg: su" yo" bue" loo" goo" wa zi nghoid.

²²Nanu" gi loem" jeung" da" nheigloem: e" myed yo"- Akyu" mho' nghoid ri mho' ja: dangain" yo" yu boem wa" ga: tid kyo.

²³ASEING Yesu gi Kyu" mho' yhoem: moo" moo doem vang lo" lho: jhoug" byid: nyid da" uri Khainjung moo" yi yo' Yuda lu daid' yi gi Yesu da" nam, moo tain" re" boem lho: «Nang gi he: da" moo" ri hang" da" akhang" aya yo" koid: lha". he: akho: akhang" nang ri hang" byid: lha"» ga: re" zheung: myid: boem.

²⁴ASEING Yesu gi «Nanu" ri ngoo we' dang: dakhoin" myid: yu" ba. Hau: dang: khoin" nanu" yo" phoid: nghoid rigi ce: myeing" akhang" khyo" ngoo koid: zi we phoid: khyoo" wa.

²⁵Yohan gyid nyhoed kham: byid: da" zigi Mangsoo byid: da" akhang" aya khyo" nghoid la". Byu yi byid: da" akhang" aya khyo" nghoid la"» ga: myid:. Nyangnu" ngeig go" nyid zigi «Mangso da" akho akhang" khyo" koid: ein: tid nghoid rigi Yohan da" dang: ri nanu" ciwim aloem" jeung" go" ga: doem myid: wa.

²⁶Nghoidloug we' ‹byu da" akho: akhang" khyoo" koid› ein: tid rigi Meing: byu yi myoo" sho' Yohan ri lape: dayug ga: loem" boem yoomo byu yiri ngoonu" gyoug ca"» ga: wigi nyang: cang" nyang: sham: go" nyid.

²⁷Houg: su" nghoid yoomo nyangnu" gi «ngoonu" asi» ga: zheung: phougtu" ago". Houg: yoomo Yesu gi «ngoo koid da" moozoo" ri we' hang" da" akho akhang" khyo" koid ziri ngoo we' nanu" ri atid kyoo" wa» ga: tid.

²⁸Hau: thang: ri Yesu gi «nanu" khasu" ein: shau" myid go". Lu daid' dayug moo zooshang: eig yug yo. Nyang: gi nya: zoo: mang: mo" jang" moo yhe: lho: ‹nga" zoo: we" akhid" nyid" zabyid khyam: moo moo" yhe: zei: we'› ga: tid.

²⁹Mang: moo" gi ‹ngoo anau yhi:› ga: tid nghoid loug we' thang: ri nheigloem: thed' lho: khyam: khyoo yhe: lo".

³⁰Nya: phoo gi zoo: thang jang" moo doem yhe: lho: ‹Nga" zoo: we" akhid" nyid" zabyid khyam: moo moo" yhe: zei: we'› ga: tid. Nya: zoo: thang gi ‹gi bye: nga" phoo we" ngoo yhi: wam: bye:› ga: tid.

³¹Nghoidloug we' ayhi: loo: za: nyid nyid zooshang: eig yug mo khayug gi nya: phoo vho: da" khyoo: ri koid: lha"» ga: myid: yu" nyangnu" gi «Mang: mo" yug nghoid» ga: phoid: boem. Yesu gi «nanu" ri ngoo tid ba"- kheing" khyu: zoo: mo, yo" shava myiyi: yi gi nanu" da" shid moo Mangso mungdain: khyoo vang lo" nyid boem bye.

³²Yohan gi nanu" jang" moo re" lho: deung main" da" khyoo: ri jhoug" byid: nghoid loug we' nanu" nya: dang: ri aloem" jeung" boem. Nghoidloug we' khyu: zoo: mo, yo' shava myiyi: yigi nya: dang: ri loem" jeung" boem bye. He: da" akhyoo" again ri shau" myang uri lang" nanu" gi nheigloem: thed' lho: Yohan da" dang: ri loem" jeung" lo da" khyoo: abo boem nghoid da.

³³«Dangtu' gootu: ri we' doem tam" gyo: yu" ge". Zabyid sho" to" da" khyam: seing: dayug nyid' nyang: gi khyam: kyam, lho: zabyid shi" pyeig wa duang: we' du: to. Do, pyu zung we' daloem: zhug to. Hau: thang ri nya: khyam: gi khyam: moo" zei: mo, ri nghoo" byid: khoo, lho: so" lo.

³⁴zabyidd" shi" myheing: yo' jhang loo lang" nya: dei, zoo: yi ri zabyid khyam: koid: mo, jhang khyoo: khyam: phoug" zabyidd" shi" ri mho' nhang: kaid.

³⁵Khyam: moo" zei: mo, gi nya: dei zoo: yi ri lhoem: myheig yu lho: yug su: ri yug said' su: ri said'- luggo, du" su: ri du"- lhoem: koid: boem.

³⁶Hau: thang: ri khyam: seing: gi xang: shid" tho' moo je myoo: da" nya: dei zoo: yi ri doem nhang: kaid. Nghoidloug we' khyam: moo" zei: mo, gi hau: dei zoo: yi ri we' xang: shid" mo mo, ri yhangti" nyang:- lhoem: doem koid: boem.

³⁷Lo" thang moo nyang: gi ‹Nga" zoo: rigi houg: bang: phau" myang: boem wa» ga: nya: zoo: ri nyang: khyam: moo" zei: mo, jhang khyoo nhang: kaid bye.

³⁸Nghoidloug we' nyangnu" gi khyam: seing: da" nya: zoo: ri lhoem: myang lang" ‹He: yug gi moid seing: zoo: wa su: nghoid da:- Ri" ge' nyang: ri said' pyam lho: nya: da" ziyoo jonu" lhoid yu byid: pyam shang› ga: zheung: sham: go" lho: wigi

³⁹Nyang: ri myheig tei" lho: zabyid khyam: nghe: shoid khyoo du" lhei" thu' kaid wigi said' pyam boem bye.

⁴⁰«Akhid" houg: su" nghoid yoomo khyam: seing: doem ju" lo da" uri gi khyam: moo" zei: mo, ri khasu" lo koid: wa lha"» ga: nyangnu" ri myid:.

⁴¹Nyangnu" khyam: seing: ri «khyam: seing: gi hau: akhyeing" mo, ri gyeing" gyeing" nyang: said pyam wa zi nghoid. Khyam: ri nghoid loug- ashi" phyo' yo, ri khyam: phoug" main" main" nau byid: mo, gootu: byu yi ri thoid nghoo" byid: wa zi nghoid» ga: phoid: kyo" boem.

⁴²Yesu gi «lug yhoem: zhug mo she: lhei" to" da" lugloem: gi yhouggyeing: thang da" yhoem: jhoin mo lugloem: bue" loo bye. He: da" moo" gi Mangsoo koid: da" moo" nghoid. ngoonu" da" shed khoin" moo mau" pho" moo" bue" loo bye: nhung:- ga: lhid" to" jhoem: dang yi ri nanu" anghab' yu" goo" la".

⁴³Yesu doem tid «houg: su" nghoid yoomo nanu" ri ngoo gi athang agoin da" Mangso Mungdain: ri nanu" jang" mo yu pyam lho: hau: mungdain yo" moin: yi" da" ashi" yo zei: byid: wa da" Byumyu" yi da" lo, moo byid: pyam wa nghoid.

⁴⁴Hau: lugloem: tho' moo gyo" baid mo, gi gyau: moin" loo" goo" wa hang" da" tho' moo" we hau: lugloem: shau" gyo" baid su: gi mhoin' kaid wa» ga: wigi tid.

⁴⁵Yesu da" dangtu' joem ri Khainjung moo" yo" Pharishe yi shau" gyoo: lang" Yesu gi nyangnu" ri yeing lho: tid zhug nyid ziri se gyo: boem ago".

⁴⁶Houg: yoomo nyangnu" gi Yesu ri myheig tei" wa da" khyoo: sho: lo" nyid ago". Nghoidloug we' nyangnu" gi mung" byu yi ri gyoug boem ago". Khasu" wim gari Meing: byu yi gi Yesu ri Lapi: nghoid ga: loem" jeung" nyid boem yoomo nghoid.