Read Lashi LUKA 1 Bible Online

LUKA 1 - Lashi bible

LUKA 1

¹Myo, nhoo: bug thu' yoeb bang nghoid da" Thophilu we"- Nyhangnu" loem: khau loem" jeing" da" khyoo: moo" mo apoem: ayang: nghoid da" khyoo: joem ri lhid" too" mo, myoo" sho' bo nyid boem bye.

²Houg: yoomo hau: da" khyoo: joem ri myojid" myang da" sagsi: yi nghoid wigi Aseing: Yesu da" khyoo: lu dang: gi, ri kho" kyo" da" byu yi kho" to" ziyo' dakhyoo" ti" Jhoem: mougsoug" sara: yi gi koid: lhid" xoem" to" da" khyoo: nghoid.

³Ngoo nghoid loug we' hau: da" khyoo: joem dangain" ri bue" shed" lo da" ayo, mo nyeing" za: cang myang yen" su: nghoid ziyo' dakhyooti.

⁴Khyang: khyang: yo" nghab wa da" shid' re" akhyoo" jang da" jhoem: pug dapug yo" bue" ri gi wa ein: myid soin. Aseing: shau" gyo: da" khyoo: joem ri joeb sho' Aseing: ri si' nhang: noug: yoomo he: da" jhoem: pug ri lhid" kaid da" zi nghoid.

⁵Yuda khokham" Herod da" pyaid moo Zakhari ga: da" khainjung agyi dayug nyid. Nyang: gi Abia ga: da" khainjung phung: moo boo su: nghoid. Nya: yhoem: seing: myhi' gi Elisabed ga: zi nghoid. Elisabed we khainjung akung: ako' mo nghoid.

⁶Nya: eig yug goin" - Mangso da" shid' khoin" moo deing: byeung" su: eig yug nghoid. Mangso da" mungdang: bain sho' yo"- Mangsoo pyeing: to" da" dang: dakhoin" we' ashoid loo: cang byeung" su: tang: nghoid.

⁷Nghoidloug we' Elisabed gi zoo: ayo" bougdung: nghoid da. Nya: eig yug goin" su- pyaid gye gyi: bye: ago".

⁸Danyid: nyid" ri Zakhari gi nyangnu" phung: moo moo" eung: wigi Mangso da" shid' khoin" moo No ku" yhoem: moo" moo khainjung da" moo" yhe: zei: nyid uri

⁹Khainjung da" thung" yo' dakhyoo" ti"- Me" eung: loo yoomo No ku da" yhoem: moo" khoug: moo gyeungshang: da" yab moo vang lo" lho: nam pyo: da" shoem: lo" nghe, nham xoin" to" nyid.

¹⁰Houg: su" myi: nghi xoin" to" nyid da" uri re" bo noku da" byu myoo" sho' mo, gi nghe: shoid moo Akyu" mho' nyid boem.

¹¹Hau: da" uri Mangso da" moug: lagyoo: gi Zakhari da" shid' khoin" moo thu' lo wigi nam pyo: da" shoem nghe xoin" to' byid: da" phoin: lo, yo shoid moo re" yab jo.

¹²Zakhari gi Mouglagyoo: ri myang lang" nheigloem: moo dain' gyoug nain" nyid.

¹³Nghoidloug we' Mouglagyoo: gi Zakhari we" agyug Mangsoo gi nang mho' da" Mangso thui: ri tam" gyoo: byid: bye. Re" myhi' zeing Elisabed gi yuggi zoo: agyid asoo: yo" khu: loo wam bye. Hau: zooshang: ri Yohan ein: myeing myheing byid: wa zi nghoid.

¹⁴Nang gi gye" gau yi ngei pyoo: wa Hau: zooshang: khu: loo yoomo Byu myoo" sho' mo, we gau yi ngei pyoo: goo" wa nghoid.

¹⁵Nyang: gi Mangso da" shid' khoin" moo gyi: sheung: su: nghoid wa. Nyang: gi zabyid yhid: yo' yed coid ja: yhid: ri shug wa su: anghoid.

¹⁶Israela Amyu" myoo" sho' mo, ri nya: da" Mangso jhang khyoo: yo" doem shu" loo" wa su: nghoid.

¹⁷Aseing: Meshia da" shid' khyoo: gei yhi: su: nghoid lho: Lapi: Elia yo' dakhyoo" ti"- yoem: vhoo" phung: yoeb gyi: wa su: nghoid. Nyang: gi nya: pho, ri nya: zoo: yi yo"- doem veing" goo" nhang: wa zi nghoid. Mangsoo ri gyikoid nyid mo, ri deung main" da" phajhi" ri doem yoo" nhang: wa nghoid. Aseing: shid' re- jen" jen" nghoid wa shid' re" Aseing: da" Byumyu" yi ri nyheing soin byid: wa nghoid ga: Zakhari ri tid.

¹⁸Zakhari gi hid: su" bui" wa zigi khasu" se' bui" wa ngoo we' mangzoo: danghoid lo. Nga" myhi' zeing we' pyaid gyi: bye: ga: Mouglagyoo: ri dang: phougtu.

¹⁹Mouglagyoo: gi ngoo gi Mangso da" shid' moo yab jo da" Gabriela nghoid nyid Nang ri he: da" lu dang: gi re" tid kyoo" wa shid' re" Mangsoo gi ngoori nhang: kaid zi nghoid.

²⁰Tam" gyoo: we' nang gi nga" dang: ri aloem" jeing" yoomo he: da" moo" bue" lo da" bidnyid ju" sho' dang: ayo" tid loo: za: nhoid jed loo" zi nghoid ga: tid.

²¹Byu yi gi Zakhari ri lang" nyid boem- Zakhari No ku" yhoem: moo" khoug: moo lo" myang" nyid byug ziri mau" nyid boem.

²²Zakhari gi No ku" yhoem: moo" khoug: mo thu' lo da" uri dang: ayo" tid loo: yoomo Mangso yhoem: moo" khoug: moo yoeb myang" thui: gyoo: kho" da" khyoo: ri nyangnu" shau" boin: lo boem. Zakhari gi myeing" dau' byug yoomo lo, tu kyeing" te: tu lho: za: danyid lo.

²³Hau: thang: ri nya: da" moo" bain lang" gi yhoem: khyoo: lo.

²⁴Ayo, akhyeing: dajhi myang" loo" lang" Nya: myhi' zeing Elisabed gi gung lid: loo yoomo lham" moo" wim khyab goin" yhoem: khoug: moo za: daloung" jo, lo.

²⁵Elisabed gi akhid" ngoori Mangsoo gi jeju" byid: bye. Ngoori subi" juang" yi doin: khyo, da" khyoo: ri Aseing: wigi byug loo" nhang: bye: ga: tid nyid.

²⁶Elisabed gung lid: zi lham" moo" khyug khyab myang" lo" da" uri Mouglagyoo: Gabriela ri Galile mung" Nazared voogung mo zoomyi: dayoug jhang khyoo: nhang: kaid.

²⁷Hau: da" zoomyi: zoo: gi David khokham" mo xo' gyoo" lo da" Yoseb ga: da" yuggi zoo: yo" loxo' wa shid' re" dang: myid: too" su: nghoid. Hau: myiyi: zoo: da" myeing gi Mari ga: zi nghoid.

²⁸Mouglagyoo: gi nya: jang" moo re" lho: goo" ki" lid: da" jeju" shau" kham: zo: da" myiyi: nu" we"- nang gi ngei pyoo: yug yoo bye: ga: tid.

²⁹Hau: dang: ri Mari shaug" gyoo: lang" nheigloem: amyen akhyoid wim lo wigi He: da" Mungdang: gi khasu" nghoid wa la"» ga: myid: mau" nyid.

³⁰Mouglagyoo: gi Mari we" agyug- nang gi Mangso da" shid' khoin" moo myonhoo: bug thu' sheing" jhu" bye.

³¹Nang gi gung lid: lo lho: Yuggi zoo: da" agyid asoo: ri yo" khu: loo wa Hau: yuggi zoo: ri Yesu ein: myeing myheing byid: ca.

³²Hau: zooshang: gi gyi: sheung: loo wa Myhang: thang da" Mangso nya: zoo: ga: myheing shau" myheing wa. Aseing: Mangsoo gi Nya: phoo David da" khokham" khoo" nyang: ri byid: wa zi nghoid.

³³Nyang: gi Yaku da" Byumyu" ri byeing abyid: loo" vhoeb khang" wa. Nyang: zhoung: da" khokham" khoo" mo kha: nham we' gyoo" loo: wa zi anghoid ga: Mari ri tid.

³⁴Ngoo gi gyeungshang: da" zoomyi: danghoid shi" ri khasu" wigi gung lid: lho: yuggi zoo: se' khu: loo wa lha"» ga: Mouglagyoo: ri myid.

³⁵Mouglagyoo: gi «gyeungshang: Venyi: gi Re" tho' moo juri" wa. Myhang: thang da" Mangso yoem: vhoo" gi nang ri shoem" goem byid: wa. Houg: yoomo nang khu: loo wa yuggi zoo: ri myhang: thang da" Mangsoo nya: zoo: ga: myheing byid: boem wa.

³⁶Re" bidnoem myhi, nghoid da" Elisabed we' mang: loo" yid ri she- yuggi zoo: agyid asoo: ri gung lid: ci: da. Bougdung: myhi, daga: nyid su: gi gung lid: zi lham" moo" khyug khyab nghoid bye.

³⁷Mangsoo ayo" koid: da" moo" daja: we' aboo" ga: re" tid kyo.

³⁸Mari gi ngoo Aseing: da" dei zoo: nghoid. Aseing: tid kyo" ziyo' dakhyoo" ti"- ngoo moo bue" loo baja" o"- ga: Mouglagyoo: ri doem tid. Houg: lang" Mouglagyoo: gi Mari jang" mo doem thu' lo.

³⁹Kha: myhang amyang" ri Mari gi byen soin lho: boem moug: moo jo, da" Yuda voo davoo khyoo: myab myab do, lo.

⁴⁰Nyang: gi Zakhari da" yhoem: moo vang lo" lho: Elisabed ri lo, zei: lo" zei. Mari lo meing da" thui: ri shau" gyo: da" Elisabed ung: khoug: mo zoonu" gi gau, thu' jhu" nyid.

⁴¹Elisabed gi gyeungshang: Venyi: yo" byeung" zoore.

⁴²Nang gi myiyi: dangain" tho' moo Mangso da" mainkaid jeju" je shau" kham: zo: su: nghoid bye. Nang khu: loo wa da" yuggi zoo: we' ngi lhoo su: nghoid ga: thui: moo" yo" lhoem tid.

⁴³Nga" yhoem: seing: da" nya: myhi' gi ciwim wigi nga" jang" moo to' ju" lo lha".- ciwim wigi hid: yhi' da" jeju" ngoo shau" kham: zo: lha"» ga: tid.

⁴⁴Nang yo" doem go" da" dang: thui: ri ngoo shaug" gyoo: lang" nga" ung: khoug: mo zoonu" gi pyo: gau thu jhu" nyid bye.

⁴⁵Mangsoo byid: da" yoeb bang yo' dakhyoo" ti"- bui" wa"- ga: nang gi loem" jeing" yoomo ngi lhoo bye" ga: thui: zeing yo" nyho: tid.

⁴⁶Mari gi Nga" da" nheigloem: gi Mangso myonhoo: phung" yoeb ri coung" nghei nau da.

⁴⁷Khyoid yu Aseing: Mangsoo koid: to" moozoo" yoomo nga" Venyi: gi gau yi ngei pyo: nyid.

⁴⁸Aseing: gi nya: da" dei zooshang: da" nge thang yooboo ri we' khyoid pyam byid: bye. Akhid" mo doem ju" loo wa da" myid: yam: zoo: xeigju" sho' ngoori gi ngi lhoo su: ga: boem wa: bye.

⁴⁹Khasu" wim ga: ri yoem: bo Aseing: gi nga" shid' re" mau" pho" moo" ri zei: byid: yoomo nghoid bye. Aseing: da" myeing khyang" gi myhang: thang gyeungshang: nyid baja".

⁵⁰Aseing: ri phau" myang: gyoug voem da" byu dangain" ri Byu ngoug xi: yam: nya: nheig khyeig da" nheigloem: dabo nyid baja".

⁵¹Nya: yoem: bo da" lo, yoem yo"- nheigloem: gyi: nghoid boin: mo ri abyoo asain" lhu: sain" pyam byid: wa.

⁵²khokham" zeing ri nya: khoo" mo tu: khyo kaid wa nyhoem thang jo, mo, rigi tu: to' kaid wa.

⁵³Zoo yoid gyid shed mo, ri cau: ngham" da" zoo: noem gam zho.

⁵⁴Yoo" mo, di mo, ri lo, koem: nhang: kaid.

⁵⁵Abraham yo"- Abraham da" akung: ako' tho' moo khanham we' byid: to" da" nheig khyeig shoomyen: da" khyoo: ri myid: boin: lho: Aseing: gi ngoonu" phoug" phyid" yi ri byid: to" da" dang: theing khoin" yo"- dakhyooti nya: da" dei zoo: Israela ri pang" thoug byid: bye: ga: tid.

⁵⁶Hau: thang: ri Mari gi Elisabed jang" moo lham" moo" soem" khyab koo: nyid kho" lho: nya: yhoem: khyoo: doem gyoo" loo" bye.

⁵⁷Elisabed gi bidnyid lhoo khyab byeung" lo da" uri yuggi zoo: ri khu: loo bye.

⁵⁸Hid: su" nyang: ri Mangsoo gi gye" mau" pho" jeju" koid: byid: da" khyoo: ri shaug" gyoo: lang" yhoem: kyoo" cang" yo,- bidnoem seing" cang" yi zheung: shaug" gyoo: lang" nyangnu" gi nyang: yo' dage" gau yi ngei pyo: nyid boem.

⁵⁹Hau: thang: ri shed' nyid" ein: da" bidnyid moo nyangnu" gi yuggi zoo: yi da" a thang: yham" kho: da" pui" khyoo: re" ago". Nyang: ri Zakhari ga: nya: pho da" myeing nyang: myheing nau ago".

⁶⁰Nghoidloug we' zooshang: da" nya: myhi' gi hau: da" myeing ri amyheing goo"- Yohan ein: damyheing ge" ga: tid thu' lo.

⁶¹Co, kho: bang: gi Re" akung: ako' moo Yohan ga: zigi dayug we' abo yu" shi"- ga: Elisabed ri doem tid boem.

⁶²Hau: thang: ri nya: phoo vho: da" khyo" myheing wa shid' re" lo, tu, tu, lho: doem myed: boem.

⁶³Zakhari gi lug yho' dakhyab ri mho' yu lho: zoonu" da" myeing gi Yohan nghoid ga: lhid" shug.

⁶⁴Hau: uri houg: bang: dangain" mo gi mau" boem ago". Hau: uri Zakhari gi dalheing: dam- dang: doem yo" tid lo wigi Mangso da" jeju" ri coung" ngei byid.

⁶⁵Yhoem: kyoo" cang" yi gi gye" gyoug nyid boem- hid: su" bue" lo da" moo" gi Yuda mung" goin" jang" moo fu" ju" loo" bye.

⁶⁶Shoug" gyoo: mo, dangain" gi He: zooshang: gi ci: te" su: nghoid wa lha"» ga: tid go" nyid boem. Mangso da" yoem: bo lo, gi hau: zooshang: tho' moo zung" lhug: nyid.

⁶⁷Houg: lang" nya: phoo Zakhari gi gyeungshang: da" Venyi yo" byeung" lho: Lapi: dang: khyo" tid zigi

⁶⁸Israela da" Mangsoo ri coung" nghei nyid ge' Aseing: gi nya: Byumyu" jang" moo gyoo" lo lho: nyangnu" ri loid byoin nang bye.

⁶⁹Shid' phyang" re- gyeungshang: gyeungshang: da" lapi: yi mo wigi tid to" ziyo' dakhyoo" ti"-

⁷⁰Aseing: gi ngoonu" ri gyivoo yi da" lo, mo we' ngoonu" ri ngheing" mo, da" lo, mo we' khyoid yu wa da" shid' re"

⁷¹Aseing: Mangso da" dei zoo:- David da" akung: mo, yoem: bo da" Aseing: ri thu' loo nhang: bye.

⁷²Ngoonu" da" phoug" phyid" yi da" tho' moo nheig khyeig wa ziyo'- dang: theing" khoin" ri myed boin: wa shid' re" tid too" bye.

⁷³Ngoonu" gi Mangso da" shid' khoin" moo da" pyaid goin" deung main" gyeungshang: nyid wa shid' re" ngoonu" ri gyivoo yi da" lo, mo khyoid yu lho: Aseing: Mangso: da" moozoo" ri agyug avoem loo za: voin vu, nhang: wa ga: ngoonu" da" nya: phoo Abraham ri dang: theing" too" bye.

⁷⁴

⁷⁵Houg: su" nghoid yoomo ngoonu" dangain mo, gi nya: shid' khoin" moo gyeungshang: deungmain" nyid ca".

⁷⁶O"- Nga" zoo: we"- myhang: thang Mangso da" lapi: ga: myheing boem wa. Nang gi Mangso da" khyoo: ri jen" jen" soin to" lho: gam shid" shi: su: nghoid wigi

⁷⁷Aseing: Mangso da" byu phung: ri yooboo khyoid pyam byid: lho: khyoid yu da" khyoo: ri kho" kyoo" wa zi nghoid.

⁷⁸Ngoonu" da" Mangsoo: gi nheig khyeig shoo" myen: da" nheigloem: yo" byeung" joeb su: nghoid. Aseing: khyoid khyu: yu da" jeju" ri Mougkhung: tho' mo wigi Bid moo" khyab yhangti" ngoonu" tho' moo doug bang gyoo" loo bye.

⁷⁹Shid: zau: da" bid shoem: yoeb moo zhoung: jo mo, da" tho' moo doug bang loo wa nghoid. Hau: tho' agoo"- Ngoonu" da" myenjham" khyoo: moo shu" vhu" she: loo wa zi nghoid.

⁸⁰Zoonu" gi gyi: sheung: lo lho: Se, da" nyan: we yang" lo- Nyang: gi Israela Amyu" yi da" shid' moo bang bang moo" azei: loo" shi" ri kyoem: shang" khoug: moo da" nyid nyid.