Read Lashi LUKA 12 Bible Online

LUKA 12 - Lashi bible

LUKA 12

¹Hau: da" uri Byu khyeing" moin zoeb foem: lo boem yoomo nyang: cang" nyang: we' nang: khyoid go" lo. Yesu cangzoo: yi ri xang: shid" tid da" zigi Pharishe" yi da" ayid void' doo cid" ri zed" nyid ge'.

²Nghoeb to" da" zi dangain" gi phang shug loo wa. Yhoem" to" da" zi dangain" we' shau" myang loo wa.

³Houg: yoomo moug: coid moo nanu" tid da" dang: gi-moug: boo" moo subi" shau" gyo: loo" wa. Yhoem: mo khoug: lhung khoug: moo nanu" dang: so' so' go" da" dang: gi yhoemkhung: tho' mo nyho: yoid zi shau" wa ga: tid kyo.

⁴Nga" bidnoem yi we"- nanu" ri ngoo tid zi gi gung shoo" ri said tho' moo gootu: Ci" we ayo" koid: mo ri agyug goo.

⁵Nanu" gyoug moin: su: ri ngoo toin" shid ba. Gung shoo" ri said thang: ri nanu" ri ngarai mung" moo yo" khyo kaid su: ri gyoug nyid ge'. Nanu" ri ngoo tid. Hau: Aseing: ri je: gyoug nyid ge'.

⁶Jhakhyang wu: du: ri theing" cen eig cu' yo"- yo" oung" anghoid goo" la". Nghoidloug we' Mangsoo gi jhakhyang dadu: ri we' ato" myhid.

⁷Nanu" da" vhuloem mo xam: ri lang" dangain" nghab too" bye. Houg: yoomo agyug goo"- Nanu" gi jhakhyang joem tho' moo je phoug" dab mo nghoid nyid.

⁸Nanu" ri ngoo tid zigi Nga" cangzoo: gyeing" nghoid ga: sube" shid' moo yhen: yu su: rigi Byu da" nya: zoo: we' Mangso lagyoo: yi da" shid' khoin" moo nya: cangzoo: agyeing" nghoid ga: yhen: yu wa.

⁹Ngoori su" da" shid' khoin" moo ngeig pyam su: rigi Byu da" nya: zoo: we' Mangso lagyoo: yi shid' khoin" moo ngeig pyam wa.

¹⁰Byu da" nya: zoo: ri nhoid wigi shoid su: ri yooboo yo" khyoid pyam byid: nghoid loug we' gyeungshang: da" Venyi: ri tid shoid su: ri koem gi yooboo yo" khyoid pyam byid: loo: wa zi anghoid.

¹¹Subi" gi nanu" ri tarha" jung yi moo we' khokham" amyeing" ci: mo, da" shid' khoin" moo nghoid loug we' khe: shu" lo" da" uri khasu" tid wa zi ce: myid amyoo: goo.

¹²Nanu" Khasu" tid wa da" khyoo: ri gyeungshang: da" venyi: gi hau: uri jhoug" byid: loo wam bye: ga: tid.

¹³Byu phung: moo" mo da" byu dayug gi Sara: moo" we"- ngoori mid gam byid: wa shid' re" nga" mang: ri tid byid: we' ga: Yesu ri tid.

¹⁴Yesu gi Byu nang we"- Re" shid' re" hang" su: wigi ngoori tarha" agyi khyo" we' moid gam byid: wa su: khyo" we' nyheing to" lha"» ga: doem myid.

¹⁵Hau: thang: ri vhoo: bo myo, no, da" khyoo: aja: ja: ri zed" pyam ge'. Byu da" kangso' gi ziyoo jonu" moo geing: zug jo, zi anghoid ga: tid.

¹⁶Hau: thang: ri Yesu gi dangtu' yu lho: Sathi" dayug gi nya: yoo thung" mo gug myoo" sho' yoo" yoomo

¹⁷Nga" yoo mo gug shi" mei: shi" ri shoung: too" wa shid' re" joyoo lang" ayu" loo:- ngoo khasu" se' koid: loo: wa lha"» ga: nyang: kyeing" nyid yu nyid.

¹⁸Hau: thang: ri nyang: gi ngoo hid: su" koid: wa jhi: xoug ri phyo pyam lho: jhi: seig je gyi: zi ngoo koid: wa. Nga" da" gug- shivoo: joem yo' ziyoo joem ri hau: jhi: seig moo shoung: too" wa.

¹⁹Houg: lang" nang gi zain ved myoo" sho' zo: shug wa shid' re" ziyoo jonu" ri young: too" bye: yoomo nheigloem: pyoo" pyoo: danyid re'- zo: pyoo shug pyoo: nyid re- ein: ngoo nga" gung ri tid wa" ga: tid.

²⁰Nghoidloug we' Mangsoo gi Byu fang: phoo nang we"- akho: myen nyang: re" kangso' gi thang loo" wa. Houg: yoomo nang young: to" da" ziyoo jonu" joem gi hang" lo, moo vang loo" wa lha"» ga: tid.

²¹Nyang: nya: shid' re" ziyoo jonu" khamyhoo young: too" nghoid loug we' Mangso da" shid' khoin" moo ayoo" ajo, su: gi hau: da" sathe" phoo yo" dadu nyid ga: tid.

²²Hau: thang: ri ASEING Yesu gi nya: cangzoo: yi ri tid zigi Houg: su" yoomo nanu" gi Ce: noem se' zoo: wa lha". ein: kangso' shid' re" seing" akho" nyid goo. Ce: noem sevoid wa lha". ein: wigi gung du: shid' re" seing" akhoo" goo" ga: tid.

²³Kangso' gi zoo: noem tho' moo je yhoug: gyen:- Gungdu: gi byi: mi tho' moo je yhoug: gyen.

²⁴Ka" no, joem ri myid yu" ge'. Nyangnu" gi amyoug: ri we' asain" too. Ayham" ashab yu. Nyangnu" moo zei: kaid to" yhoem: zeing ajo, Jhi: moo we' ashoung: too. Nghoidloug we' Mangsoo gi nyangnu" ri zho" jhoug nyid. Nanu" gi ngho' joem tho' moo myoo" sho' aphoug" je dab nyid anghoid goo" la".

²⁵Nanu" mo hang" nghoid loug we' seing" kho" nyid yoomo nyang: nya: da" kangso' ri dazain damoo" khyalhang" yo" loung: sheing: nhang: goo" wa la".

²⁶Hid: yhangti"- nge" da" moozoo" ri lang" age bue" nghoid rigi ci: yoomo gootu: moo" ri myid myo: nyid go" lha".

²⁷Siyoo mo, zu: kyen: bain: gam joem ri yu" yu" ge'. Khyeing: we ani:- yo, gain: we' ayo,- Nghoidloug we' myonhoo: bo da" Sholumon khokham" zeing lang" Hau: bain: dakyang: yhangti" lang" ashug" void yoomo nanu" ri ngoo tid zi nghoid.

²⁸Loem" jeing" loem: khau: khyoo: neing: mo we"- akhid" nyid" siyoo khoug: moo jo lho: nab yo nyid: gi myi: khyoem moo vang lo" da:- siyoo mo myo, gam ri lang" Mangsoo gi hid: su" foid to" nghoid rigi nanu" ri hau: tho' mo je foid wa zi anghoid goo" la".

²⁹Ci: zoo: wa lha".- ci: shug wa lha". ein: wigi seing" akho" nyid goo.

³⁰(Houg: yhangte" da" ziri Mougmyid tho' moo nyid da" byumyu" bain sho' mo gi sho: nyid ago".) Hau: da" zi nanu" ca" nyid ziri nanu" da" nya: phoo gi se' nyid gu nghoid.

³¹Nanu" gi nya: mungdain: nya: deing: byeung" khyoo: ri xang: shed" ri shoo: ge' houg: lang" hau: zi joem nanu" ri byid: wa zi nghoid.

³²Yang" phung: zoo: we"- agyug goo. Khasu" wim gari nanu" da" nya: phoo gi Mungdain: byid: nau nyid.

³³Nanu" gi nyang: nya: da" ziyoo jonu" oung" pyam lho: sho" jhen: mo, ri gam byid: ge' apyang: ayoin" se' da" ngei thung: ri daci: ge'. khoug" su: aju"- nhau: ayo" zo: da" mougkhung: tho' moo nanu" ziyoo jonu" ri dayoung: too" ge'.

³⁴Khasu" wim gari nanu" da" ziyoo jonu" jo, jang" moo nanu" da" nheigloem: we' jo, nyid zi nghoid.

³⁵Nanu" gi khanham we' jen" jen" nghoid nyid wa shid' re" phyid" cu" cu" ci: lho: myi: kug ri tab too" ge'.

³⁶Lo, xo' pui" mo doem lo da" nya: yhoem: seing: gi khoem" lo ko, da" uri phyed' yo" phang byid: wa shid' re" lang" nyid da" dei zoo: yi yhangti"- lhed nyid ge'.

³⁷Dei zoo: yi zung" nyid da" khyoo: ri Aseing: doem ju" lo da" uri gyeing: boin: lhed nyid zi lo myang nghoid ri houg: bang: khayhi' ngi lho: boem wa lha". Nanu" ri ngoo deung" deing tid zigi Aseing: gi hau: da" dei zoo: yi ri being" voo agyeing" khyo" zoobui" moo zhung: nhang: lho: Aseing: nyang: atho' byi: khyoid ci: lho: dei zhoo" dei jhug wa zi nghoid.

³⁸Nyang: gi myen" gam gung ri nghoid loug- myo, myang zoo" ri nghoid loug we' ju" lo da" uri lhed lang" nyid da" dei zoo: yi gi ngi lho' boem wa.

³⁹Gyeing" nyang: yhoem: seing: gi khoug" su: juri" wa da" ayo, dase' nghoid rigi khoug" su: ayo" baid thoid vang ri" sho' nyang: koid: zi nghoid.

⁴⁰Byu da" nya: zoo: gi nanu" ayu" alang" nyid da" ayo moo gyoo" loo wa nghoid yoomo nanu" we' jen" jen" koid: nyid ge".

⁴¹Peteru gi Aseing: we"- he: dangtu' gi ngoonu" ri tid la". houg: su" anghoid lang" gi byu dangain" bang: shid' re" la"» ga: myid.

⁴²Yesu gi dang: zung" lho: phajhi" se' da" dei zoo: gi hang" nghoid la". Yhoem: seing: gi dei zoo: yi ri vhoeb khang" wa shid' re" yo"- ayo, ju" lang" vhu" kung: phoug" thug byid: wa shid' re" vhu" jhung: dayug nyeing to" ein: shang.

⁴³Koid: nhang: da" yoovoin ri zhug zhug zei: nyid ziri Aseing: lo myang lang" hau: da" dei zoo: gi khayhi' ngi lho' wa lha".

⁴⁴Ngoo nanu" ri deung" deing tid zigi Yhoem: seing: gi nya: ziyoo jonu" jo, moo jo, ri vhoeb khang" nhang: wa shid' re" ab byid: wa zi nghoid.

⁴⁵Nghoidloug we' gyeing" nyang: ga: rigi hau: da" dei zoo: gi nga" da" yhoem: seing: doem loo wa zigi myang" shi" wa ga: nheigloem: moo myid lho: wigi dei zoo: myhi, langjhang phoo yi ri baid nhoug zo: yed shug yed dakoid nyid.

⁴⁶Hau: yug amyid to" da" bidnyid amyang to" da" ayo, moo yhoem: seing: gi doem ju" lo wigi hau: yug ri adu du lo jhu khyo lho: wigi dang: azung" atrha" mo kham: zo: wa da" dam, ri shau" kham: zo: nhang: zi nghoid.

⁴⁷Aseing: vho: da" khyoo: ri si si- jen" jen" asoin too"- Aseing: vho: khyo" acang loo: nyid da" dei zoo: yi gi gyoem, thoung" wigi gyi" sho' lo mho' zi shau" zoo: wa nghoid.

⁴⁸Houg: su" nghoid loug we' Aseing: da" nheigloem: ri asi loo za: gyoem thung" kham: zo: da" khyoo: ri shoid vhang: su: gi dajhi kyeing" da" gyoem thung" dam ri shau" kham: zoo: wa nghoid. Jeju" koid: da" khyoo: myoo" sho' kham: yu" su: gi yoovoin myoo" sho' boo wa. Je loem" jeing" ab nung" su: gi je gyi: da" voin vu, wa moo" je bo loo wa zi nghoid.

⁴⁹Ngoo gi he: mougmyid ri myi: nghe, kaid wa shid' re" jure" zi nghoid. Akhid" nyang: nghe, kaid noug bye.

⁵⁰Ngoo kham: yu wa Babtisma daloem: jo,- hau: moo" abain zei: zei: gi ngoo nheigloem: amyen.

⁵¹He: mougmyid ri myenjham" ngei pyo: khyoo:- byid: wa ein: ngoo re" ein: jhoo: go" la". Houg: su" anghoid. Byu dayug yo" dayug gang: go" loo" wa shid' re" ngoo re" zi danghoid.

⁵²Akhid" mo byu wu: yug nyid da" yhoem: moo eig yug gi dagang- soem" yug gi daphung: gang: go" loo" wa.

⁵³Nya: phoo gi yuggi zoo: yo"- Nya: myhi gi myiyi: zoo: yo, nya: nid, yo' nya: du moo"- nyang: cang" nyang: gang: go" loo" wa.

⁵⁴Hau: thang: ri Yesu gi mung" byu yi ri tid bidvang shoid moo jhoem: moug: do loo lang" gi mougvoo wa amyang" loo: ga: nanu" dalheing: dam se' ago"- nanu" tid ziyo' dakhyoo" bui" se' zi nghoid.

⁵⁵Moug: thang: khyo" lid hau, lo zi myang lang" gi loung loo wa ga: tid se' ago"- nanu" tid yhangti" bui" se' nyid.

⁵⁶Akug void mo we"- nanu" gi mougmyid aved asam" ri yu" lho: mougvoo moug: phang" rigi se' tid boem. He: pyaid moo bue" loo wa da" alhoo: again rigi ciwim wigi asi go" lha".

⁵⁷Tarha" nyeing veing" da" moo" zei: wa da" shid' re" ciwim wigi nanu" nyang: gung nyang: asham: kho: go" lha".

⁵⁸Nang ri tarha" yung" shug su: dayug yug- Tarha" agyi jhang khyoo: dage" yhe: lo" da" uri khyoo: moo tid go" pyai" pyam ge'. Houg: su" anghoid ri nyang: gi nang ri tarha" agyi shid' khoin" moo she: yhe: loo" wa zi nghoid. Tarha" agyi gi nang ri pya: da: yi jhang khyoo: ab kaid wa. Pya: da: yi gi nang ri thung: lhoung: too" wa zi nghoid.

⁵⁹Hau: jhen: dangain" pyai" pyam sho' axab xab gi nang gi thung: mo yo" thu' loo lho: wa zi anghoid. ein: wigi ngoo tid.