Read Lashi MATHE 26 Bible Online

MATHE 26 - Lashi bible

MATHE 26

¹ASEING Yesu hid: su: ga: bain jhoug" byid: lang" nya: cangzoo: yi ri tid da" zigi nanu" se' ziyo' dakhyoo" ti" eig nyid rigi

²«Lhid: kaid" da" pui" ju" wa zi nghoid. Hau: uri byu da" nya: zoo: ri said pyam wa shid re" sube" da" lo, moo" ab pyam beom wa nghoid.»

³Hau: ruri nyang: Khainjung moo" yi yo"- Yuda vhu" jhung: yi gi Kayapha ga: su: khainjung da" joyoo moo zheung: foem to.

⁴Nyangnu" gi ASEING Yesu ri zheig zoo: gau" myheig lho: said pyam wa shid re" zheung: sham go" nyid.

⁵Nyangnu" gi mung" byu joem thei" lu lhufu go" loo wa yoomo pui" uri amyheig a tei" wa khyare" tid go" to.

⁶ASEING Yesu gi Bethani voo mo manggam: dab yu" bye: da:- Ludaid' Simon da" yhoem: moo

⁷Voem: zo: nyid da" uri myhi' zeing dayug gi gye" phoug" dab shoem: nam, pyo: ja: xu: bo da" lug phyu: thug ci: re" lho: ASEING Yesu da" vhuloem tho' moo foid shoin" kaid.

⁸Hau: da" khyoo: ri nya: cangzoo: yi myang lang" nheig yu" yo: lo lho «ci: wim amyib afoo" hid: su" koid: lha".

⁹Khasu" wim gari he: da" moora: xu: ri ngei myoo" sho' mo oung" pyam lho: sho" jhen mo, ri gam byid: ri ge» ga: tid ago".

¹⁰Hau: dang: ri ASEING Yesu si lang" «ci: wim wigi he: da" myhi' zeing ri tid nhung byid: nyid go". Nyang: koid: da" moo" gi nga" shid re" gye" ge da" moozoo" nghoid bye.

¹¹Sho" jhen: mo, gi nanu" yo" khanham we' dage" yo" nyid. Nghoid loug we' ngoo koem gi khanham we' nanu" yo" dage" shau" nyid wa zi anghoid.

¹²He: da" myhi' zeing nga" da" gung moo xu: foid shoin" da" khyoo: gi Nga" gung ri myhoeb shung: wa ga: soin' khyo" nghoid da.

¹³Akhid" deing" deing nanu" ri ngoo tid ba"- Lu dang: gi ri moug myid joyoo khang moo" moo kho" kyo" lo" da" uri he: myhi' zeing ri myid boin: wa da" shid re" nyang: koid: da" moo" ri tid kyo" lo" boem wa nghoid.»

¹⁴Hau: thang: ri nya: cangzoo: daxe: eig yug moo bo da" dayug Yuda Iskarud ga gi khainjung moo" yi jhang khyoo yhe: lho:

¹⁵«Yesu ri nanu" da" lo, moo ab byid: ri ngoori ci: byid: wa go"» ga: yhe: myid. Houg: bang: gi ngei soem" xi: kyab byid: boem.

¹⁶Hau: ayo, mo wigi Yuda gi Yesu ri nyangnu" lo, moo kha: khyo" yo" ab byid: pyam wa da" khyoo: ri za: dasho: nyid lo.

¹⁷Doo cid" abo da" zooyho' zoo: pui" xang shid" nyid moo cangzoo: yi gi Yesu jhang khyoo re" lho: «ASEING shid re" lhid" kaid myen" xoin: zoo: pui" ri khayoo: nyheig nhang: nau lha"» ga: re" myid: boem.

¹⁸Yesu gi «voo khoug: khyoo vang lo" lho: byu dayug jang" moo yhe: wigi sara: tid kaid- nga" ayo, jhang loo bye: re" da" yhoem: moo led lo" pui" ri nga" cangzoo: yi yo" dage" zoo: wa ein: lo" tid ge'»› ga: tid kaid.

¹⁹cangzoo: yi we' ASEING nyangnu" ri tid kaid ziyo' dakhyoo" ti"- koid: wigi led lo" da" myen" xoin: zoo: pui" ri nyheing to" boem bye.

²⁰Hau: nyid" myen" thang; ju" loo lang" Yesu yo cangzoo: daxe: eig youg bang: yo" dage" zoo: wa shid' re zhoung: jo, boem.

²¹Hau: uri Yesu gi «nanu' ri ngoo tid ba. Nanu" mo dayug gi sube" lo, moo ngoori ab pyam goo" wa nghoid» ga: tid.

²²cangzoo: yi gi nheigloem: gye" agyo: pyo: ziyo'- «ASEING we"- hau: su: gi ngoo nghoid la". ngoo nghoid la"» ga: dayug bain dayug myid: nyid boem ago" da.

²³Yesu gi «ngoo yo' dage" zooyho' bian daloem: moo shoin" lab, zoo: su: gi ngoori ab pyam wa su: nghoid» ga: tid.

²⁴Jhoem: mungdang: moo nya: khyoo: ri tid to" ziyo' dakhyoo" ti"- shid: wa zi nghoid. Nghoid loug we' Byu nya: Zoo: ri ab pyam su: shid' re" khayhi' gyoug. Yuggi he: yug ri akhu: kaid nghoid rigi nya: shid re" je gi wa zi nghoid, ga: tid.

²⁵Yesu ri ab pyam wa da" Yuda gi «Sara: we"- hau: ab pyam wa su: gi ngoo nghoid- anghoid la"» ga: myid: uri ASEING Yesu gi «nghoid nang nyang: nghoid bye:» ga: tid.

²⁶Yesu gi cangzoo: yi yo" dage" myen" xoin: zo: nyid da" uri zooyho' ri yu lho: jeju" ri bain coung" nghei lang" zooyho' ri phe, yu wigi «he: da" zooyho' gi nga" da" gung du: nghoid yu zoo: ge'» ga: tid lho: nya: cangzoo: yiri gam byid.

²⁷zabyidd" goem ri we' yu lho: jeju" bain coung" nghei lang" cangzoo: yi ri byid: lho: «nanu" dangain" mo, shug ge'.

²⁸He: da" zigi nga" suid" nghoid. He: da" suid" yo" Mangsoo dang: theing da" dazid thoug" too" bye. Byu myoo" sho' mo da" yooboo ri khyoid pyam byid: wa shid re" shoin: pyam da" nga" suid nghoid.

²⁹Nanu" ri ngoo tid nau da" zigi akhid" mo wigi nga" pho da" mungdain: moo nanu" yo" dage" zabyidd' aseig ri shau" shug da" bidnyid ju" sho' he: zabyidd" rigi ngoo shug loo: zi anghoid» ga: tid.

³⁰Hau: thang: ri Yesu yo" cangzoo: yi gi jihkoin" ri bain coung" ngei lang" zhainlun boem khyoo thu' yhe: lo" ago".

³¹Hau: thang: ri Yesu gi «jhoem: mungdang: moo yang zung" su: ri said pyam lang" gi yang joem gi abyoo asain" bei, sain" loo" wa ga: tid to" ziyo' dakhyoo" ti" akhimyen nyang: nanu" gi ngoori she: pyam too" kho' lho: phang: sain" lo" boem goo" wam: bye.

³²Nghoidloug ngoo gi shid: jang" mo dem dei to'' lo lho: thang: ri nanu" da" shid khyoo:- Galile mung" moo yhe: loo" lang" wa» ga: cangzoo: yi ri tid kyo.

³³Petru gi «subi" dangain" ASEING ri she: pyam too" khari" nghoid loug we' ngoo gi khanham we' she: pyam khoo wa zi anghoid» ga: tid.

³⁴Yesugi «nang ri ngoo deing" deing tid ba"- khoomyen gyo, atoin: shi" ri nang gi ngoori asi ga: soem" lheing: ju" sho' ngeig pyam wa» ga: Petru ri tid.

³⁵Petru gi «ngoo gi ASEING yo" dage" bo shid: ca" nghoid loug ASEING ri asi ein: ngoo tid zi anghoid» ga: tid. Gootu: cangzoo: yi we' houg: su" zheung: bo tid boem ago".

³⁶Hau: thang: ri Yesu gi cangzoo: yi yo" dage" Geseman ga: dajoyoo moo ju" yhe: lo" boem. Yesu gi ngoo gi hau: joyoo moo yhe: lho: akyu" mho' nyid uri nanu" gi «he: joyoo moo zhoung: jo, lang" ge'» ga: cangzoo: yi ri tid khare" lho:

³⁷Petru yo" Zebedi nya zo: eig yug ri khe: shu" wigi Yesu gi nheigloem: amyen, akhoid wim loo yoomo nheig gye" koug nyid.

³⁸«Ngoo gi shid: loo" sho' nheigloem: myid myo: nyid. Nanu" gi he: joyoo moo ngoo yo' dage" gyeing" gyeing: lang" nyid ge'» ga: wigi cangzoo: soem" yug ri tid.

³⁹Hau: thang: ri shed khyoo dajhi' jhen" yhe: lho: myidjang: moo goeb' mhoug to" wigi «O nga" pho Mangsoo we"- ge, bue" nghoid yoo: gi he: kyi" khyeug da" goem ri nga" jang" mo yo" led lo" rigi led' loo" nhang: we' nghoid loug we' ngoo vho: khyo" anghoid. Nang vho: khyo" nghoid baja"» ga: akyu" mho' nyid.

⁴⁰Houg: lang" Yesu gi cangzoo: soem" youg bang: jhang khyoo doem lo" yu" rigi yhoeb' pyo: jo, zi lo" myang wigi «nanu" soem" yug gi ngoo yo" danayi: khyalhang" we' ayo" gyeing: nyid goo" la"» ga: Petru ri tid.

⁴¹Jham" ca: yu" ziri yo" oung: loo" wa shid re" akyu" mho' lho: zed" lhed nyid ge'. Nheugloem: Venyi: gi vho: ngei nyid nghoid loug we' gung du: yoem: neing: nyid» ga: tid.

⁴²Houg: mo Yesu gi da lheing: doem yhe: lho: «nga" phoo we" he: kyi" khyeug da" goem ri ngoo mo ayo" lhed: kaid lang" gi nang vho: khyo" za: nghoid baja"» ga: akyu" doem mho' nyid.

⁴³Yesu dalheing: doem ju" lo yu" uri we' cangzoo: yi gi yhoeb' myhed' jo, ziri lo doem myang khasu" wim gari nyangnu" gi myo, ayo" phang boem loo nghoid ago".

⁴⁴Yesu gi nyangnu" jang" mo, doem yhe: lho: akhang: mho' yhangti"- soem" lheing: lheing: akyu" yhe: doem mho'.

⁴⁵Hau: thang: ri cangzoo: yi jhang khyoo doem lo" lho: «nanu" gi gye: yhoeb' pyo: lho: doug no: nyid go" la". Yu" ge' byu da" nya: zoo: ri yooboo dab mo da" lo, moo ab pyam wa ayo, ju" bye.

⁴⁶Too, ge" nyhangnu" yhe: lo" boem loo shang- yu" ge' ngoori ab pyam wa su: gi ju" loo bye:» ga: tid.

⁴⁷Houg: su" ga: ASEING dang: da tid nyid shi" uri nyang:- cangzoo: daxe: eig yug moo bo da" Yuda gi thung" keing:- sham: lham: ci: da" byu myoo" sho' mo yo" dage" ju" ri" bye. Houg: bang: gi khainjung moo" yi yo" phung nheig boo yi wigi nhang: kaid mo, nghoid.

⁴⁸Yesu ri ab pyam wa su: gi nyang: yo' dage" re" mo, ri «ngoo boobug bug su: gi nanu" vhoo: su nghoid, nyang: ri myheig ge'» ga: aved tid to.

⁴⁹Yuda gi kho" ga: Yesu jang" moo dain" yhe: lho: Yesu ri boobug boug lho: tid zigi «Sara: we" ngei pyo: nyid baja"» ga: tid.

⁵⁰Yesu gi «byen cang" phoo we" nang koid: wa da" moo" ri myab myab koid: we'» ga: tid. Hau thang: ri nyangnu" re" lho: myheug wigi teing tei too" bye.

⁵¹Yesu jang" moo bo cang lo da" byu dayug gi sham: ri she: thu' yu lho: Khainjung moo" da" deizoo: dayug ri she: jab kaid ri hau: youg da" nakhyab byed' gyoo" loo.

⁵²Yesu gi «nyang: ri tid re" da" sham: ri sham: byang moo doem xang we' sham: ci: mo, gi sham: yo" shid: loo" wa» ga: nyang ri tid.

⁵³Ngoo gi nga" pho jang" mo gyi yoem: mho' nghoid rigi dab zeing daxe: eig dab tho' moo je myoo: da" mauglagyo: gyidab nga" jhang khyoo yo: nhang kaid wa zi nanu" asi goo" la".

⁵⁴Nghoidloug we' he: moozoo" gi Jheom mungdang: moo cibue" loo wa» ga: tid to" khyoo: gi khasu" koid: deing: b yeung loo wa lha".

⁵⁵Hau: thang: ri Yesu gi hau byu phung: yi ri «nanu" gi khyang toug ri myheing yhangti"- ngoori myheig wa shid re" thung" keing: we' sham: lham: we dari" go" la". ngoo ginyid khang" moo" noku yhoem: moo" moo zhoung: jo, lho: jhau" mho' nyid da" uri nanu" ngoori ci: wim amyheig atei go.

⁵⁶Nghoidloug we' he: moo" dangain" bue" loo zigi jhoem: pug moo lapi: yi lhid" to" ziyo' dakhyoo ti" deing byeung" loo wa shid re" bue" lo zi nghoid» ga: tid. Hau: uri nyang: nya: cangzoo: yi dangain" mo, myeung: too" khare" lho: phang: sain" lo" byug boem bye.

⁵⁷ASEING Yesu ri myheig loo" mo, gi nyang: ri khainjung moo"- Kayapha da" yhoem: khyoo: shu" yhe: lo" boem. Tarha" sara: yi yo" Yuda vhu" jhung: yi gi houg: moo zheung: foem: to" ago".

⁵⁸Petru gi vi" vi: mo Kayapha da: yhoem: vang" ju" sho'- Yesu thang: moo cang yhe lo". Hau: thang: ri vang" khoug: moo vang yhe: lo" lho: Yesu ri tarha" dang: kho' da" moozoo" gi khayoo: thang lo" ziri cang yu" wa da" shid re" zung" lhug bang: yi yo" dage" zhoung jo.

⁵⁹Khainjung moo" yi yo" dage" kongsi byu yi dangain" mo, gi Yesu ri yo" said pyam sho'-ajo, da" mhau da" sagsi: ri sho: nyid boem.

⁶⁰Nghoidlug we' nyangnu" gice" sagsi: we' amyang mhau da" sagsi: kham: mo, gi myoo" sho thu' lo boem. Lo" thang moo byu eig yug gi shid' khyoo: thu' re" lho:

⁶¹He: yug gi «‹ngoo gi Mangso da" noku yhoem: moo" ri phyo' pyam lho: soem" nyid" da" agyoo: moo doem yo" tu: shab too" wa› ga: tid su nyang: nghoid» ga: sagsi: to' kham: ago".

⁶²Khainjung moo" gi to' yab re" lho: nang ri houg: bang: khasu" ga: yooboo foin: nyid go" la". nang ci: aphoug tu" loo: rhe" ga: Yesu ri myid.

⁶³Nghoidloug we' ASEING Yesu gi sam" zoo: tam" to" khainjung agyi moo" gi da" dei nyid da" Mangso myeing yo" nang ri myid: yu" ba"- nang Mangso nya: zoo: Meshia nghoid. la". Ngoonu" ri tid kyoo" we' ga: myid: yu.

⁶⁴Yesu gi «nang nyang: tid abye: nghoid loug we' akhid" mo byu da" nya: zoo: gi myhang: thang su: da" lo, yo shoid moo zhoung: jo ziyo'- moug khung: mo jhoem: moug" zhoung: lho: ju" re" ziri nanu" myang boem wa» ga: nyang: ri tid.

⁶⁵Hau: uri khainjung agyi moo" gi nya: da" byid: ri lang: ceig pyam lho: «he: yug gi Mangsoo ri aphoug" akhyoid da" dang: ri tid nyid bye. Ngoonu" sagsi: gootu: avhoo: loo- Mangsoo ri aphoug" akhyoid da" dang: tid zigi nanu" shau" gyoo: bye.

⁶⁶Dang: khasu" kho' wa go"» ga: myid: ri Houg: bang: gi «yooboo myang bye: yoomo nyang: gi shid moin: yooboo yoo" bye:» ga: nyangnu" tid boem.

⁶⁷Hau: thang: ri nyangnu" gi Yesu myonhoo: moo shi" kain" byi" gyoin: lho: baid ago". Nyang ri lo, zhoeb yo' we' thoin: lho:

⁶⁸«ASEING Meshia we"- nang ri hang" khayug cikoid zi pe: kyo" yu" we'» ga: tid.

⁶⁹Petru gi tarha" yung" yhoem: pain' moo zhoung: jo uri khainjung agyi da" dei dei myiyi: zoo: dayug re" lho: wigi «nang we' Galile byu Yesu yo" dage" nyid su: nghoid da» ga: tid.

⁷⁰Nghoid loug Petru gi «nang tid nyidkhyoo: ri ngoo asi» ga: nyangnu" dangain" bang: shid khoin" moo ngeig pyam lho: yhoem: vang" khoug: khoem" duang khyoo to lo".

⁷¹Dei dei da" myiyi: zoo: goo" yug nyang: ri doem myang wigi houg: moo nyid mo, ri «He: yug gi Nazared voo byu Yesu yo" nyid su: nghoid» ga: tid.

⁷²Petru gi «hau: yug ri ngoo gyeing" gyeing" asi» ga: he: lho: deom phoug tid.

⁷³Hau: thang: daso' ri anam moo yab jo, mo, gi Petru jang" moo re" lho: «nang gi deung" deing nyangnu" mo dayug nghoid da" khyoo: nang nyang: tid nyid da" dang: mo se gyoo: bye:» ga: tid boem.

⁷⁴Petru gi «jo da" khyoo: ri ngoo gyeing" gyeing" tid nyid hau: su: ri ngoo asi. Ngoo tid zi adeung rigi Mangsoo ngoori dam: kaid baja"» ga: tid lang" gyo, toin: loo bye.

⁷⁵Hau: uri «gyo, atoin: shi" ri nang gi ngoori asi ga: soem" lheing: ju" sho' ngeig pyam wa» ga: da" ASEING Yesu tid to" da" dang: ri Petru doem myid boin: lho: nghe: shoid khyoo: thu' lo" wigi yoem" kaid yhe: ngau nyid.