Read Lashi LUKA 21 Bible Online

LUKA 21 - Lashi bible

LUKA 21

¹Yesu lheing: yu" kaid uri yoo" mo, di mo, No' ku" yhoem: moo" mo ngei boin" moo alu: kaid nyid boem ziri myang.

²Houg: yo' dakhyoo" ti"- gyid dingga" eig cu' ri shojhen: da" cougmoo" myhi, dayug re" kaid nyid ziri we myang.

³Nyang: tid zigi ngoo nanu" ri tid ba:- he: da" shojhen: cougmoo" myhi, gi dangain" bang: tho' moo je kaid abye:.

⁴Houg: bang: gi nyang: nya: ngei jain" ngei thang: mo alu: dakaid ago". Nghoidsho' loug we' he: da" myiyi: myhi, gi shojhen: da" zi nyang: yo' gu: dangain" zoo: wa zi dangain" ri kaid pyam abye: ga tid.

⁵Cangzoo: yi dayham" gi noku yhoem: moo" gi lugloem: joem yo"- Mangsoo ri ab noung" to" ziyoo joem gi myang lho: hau: zi khayhi' young" lha" ga: tid go" nyid boem.

⁶Hau: uri Yesu gi Nanu" shau" myang da" zi joem dangain" gi lug daloem: we' akhang: joyoo moo ake" too" loo: sho' byo sain" pyam da ayo, ju" loo wa" ga: tid.

⁷Houg: bang: gi sara: we"- he: da" moo" gi kha: uri bue" loo wa lha". he: moo" bue" lo da" uri ce: noem alhoo: again yi bue" thu' loo wa lha"» ga: zheing: myid: boem.

⁸Yesu tid zigi Nanu" ri mhau zi athoung" shau" wa shid' re" zed" nyid ge' Byu myoo" sho' mo, nyang:- nga" n ga" khyoo: yo' sen: lho: ngoo gi nyang: nghoid ga: tid da" ayo, ju" ri" wa nghoid loug we' houg: bang: da" thang: moo acang loo" goo.

⁹Nanu" gi meing byo, lo da" gyi dang: yo"- doin: lhoem" keing" khyoo, go" da" lu dang: shaug" gyoo: lo da" uri adain agyug goo"- houg: yhang: te" da" moo" gi xang" shid" bue" loo wa. Nghoidloug we' lo" thang zigi anghoid shi" ga: tid.

¹⁰Nyang: yhe: lho: xo' tid da" zigi Byu damyu" yo" damyu"- damoug: yo' damoug: mungdain: daloem: yo" daloem:- gyipui" phang meing: zain go" loo wa.

¹¹Joyoo khang" moo" moo myid leig gyi" sho' leig da" khyoo:- zooyoid phang" khoug: gyoo" zi dab, lei da" noophyoo" aja: aja: myo: loo wa. Mougkhung: mo gyoug pho" ziyo'- mau" pho" alhoo: again bue" thu' loo wa.

¹²Nghoidloug we' he: da" moo" abue" loo shi" da" uri byu yi gi nanu" ri myheig yu, lho: shen" yhen lo boem wa. Nanu" ri tarha" yung" moo zheing: ab pyam wigi Tarha" dang: kho" lho: thung: khyo, pyam zi shau" boem wa. Nanu" gi nga" myeing yoomo kho: kham" yi yo"- amyeing" ci: mo, da" shid' khoin" moo ju" lo" boem wam bye.

¹³Hid: su" bue" loo loug - nanu" gi ngei bu: lu dang: ri tid loo" wa shid re" amyeing akhang" ri yo" yu boem wa nghoid.

¹⁴Houg: yoomo nanu" gi ce: khyo" phougtu" wa ziri agung youg wa shid' mo nanu" da" nheigloem: ri nyang: soin' too" ge'-

¹⁵Khasu" wim gari nanu" da" gyivoo yi ayo" ngeig- ayo" shang" yab jo, sho' wim da" dang: yo"- nyan phajhi" yo' mungdang: ri ngoo nanu" ri byid: wa byid: loo wa yoomo nghoid.

¹⁶Nangnu" gi nya: myhi' nya: phoo- nya: mang: nya: nhung"- bidnoem seing" cang" yi yo"- nanu" nya: da" byen cang" yi wigi gyivoo yi da" lo, moo ab pyam zi shau" boem wa. Nanu" mo dayham" rigi said pyam boem wa nghoid.

¹⁷Nga" myeing yoomo byu yug khang" moo" gi nanu" ri ngheing" lo boem wa.

¹⁸Nghoidloug we' nanu" da" vhuloem mo xam: dakhaid we' byug wa zi anghoid.

¹⁹Nanu" gi geung: geung: teing teing yab, jo, ge' houg: lang" she khyoid yu zi dashau" boem wa.

²⁰Yerusalem voo moo" ri gyivoo joem re" lheing: kham: ci: ziri nanu" myang da" uri hau: voo byo, loo" wa zi jhang bye: ein: si' loo: ge'.

²¹Hau: uri Yuda mung" moo nyid da" mung" byu yi gi boem tho' khyoo: phang: do, loo" ca" goo" wa. Soo" yo voogung moo nyid mo, gi voo moo" khyoo: avang loo goo. Voo moo" mo bang: we phang: ca" goo" wa.

²²Khasu" wim gari hau: bidnyid gi jhoem: mungdang: moo tid to" ziyo' dakhyoo ti"- joeb byeung" lo da" yooboo dam kaid da" bidnyid nghoid.

²³Hau: ayo, moo gunglid: ci: da" myiyi: yi yo"- zoonu" nya: myhi' gi gyoug pho" zi shau" boem wa nghoid. Hau: meing: moo gyoug pho" jamjau ju" lo lho: houg: mo byu yi we' Mangso yooboo dam kaid zi shau" boem wa nghoid.

²⁴Byu dayham" gi sham: dam yo" said pyam zi shau" boem wa. Dayham" bang: rigi join khyo" myheig shu" lo" boem wigi mung" zoo: mung" zeing: moo byo sain" lo" boem wa. Tungbau Byumyu" yi gi nyang: nya: vhoeb khang" da" pyaid athang thang gi Yerusalem voo moo" ri khyidvoo: khoug: moo nang zeug ci: boem wa.

²⁵Bid kyi: lham" moo" joem moo mau" pho" alhoo: again bue" thu' loo wa. Mougmyid tho' mo byumyu" bain sho' mo, gi Panglai gyid mung" mo being mhoid baid poug myheing go" da" thui:- shaug" gyoo: boem yoomo nheig coid coid lo" boem wa.

²⁶Mougkhung: tho' mo yoem: vhoo" joem ri nyangnu" da" moozoo" mo khaid khyo' kaid zi shug yoomo myidjang: tho' moo bue" loo wa shid' gyoin noo gyoin ri myang yoomo byu yi gi gyoug dain coid leung lo" boem wa.

²⁷Hau: thang: ri jhoem" moug" khoug moo gyi: thang da" yoem: moo" phung" yoeb yo'-byu nya: zoo: gi thu' myang gyoo" loo wa.

²⁸He: da: moozoo" bue" thu' lo da" uri nanu" da" khyoid yu khyoo: gi jhang loo bye yoomo to' yab lho: nanu" da" vhuloem joem tu" yu" ge' khasu" wim gari nanu" da" khyoid yu khyoo: gi jhoug loo bye.

²⁹Hau: thang: ri Yesu gi nyangnu" ri dangtu' yu lho: tid zigi lafoem gam yo" gootu: da" seig gam joem ri tu, yu" ge'.

³⁰Hau: seig gam joem moo anyug toin loo lang" gi nanu" hau ziri myang lang" zain vang khoem" jhang bye: zi se' ago".

³¹Houg: yo' dakhyoo" ti"- tid kyo" lid lo da" moozoo" joem bue" lo da" ziri myang lang" gi Mangso da" mungdain: gi jhang bye: ein: nanu" xoem" too" loo: ge'.

³²Akhid" dei nyid da" byu yi he: yam" dangain" shid: shi" ri he: khyoo: dangain" bue" loo wa ziri myid boin: ge'.

³³Mougkhung: yo" myidjang: lid lo" byug nghoid loug we' nga" mungdang: gi khanham we' alailoo" wa.

³⁴Nanu" gi zo: pyoo: shug pyoo: yed coid ziyo' nyid' lho: he: pyaid shid' re" za: myid myo nyid wigi-ge da" ayo, ri aze" thang wa shid' re" lhid zed" nyid ge'.

³⁵Houg: su" alhid zid" nyid nghoid rigi Tarha" dang: kho" da" bidnyid gi mang: khung" beig gyoo" lo yhangti"- nanu" da" atho' moo dalheing: dam beig gyoo" loo wa. Hau: bidnyid gi byu xangsu: bain sho' mo, da" tho' moo gyoo" loo wa nghoid.

³⁶Gyeing: gyeing: soo" soo" koid: nyid ge' ju" gyoo" loo wa da" myo, dain' dei: da" shid: gyoin noo gyoin ri yo" kham: zeing: yab jo, lho: wigi Byu nya: zoo: da" shid' khoin" moo dain: dain: yo" yab lho: tarha" dang: kho" ziri yo" kham: wa shid' re" khanham we akyu" damho, nyid ge'.

³⁷Yesu gi hau: danyid" goin" noku yhoem: moo" moo jhau" mho' byid: nyid lho: myenthang: zoo" rigi zhainlun ga: da" boug khyoo: do, lo" lho: damyen goin houg: moo lo" nyid.

³⁸Byu myoo" sho' mo, gi nya: dang: ri tam" gyoo: wa shid' re" No' ku" yhoem: moo" moo nab kyoo no" re" lo boem.