Read Lashi LUKA 14 Bible Online

LUKA 14 - Lashi bible

LUKA 14

¹Dougno: Bidnyid danyid" moo Yesu gi zoo: noem zoo: wa shid' re" Pharishe zoug: dayug da" yhoem: moo vang lo. Houg: lang" nyangnu" gi Yesu ri gau" yu" go" nyid boem.

²Yesu da" shid' khoin" moo khyid: lo, shid: su: dayug ju" re" lo.

³Dougno: Bidnyid ri noo ge ze: gi wa la"» ga: Pharishe yo" Tarha" sara: yi ri myid?.

⁴Nghoidloug we' nyangnu" gi ci: we' aga: boem. Yesu gi noo su: ri khe: yu lho: wigi noo ri ge loo" nhang: wigi nyang: ri thu' loo" nhang.

⁵Yesu gi Nanu" mo hang" nghoid loug- nyang: nya: zooshang: nghoid loug- nanu" da" goug: nyhoug nghoid loug- Dougno: Bidnyid ri gyid thung" moo byid gyo" jo, ri lhab nyang: axue: thoid yu wa goo" la"» ga: myid.

⁶Nghoidloug we' nyangnu" gi dakhoin" we' ase' phougtu boem nghoid ago".

⁷Zoo: pui" khe: jang" moo yhi: mo, gi xang: shid" ju" yhi: mo, gi je ge da" joyoo ri yhe: khyen: zhung: go" nyid zi Yesu nyang lang" houg: bang: ri dangtu' daja: tid.

⁸Yesu tid kyo" zigi nang ri loxo' pui" moo khe: nghoid rigi je reng: da" joyoo moo ayhe: zhung: gyeing" nyang: re" tho' mo myonhoo: je gyi: da" lu daid' dayug yug ri we' khe: too" wa zi nghoid.

⁹Pui" seing: gi re" jang" moo re" lho: He: zoug: phoo ri joyoo shu byid: we' ga: tid wa. Hau: uri nang gi sho' thu' lho: nyhoem: gyo" da" joyoo moo shau" zhung: wa.

¹⁰Houg: yoomo Nang ri khe: nghoid rigi pui" khyoo: yhe: lho: nyhoem: gyo" da" joyoo moo shi" dayhe: zhung: we'. Houg: lang" she pui" seing: gi Re" jang" moo re" lho: bidnoem phoo we" joyoo gi moo zhung: shang ga: tid wa. Houg: lang" she nang gi pui" re" da" being" voo yi da" shid' khoin" moo myo nhoo: boo wa zi nghoid.

¹¹Houg: su" nghoid yoomo nyang: nya: gung ri coung" byid: mo, gi khyo, nyhoem: pyam byid: zi shau" wa. Nyang nya: gung ri khyo, nyhoem: su: gi phau" myang: tu: to' kaid zi shau" wa ga: tid.

¹²Hau: thang: ri Yesu gi Yhoem: seing: ri Nang gi nab xi" nghoid loug myen" xoin: nghoid loug doo" zhoo" wa ein: soin da" uri re" byen cang" yi bidnoem yi mang: nhung" yi nya: byumyu" zoo mo, yug phoo- yoo" zo: yoo" shug da" yhoem: kyoo" cang" yi ri akhi:- khi: nghoid loug nyangnu" we' doem khe: lho: jeju" doem yo" toug" goo" wa zi nghoid.

¹³Houg: yoomo zoo: pui" shug pui" khe: nghoid rigi sho" jhen: mo, yuid mo, gang: mo, khyid: agi mo, myo, amyang mo, ri lhoung: khi: ge'.

¹⁴Houg: su" khi: lang" gi nang ngi lhoo wa. Khasu" wim gari houg: bang: gi nang ri jeju" yo" phug wa yoem: aboo mo, nghoid. Deung main" mo, shid: jang" mo doem dei to'' lo da" uri Mangsoo gi nang ri jeju" doem toug" byid: zi shau" wa ga: tid.

¹⁵Yesu yo" dage" zhoung: jo, da" byu dayug gi hau: da" dang: ri shaug" gyoo: lang" Mangso da" mungdain: zo: shau" pui" yo" vang loo" su: gi ngi lhoo su: nghoid ga: tid.

¹⁶Yesu tid zigi Byu dayug gi doo" zhoo" doo" jhoug da" pui" daloem: koid: wa shid' re" being" voo myoo" sho' khe: to.

¹⁷Ayo, ju" loo lang" nyang: khe: too" mo, jhang khyoo: dei zoo: dayug ri nhang: kaid lho: Ri" loo: ge' dangain" bain nyheing too" bye ga: tid nhang: kaid.

¹⁸Nghoidloug we' nyangnu" dangain" mo, gi dayug bain dayug akhang" mho' ago". Xang: shid" yug gi ngoo gi yoo thung" dakhyang" qei too" yoomo yhe: yu" ca" ngoori akhang" byid: shi" we' ga: mho' toung" pain.

¹⁹Gootu: dayug gi ngoo gi rheng" nu" wim: zoem" qei too" yoomo yhe: jhoug" ca"- ngoori akhang" byid: shi" we' ga: mho'.

²⁰Gootu: dayug gi akhang: yo, shi" deung: khu: de: loxo' too" yoomo ayo" ri" shi" ga: tid.

²¹Hau: byu khi: nhang: da" dei zoo: phoo gi nya: jang" moo doem lo lho: houg: bang: tid khyo" dangain" lo tid kyo. Houg: lang" yhoem: seing: gi gyi" sho' nheig yo: lo wigi fu" moo" khyoo yo"- khyoo: zoo: khaid khang" moo" khyoo: thu' loo" nhang: lho: ashug" ajhen: bang:- khyid: gyoug myo, jid mo, -byu yoin byugang: yi dangain" ri myab khe: shu" loo ge" ga: dei zoo: yi ri doem nhang: kaid.

²²Amyang" ri dei zoo: yi doem ju" lo lho: Aseing: nhang: kaid ziyo' dakhyoo" bain koid: bye. Nghoidloug we' joyoo akoem: jo, shi" ga: tid.

²³Yhoem: seing: gi soo" yo voogung khyi, khang" moo" khyoo: yhe: lho: nga" yhoem: byeung" sho' Byu ri agyoo: akhyoid khe: shu" loo ge" ga: tid kaid.

²⁴Akhang: ngoo xang: shid" khe: too" mo, dayug we' nga" voem: zo: pui" moo ayo" zoo: ga: tid.

²⁵Byu phung: moo" joem gi Yesu yo" dage" cang lo boem. Yesu gi nyangnu" ri bain lheing: yu" lho: tid zigi

²⁶Nga" thang: cang loo nghoid loug we' Nya: myhi' nya: phoo- nya: myi: nya: zoo:- nya: mang: nya: nhung" yi yo"- nyang: nya: gung ri te: je jheddab mo, gi nga" cangzoo: ayo" bui.

²⁷Nyang: nya: da" pyang" zeing ri vu, lho: nga" thang: acang su: gi nga" cangzoo: ayo" bui.

²⁸Nanu" mo hang" nghoid loug we' Do, pyu zung daloem: zhug wa ga: myid to" lho: do, pyu zung bain koid: wa shid' re" nyhang" nyang: moo houg yo" bain koid: wa sho' da" ngei- tham: atham:- zhoung: jo, lho: asoin: yu loo: nyid ' wa go" la".

²⁹Houg: yhangti"- soin: yu" zi aboo loo: do, pyu zung apoem: ayang: qei: lho: ayo" bain koid: nghoid rigi yu" myang mo, hang" we' hau: yug ri juang" yi pyam boem wa zi nghoid.

³⁰He: yug gi koid: gi koid: shid" bye:- nghoid loug we' bain sho' ayo" koid: nhung: lha"» ga: tid boem wa zi nghoid.

³¹Gootu: daja: khyo" doem tid shang ein: rigi kha: te" gyeing" da" khokham" nghoid loug we' Gootu: khokham" dayug yo"- Meing: zain: goo" wa da" gyipui" soin nghoid rigi gyizoo: damoin" yo"- gyizoo: eig moin" yo" zain: do, lo da" khokham" ri lhoem: zain: ung: wa la". ein:- zhoung: jo, lho: amyid yu" wa la".

³²Gyeing" nyang: ayo" lhoem: oung: pyam nghoid rigi Nyang: ri gyipui" zain: wa ga: soin to" da" khokham" vi: moo danyid shi" uri Mung" lagyoo: ri nhang: kaid lho: gyipui" noo: wa da" byen, phyoo" zain: goo" ca.

³³Houg: yo" dakhyooti"- nanu" mo hang" nghoid loug we' nyang: nyang: yo" da" zi dangain" atoo" kho" rigi nga" cangzoo: ayo" bui.

³⁴Xoo" gi ge nyid nghoid loug we' xoo" mo cau: zi phue: loo" lang" gi Cau: ngham" da" zi kha: yo, ase' yu loo.

³⁵Hau: xoo" gi myidjang: shid' re" nghoid loug we'' jen" kaid wa shid' re" nghoid loug we' ce" akyu" we' aboo loo. Houg: yoomo hau: xoo" ri byu yi gi she: lhei" pyam se' nyid. Houg: su" wigi Nukhyab dab, mo, gi gyo: yu ge" ga: tid.