Read Lashi MATHE 28 Bible Online

MATHE 28 - Lashi bible

MATHE 28

¹Dougno: Bidnyid lid: lo" lho: Labain nyid" nab kyoo myo, yoeb yoeb myang lo da" uri Magadala Mari yo"- gootu: Mari eig yug gi loeb koem" yhe: ago".

²Nyeigdain tung" hau: joyoo moo myid leig leig lo:- Mangso da" Mouglagyoo: gi mougkhung: mo gyoo" lo wigi lugloem: ri tu: phoug pyam lho: hau: da" lugloem: tho' moo zhoung: jo.

³Nya: da" aved asam" gi lhab su" myeig nyid wigi nya: da" byimi gi gyu: su" bo" bang lho: nyang: thu' re".

⁴Zung" nyid da" gyizoo: yi gi atho' tid loo: gyoug dain nain" wigi shid: mo yhangti" bue" lo" boem.

⁵Hau: moug: lagyoo: gi myiyi: eig yug ri «agyug goo"- pyang" zeing moo baid jen said pyam bye da" Yesu ri re" eig yug sho: nyid zi ngoo se.

⁶Nyang: gi hid: moo: anyid loo:- nyang: tid ziyo' dakhyoo ti" dei to' loo bye. Re" yu" ge' nyang: ri kaid to" joyoo ri yu" yu" ge'.

⁷Nya: cangzoo: yi jhang khyoo myab myab lo" tid kyoo" ge'. Nyang: gi shid: jang" mo dei loo bye. Nanu" da" shid moo Galile mung" khyoo: yhe: loo" bye nanu" ASEING yo" houg: moo doem myang goo" wa. Ngoo nanu" ri tid da" dang: ri ato" myhid goo"» ga: pyeung: kaid.

⁸Myiyi: eig yug we gyoug dain nghoid loug we' gye" gau yi ngei pyo: ziyo'- loeb mo wigi nya: cangzoo: yi re' hau: ludang: lo" tid kyoo" wa ga: hain hain zheung: gei lo".

⁹Hau: da" uri Yesu gi nya: eig yug jang" moo phyed' za: ju" lo lho: Re" eig yug ngei pyo: nyid goo" baja" ga: tid. hau: myiyi: eig yug gi Yesu jhang tain" yhe: lho: khyid moo zei: ci: wigi nyang: ri noku ago".

¹⁰Yesu gi Agyug goo" ga: nya: eig yug ri tid lo" lho: nga" mang: nhung" yi ri Galile mung" khyoo: ri" wa shid re" tid ge, kyoo" ge' nyangnu" gi hau: mung" moo ngoori shau" myang goo" wa ga: tid.

¹¹Myiyi: eig yug doem tau lo" da" uri gyizoo: yi dayham" gi voo moo" khyoo zheung: vang lo" lho: Khainjung agyi yi ri bue" lo da" khyoo: bain sho' lo" tid kyo" boem.

¹²Khainjung agyi yi yo"- Yuda vhu" jhung: yi gi zheung: foem: sham go" lho: gyizoo: yi ri ngei myoo" sho' byid: wa shid re" khyoo: sho: nyid boem.

¹³Hau: thang: gyizoo: yi ri hid: su" tid ge'. Myen" ngoonu" yhoeb' jo nung ri nya: cangzoo: yi gi nya: mang ri re" khau" yu pyam' bye: ein: tid ge" ga: tid boem.

¹⁴Gyeing" gyeing" nyang: he: da: ludang: ri zoug: phoo shau" gyoo lang gi nanu" da" tho' moo moo" amyi" wa shed re" nanu" ce: yooboo aboo ein: nyang: nyang: se' gyoo: ri ngoonu" so' tid byid: wa he: khyoo: yo' sen: lho: nanu" ci: aci' ca".

¹⁵Zung" bang: gi ngei ri yu ci: lho: nyangnu" tid kaid ziyo' dakhyoo ti" lo" koid boem. Nyang: nu" tid da" lu dang: gi akhinyid" ju" sho' Yuda byumyu" yi moo fu" jo, bye.

¹⁶Nya: cangzoo: daxe: da youg bang: gi Yesu pyeung: kaid ziyo' dakhyoo" ti"- Galile mung" mo boem khyoo: do, yhe: lo" boem.

¹⁷Nyangnu" gi nyang: ri doem shau" myang boem da" uri nyang ri nyangnu" noku boem nghoid loug we' houg: bang: mo da" yham" gi aloem" loem" yang:- danghoid boem ago".

¹⁸ASEING Yesu gi cangzoo: yi jang" moo tain re" lho: mougkhung: tho' yo' myidjang: dang moo jo, da" amyeing" a: na: dangain" gi ngoori byid: too" bye.

¹⁹Houg: su" nghoid yoomo Nanu" thu' lo" wigi khyi khang" moo" mo byumyu" bain sho' mo ri nga" cangzoo: bue" loo nhang: ge'. Nyangnu" ri nya: phoo nya: zoo: gyeungshang: Venyi: da" myeing khyang" mo baptisma ri kham: byid: lho:

²⁰Nanu" ri ngoo tid to" da" amyeing" mungdang: dangain"- nyangnu" yo" cang pyeing wa da" shid re" nyangnu" ri jhoug" byid: ge".- ngoo gi he: da" mougmyid pyaid thang sho' nanu" yo" dage" khanham we danyid nyid wa" ga: tid kaid. 1).