Read Lashi LUKA 15 Bible Online

LUKA 15 - Lashi bible

LUKA 15

¹Damyid" ri kheing" khyu: zo: mo, yo"- sube" byu asoin: lo: mo, myoo" sho' gi Yesu da" dang: tam" gyoo: wa ga: nya: jang" moo zeing: re" boem.

²Hparishe yo" tarha" sara: yi gi He: yug gi subi" byu asoin: lo mo, ri kham: yu lho: nyangnu" yo" dage" zo: shug nyid boem nhung lha"» ga: gei sang: go" nyid boem.

³Hau: uri Yesu gi he: dangtu' yu lho: tid da" zigi

⁴Nanu" mo dayug yug gi yang dashoo: mo dadu: byug lo" ri mhain" kaid jang" moo too" kho" lho: byug lo" da" yang ri ashau" ri shau" sho' shoo: wa zi anghoid la".

⁵Hau: da" yang ri shau" lang" gi gau yi ngei pyoo: za: kootho' moo tu: vu, loo" wa.

⁶Yhoem: ju" loo lang" gi bidnoem seing" cang"- yhoem: kyoo" voo yoo bang: ri khe: lho: byug da" yang ri ngoo doem shau" bye:- ngoo yo" dage" gau yi ngei pyoo: nyid boem shang.

⁷Houg: yo' dakhyoo" ti" ngoo tid zigi nheigloem: thid anoo" lo da" myonhoo: ngilang: bo da" byu- goug: xe: goug: youg bang: da" tho' moo yooboo yo" mung" byu dayug nheigloem: thid lo ri Mougkhung: Mungdain: moo gau yi ngei pyoo: khyoo: jo, wa.

⁸Hau: lho: ri myiyi: zoo: dayug gi nya: ngei den" ga" daxi: kyab mo dakyab byug lo" ri nyang: khasu" koid wa lha". Nyang gi myi: kug thoin lho: yhoem: goin" jid" jid" jhoin: zoo: jhoin: zeing moo amyang ri myang sho' shoem" sho: yu" wa nghoid.

⁹Nyang: gi hau: ngei den" ga" ri shau" myang lang" gi bidnoem seing" cang" yhoem: kyoo" voo yoo ri khe: lho: byug lo" da" nga" ngei den" ga" doem shau" bye:- ngoo gau yi ngei pyoo: nyid bye. Houg: yoo mo nyang" nu" dage" gau yi ngei pyo: pui koid' shang:

¹⁰Houg: yo' dakhyoo" ti"- ngoo tid da" zigi yooboo yoo" su: dayug yug- nheigloem: thid lo ri Mangso da" moug: lagyoo: yi gi gye gau yi nyid.

¹¹Yesu tid- shid phyang" byu dayug gi zooshang: eig yug yo.

¹²Nya: nhoung" yug gi nya: phoo ri nga" ba" we"- ngoo yoo" eung: da" moid ri akhid" nyang: gam byid: kaid we' ga: lo" tid. Houg: lang" nya: phoo gi nyang: yo" da" ziyoo ri nya: zootang: ri kho" gam byid: bye.

¹³Hau: thang: kha: myhang amyang" ri nya: nhung" gi nya: da" ziyoo dangain" oung" pyam lho: ngei ri za: ci wigi gye ve: da" mungdain: daloem: khyoo: thu' loo" bye. Nyang: gi hau: mungdain: moo adu: adam:- anghoid akhuang khyoo: moo za: ngei bain yhoung: thang pyam bye.

¹⁴Nyang: yo" da" ziyoo dangain" bain yhoung: thang pyam thang: ri hau: da" mungdain: moo zooyoid phang" khoug gyo" loo bye. Nyang: gi ci: ayoo" shoo" cen doem: danghoid lo.

¹⁵Houg: su" nghoid yoomo Hau: mungdain: mo byu dayug jang" moo moo" yhe: vang nyid. Hau: yug gi nyang: ri yoothung" khyoo: vu, zung" nhang: kaid.

¹⁶Nyang: gi vu, zo: da" shigyang: kug bo zoo: nau. Nghoidloug we' nyang: ri zoo: noem daja: khyalhang" re" byid: zhoo" wa byu hang" we' anyid.

¹⁷Lo" thang moo nyang: myid boin: kaid lho: tid da" zigi nga" pho, vhoo" kung: joem nyang: gi gyi: gyi: shau" zo: nyid goo" aja:- ngoo koem gi he: da" joyoo moo zooyoid phu" zo: nyid bye: nhung!

¹⁸Ngoo nga" pho, jhang khyoo: doem lo" lho: ‹‹nga" phoo we"- ngoo gi Mangsoo: ri we' nga" phoo ri we' shoid vhang: bye.

¹⁹Pho, da" nya: zoo: ein: myheing wa ngoo amoin: yi" loo:- vhu" kung: zoo: dayug khyo" soin: yu we' ein: ngoo lo" sang: wa.»

²⁰Houg: lang" nyang: gi to' lho: nya: pho, jhang khyoo: doem tau" loo" bye. Yhoem: mo vi moo daloo" shi" ri nya: phoo myang kaid lho: nyang: ri nheig yu" khyeig yoomo yhe: gei gab' po: yu lho: boobug boug.

²¹Nya: zoo: tid zigi nga" phoo we"- ngoo gi Mangsoo: ri we' nga" phoo ri we' shoid vhang: bye. Houg: yoomo phoo nya: zoo: ein: we' myheing wa amoin: yi" loo. Za: nya: zoo: tid.

²²Nghoidloug we' nya: phoo gi vhoo" kung: zoo: yi ri khe: yu lho:-ge thang da" byisheing: ri myab myab lo" yu wigi nyang: ri foid byid: ge'. Nya: lo, moo we' lo, pain" ri pain byid: ge'. Khyid: baid ri we' nya: khyid: moo zhung" byid: ge' ga: nyang: tid.

²³Khu: myhoug to" da" nujung nu" we' lo" she: said ge'. Nyhang" gau yi zo: shug pui" zeing koid: shang.

²⁴Nga" zoo: gi shid: byug bye:- nghoid loug we' akhid" doem dei bye. Nyang: gi byug byug bye:- nghoid loug we akhid" doem shau" myang" bye ga: wigi zo: shug pui" koid: nyid ago".

²⁵Hau: uri nya: mang: gi yoothung" moo yhe: nyid. Nyang: doem lo da" uri yhoem: nam' moo ju" loo lang" zeing baid mang" baid go" nyid thui: ri lo" shau" gyo:-

²⁶Houg: yoomo nyang: gi vhu" kung: zoo: dayug ri khe: yu lho: houg: ce: noem koid: nyid ago" ga: nyang: ri myid: yu.

²⁷Hau: vhu" kung: zoo: tid zigi re" no, yhoem: khyoo: doem tau" ju" loo bye. Nyang: ngei ngei pyoo pyoo doem ju" loo yoomo re" phoo gi khu: myhug to" da" nujung: nu" we' said bye:› ga: phoug tid.

²⁸Mang: moo" gi nheig gye" gyo: yo: lho: yhoem: khoug: khyoo: avang loo. Houg: yoomo nya: phoo gi thu' re" lho: nyang: ri yhoem: khoug: khyoo: vang loo we' ga: re" jhu.

²⁹Nghoidloug nyang: nya: ba" ri tid zigi yu" we' zain nyid myang" sho' ngoo gi nang ri join dayug yhangti" moo" zei: bydi: bye. Nang tid zi ngoo khanham we' atam" gyoo: loo: akoid' yu". Nang ngoori ci: byid: yu". Nga" shid' re" ga: shoo" baid dadu: khyalhang" said lho: lu: zoem" cang" yi yo" zo: shug pui"- nang khanham we akoid: byid: yu.

³⁰Nghoidloug we' re" da" ziyoo jonu" ri shava myiyi: yi yo' lhu: poid: pyam yen" su: dadoem lo ri yen gi khu: myhoug to" da" nujung: nu" nya: shid' re" to' voem" said nhung: lha"» ga: tid.

³¹Nya: phoo doem tid zigi nga" zoo: we"- nang gi ngoo yo" khanham we' dage" da nyid nyid. Ngoo yo" zi dangain" gi re" zi kyeing" nghoid bye.

³²Re" no, koem gi shid: byug bye- nghoid loug we' akhid" doem dei loo bye. Nyang: byug byug bye: nghoid loug- akhuid' doem shau" nyang bye: yoomo nyhang" phi" yi zo: shug pui" koid: shang- ngei pyo: nyid shang.