Read Lashi LUKA 3 Bible Online

LUKA 3 - Lashi bible

LUKA 3

¹Ketha khokham" Tiberu khoo" zhoung: zi daxe: wim: zain byeung" da" uri Yuda mung" moo Puntu pilaid gi Mung" zoug: bue" nyid. Galile mung" moo Herod Ituri yo" Trakuni moug: moo Herod da" nya: no, Philid- Abili mung" moo Lusanu gi zau: aya: moo zheing: nyid ago".

²Anna yo" Kayapha eig yug gi khainjung agyi yi nghoid ago". Hau: da" uri Zakhari nya: zoo: Yohan gi dain" pyoid' yoo moo Mangso da" mungdang: ri yo" yu.

³Lapi: Esaia Jhoem: dang: moo bo ziyo' dakhyoo ti"- Byu yi gi Yodan gyid lang yam cang ju" yhe: boem lho: nheigloem: thed lho: Babtisma ri kham: yu boem ge' houg: su" nghoid ri za: Mangsoo gi nanu" da" yooboo ri khyoid pyam byid: wa" ga: byu yi ri kho" kyo" nyid.

⁴Aseing: ju" ri" wa da" khyoo: ri jen" jen" nyheing soin too" ge' Aseing: da" khyoo: ri dain: dain: nyheing koid: too" ge'.

⁵Lang: khoug: jo, moo jo, ri du: tam, pyam lho: boem zeing boem zoo: bain sho' ri khyau" khyo pyam ge' goid" da" khyoo: joem ri nyhang: kaid ge'. Amyen akhyoid da" khyoo: joem ri khyoo: myen, khyo" tam, pyam ge'.

⁶Byu xangsu: dangain" mo, gi Mangso da" khyoid yu jeju" ri shau" myang boem wa. ga: wigi-dain" pyoid yoo moo byu dayug nyho: nyid ga: Esaia jhoem: dang: moo bo ziyo' dakhyoo ti" bue" loo bye.

⁷Yohan koem gi nya: jang" mo Babtisma ri kham: yu wa ga: zheing: ju" re" da" byu yi ri Akhyeing" da" myu, no, byumyu" yi we"- ju" loo wa da" Mangsoo nheig yo: da" shid' gyoin mo loid loo" wa shid' re" nanu" ri hang" wigi tid poin" goo" lha".

⁸Nheugloem: thid bye: ziyo' moin: yi" da" asam" aved ri toin" shid ge' Abraham gi ngoonu" da" nya: phoo nghoid ein: atid goo. Mangsoo gi he: da" lugloem: joem ri Abraham da" nya: zoo: yi bui" wa shid' re" yo" phain" byid: ein: wigi nanu" ri ngoo tid.

⁹Hau: tho' moo gootu: seig gam poem: moo voozung: zung: too" bye ge da" ashi" azei: da" shi" gam bain sho' ri thoug lheing: pyam lho: myi: khyoem moo du" zei pyam zi shau" wa ga: byu dangain" mo ri kho" kyo.

¹⁰Byu phung: moo" dangain" gi houg: su" nghoid lang" ngoonu" gi khasu" koid: wa lha" ga: myed: boem.

¹¹Hau: uri Yohan gi byi: eig khyab yoo" su: gi byi: ayoo" su: ri dakhyab gam byid: ge'. Zoo: noem yoo" su: we' houg: yo" dakhyoo ti"- gam byid: ge' ga: doem tid.

¹²Kheing" khyu: zoo: mo, gi babtisma kham: yu wa ga: ju" re" boem. Nyangnu" gi sara: we"- ngoonu" gi khasu" se' koid: loo: wa lha" ga: re" myed: boem.

¹³Yohan gi nang nu" gi tarha" Upadi jo, tho' moo jain" lho: kheing" akhyu: goo"- ga: doem tid.

¹⁴Gyizoo: yi we' Ngoonu" gi khasu" koid: loo: wa lha"» ga: re" myed: boem. Yohan gi nanu" gi hang" ri nghoid loug we' atarha" khyo" ajoeb" goo. Dang: akho: goo"- hang" jang" mo we' atarha" da" ngei ri amho, zo: goo. Nanu" yo" da" la, ga, yo" nheig deig nyid ge" ga: doem tid.

¹⁵Byu yi gi Meshia gyoo" ri" loo: wa" ga: myid: byu nyid ayo, nghoid yoomo Yohan gi Meshia nghoid la"» ga: myid yu" nyid ago".

¹⁶Houg: yoomo Yohan gi Ngoo gi nanu" ri gyid moo Babtisma ri kham: byid. Nghoidloug nga" tho' je gyi: su: gi nga" thang: moo ju" ri" wa. Ngoo gi hau: Aseing: da" khyid: baid tei" lang" phid: byid: wa zi amoin: yi. Hau: Aseing: gi nanu" ri gyeungshang: Venyi: khyo" we' myi: moo we' nanu" ri babtisma byid: wa nghoid.

¹⁷Nya: da" gug nang: jang: ri khyo kyeing wa shid' re" nya: da" lo, moo gug khyoo lhang" khang" ri ci: lho: nya: gug boem ri lhang wigi gug moo rigi nya: ci: moo shoung: to" lho: gug soem: rigi ce" ze we ayo" said da" myikhyoem moo nghe, pyam zi nghoid ga: nyangnu" ri kho" kyo.

¹⁸Yohan gi gootu: tid poin" tid kyeing" da" dang: khyo" we' nyangnu" ri ngei pyo lu dang: seig ri kho" kyo.

¹⁹Nghoidloug we' Herod khokham" gi nya: no, da" yhoem: seing: myhi' Herodi ri lhoid yu ziyo' sen: lho: wigi we' Nyang: shoid da" yooboo myoo" sho' nghoid yoomo we' Yohan gi nyang: ri gyikoid tid poin" nyid.

²⁰Hau: thang: ri Yohan ri thung: moo myheug lhoung: too" yoomo Herod gi shoid vhang: led lo yooboo tho' moo gye" akhyeing" da" yooboo ri we' shoid loung: ci: bye.

²¹Byu myoo" sho' mo, gi Babtisma ri zheing: kham: yu lo" uri ASEING Yesu we' Babtisma ri kham: yu bye. ASEING Yesu gi akyu" mho' nyid da" uri Mougkhung bang" lo" lho:

²²Gyeungshang: da" Venyi: gi pheing" kyoug" khyo" Aseing: tho' moo gyoo" re". Mougkhung: mo wigi pheing" kyoug" khyo" Aseing: tho' moo gyoo" re. Mougkhung: mo wigi nang gi nga" zooti" zoo: nghoid. Nang ri ngoo jheddab ga: thui: ri shau" gyo: thu' lo.

²³ASEING Yesu gi moo" zei: shed" lo da" uri soem" xi: zain koo: nghoid bye. Subi" yu" myang soin: byid: nyid ziyo' dakhyoo"- Yesu gi Yoseb nya: zoo: nghoid Yoseb gi Heli nya: zoo:- Heli gi Mathaid nya: zoo:-

²⁴Mathaid gi Levi nya: zoo:- Levi gi Melkhi nya: zoo:- Melkhi gi Yanna nya: zoo:- Yanna gi Yoseb da" nya: zoo:-

²⁵Yoseb gi Matathia da" nya: zoo:- Matathia gi Amu: da" nya: zoo:- Amu: gi Nahum da" nya: zoo:- Nahum gi Esali da" nya: zoo:- Esali gi Nagai da" nya: zoo: nghoid.

²⁶Nagai gi Maad da" nya: zoo:- Maad gi Matathia da" nya: zoo:- Matathia Semai da" nya: zoo:- Semai gi Yoseb nya: zoo:- Yoseb gi Yoda nya: zoo.

²⁷Yoda gi Yohan da" nya: zoo:- Yohan gi Resa da" nya: zoo:- Resa gi Zerubabela da" nya: zoo:- Zerubabela gi Salathila da" nya: zoo:- Salathila gi Neri da" nya: zoo: nghoid.

²⁸Neri gi Milkhi da" nya: zoo:- Milkhi gi Adi da" nya: zoo:- Adi gi Kusam da" nya: zoo:- Kusam gi Elamadam da" nya: zoo:- Elamadam gi Era da" nya: zoo:.

²⁹Era gi Yesu da" nya: zoo:- Yesu gi Elieza da" nya: zoo:- Elieza gi Yorim da" nya: zoo:- Yorim gi Mathaid da" nya: zoo:- Mathaid gi Levi nya: zoo:-

³⁰Levi gi Simun da" nya: zoo:- Simun gi Yuda da" nya: zoo:- Yuda gi Yoseb da" nya: zoo:- Yoseb gi Yonam da" nya: zoo:- Yonam gi Eliakim da" nya: zoo:-

³¹Eliakim gi Melia da" nya: zoo:- Melia gi Mena da" nya: zoo:- Mena gi Matatha nya: zoo:- Matatha gi Natham da" nya: zoo:- Natham gi David da" nya: zoo:-

³²David gi Yese da" nya: zoo:- Yese gi Obed da" nya: zoo:- Obed gi Bua da" nya: zoo:- Bua gi Sala da" nya: zoo:- Sala gi Nason nya: zoo.

³³Nason gi Admin da" nya: zoo:- Admin gi Arni da" nya: zoo:- Arni gi Hesrun da" nya: zoo:- Hesrun gi Phared da" nya: zoo:- Phared gi Yuda da" nya: zoo:-

³⁴Yuda gi Yaku da" nya: zoo:- Yaku gi Isag da" nya: zoo:- Isag gi Abraham da" nya: zoo:- Abraham gi Thera nya: zoo:- Thera gi Nahura da" nya: zoo:-

³⁵Nahura gi Serug da" nya: zoo:- Serug gi Ragu da" nya: zoo:- Ragu: gi Pheleg da" nya: zoo:- Pheleg gi Abera da" nya: zoo:- Abera gi Sala da" nya: zoo:-

³⁶Sala gi Kainam da" nya: zoo:- Kainam gi Arphaza da" nya: zoo:- Arphaza: gi-Shem: da" nya: zoo:- Shem: gi Noa da" nya: zoo:- Noa gi Lemed da" nya: zoo.

³⁷Lemed gi Methusala da" nya: zoo:- Methusala gi Enug da" nya: zoo. Enug gi Yared da" nya: zoo:- Yared gi Mahalela da" nya: zoo:- Mahalela gi Kainan da" nya: zoo:-

³⁸Kainan gi Enu da" nya: zoo:- Enu gi shed da" nya: zoo:- Sed gi Adam da" nya: zoo:- Adam gi Mangso da" nya: zoo: nghoid.