Read Lashi MATHE 24 Bible Online

MATHE 24 - Lashi bible

MATHE 24

¹Yesu gi yhoem: moo" mo doem so" thu' lo" da uri Nya: cangzoo: yi gi nya: jhang tain" re" boem wigi yhoem: joem zheing: toin" shid' boem.

²Nyang: tid «nghoid bye: zigi He: yhoem: dangain" ziri nanu" myang wa nanu" ri ngoo tid ba"- he: lug yhoem: zeing gi lug daloem: tho' moo daloem: ake" too" loo sho'- phyo' sain" khyo pyam zi shug wa nghoid.»

³Yesu gi zhainlun boem tho' moo zhoung: jo, da" uri cangzoo: yi gi nya: jang" moo nyangnu" kyeing" re" lho: nyangnu" myid: da" zigi «Hau: khyoo: gi kha: yo, kha u" moo bue" loo wa lha". ASEING doem gyoo" loo wa da" bidnyid yo' he: da" thang lo" da" jang" moo ce: ja: alhoo: again myang thu' loo wa lha". ngoonu" ri tid kyoo" we'» ga: zheung: myid: boem.

⁴Yesu phoug gi «Nanu" ri hang" we' ayo" jhu, phyo' loo" baja" zid" nyid ge'.

⁵Byu myoo" sho' mo, ‹Ngoo gi Meshia nghoid› ga: nga" myeing voin lho: khyoo shu" vhang: lo boem wa.

⁶Nanu" gi vi: mo jang" mo, Gyipui" lu dang: ri shau" gyo: lo boem wa. Nghoidloug we' agyug adain goo. He: da" khyoo: gi bui" nyang bue" loo wa zi nghoid. Nghoidloug we' mougmyid thang lo" da" ayo, gi anghoid shi.

⁷Damoug: yo' damoug:- mungdain: daloem: yo" daloem:- gyipui" bue" lo boem wa joyoo khyi, khang" moo" moo phang" khoug myid leig leig loo wa.

⁸He: da" khyoo: dangain" gi Zoo: khu: wa su:- bidnyid ju" wigi no shid" re" ziyo' dadu nyid.

⁹«Hau: thang: rigi nanu" ri myheig: lho: yooboo foin: dam kaid wigi said pyam wa shid re" byu yi da" lo, moo ab pyam boem wa. Nga" myeing yoomo byu dangain" mo, gi nanu" ri ngheing" loo goo" wa.

¹⁰Hau: uri byu myoo" sho' mo gi nyangnu" loem" jeung" khyoo: mo thoem: tho: leung lo" lho: dayoug vhuloem ri dayug ung" zoo: go" wigi anoug angei go" da" zi bue" loo wa nghoid.

¹¹Hau: tho' moo gootu: mhau da" lapi: we' myoo" sho' thu' lo wigi byu myoo" sho' ri khyoo: shu" vhang: lo" boem wa.

¹²Akhyeing" ashoeb da" moozoo" myo: loo yoomo byu yi da" jheddab nheigloem: gi shoem: lo" byug boem wa.

¹³Nghoidloug we' lo" thang bidnyid ju" sho' zeung: kham: nyid su: gi khyoid yu zi shau" wa nghoid.

¹⁴He: mungdain: da" ngei bu: lu dang: ri byu bain sho' shid moo sagsi: bui" wa shid re" Mougmyid gyab' goin" kho" kyo" loo" wa zi nghoid. Hau: thang: ri mougmyid thang da" ayo, ju" loo wa zi nghoid.

¹⁵«Lapi: Daniela kho" kyoo" khare" da" ‹gyoug dain' ca" da" aco' ajhoid da"› zigi gyeungshang: da" joyoo moo yab jo, ziri nanu" myang wa.» (Mougsoug" nghab' su: se' gyoo: baja")

¹⁶«Houg: su" shau" myang da" uri Yuda mung" mo mo, gi boug gung tho' khyoo phang: lo" boem baja".

¹⁷Yhoemkhung: tho' moo nyid su: gi ziyo' yu wa shid re" yhoem: khoug: khyoo avang loo" baja".

¹⁸Khyam: yoo moo nyid su: we' nya: byisheing: yu wa ga: yhoem: khyoo aloo" loo: baja".

¹⁹Hau: da" bidnyid moo zoonu" gung ci: da" myhi' zeing yi yo"- noug" nu" shu" bang: gi soo" soo" yau: khe" da zi shau" wa nghoid.

²⁰Nanu" cae: thu' lo" da" ayo, gi xung" thu' yo, yo"- Dougno: Bidnyid ri aeung: loo wa shid re" Mangsoo jhang akyu" mho' nyid ge'.

²¹Khasu" wim gari hau: da" bidnyid moo gye" gyi: da" sho" jhen yau: khe" da" bidnyid ju" loo wa. Houg: yhi' gyeing" da" koug shu: yau khe" da" bidnyid gi Moug thu' xang: poin: mo he: gu: moo byu xangsu: yi khanham we' athoung" shau" yu shi" da" jam joug nghoid. Thang: phyang" khanham we' shau" yu" lo: boem wa anghoid.

²²Nghoidloug we' Mangsoo: gi hau: ayo, bidnyid ri ashoung" kaid nghoid rigi xangsu: byu yi hang" kangso' we yo" loid wa zi anghoid. Nghoidloug we' Mangsoo gi nyang: khyen: yu too" mo, shid re" hau: ayo, bidnyid ri shoung" kaid byid: wa nghoid.

²³«Hau: da" ayo, moo byu dayug yug gi ‹Yu" ge' he: joyoo moo Meshia nyid› ga: wigi we' Thei: joyoo moo Meshia nyid ga: wigi we' tid lo boem ri nyang ri aloem" goo.

²⁴Khasu" wim gari mhau' da" Meshia yo" mhau' da" Lapi: po" thu' lo lho: ge bue" rigi Mangsoo khyen: yu too" bye: mo, ri lang" khyoo yo" shu" vhang: sho'- alhoo: again mau" pho" moozoo" zeing yo"- zei: shug lo boem wa zi nghoid.

²⁵Tam" gyoo: ge' he: da" khyoo: abue" loo shi" ri nanu" ri ngoo tid kyoo" bye.

²⁶«Houg: yoomo gyeing" nyang: nyangnu" gi ‹Yu" ge' Meshia gi dain" pyoid yoo moo re" nyid› ga: tid boem nghoid ri nanu" athu' yhi: goo. He joyoo moo gau" nyid bye: ga tid nghoid loug we' hau: dang: ri agyo: loem" goo.

²⁷Bid thu' shoid mo bidvang shoid ju" sho'- mougkhung: ri we dangain" bang yi loo" nhang: da:- lhab' myeig lo" yhangti"- byu da" nya: zoo: doem gyoo" lo ri we' houg: su" wim loo" wa zi nghoid.

²⁸«Mang leung jo, da" khyi' khang" moo" moo Langda joem we' zheung: foem: boem wa nghoid.

²⁹«Houg: te" da" gyoug dain' jam joug khyoo: bain thoug" shau" da" hau: nyid" ri Bid gi moug: coid bue" loo" khari" wa. Lham" moo" we bang loo: wa zi anghoid. Kyi" joem gi mougtho' mo byid gyoo" lo boem wa. Mougkhung: moo jo, da" yoem: so' dangain" we' nyangnu" da" khyoo" mo nain" yu: phang: lo" boem wa.

³⁰Houg: thang: byu da" nya: zoo: gyoo" loo wa da" alhoo: again gi mougtho moo myang thu' loo: wa. Jhoem: moug" ju: lho: gyi: thang da" myo nhoo: phung" yoeb zeing yo"- Byu da" nya: zoo: gyoo" lo da" ziri mougmyid byu yi bain sho' mo lhoem: myang da" uri ngau nyid boem wa.

³¹Byu da" nya: zoo: gi laboo" zeing myeing: lo da" uri nya: da" moug: lagyoo: joem ri mougmyid myonhoo: myid: shoid khyoo nhang: kaid wigi Mougmyid dashoid mo zi dashoid khyoo thang sho' moo nyid da" ASEING khyen: too" mo, ri nyangnu" zeung: foem: nyid wa.

³²«Lafoem gam mo he: akhyoo" daja: ri jhau" yu ge'. Hau: seig gam mo akung: ako'' nu" lo lho: afu' toid loo lang" gi zain vang khoem" ju" loo bye: ziri nanu" se' ago".

³³Hau: ziyo' dakhyoo" ti"- tid kyo" lid lo da" khyoo: joem bue" lo ziri myang lang" gi nanu" da" anam, mo vang" khoem" duang moo nyang: ju" ri" bye: ziri si loo ge'.

³⁴Ngoo nanu" ri deung" deung tid ba"- he: da moo" bain sho' gi akhid" dei nyid mo abain shid: shi" ri boin: nyid ge'.

³⁵Mougkhung yo" myidjang: led: loo" nghoid loug we' nga" Mungdang: gi aled: loo" wa.

³⁶«Houg: su" nghoid loug we' He: da" moozoo" bue" loo wa da" ayo, bidnyid rigi nga" phoo mo lid' lho: hang" we' asi- mougkhung moo nyid da" lagyoo: yi we' asi- nya: zoo: we asi.

³⁷Noa da" bidnyid moo bue" lo ziyo' dakhyoo ti"- Byu da" nya: zoo: bidnyid moo we bue" loo wa.

³⁸Hau: da" bidnyid moo ti: gyid ashi shi" uri Noa gyid sang phoo yhoem: moo vang lo" da" bidnyid ju" sho'- Byu yi gi zo: lho: shug lho: myi: yu loxo' lho: koid: nyid boem ago".

³⁹Nyangnu" gi ti gyid shi, jang" moo myu: shid: doem lo" da" bidnyid ju" sho' asi aboin: loo: nyid boem ago". Byu da" nya: zoo: doem gyoo" loo wa da" bidnyid moo we' houg: yo' dakhyoo" ti"- bue" loo wa zi nghoid.

⁴⁰Hau: da" ayo, ri khyam: yoomoo byu eig yug moo" zei nyid da" jang" mo- dayug ri shu" do, lo" byug lho: dayug gi deung gyo" nyid khari" wa zi nghoid.

⁴¹Lug lheing: gyeig nyid da" myiyi: zoo: eig yug mo we' dayug rigi shu" do, lo" byug lho: dayug gi deung nyid khari" wa.

⁴²Houg: su" nghoid yoomo zed" lhid zoore" lang" nyid ge'. Nanu" da" Aseing: gi kha: yo, khakhyeing: moo gyoo" loo wa zi nanu" asi.

⁴³Yhoem: seing: gi nya: yhoem: moo khoug" vang wa da" ayo, akhyeing: ri gyeing" gyeing" nyang: se' nghoid rigi nya: yhoem: ayo" re" khau" baid phoid loo" sho' zung" nyid wa zi anghoid la".

⁴⁴Byu da" nya: zoo: gi nanu" amyid to" da" ayo, akhyeing: moo ju" ri" wa nghoid yoomo nanu" khanham we' jen" jen" koid nyid ge'.

⁴⁵«Loem loug ziyo' phajhi" bo da" deizoo: gi hang" nghoid la". hau: yug gi nya: yhoem: seing: da" deizoo: gootu: ri vhoeb' khang" lho: ayo, ju" lang" zoo: shug thug byid: wa shid re" yhoem: seing: wigi khyen: nhang: too" su: nghoid.

⁴⁶Yhoem: seing: doem ju" lo da" ayo, moo moo" loem loug zei: nyid lang" zi lo shau" myang da" deizoo: koem gi ngilho' nyid.

⁴⁷Nanu" ri ngoo deung" deing tid da" zigi yhoem: seing: gi hau: da" deizoo: ri nya: zi jo, moo jo, ri yu" goin coung: vhoeb' khang" nyid wa shid re" hau: da" deizoo: ri nyheing too" zi nghoid.

⁴⁸Nghoidloug we' hau: da" deizoo: gang: dayug gi nya: yhoem: seing: gi myab doem loo wa zi anghoid- myang" shi wa ga: myid nyid.

⁴⁹Nya deizoo: byen cang" yi ri we' youg baid lho: yhid: shug foo" zo: mo, yo"- zo: yed' shug yed nyid uri

⁵⁰Hau: thang mo hau: yug alang" nyid aboin: aso" da" da nyid moo nya: yhoem: seing: doem ju" lo wigi

⁵¹Nyang: ri eig du khyo lho: ayid void mo kham: zo: wa da:- amyen, akhyoid da" dam kham: nhang: wa nghoid. Hau: jang" moo ngoug byid' ngoug nhab' yo"- zei yang: kyeig ga: ngau nyid wa.