Read Lashi LUKA 18 Bible Online

LUKA 18 - Lashi bible

LUKA 18

¹Hau: thang: ri Yesu gi nya: cangzoo: yi ri kha: uri we' yoem: ashoin: loo za: ayo, bain sho' moo akyu" mho' ca" da" khyoo: ri dangtu' daja: khyo" jhoug" byid: zigi

²Voo zeing davoo moo Mangsoo ri we' agyug- Byu ri we' cishu: anhang: da" tarha" agyi dayug nyid.

³Hau: lho: hau: voo moo cougmoo" myhi, dayug we' nyid. Nyang: gi tarha" agyi jang" moo yhe: lho: ngoo yo" sei: boo su: ri ung: sho' dang: kho" byid: we' ga: kau: to.

⁴Tarha" agyi phoo gi shang" yhen" zoo: myang" lang" re" kau: to" da khyoo: ri ayo" tid byid: ga: he: pyam. Nghoidsho' loug we' lo" thang moo nya: gung nyang: tid zigi ngoo gi Mangsoo ri we' agyug- byu ri we' cishu: anhang: su: nghoid.

⁵Nghoidloug we' he: cougmoo" myhi, gi ngoori phibu daci: pu' nyid yoomo nya: da" jo khyoo: yo" yu wa shid' re" ngoo nya: da" moo" ri tid byid: wa zi nghoid. Houg: su" anghoid rigi nyang: gi ngoori atheing: loo: phibu daci: pu' nyid lang" gu: thang: lang: moo gi ngoori myoug: doug nhang: wa zi nghoid ga: tid.

⁶Aseing: zo, tid zigi hid: adeung amain" da" tarha" agyi khyoo: ri gyo: yu" ge'.

⁷Khyen: yu shau" nya: byu yi da" nyid" myen" bo pang" wa shid' re" yoid mho' ngau nyid boem nghoid rigi Mangsoo gi dang: akho: byid: loo: nyid wa la". nyang: gi houg: bang: ri pang" thoug byid: wa shid' re" nhe" nyid wa la".

⁸Nanu" ri ngoo tid zigi Aseing: Mangsoo gi houg: bang: shid' re" myab myab dang: kho" byid: wam: bye. Houg: nghoid loug we' Byu da" nya: zoo: doem gyoo" lo da" uri He: mougmyid mo loem" jeing" mo, ri re" myang shi" wa la"» ga: tid.

⁹Nyang: nya: da: gung rigi deung main" su: nghoid ga: loem: khau ci: lho: subi" goo" ji rigi atham: myang yu" nyhoem: mo, byu yug khang" moo" ri Yesu we' he: dang: tu, ri tid.

¹⁰Byu eig yug gi akyu" mho' wa shid' re" No ku" yhoem: moo" khyoo: yhe: lo. Dayug gi Pharishe gootu: dayug gi kheing" khyu: zo: su: nghoid.

¹¹Pharishe phoo gi nyang: kyeing" yab jo, lho: akyu" mho' zigi O"- phoo Mangsoo: we"- Byu goo" ji yi gi vhoo: boo mo adeung amain" mo sube" myi: lhoid mo, za: danghoid. Ngoo koem gi houg bang: yhangti" anghoid yoomo we' thei: da" kheing" khyu: zo: su: ti" anghoid yoomo we' re" da" jeju" ri boin: ga: tid.

¹²Ngoo gi labain daloem: khoug: moo-zoo: noem eig lheing: nyang: zeung: akyu" mho'- Hau: lho: yo" da" ziyoo daxi: boem mo daboem we ngoo nang ri byed.

¹³Nghoidloug we' kheing" khyu: zo: su: gi vi" moo yab jo, lho: mougkhung: khyoo: lang" avoem" nghang yu" loo za: O" phoo Mangsoo we"- yooboo shoid vhang su: ngoori nheig khyeig yu shi" we' ga: nya: yanggang moo baid lho:-tid nyid.

¹⁴Ngoo nanu" ri tid wa Yesu tid zigi kheing" khyu: zoo: su: gi Mangso da" shid' khoin" moo deung main" su: dayug khyo" yhoem: khyoo: doem yo" tau" lo. Pharishe phoo gi houg: su" anghoid. Khasu" wim gari hang" we' nyang: nya: da" gung ri coung" byid: mo, gi doin: khyo, pyam zi shau" lho: hang" we' nyang: nya: da" gung ri khyo nyhoem: mo, gi tu: to' kaid zi shau" wa nghoid.

¹⁵Nya: da" lo, yo" tain" byid: wa shid' re" Byu dayham" bang: gi nyang: nya: zoonu" yi ri Yesu jhang khyoo: shu" re" boem. Nya: cangzoo: yi gi houg: su" koid: zi myang lang" houg: bang: ri lhoem: gyikoid.

¹⁶Nghoidloug we' Yesu gi zoo shang yi ri khe: yu lho: zooshang: yi ri nga" jhang ri" nhang: ge' alhoem: toem too" goo". Khasu" wim gari Mangso mungdain: gi houg: yhangti" mo, da" mungdain: nghoid.

¹⁷He: ziri xoem" too" ge' hang" nghoid loug we' zooshang: dayug yhangti"- Mangso da" mungdain: ri akham: yu su: gi hau: mungdain: moo yo" vang loo" wa zi anghoid.

¹⁸Yuda byumyu" mo vhu" shi: su: dayug gi ge da" sara: we"- apyaid ato: kangso' yo" kham: yu wa shid' re" ngoo khasu" koid: wa lha"» ga: Yesu ri myid.

¹⁹Yesu tid zigi nang ciwim wigi ngoori ge da" sara: ein: tid lha". Mangsoo mo lid lho: ge zi dayug we' anyid.

²⁰Su: myi: alhoid- Byu asaid- sube" zi akhoug"- adeung amain" da" sagsi: akham:- myhi, phoo ri phau" myang: we' ga: da" toung: to" da" tarha" joem ri nang si' wam: bye.

²¹Hau: yug tid zigi he: da" taung: to" da" tarha" dangain" ri dang: soo" rigi ngoo zooshang: pyaid mo bain cang bye: ga: tid.

²²Hau: da" dang: ri shaug" gyoo: lang" Yesu gi nang zei: ca" da" moo" daja: boo shi. Re" da" ziyoo jo, nu" bain sho' oung" pyam lho: sho" jhen: mo ri gam byid: pyam we'. Hau: thang: ri doem re" lho: nga" thang: moo cang we'. Houg: lang" nang mougkhung: moo soidgain yoo" wa ga: nyang: ri tid.

²³Hau: yug koem gi soidgain jo, nu" myoo" sho' yoo" su: nghoid yoomo Yesu da" dang: shaug" gyoo: lang" nheigloem: gye" gyo: nyhau" lo.

²⁴Yesu gi hau: da" khyoo: ri myang lang" soidgain ziyoo yoo" su: shid re" gi Mangso mungdain: khyoo: yo" vang wa shid' re" gye" youg: nhung.

²⁵Soidgain yoo" mo, Mangso da" mungdain: moo yo" vang loo" wa tho' moo gi Gola ug gi nghab nhoo: duang: khyo" jhu: vang lid loo" wa zigi je lei nyid.

²⁶Hau: dang: ri shaug" gyoo: da" myeing: byu yi gi hid: su: danghoid rigi khyoid yu zi hang" se' shau" boem wa lha"» ga: nyang: ri myed: boem.

²⁷Yesu gi byu yi" ayo" koid: da" khyoo: ri Mangsoo gi yo" koid: ga: phougtid'.

²⁸Hau thang:Peteru gi yu" we' ngoonu" gi nyang: nya: yhoem: yoo she: pyam kho" lho: re" thang: moo cang boem bye: ga: tid.

²⁹Yesu gi deung" deung nanu" ri ngoo tid zigi nghoid bye: Mangso da" mungdain: shid' re" nyang: nya: yhoem: nghoid loug- yhoem: seing: myhi' nghoid loug- nya: mang: nya: nhung" ri nghoid loug we' nya: myhi' nya: phoo ri nghoid loug we' nya: zoo: nya: myid ri nghoid loug we' yo" too" khoo su: gi

³⁰He: pyaid moo za: atho' tid da" jeju" shau" kham: zoo: lho: doem ju" loo wa da" we' pyaid moo athang agoin da" kangso' yoo" wa".

³¹Yesu gi cangzoo: daxe: eig yug ri nya: nam moo khe: yu lho: tid zigi tam" gyoo: ge'. Ngoonu" gi Yerusalem shoid khyoo: gyung: so" lo" nyid boem. Byu nya: zoo: khyoo: yo" sen: wigi Lapi: lhid" too" khare" da" byu nya zo: deungmain" ziyo' khyoo: deingmain" ziyo' bue" loo wa.

³²Nyang ri nghi: zain' byumyu" yi da" lo, moo ab, pyam boem wa. Nyang: ri juang" yi roi" lho: shi" kain" we' byi" gyoin: boem wa.

³³Nyangnu" gi nyang: ri baid youg boem lho: said pyam boem wa. Nghoidsho' loug we' soem" nyid" kyoo: lang" nyang: doem dei to'' loo wa nghoid.

³⁴Nghoid loug we' nya: cangzoo: yi gi hau da" dang: ri ase' gyoo: boem nghoid ago". Hau: da" dangkang: gi nyangnu" jang" mo yhoem" too" shi" yoomo nyangnu" gi Yesu ce noem tid ziriase' gyoo: boem nghoid da.

³⁵Yesu gi Yerikho voo nam moo ju" lo" da" uri myo, amyang su: dayug gi khyoo: yam moo zhoung: jo, lho: mho' zo: nyid.

³⁶Nyang: gi byu yi lid: lo" nyid zi shau" gyoo: lang" ‹‹houg: ci: nghoid» ga: myid.

³⁷Byu yi gi Nazared mo Yesu lid: lo" nyid ga: nyang: ri tid kyo" ago".

³⁸Hau: yug gi David da" nya: zoo: Yesu we"- ngoori nheig khyeig we' o"- ga: lhoem: ngau thu lo.

³⁹Shid' moo soo" mo, gi nyang: ri sam" zoo: nyid wa shid' re" gyikoid boem. Nghoidloug we' nyang: gi David da" nya: zoo: we"- ngoori nheig khyeig we"- ga: je" nyho: yoid lo.

⁴⁰Houg: yoomo Yesu gi yab theing: lho: hau: myo anyang su shu" loo ge' ga: amyeing" byid. Nyang: gi jang" moo ju" loo lang.

⁴¹Yesu tid zigi re" shid' re" ce: noem koid: nhang: nau? ga: nyang: ri myid. Myo, amyang su: gi ‹‹Sara: we"» ‹‹ngoo gi myo, doem myang nau ga: tid.»

⁴²Yesu gi myo, myang loo: we'. Re" da" loem" jeing" nheigloem: gi nang ri ge loo" nhang: bye: ga: nyang: ri tid bye:.

⁴³Houg: jang: nyang: myo, myang lo lho: Mangso da" jeju" ri coung" zoore" Yesu da" thang: moo cang lo. Hau: da" khyoo: ri myang da" byu phung: yi: gi Mangso da" jeju" ri dangain" mo, coung" nghei nyid boem.