Read Lashi LUKA 16 Bible Online

LUKA 16 - Lashi bible

LUKA 16

¹Yesu nya: cangzoo: yi ri tid zigi sathi phoo yug gi moo" pyeing" su: dayug yo"- hau: yug gi sathi" pho da" ziyoo jonu" ri agoin: lhu: shoin' pyam nyid da" ziri byu yi gi sathi" phoo ri khyang" lo" shid: boem.

²Sathi" phoo gi moo" pyeing" su: ri khe: yu lho: tid da" zigi re" da" khyoo: ngoo shaug" gyoo: bye. Khasu" koid: nyid? re" da" lo, mo nga" ziyoo jonu" zhayen" dangain" ngoori byid: we'. Khasu" wim gari nang gi nga" moo" ci: moo we' pyeing" wa zi amoin: yi" loo.

³Vhu" kung: phoo nya: gung nyang tid da" zigi Nga" Aseing: gi nga" moozoo" mo ngoori toem nyid bye. Ngoo khasu" koid: loo wa lha". ngoo myidjang: du: nhoug wa yoem we aboo mho' zo: yen" wa zi we' ngoo sho.

⁴Nga" aya gyo" thang: ri ngoo khasu" koid: wa zi akhid" si bye- ngoori nyangnu" yhoem: moo lhoem kham: yu wa da" byen cang" ngoo yo".

⁵Hou: yoomo Aseing: ri jhen dab da" mung" byu mo, dangain" ri nyang: khe: lho: xang: shid" yug ri myid: zigi nang khamyhoo jhid" to.

⁶Hau: yug gi mainkaid xu: xu: dashoo: joid" jhen dab ga: phoug tid. Houg: lang" moo" pyeing" su: gi hid: the, re" zhayen"- zhoung: jo, lho: joid" wim: xi: ein: lhid" too" we' ga: tid.

⁷Hau: thang: ri gootu: dayug ri we' nyang: doem myid: zigi nang khamyhoo jhen: dab, ga: myid. Hau: yug gi sungsoo: gug dakhyeing" tang bo ga: tid lang" moo" pyeing" su: gi hid: the, re" zhayen"- shed shoo: tang ein: lhid" too" we' ga: tid.

⁸Hid: yhangti" yeug dakhyo" koid: da" adeung amain" khyo" koid: da" moo" pyeing" su: ri Aseing: gi coung" byid. Khasu" wim lha"» ga: ri Moug: myed byu yi gi Moug: myed moozoo" zei: jang" moo- bidbang zoo: yi da" tho' moo je yeug yoomo nghoid.

⁹Hau: tho' moo Yesu «gi Mougmyid jonu" yo' bidnoem koid: ge'. Hau: ziyoo jonu" yo" gu: thang loo" lang" Mangsoo: gi ngei pyoo: athang da" yhoem: moo lhoem kham: yu wa zi nghoid.

¹⁰Nge da" moo" moo deung main" su" gi gyi: da" moo" moo we' deung main" wa. Nge da" moo" moo adeung amain" su: gi gyi: da" moo" moo we' deung main" wa zi anghoid.

¹¹Houg: su" nghoid yoomo nanu" mougmyid soidgain khyoo: moo lang" deung main" khyoo: ajo, rigi deung main" da" soidgain khyoo: moo khasu" nanu" ri yo" loem wa lha".

¹²Byen cang" da" soidgain tho' moo lang" deung main" khyoo: nanu" moo abo rigi nang seing: wa da" soidgain hang" re" se' byid: wa lha".

¹³Yhoem: seing: eig yug moo dei zoo: vang da" byu hang" we' anyid. nyang: gi dayug ri ngheing" lho: dayug rigi ngei wa. Nyang: gi dayug ri phau" myang: lho: dayug rigi aphoug" akhyoid koid: wa. Nanu" gi Mangsoo: yo"- ngei sheing: ri davhu" dam dei zoo: yo" koid: wa zi anghoid.

¹⁴Pharishe yi gi hau: khyoo: dangain" ri shaug" gyoo: yoomo nyang: bang: gi Yesu ri juang" yi byid: ago.Khasu" wim gari nyangnu" gi ngei ri jheddab mo, nghoid.

¹⁵Yesu gi nanu" ri nyang: nya: da" gung du: ri byu gi yi nghoid ga: subi" ri myang nhang nau ago". Nghoidloug we' Mangsoo: gi nanu" da" nheigloem: ri se' nyid. Byu yi gye" vho: ngei jheddab nyid da" zigi Mangso da" shid' khoin" moo gi ce: phoug" adab da" zi anghoid.

¹⁶Babtisma sara: Yohan anyid shi" mo Moshe tarha" yo"- Lapi: yi gi amyeing" zeing khyo" jo: jo, bye. Yohan nyid lo jang" mo wigi Mangso: da" Mungdain: da" khyoo:- Ngeibu: lu: dang: gi ri tid loo bye. Byu yug khang" moo" we' hau: khyoo: moo shi, goo" shi, yang- vang lo" boem bye.

¹⁷Nghoid loug we' hau: tarha" mo nge thang da" tarha" dakhoin" byo, loo" wa tho' moo Mougkhung: yo" myidjang: byo, loo" wa zigi je lei nyid.

¹⁸Nyang: nya: yhoem: seing: myhi' ri kang" pyam lho: gootu: myiyi: yo" deungkhu: doem qei" su: gi myi: lhoid su: nghoid. Kang" too" kho" da" myiyi: myhi, yo" loxo' su: hang" we' sube" myi: lhoid zi nghoid.

¹⁹Goonham, dalheing: ri nyang: gi nyid" khang" moo" phoug" dab thang da" mi, byi: ri void ci: lho: nyid di nyid ge nyid.

²⁰Nya: yhoem: khoem" duang nam moo dagung goin" dam, joid, joid, su:- shojhen da" Lazaru ga: su: gi

²¹Sathi" pho da" zoobui" mo gyoo" da" voem: gyoo" voem: thang:- re" zhoo" wa shid' re" vhooloo kho" nyid. Lakhuid" joem gi nya: dam noo ri re" yo, byid: nyid boem.

²²Hau: sho" jhen su: gi shid: lo" wigi moug: lagyoo: yi gi nyang: ri Abraham da" nam moo nyid nhang: wa shid' re" moug: khoung: mungdain: zoo: pui" zeing khyoo: shu" loo" bye. Sathi" phoo we shid: lo" wigi myhoeb pyam zi shau" lho:

²³Nyang: gi moovo moug: moo gye" kyi" khyeug zi shau" nyid yoomo nyang: yu" kaid da" uri Abraham ri we' Abraham da" nam mo Lazaru ri we' myang kaid.

²⁴Sathi" phoo gi phoo Abraham we"- ngoori nheig myen: yu shi" we'. Ngoo gi he: da" myiyham: khoug: moo atho' tid loo:- kyi" khyeug shau" nyid. Lazaru da" lo, nyhoug" vhu" mo gyid jham" dazo, nga" yhoo: moo khyo, jham" byid: wa shid' re" nga" jhang khyoo: jen" nhang: kaid we' o"- ga: yoid tid.

²⁵Nghoidsho' loug- Abraham gi nga" zoo: we"- nang dei nyid shi" uri nyid di nyid ge shau" void shau" zo: da" khyoo: ri we' Lazaru gi sho" jhen: jamjau kham: kho" da" khyoo: ri we' myid boin: re. Akhid" koem nyang: gi myenjham" ngei pyoo: khyoo: shau" kham: zo: wigi nang koem gi kyi" khyeug shau" nyid bye.

²⁶Hau: tho' moo gootu: nanu" yo" ngoonu" da" agyoo: moo no, thang da" lang: khoug: daloem: kyo: to. Houg: yoomo nanu" tab mo zi ngoonu" tab khyoo:- ngoonu" tab mo zi nanu" tab khyoo:-gu: lid noug mo, hang" we' ayo" gu: lid ga: wigi tid.

²⁷Sathi" phoo doem tid zigi phoo Abraham we"- houg: su" nghoid lang" Lazaru ri ngoo me yhoem: khyoo: nhang: kaid byid: we'.

²⁸Houg: moo nga" nhung" yi wim: yug nyid shi"- nyangnu" we' hid: yhi' kyi" khyeug jamjau jang" moo azheing: ju" loo wa shid' re" nyangnu" ri lo" tid poin" nhang: we'.

²⁹Abraham gi re" nhoung" ri tid poin" wa shid' re" Moshe yo" lapi: yi nyid bye. Houg: bang: da" dang: ri tam" gyoo: goo" baja" ga: tid poin" bye.

³⁰Sathi" phoo gi phoo Abraham we"- houg: za: anghoid- gyeing" nyang: shid: byug bye: bang: mo dayug yug nyangnu" jhang doem lo" kho" kyo" rigi nyangnu" nyangnu" da yooboo mo nyangnu" doem lhueung: loo wa

³¹Abraham gi nyangnu" Moshe yo" lapi: yi da" dang: atam" gyo: nghoid rigi gyeing" nyang: shid: bye: jang" mo byu dayug yug doem dei to'' loo nghoid loug we' nyangnu" gi loem" jeing" wa zi anghoid ga: wigi tid.