Read Lashi MARKU 9 Bible Online

MARKU 9 - Lashi bible

MARKU 9

¹Houg: lang" nyang gi nyangnu" ri ngoo nanu" ri gyeung" nyang: tid zigi Mangso mungdan gi yoem: so' yo' ju" re" ziri ashau" myang myang gi hid: Moo nyid mo, mo dayham" gi ashid: shi" goo" wa, ga: xo' tid.

²Hau: thang: khyug nyid" kyo: ri Yesu gi Petru- Yaku yo' Yohan ri nyang yo' dage" boem myhang: daloem khyoo: shu" do, lo". Nyangnu' da" shid khoin" moo nyang:- Yesu gi yoeb bang thed lo" byug.

³Nya: byimi bang lo ziyo' bang: bang: phyu: loo". Moug: myid tho' mo byimi cid" zoo: mo, hang" we' houg: yhi' bang: bang: phyu: sho' ayo" ced" phyu: nghoid ago".

⁴Hau thang ri Yesu yo' Moshe Elia dang: tid go" nyid ziri zang zoo: seom" yug gi myang boem.

⁵Houg: lang" Petru gi Yesu ri-Sara we"- ngoonu" he: joyoo moo nyid ri khayhi' gelha? Aseing: shid re" zoem" daloem: Moshe shid re" zoem" daloem:- Elia shid re" zoem" daloem:- zoem soem" loem ngoonu" ri koid nhang: we'. ga: tid.

⁶Khasu" wim ga: ri nyangnu" gye" gyoug pyam boem wigi nyang ci: tid wa ziasi, loo:-

⁷Hau thang; ri Jhoem: moug" dathei" thu' lo wigi nyangnu" ri lo shoem" nghoeb pyam da:- jhoem: thei" khyoug: mo He: yug gi ngoo jhedab da" nga" zoo: nghoid- nya: dang: ri tam" gyoo: ge' ga: thui: meung thu' lo.

⁸Houg: lang" nyangnu" gi ayam aqei: khyoo: nyid, dain tung" yu kaid ago"- nghoid lug we' Yesu mojain" lho: hang" ri we' amyang lo: boem nghoid da:.

⁹Hau: boem tho' mo nyangnu" doem tau" gyo" lo nyid uri Yesu gi nyangnu" ri byu nya: zoo: shid: jang" mo adoem dei to'' loo loo gi nanu" myang bye: ziri hang" ri we' atid kyoo" goo" ga: amyeng" byid: to".

¹⁰Nyangnu" ri nya: da" amyeung" dang: ri gyo: cang boem nghoid loug we' shid: jang" mo doem dei to' lo ga: zigi ce: ja: nghoid lha".- ga: nyang: cang" nyang: tid sham: go" nyid.

¹¹Houg: lang: nyang: nu' gi Yesu ri Elia shi" xang: shed" ju" ri wa ga: Tarha" sara yi cikoid tid to" lha"» ga: myid: boem.

¹²Nyang: doem tid zi gi nyangnu" ri ja: khang" moo" jen" jen" soin' nyheung too" wa shid re" Elia gi gyeung" nyang: xang: shid" ju" ri" wa nghoid. Nghoid loug we' jhoem: mungdang: moo byu nya: zoo: gi khyeug shu: zi myoo" sho' kham zo: lho: ngeug pyam zi toung" shau" wa ga: cikoid tid to lha".

¹³Ngoo nanu" ri tid zigi Elia gi ju" re" abye:- nya: khyoo: ri jhoem: mougsoug" moo tid to" ziyo' dakhyoo"- nyangnu" vho: khyo" nyang: ri koid yu boem bye:-

¹⁴Nyid da" cang: zoo yi jhang zheung: ju" loo lang" nyangnu" ayam aqei: moo byu phung: moo" zheing: zeung: nyid boem ziyo' tarha" sara dayham" yi gi nyangnu" yo' tid ngeug go" nyid ziri nyangnu" lo" myang boem ago".

¹⁵Meing: byu yi gi Yesu ri myang lang" gye" mau" zoo re" nya: jhang tang" yhe: lho: tau, yu ago".

¹⁶Yesu gi nya: cangzoo: yi ri ce: ja: khyoo ri nanu" nyangnu" yo' tid ngeug go" nyid go"- ga: myid:.

¹⁷Mo, phung: mo byu dayug to' re" lho: sara moo" we" ngoo re" jang" moo nga" zoo: ri shu" re" khasu" wim ga: ri nyang gi vang lho: dang; ayo" tid su nghoid.

¹⁸Hau: yu vang zhung: khang" moo"- myid jang: moo baid lheung: kaid lho: nhoid mo nyoeb du: athei" thei" thu' wigi zei kyeug lho: gunggoin" goin" kyoung: thain: loo" loo" wim nyid. Hau: yu ri khaid, thu' byid: wa shid re" re" cangzoo: yi ri ngoo mho' nghoid loug we' nyangnu" ayo" khaid thu' byid: boem nghoid da:.

¹⁹Yesu gi nyangnu" ri loem" jeung" myid, abo da" byumyu" we"- ngoonanu" yo' khamyhang ju" sho' nyid nyid wa lha". Ngoo nanu" ri kha: myhang ju: sho' zeung: kham byid: wa lha".- Hau: yuggi nu" ri nga" jhang shu" ri ge' ga: tid.

²⁰Nyangnu" gi hau: yug gi nu" ri Yesu jhang shu" lo ago"- hau: u ri Yesu ri myang lang" hau: yuggi nu" ri lang: thain: joeb loo" nhang: lho: myidjang: mooleung baid lo" ziyo' nhoid mo nyoeb du" athei" thei" leung lu: yen".

²¹Yesu gi nya: phoo ri-nyang: hidsu" bue" zi khamyhang nghoid bye: la".- ga: myid. Nyang: gi zoo shang: yo, mo nyang: nghoid bye: ga: nyang: phoug tid.

²²Yu gi nyang: ri said pyam wa ga: myoo" sho' leung:- nyang: ri myi: moo gyid moo baid zei, kaid kaid wim nyid. Nang yo" bue" nghoid rigi nga" phoo tang: ri nheug khyeug ziyo' pang" thougyu we'.

²³Na nyang: nghoid bye: Yesu gi yo" bue" nghoid rigi loem" jeung" nheigloem: boo su: shid mo gi ja: khang" moo" yo" bue" zi nghoid ga: tid.

²⁴Houg: lang" nyang: hau: zoo shang: nya: phoo gi ngoo loem" jeung"- nga" loem" jeung" myid' atham: ngoori bo pang" thoug yu we' ga: ngau thu' lo.

²⁵Yesu gi mung" byu yi nya: jhang gei zeung: phoung lonyid ziri myang lang" hau: akhyeung" da" yu ri nhoid jed, nu jed da" yu we"- ngoo nang ri amyeung" byid: bye:- yuggi nu": jang" mo thu' loo, we' nyang: moo khanham we' adoem vang loo" loo:- ga: nheug yo: kaid.

²⁶Hau: akhyeung" da" yu gi yoid nyho: lho: hau: yuggi nu" ri lang: thain; joeb loo: nhang: lho: nya: khyoug: mo thu' lo,- yuggi nu" we' shid: mang yhang: ti" daleung jo, lo:- byu myoo" sho' mo, gi nyang: shid: abye: ga: coem tid ago".

²⁷Nghoid loug we Yesu gi-hau: yug gi nu" da" lo, moo zei: lho: she: to' kaid da:- houg: lang" hau: yuggi nu" gi to' yab re".

²⁸Hau thang; Yesu gi yhoem: khoug: khyoo: doem vang lo" wigi nyang: kyeung" nyid uri nya: cangzoo: yi gi nyang: ri ngoonu" gi hau: yu ri ciwim wigi ayo" khaid thu' pyam boem lha".- ga: myid: boem.

²⁹Yesu gi nyangnu" ri akyu" mho' khyo" za: anghoid rigi gootu: ce" khyoo" we' he: ja" yu ri ayo" khaid thu' pyam- ga: tid kyo".

³⁰Yesu yo' nya: cangzoo: yi gi houg: mo to' lo" lho: Galile khyoo: lid yhe: lo" ago"- houg: moo nyid khyoo: hang" ri we' Yesu asi nhang: noug nghoid.

³¹Khasu" wim ga: ri Yesu gi nya: cangzoo: yi ri byu nya: zoo: gi sube" da" lo, moo ab byid: pyam zi shau" wigi nyangnu" gi nyang: ri said pyam boem wa nghoid. Nghoid loug we-said pyam thang: ri soem" nyid" ri doem dei to'' loo: wa ga" jhoug" byid: bye.

³²nghoid loug we' nyangnu" gi nyang" jhoug" byid: bye da" dangkang: ri ase' gyo: boem nghoid da:- nghoid lug we' nyangnu" gi nyang: ri avoem" myid: yu" boem.

³³Yesu yo' na: cangzoo: yi gi Kapenaum voo khyoo: ju" re ago". Yhoem: khyoug: moo yhe: vang loung" jo, thang: ri Yesu gi nya: cang" zoo: yi ri nanu" gi khyoo: laid moo ce: noem tid ngeug go" boem lha".- ga: myid:.

³⁴Nghoid loug we' nyangnu" gi nyang: ri ayo" sho' kyo" boem khasu" wim gari nyangnu" gi khyoo: laid moo nyangnu" mo hang" jegyi: thang su: nghoid da" khyoo: ri nyang: cang" nyang: tid ngeug goo" yoomo nghoid.

³⁵Houg: lang" Yesu gi zhoung: jo, lho: cangzoo: daxe: eig yug ri khe: yu wigi nyangnu" ri tid zi gi shid' moo nyid noug su: gi dangain" mo, thang: moo nyid da" hau" lho: dangain" mo, da" dei zoo: ca"- ga: tid.

³⁶Yesu gi zoo: shang: dayug ri shu" yu lho: nyangnu" shid' khoin" moo yab jo, nhang› Hau: zooshang: ri nya: lo, wigi gaid, zei: zoore"- nyangnu" ri zooshang: mi" mo hid: yhang: te" zooshang: dayug ri nga" myeung khyo" lhoem: kham: yu su: hang" nghoid loug we' ngoori lhoem: kham: yu zi nghoid bye:- Hougsu" ngoori lhoem: kham yu su: hang" nghoid loug we' ngoori za: lhoem: kham: yu zi anghoid- ngoori nhang: kaid su: ri we' lhoem: kham: yu bye"- ga: tid.

³⁷

³⁸Yohan gi nyang: ri Sara we"- re" myeing khyo" yu khaid thu' pyam nyid su: dayug ri ngoonu" myang. Nghoid loug we' nyang: gi ngoonu" yo' dage" cang yen" su: anghoid. Yoomo- ngoonu" nyang: ri toem pyam khoo, bye"- ga: tid kyo".

³⁹Yesu gi nyang: ri atoem goo"- khasu" wim ga: ri nga" myeing khyo" mau" pho" moo" bain zei: thang: ri nga" khyoo: ri age da" dang:-xei xei zoo: yo" tid byu hang" aboo.

⁴⁰Khasu" wim ga: ri nyhang" ri athoug theing su: gi nyha" shoid mo byu nghoid nyid.

⁴¹Ngoo nanu" ri deung" deung tid zigi nga" byu yi nghoid ago" ga: khyo" wigi nanu" ri gyid dagoem shoin: jhug su: hang" nghoid lug we' gyeung" nyang: jhung: shug shau" kham: yu wa nghoid.

⁴²Hougsu" wigi ngoori loem" jeung" nyid da" he: zooshang mi" mo dayug yug ri loem" jeung" nheigloem: ze" phyo' byid: su: hang" nghoid sho' lug we' nya: leung zeung: moo lug lheung: je yi gyab, tei" lhang" lho: gyid thoem" khoug: khyoo: du" zei, kaid zigi nya: shid mo je ge nyid.

⁴³Re" lo, wigi re" loem" jeung" khyoo: ri ze" phyo' byid: nghoid rigi hau: lo, ri phyed pyam we'. lo, eig lo, goin" yo' myi: khanham we' ashid: ashoem: lo" da" myi mi: thoem" moo gyoo" loo" wa tho moo lo, dashoid adab lo: zi kangso. dei shoid khyoo: vang loo" wa zigi re" shid re" je ge'.

⁴⁴

⁴⁵Re" khyid: gi re" loem" jeung" khyoo: ri ze" phyo' pyam byid: nghoid rigi hau" khyid: ri phyed pyam we' khyid: eig khyid: goin yo' Myi: khanham we ashid: ashoem: lo" da" myid mi: thoem" moo gyo" loo" wa tho' moo Khyid: dashoid adab loo: kang: so' dei khyoo: vang loo" wa zigi re" shid mo je ge nyid.

⁴⁶

⁴⁷Re" myo, jed" wigi re" loem jeung" khyoo: ri lhu: phyo' pyam nghoid rigi hau ziri yu pyam we' myo, eig jid" goin" zi ngarai mung" moo khyo, pyam wa tho' ri gi myo, dajid" kyeing" yo' Mangso mungdain: vang loo" shid mo re" shid re" je ge nyid.

⁴⁸Nyangnu" ri zo: da" lug dung; we' ashid:- ngarai mi we' khanham we' ashid: anoem: dadab nyid.

⁴⁹Zooxoin" ri xoo" kaid lho: kyeung shang: pyam ziyo' dakhyoo"- byu dangain" ri we' myi: wigi kyeung shang: loo wa.

⁵⁰Xoo" gi ge nyid nghoid lug we' xoo" bei: lo" byug lang" gi hau: xoo" ri ngham" sho' nanu" khasu" doem yo" koid yu goo" wa la". nanu" khyoug: moo zoem" khau: da" xoo" bo jo, wigi dayug yo' dayug- nyang: cang" myenjham" ga: nyid ge' ga: tid.