Read Lashi MATHE 23 Bible Online

MATHE 23 - Lashi bible

MATHE 23

¹Hau: thang: ri Yesu gi Byu phung moo" yi yo' nya: cangzoo: yi ri hid: su" ga: tid.

²«Tarha" sara: yi yo"- Pharishe gi Moshe da" tarha" ri dangkang: phang shug wa shid re" amyeing" akhang" yo" jo, mo nghoid.

³Houg: yoomo houg: bang: jhoug" byid: ziyo' dakhyoo ti"- tam" gyo: cang zei: yhi: ge' nghoid loug we nyanu" nyang: gi nyang: nyang: jhoug" byid: ziyo' dakhyoo" ti"- acang boem yoomo nyangnu" koid: yhangti"- acang koid: goo.

⁴Nyangnu" nyang: gi gye" led: lho: voin yau: da" yoovoin ri subi" ri soin' foin: boem. Nyangnu" nyang: gi hau: yoovoin ri bo voin wa shid re" lo, da nyhoug" yo, we' anau tu: yu" boem.

⁵Nyangnu" koid: da" moozoo" dangain" gi mung" byu shid khoin" moo za: te: koid: shug boem. Nyang: nya: da" ngeilang: yo" lo, pu, moo tab ci: da" jhoem: dang: dab, du da" shooyid yho' ri je gyi: sho' koid: lho: void ci: boem ago". Byi: sheing: bain: byug thang: we' sheing" sheing: coeb' void to" ago".

⁶Pui" khang" moo Je reng: da" zhung tang yo"- Tarha" jung moo we' gootu: cen: nyheing to" da" joyoo ri nyangnu" vho: ago".

⁷Kid" vang" moo we' phau" myang: vhu" pid' pid wa ziri vho: ngei ago". ‹Sara: moo" we"› ga: tid wa ziri we' gyoo: ngei ago".

⁸Nghoidloug we' nanu" dangain" mo, gi nya: mang: nya: nhung" nyang: cang" nghoid lho: nanu" da" tho' moo sara: gi dayug kyeing" za: danyid yoomo nanu" nyang: cang" ‹sara: we"› ein: akhi: goo".

⁹He: mougmyid tho' moo hang" ri we' ‹phoo› we" ein: atid goo" goo. Nanu" nya: ‹phoo› gi mougkhung: tho' moo dayug kyeing" za: date: nyid.

¹⁰Nanu" mo hang" ri we' vhu" jhung: phoo we" ein: we atid goo. Ci: wim: gari nanu" moo Meshia ga: da: vhu" jhung: dayug kyeing" date: nyid.

¹¹Nanu" mo gyi: thang su: gi nanu" da" dei zoo: shi" bui" ca.

¹²Nyang: nya: gung ri tu: to' su: gi nyhoem: gyo" loo" wa. Nyang: nya: gung ri nyhoem: khyo' nyid su: gi tu: to' kaid zi shau" wa nghoid.

¹³«Akug void da" tarha" sara: yi yo' Pharishe nanu" gi joem: loo" goo" wa. Subi" mougkhoung: mungdain: khyoo: vang loo" wa ga: soin' lo" da" uri nanu" gi khoem" myhid" byid: ago". Nanu" nyang: we' avang lo" boem. Vang loo" wa ga: yoem: kaid nyid mo, ri we' vang loo" wa da" akhang" abyid: boem zigi nanu" shid re" khayhi gyoug phyoo" nghoid.

¹⁴Ayid void ci: da" tarha" sara: yi yo" pharishe we"- nanu" gi joem: lo" abye: go. Nanu" gi cougmoo" myhi, yi da" yhoem: mo ziyoo joem ri atarha" khyo" lhoid yu boem lho: Subi" gyo: du wa khyo" akyu" sheing" sheing: mho' nyid ago". He: khyoo: yoomo nanu" gi gye" gyi: lid: da"- dam ri shau" kham: zo: boem wa.

¹⁵«Akug void da" Tarha" sara: yi yo" pharishe - nanu" gi joem: lo" nyid abye: go. Nghi: zain mo byu dayug ri Yuda noku byu dayug khyo" yo" fang yu wa shid re" Nanu" gi gyid mung" gu:- tung: gung lid loo" sho' pyi" kyang: su" kyo' yen" ago". Phung: yo" fang too" bye: su: ri lang" gi nanu" nyang: mo, eig boem je myoo: sho' ngarai mung" yo" moin: yi" da" byu bui" nhang: pyam boem rigi nanu" shid re" khayhi gyoug: phoo" nghoid.

¹⁶«Khyoo: shid da" myo, jed mo, we"- nanu" gi joem: lo" abye: go. Hang" nghoid loug we' Noku yhoem: moo" myeing ri lang: lho: nheung" rigi ci: aca" ga: myid boem nghoid loug we' hau: zigti nanu" shid' re' yhoem: mo da" sheing: ri nheung" su gi hau: nheing" khoin" ri cang pyeing ca" ga: jhau" boem rigi nanu" shid re" khayhi' gyoug: hoo" nghoid.

¹⁷Ko" da" myojid' mo, we"- hau: da" sheing: ri gyeungshang: nhang: da" Mangso yhoem: yo"- sheing: gi khazi je yhoug gyen: lha"» ga: myid.

¹⁸Hang" nghoid loug Mangso da" phoin: ri nheung" rigi ci: aca" ga: myid: boem nghoid loug we' phoin: tho' mo ri nheung" su: gi nya: da" nheing" myeing" ri cang pyeing ca" jhau" ga: jhau" boem rigi nanu" shid re" khoyhi gyoug phoo" nghoid.

¹⁹Myo, jed mo, we"- hau: xoin" ri gyeungshang: nhang: da" phoin: yo' hau: xoin": gi khaloem: je yhoug gyen: jo la".

²⁰Phoin: yo" nheung" su: gi hau: phoin: yo"- hau: tho' mo xoin" du: dangain" ri bonheung" zang" bye.

²¹Noku yhoem: moo" ri nheung" su: gi hau: yhoem: moo nyid su: Mangsoo: ri bo nheing" zang" bye.

²²Mougkhung: ri nheing" su: hang" we'-Mangsoo zhung: tang yo"- houg: moo zhung: jo, su: ri bo nheing" su nghoid.

²³«Ayid void to" da" Tarha" sara: yi yo" Pharishe yi we"- Nanu" gi joem: lo" abye: go". Nanu" gi sheing: nham"- pagyoem, rin" soi: shi" mo daxi: boem mo daboem da" alu: ri byid: nghoid loug we' hau: tarha" moo bo da" je yhoug gyen: da" tarha" nyeung veung" jheddab da" khyoo:- nheig khyeig da" khyoo: yo"- deungmain" da" khyoo: rigi nanu" lid too" kho, ago". He: gu: ri we' cang pyeing" nyid ri ge'.

²⁴Myo, jed da" khyoo: shid mo, we"- nanu" gi pyoeb soid abo myhau: kaid wa shid re" gyid ri kain: shug ago". Nghoid loug we' Gola ug zeing: rigi yo" myhau: pyam nyid goo" nhung: lha".

²⁵«Akug void tarha" sara: yi yo" Pharishe yi we"- nanu" gi joem: lo" abye: go. Nanu" gi khu, bain ri atho' moo za: te: cid" lho: nghoid loug we' nheigloem: ung: khoug: moo gi myo, no, vhoo: bo- akhyeing" ashoeb- khoug" zo: mhoug zo: da" ziyo' byeung" jozi gi nanu" shid' re" khayhi' gyoug phoo" nghoid.

²⁶Myo, jed da" Pharishe yi we" nanu" da" khu, bain joem ri akhoug: moo shi" ced" san pyam ge'. Houg: su" koid: lang" adang shoid' moo we yung" lho' loo wa zi nghoid.

²⁷«Akug void Tarha" sara: yi yo" Pharishe yi we"- Nanu" gi shoo" fid" joid to" da" loeb yo" du nyid. Hau: da" loeb gi adang shoid' moo young" jo, nghoid loug we' akhoug: moo gi byu shid: shoo" youg: yo" mang boeb byeung" bo jo zigi nanu" shid' re" khayhi' gyoug phoo" nghoid.

²⁸Houg: yo' dakhyoo" ti"- nanu" we' atho' moo gi deung main" mo, ti nghoid loug we' nheigloem: ung: khoug: moo gi byu ge, akug za: te: void to" lho: yooboo yo" za: dabyeung" jo, ago".

²⁹«Akug void da" tarha" sara: yi yo" pharishe yi we"- nanu" gi joem: lo" abye: go. Nanu" gi lapi: yi da" loeb' ri koid: lho: deung byeung" mo da" loeb' ri we' shoung: yhung byid: boem da zigi nanu" shid re khayhi' gyoug phoo" nghoid.

³⁰Hau: tho' moo nanu" gi ngoonu" za: phoug" phyid" da" pyaid mo kangso' dei wa ein:- rigi Lapi: yi ri said pyam jang" moo boo wa anghoid ga: tid ago".

³¹Houg: yoomo nanu" gi Lapi: yi ri said da" nya: myid nya: zoo: yi nghoid da" khyoo: ri yhein: yu boem bye: nhung: lha".

³²Nanu" da" phoug" phyid" yi da" pyaid mo shoid' vhang: lo da" khyoo: ri lo" thang sho' dajha" cang loo" ge'.

³³Myu joem yo" lhang: myu nya: myid nya: zoo: yi we"- nanu" gi ngarai mung" moo kham: zo: wa da" dam mo khasu" koid: se' loid lo" boem wa lha".

³⁴Houg: su" nghoid yoomo nanu" ri ngoo tid nau da" zigi nanu" da" jhang khyoo lapi: yi phajhi" boo mo, Tarha" sara: yi ngoo nhang: kaid wa. Nanu" gi houg: bang: dayham" gi lhoem: said pyam lho: dayham" rigi pyang" zeing moo jen" lhang" to" boem wa. Dayham" ri gi tarha" jung khoug: moo baid lho: dayham" rigi davoo mo davoo khyoo cang khaid lo" boem wa.

³⁵Houg: yoomo ce: yooboo abo da" Abela da" suid" mo wigi yung" lho' da" Noku yhoem: yo" phoin: gyoo: mo nanu" said pyam shau" da" Barakhi nya: zoo:- Zakhari da" suid" moo ju" sho' young" lhoo mo, dangain" ri suid" shoin: nhang: boem yoomo nanu" gi yooboo dang: phyed zi shau" goo" wa zi nghoid.

³⁶Hid: yhangti" suid" shoin: pyam mo, dangain" mo, shid re" he: da" pyaid mo byu yi da" tho' moo yooboo dam shau" kham: zoo: wa ein:- nanu" ri ngoo deung" deung tid bye.

³⁷«O" Yerusalem we" Yerusalem voogung we"- nang gi Lapi: yi re" jhang khyoo Mangsoo nhang: kaid da" lagyoo: yi ri luggo, yo" du" said gyo, vhoeb' zheung gi gyo, nu" yi ri nya: dung soo" khoug: moo khe: zheung" kaid to" yhangti"- ngoo gi re" meing: byu yi dangain" ri khayhi' khe: zheung" too" noug loug we' nang nu" nyang: agyoo: nghoid ago:.

³⁸Yu" we' re" noku yhoem: moo" gi akoem: she: pyam too" wam: bye.

³⁹‹Aseung da" myeing khyang" mo ju" re" da" Mangso mainkaid su:› ga: nang tid bidnyid aju" ju" gi akhid" mo khanham we' nang ngoori; doem myang loo: zi anghoid.