Read Lashi MARKU 7 Bible Online

MARKU 7 - Lashi bible

MARKU 7

¹Houg: lang" Pharishe" yo' Yerusalem mo re" lo da" tarha" sara yi dayham" gi Yesu jhang lheungkhoem: zeung: foem: lo xoem.

²Nyangnu" gi nya: da" cangzoo: yi dayham" lo, acid" pyam loo:- asan da" lo. Wigi vhoem: zo: nyid ziri zang" myang ago". Houg: yoo mo pharishe" gi hau: khyoo: byu mung" byu yi ri tid kyo".

³Khasu" wim ga: ri Pharishe" yo' Yuda byumyu" dangain" mo, gi goo" nham, mo da" phoug" phyid" thug" ri ri cang lho: loo, shi" acid" sain pyam lo:- zoo: noem azo: yu" boem nghoid da.

⁴Hau: lho: kid" mo qei ci: lo da" zi dangain" ri we' cid" shi" acid" sain pyam zi nyangnu" azo: yu" boem nghoid da. Hau: tho' moo gootu: goem-oug" yo' gyid goem- yhoeb, joyoo: ri ced" san da' thung" ri myoo" sho' ja: ri we' nyang nung yo" yu ziyo' dakhyo" lhoung cang nyid boem zi nghoid.

⁵Pharishe" yo' tarha" sara yi gi Yesu ri myid: zigi re" cangzoo: yi gi ciwim ngoo nu" phoug" phyed" thung" ri acang loo:- asan asen" da" lo, wigi lab, zo: nyid goo" lha".

⁶Yesu nyangnu" ri «nanu" da" khyoo: ri Lapi: Esaia tid to" zi gi khayhi' deung nyid lha". Nanu" gi ayid void mo, nghoid boem da:- Esaia gi Nya: Lapi: dang: moo Byu he: myu" gi nyangnu" da" nhoid yid mo za: ngoori phau" myang: ago". Nyang: nu" nheigloem: gi gyeing" nyang ngoo yo' we gang jo.

⁷Nyangnu" gi byu yi da" jhoug" dang: ri Nga" tarha" nghoid khyo" jhoug" byid: nyid boem wigi nyangnu" gi akoem: moo za: goeb pid nyid boem" ga: lhid to" ziyo' dakhyoo" ti" nghoid nyid.

⁸Nanu" gi Mangso da" amyeung" dang: ri to" pyam kho' lho: byu yi jhoug" byid: thung" ri joem ri phau" cang nyid ago"» ga: tid.

⁹Xo, lho: Yesu gi «Nanu" gi nanu" nya: da" thung" ri ri yo" phau" cang wa shid re" Mangso da" amyeung" dang: joem rigi gye" shoeb shoeb za: ngeug she: pyam boem abye:.

¹⁰Moshi gi re" myhi, re" phoo ri phau" myang: we' ga: tid to"- nya: myhi' nya: phoo ri nheing" dang: tid mo, hang" we' deung" deing nyang: ca" ga: amyeung" byid: to".

¹¹Nghoid loug we nanu" gi byu dayug yug da" nya: myhi' anghoid lang" nya: phoo ri pang" thoug wa daja: ja: yoo" nghoid loug we' hau: zigi Koban nghoid (Mangsoo ri byid: too" bye: da" jhung: shug nghoid ga: tid vigi-)

¹²Nyang: gi nya: phoo- anghoid lang" nya: myhi, ri Apang" ca" loo:- ga: nanu" jhoug" byid: ago".

¹³Hidsu" nanu" da" phoug" phyid" thung" ri nanu" lo, lid jhoug" byid: ziyo' - Mangso mungdang: ri gi jang" pyam boem bye- hid: yhang: te" zi gootu: myoo" sho' ja: we' nanu" koid shi" ago".

¹⁴Houg: lang" Yesu gi mung" byu yi ri nya: jhang khyoo: doem khe: yu lho: nyangnu" ri nanu" dangain" mo, nga" dang: ri tam" gyo: yu" lho: se' gyo: yu ge".

¹⁵Tung: gung khyoo" byu dayug gung: khyoug: khyoo: vang lo ja: ce" noem nghoid loug we' nyang: ri aco' ajhoid ayo" bui" nhang: byu dayug da " gung mo thu' lo zi gi nyang ri aco' ajhoid' yo" bui" nhang..

¹⁶Shoug" gyo: ja: nakhyab dab, mo, gi tam" gyoo: ge'.

¹⁷Yesu gi mung" byu yi ri nyhed: too" khre" lho: yhoem: khyoug: khyoo: ju" vang loo" lang" nya: cangzoo: yi gi houg su" tid nyid zi ri phoid: kyoo" wa shid re" mho' ago".

¹⁸Yesu nyangnu" ri myed:- nanu" we' gootu byu joem ti" ase' gyoo: shi" goo" nhung: lha". tung gung khyo" Nanu" woendong: khyoo: vang lo ja: ce" noem nghoid loug we' Nanu" ri aco' ajhoid ayo" koid zingna nu ase gyoo: goo" la".

¹⁹Khasu" wim ga: ri hauzi gi nanu" nheigloem: khoug: khyoo: vang lo" zi anghoid- nghoid loug we' voem: doug: kho' khyoo: vang lo" wigi gung doem mo doem thu' lo" (hid: su: tid nyid zigi zoo: shug dangain" zoo wa zi ge nyid ga: Yesu tid fu".)

²⁰Nyang: xo' lho: «byu dayug da" ung: khyoug: mo thu' re" ja: gi byu ri aco' ajhoid yo" bui" nhang:» ga: tid.

²¹Khasu" wim ga: ri byu dayug da" ung: khyoug: nheigloem: mo akhyeung" ashoeb da" moo" zei: wa zi myid thu' lo da:- soem" lid sho: zi lhoid zi Byu said zi

²²Myi: lhoid lang lhoid go zi jhu phyo' go" khyoo: - mhau' nyam khyoo:- myed, nau: zi gei sang: khyoo:- nghoid boin: ziyo' akoo" apya doid koid da" khyoo: yo' age khyoo: myoo" sho' thu' lo nyid zi gi

²³Hid: te" akhyeung" ashoeb ja: dangain" gi byu dayug da" ung: khyoug: moo thu' re" lho: nyang ri aco' ajhoid yo" bui" nhang:- ga: tid.

²⁴Houg lang" Yesu gi hau: joyoo mo to' lo" lho: Turu meing: ayam, khyoo: yhe: lo". Nyang: gi yhoem: daloem: moo yhe: theung: nyid. Hau: zi hang" ri we' asi nhang: noug nghoid da:- nghoid loug we' nyang: ayo" gau" jo, nghoid da:-

²⁵Myi: yi daja" zoo: myi nu" ri yu vang joung" ci: da:- myi: yi: myhi, dayug gi Yesu re" ju" nyid ziri shaug" gyoo: yo' Yesu khyid: yang: moo re" goeb pid.

²⁶Hau: myi: yi: myhi, gi tungbau byumyu" nhoid wigi suri Phiniki mung" byu nghoid da:- nyang: gi Yesu ri nya: myiyi: zo: da" khyoug: mo hau: yu ri khaid thu' pyam byid: wa shid re" mho'.

²⁷Yesu gi zoo: shang: yi ri shi" zho" ca:- ga: phoug tid zoo: shang: yi da" voem: ri yu lho: lakhuid" joem ri pyam byid: wa zi gi agi nghoid da" ga: tid.

²⁸Myiyi: myhi, gi nghoid bye: sara we"- nghoid loug we' lakhuid" joem lang" zoo shang: yi zo: khyo, to" da" zoo: bue" gyid mo, voem: cab, joem ri shau" zo: ago"- ga: nyang: ri phoug tid.

²⁹Yesu gi myiyi: myhi, ri nang hougsu" tid yoomo yhoem: khyoo: tau" loo" re'- hau: yu gi re" zoo: mo phang: thu' lo" ziri nang myang lha"- ga: tid.

³⁰Nyang: yhoem: moo ju" lo" uri yu gi nya: zoo: mo phang: thu' lo" byug wigi nya: zoo: gi yhoeb cuang tho' moo yhoeb jo, lang" ziri lo" myang.

³¹Houg: lang" yesu gi Turu meing: mo doem tau" phang: lo uri Sidun meing: ri lid too kho' lho: Dekapoli meing: mo daxi: vo ri lid' kho' wigi Galile thoem" khyoo: ju" yhe: lo".

³²Byu dayham" gi noo phyoo" shau" ziyo' myeung" abue" da" nu" jed dayug we' Yesu jhang shu" re" wigi nya: tho' moo lo, ki" byid: wa shid re" Yesu ri mho' ago".

³³Houg: lang" Yesu gi mo, phung: mo nyang: ri za: gootu: dajhoin: khyoo: shu" thu lo" wigi hau: youg nukhyung: khyoug: moo nya: lo, nyhoug: thau" kaid byid: lho: nya: yhoo: moo lo, nyoug" moo shikaim" teug wigi thoug" byid:.

³⁴Hau thang: ri Yesu gi - moug: khung: khyoo: tu: yu" lho: so moo" she: wigi hau: yug ri Ephata ga: tid da:- Hau dang: kang gi hau: zigi bang" loo" we' ga: zi nghoid.

³⁵Houg: lang" nyang:- nya: nukhyab bang" lo" ziyo' vhoo: tei" zi boid: lo" byug wigi yau: khe" khyoo; aboo loo za: nyang: gi dang: bui" bui" za: tid lo shid" lo. .

³⁶Yesu gi hau: khyoo: hang" ri we' atid kyoo" wa shid re" mung" byu yi ri amyeing" byid:- nghoid loug we' nyangnu" gi je- hau: khyoo: je tid lo" ago".

³⁷Hau: ludang: ri shau" gyo: mo, dangain"- atho' tid loo sho' gyo: mau" pyam boem - nyang: gi ja: khang" moo" ri shoeb shoeb za: koid da:- nujed mo, ri we' nu: gyoo: nhang: lho: nhoid jed' mo, ri we-dang: tid nhang:- ga: tid ago".