Read Lashi MARKU 4 Bible Online

MARKU 4 - Lashi bible

MARKU 4

¹Hau: thang: ri yesu gi Galile thoem" yam moo doem jhoug" byid: nyid. byu phung: moo" zeing nya: jhang zeung: re" boem lang" gi Byu yi soug myo loo yoo mo nyang gi lhid dakhyab tho' moo yhe: vang zhoung: jo, meing byu yi gi tung gung gyid soo" moo nyid nyid lhid gi gyid khyoo: yu yhe: lo".

²Houg: lang" nyang: gi dang tu, khyoo"- nyangnu" ri myoo" sho' ja: jhoug" byid: lho: tid zigi

³Tam" gyo: yu" ge' byu dayug gi myoug: shi" sain" wa ga: thu' yhe: lo" da.

⁴Nyang: yoo moo yhe: sain" kaid da" myoug: shi" dayham" gi khyoo: gung moo gyo" lo" ago". hau: myoug: shi' joem ri gi ngho' joem re" kuid: zo; pyam ago".

⁵Dayham gi lug phug tho' moo gyoo" lo". Myid zhoo" athu: yoomo houg: jang: youg re" boem,

⁶Hau thang: ri Bid zho: loo lang" lhab nyhau" pyam- khasu" wim ga: ri agyi: no, sho ayo" cen, yoomo nyhau" shid: lo" boem bye.

⁷Myaoug: shi" dayham" gi zu: byab gyoo: moo gyoo" lo"- zu: byab gi gyi: nghoeb lo ziyo' shivoo: poem: joem ri re" foeb, pyam yoomo-ashi" ayo" zei: loo nghoid da.

⁸Nghoid loug we' myoug: shi" dayham" gi myidjang: ge jang" moo gyo" lo" lho: houg: gi youg gyi: lo wigi ashi" zei: lo ago"- dayham" soem: xi: zhang- dayham" khyug xi: zhang- dayham" gi dashoo: zhang myo; tham: lo ago".

⁹Nookhyab dab mo, gi gyo: yu ge'. ga: Yesu dang: thang tid.

¹⁰Yesu nyang: kyeing" nghoid lang" gi nya: dang: ri shoug" gyoo: mo, dayham" cangzoo: daxe: eig yug yo' dage" nya: jang" moo re" wigi hau: dang: tu joem da" dangkang: ri phuid: kyoo" byid: wa shid re" mho' ago".

¹¹Houg: lang" nyang: gi nyangnu" ri Mangso mungdain: yo' sen: da" no, thang khyoo: ri se', gyoo: wa da" akhang"- nanu" shau" yu boem bye: go"- nghoid loug we' hau: da" akhang" ri ashau" yu mo, gootu: byu yi koem gi qei: shoem dang: tu khyo" za: se gyo: yu boem.

¹²Khasu" wim ga: ri nyangnu" gi yu" nghoid loug we' amyang - tam" gyoo: nghoid loug we' ase' gyoo: nghoid ago". Nyangnu" myang lho: se' gyo: yu boem nghoid rigi Mangso jang" moo doem tau" loo goo" wa Houg: lang" nyang: gi nyangnu" ri Yooboo khyoid pyam byid: wa ga:

¹³Houg: lang" Yesu gi nyangnu' ri he: dang: tu, ri nanu" ase' gyoo: boem rhe"- hougsu" nghoid ri dang: tu, gootu ri nanu" khasu" se' gyoo: goo" wa, lha"» ga: myed:.

¹⁴Myoug: shi" sain" su; gi hau: Mangso da" mungdang: ri sain" kaid.

¹⁵Byu dayham" gi khyoo: cang gung moo gyo" lo" da" myoug: shi": yo' du nyid boem da. Mangso mungdang: ri shaug" gyoo: lang" - satan ju" re" wigi nyangnu" moo sain" to" da" hau: mungdang: ri yu pyam' byid.

¹⁶Gootu: dayham" gi myid zhoo" athu: da" lug phaug tho' moo gyoo" lo" da" myoug: shi" joem yo' du. Hau: mungdang: ri shau" gyoo" lang" su- nyangnu" gi ngeibu: ziyo' lhoem: kham: yu ago".

¹⁷Nghoid loug we hau: mungdang: gi nyangnu" da" nheugloem: khoug: moo agyi: no, sho' ayo" cen, yoomo myang" sho' ayo" kham' nghoid ago". Hougsu" hau: mungdang: yoo mo yau: khe" zi anghoid lang" shen" yhen zi:- thoung" shau" loo lang" myad myad doem phoug lo" boem bye.

¹⁸Houg: mo gootu gi zu: byab moo sain" kaid da" myoug: shi" yo' du nyid ago", nyangnu" gi hau: mungdang: ri shau" gyo: yu boem nghoid loug we'.

¹⁹He: moug myid byu nyid yo, boin: shid re" myid myoo: ung: loug zi ngei sheing: jo, nu" amyung ashoo" yoo" jo, nau: ziyo' gootu: aja: ja: ri myo, no, vhoo" byed da" ze wigi hau: mungdang: ri foeb pyam lho: ashi" ayo" zei: loo nghoid ago".

²⁰Nghoid loug we' gootu: dayham" gi myid gi moo sain" kaid da" myoug: shi": yo' du nyid ago". Nyangnu" gi hau: mungdang: ri shaug" gyoo: lang" kham: yu lho: dayham" soem: xi: zhang - dayham" khyug xi" zhang- dayham" gi dashoo: zhang ashi" zei: lo boem.

²¹Yesu doem xo' tid zigi myikug ri nya: ke" jang: mo: da ke" to" anghoid goola? lain" khyoug: moo zhong" lhoung too" wa hougsu" anghoid lang" gi yhoeb cuang gyid" moo kaid to" zigi khayug lhoug koid yu" la".

²²Khasu" wim ga: ri amyang loo: sho' yhoem" to" ja: gi di: di: nyang: myang thu' loo wa nghoeb to" ja: dangain" we phang shug lo boem wa.

²³Nookhyab dab mo, gi tam" gyoo: ge,. baja"- ga: tid.

²⁴Nanu" shau" gyo: ja: ri zed" lho gyo: yu" ge' Houg: su" ga: nyangnu" ri tid. nanu" subi" ri leug byid: da" jo, leug mo Mangsoo gi nanu" nyang: ri; doem tau" leug byid: loo wa nghoid. Hau tho' je vigi lung byid: wa nghoid.

²⁵Yoo" su: rigi je, doem lung: byid: shi" wa"- ga: nyangnu" ri tid kyo". Ayoo" mo, ri gi nyangnu" yo" da dajhi' kyeing" zilang yu pyam byid wa ga: tid.

²⁶Yesu doem xo' tid zigi Mangso mungdain: gi hid: yo' du nyid. Byu dayug nya: yoo moo myoug: shi" yh: sain" kaid too" kho' lho:

²⁷Nyang: Myen" ri yhoeb- nyid" ri qi: doem yhoeb doem to soo" yen" koid nyid da" ayo' moo hau: shi" gi boug go' thu' lo wigi youg lo nyid. nghoid loug we hau: ashi" khasu" youg gyi: lo nyid ziri nyang: asi nghoid da:-

²⁸Khasu" wim ga: ri myidjang: gi nyang: za: nyang hau: shivoo: joem ri youg gyi: loo nhang: lho: ashi" zei: loo nhang: nyid da. Xang: shed" ri amyug thu'- hau: htang: ri gug nham: thu' ri nhang: wigi thang: thang ri gug shi" yo' byeung" da" gug shi" ri thu ri" nhang.

²⁹Gug myheung lang" yed, yo, ju" loo wigi nyang: gi gyen: goem: yo' yed yu pyam- ga: nyangnu" ri tid.

³⁰Hougsu" Yesu gi Mangso mungdain: ri ce: ja: yo' tu, tid wa lha". Ce: ja: dang: tu, ci: lho tid pang: kyoo" wa lha".

³¹Hau: zi gi nghang" shicab' yo' du nyid. nghang" shi" gi sain" kaid uri mougmyid hto' moo jo, da" ashi" jid" jo, moo jo, tho' moo je nge thang da" ajid" nghoid.

³²Nghoid loug ve- Myid jang: moo sain" kaid lang" gi youg gyi: lo wigi gootu: shi voo dangain" tho moo je gyi: re" da: abang bue" lo. - akyang: joem we' gyi: sheung: byo lo wigi hau: ayoeb moo ngho' joem soid lo soid nyid boem ago".

³³Hougsu" Yesu gi houg yhang te" dang: tu myoo sho' nyangnu" se' yo" gyoo sho' nya: mungdang kho" kho" kyo". Nyang: kho" kyo" ziyo' dakhyoo" nyangnu" se gyo: boem.

³⁴Dangtu aci: loo za: ri nyangnu" nyang: ci" we' atid kyoo" nghoid loug Yesu gi nya: cangzoo: yi yo' dage" nyid uri acang: joeb sho' phuid kyo" da.

³⁵Hau: nyid" myenthang: ri nyang- Yesu gi nya cangzoo: yi ri ngoonu" thoem" thei: tab khyoo: gu: dab loo" shang ga: tid.

³⁶Houg: lang" nyangnu" gi mung" byu yi ri too" kho' lho: Yesu gi nyang: zhoung: jo, da" lhid hto' moo cangzoo: yi yhe: do, zhoung: lho: nyangnu" dage" gu: lo" ago". gootu: lhid joem we houg: moo jo, boem.

³⁷Hau: uri ug lid moo" nyeigdain tung" hau lo wigi beung mhoid wigi lhid khyoug: moo gyid alug lug byeung" lo nyid.

³⁸Yesu gi lhid thang moo vhu" khug khyoug: lho: yhoeb jo, da:- cangzoo: yi gi nyang ri nhau" lho: Sara We"- ngoonu" noeb shid: lo" nyid ziri nang cishu" anhang: rhe"- ga: tid boem.

³⁹Yesu gi to' re" lho: ug lid ri sam: zoo: nyid we' ga: amyeung" byid:- beung: mhoid ri we' tam" loo: we' ga: tid kaid. Houg: lang" ug lid no: lo" lho: gye" myenjham" tam" lo" bye.

⁴⁰Houg: lang" Yesu gi nya: cangzoo: yi ri nanu" ciwim wigi houg: yhi' yhi toung" gyoug go" la".- Nanu" gi akhid" ju" sho' loem" jeung" myid' aboo goo" rhe" ga: tid.

⁴¹Nyangnu" koem gi gye" gyoug dain pyam boem bye- Houg: yoomo he: yug gi khayhang: te" byu nghoid lha".- ug lid yo' beung: mhoid, lang" nya: dang: ri tam" gyo: ago"- ga: nyang cang" nyang tid go" nyid boem.