Read Lashi LUKA 6 Bible Online

LUKA 6 - Lashi bible

LUKA 6

¹Dougno: Bidnyid ri ASEING Yesu gi sung: soo: yoo khyo" kho: led lo" da" uri cangzoo: yi gi sung: soo: nham: ri kho: lho: ne khyu: zo: ago".

²Pharishe dayham" bang: gi «nanu" ciwim wigi Dougno: Bidnyid ri age koid: da" moo" ri koid: go"» ga: myid: boem.

³ASEING Yesu gi «David khokham" we' nya: byen cang" daphung: yo' zooyoid da" uri khasu" koid: da" khyoo: ri nanu" anghab' yu" goo" rhe.

⁴Nyang: gi No' ku" yhoem: moo vang lo" lho: Moshe da" tarha" yo" dakhyoo ti"- khainjung agyi yi mo gootu: hang" we' age zo: da" myo, shid" ti: mo zooyho' ri yu zo: pyam Nya: byen cang" yi ri we' gam zho.

⁵Byu da" nya: zoo: gi Dougno: Bidnyid da" aseing: nghoid» ga: tid.

⁶Dougno: Bidnyid goo" nyid" moo Yesu gi tarha" jung daloem: moo vang lo" lho: tarha" kho" nyid. Hau: tarha" jung moo lo, yo lo, shid su: dayug we' nyid.

⁷Tarha" sara: yo"- Pharishe yi gi Yesu ri yooboo shau" shoo: sho' khyoo: shoo: nau boem yoomo Dougno: Bidnyid ri hau: youg da" noophyoo" ri ze: ge aze: ge ziri yu" go" nyid.

⁸Yesu gi houg: bang: da" nheigloem: ri si' byid: yoomo lo, shid su: ri to' lho: shid' moo lo" yab we' ga: tid. Hau: yug gi to' lho: shid' moo lo" yab jo.

⁹Hau: uri Yesu gi Moshe da" tarha" yo" dakhyoo ti"- Dougno: Bidnyid ri ge da" khyoo: ri gi ge koid: la". age da" khyoo: gi ge koid: la". Byu da" kang: ri ge khyoid yu la". ge said pyam la". nanu" ri ngoo myid: da:- ga: tid.

¹⁰Yesu gi houg: bang: dangain" mo, ri lheing: yu" lho: lo, shid su: ri re" lo, dain: kaid we' ga: tid. Hau: yug gi lo, ri dain: kaid da" uri goo" nham mo lo, yhangti" nyang: doem ge loo" khare".

¹¹Pharishe yi gi nheig gye" yu" yo: lho: Yesu ri khasu" koid: myheug pyam wa lha"» ga: sham: go" nyid boem.

¹²Hau: thang: ri Yesu gi Akyu" mho' wa shid' re" boem khyoo: do, lo. damyen goin" Mangso jang" moo akyu" mho' nyid.

¹³Myo, myang loo lang" Cangzoo: yi ri nya: jang" moo khe: yu lho: houg: bang: daxe: eig yug ri khyen: yu wigi Lagyoo: yi ga: myeing myheing byid.

¹⁴Hau: daxe: eig youg bang: gi Peteru ga: Aseing: wi myeing myheing byid: da" Simun- yo" Simun da" nya: no, Andre- Yaku yo" Yohan- Phili yo" Batholume-

¹⁵Mathe yo" Thoma- Alphe nya: zoo: Yaku- Byumyu" ri jheddab nheigloem: tho' su:- Simun.

¹⁶Yaku da" nya: zoo: Yuda yo"- thang: ri fain" loo" su:- Yuda Isakarud zheing: nghoid da.

¹⁷ASEING Yesu gi lagyoo: yi yo" dage" boem tho' mo gyoo" lo lho: janggyoin: moo ju" lo. Hau: joyoo moo cangzoo: yi phung: moo" daphoung: tho' moo gootu: Yuda mung" yo" Yerusalem voo mo we' Panglai gyid mung" yam moo jo, da" Turu yo" Sidon voo mo mo, we' ju" ri" mo, myoo" sho' nyid lang" boem.

¹⁸Houg: bang: gi Yesu da" mungdang: tarha" ri re" tam" gyoo: wa ziyo'- nyangnu" da" noophyoo" joem ri ze: gi byid: baja" ga: zeung: ri" mo, nghoid. Agyeing" ashang: da" yu joem shen" yhen zi shau" nyid mo, we' jure" lho: noo ge lo" boem ago".

¹⁹Yesu da" gung mo yoem: so' thu' lo" lho: noophyoo" ri ge nhang: yoomo Byu phung: moo" yi gi Yesu ri shau" zang" tain" yoo: ga: gye" yoem: kaid nyid boem ago".

²⁰Yesu gi cangzoo: yi ri yu" lho: sho" jhen: mo, nanu" gi ngi lho, boem wa. Mangsoo vhoeb khang" zi nanu" shau" yu boem bye.

²¹Akhid" uri zooyoid gyid shed nyid mo, nanu" gi ngi lho, bye. Nanu" gi voem: gyi: da" ayo, ju" loo wa. Ngau nyid mo, nanu" gi ngi lho, bye. Nanu" gau yi da" ayo, ju" loo wa.

²²Byu nya: zoo: yoomo nanu" ri ngheing" lo boem da" uri we' she: lhei" pyam zi shau" boem uri we' nanu" da" myonhoo: ri gyoeb nhang: da" uri nghoid loug- nanu" gi ngi lho bye.

²³Houg: yhangte" da" khyoo: thoung" shau" zo: da" uri gau yi nyid ge'. Gau wigi go" yen" ge'. Mougkhung: tho' moo nanu" da" jhung: shug gi gye" myoo jo, bye. Hid: su" nanu" ri age khyo" koid: mo, da" nya: phoug" nya: phyid" gi shid' phyang" mo lapi: yi ri we' houg: su" nyang: shen" yhen pyi: sho: led lo boem bye.

²⁴Nghoidloug we' Yoo" mo, jo, mo, nanu" gi joem: loo" goo" wa. Nanu" gi he: pyaid moo za: date: shau" pyo: nyid.

²⁵Akhid" uri gyi" gyi: shau" zo: nyid mo, nanu" gi joem: loo" goo" wa. Nanu" da" zooyoid gyid shed da" ayo, ju" loo wa. Akhid" uri gau yi nyid mo, nanu" gi joem: loo" goo" wa. Nanu" gi myid myoo: ungloug: lho: koug ngau nyid da" ayo, ju" loo wa.

²⁶Byu myoo" sho' mo, gi nanu" ri coung" byid: da" uri nanu" gi joem: loo" goo" wa. Hid: bang: da" nya: phoug" nya: phyid" gi mhau da" lapi: yi ri houg: su" ga: coung" byid: boem yu" bye.

²⁷Nghoidloug we' nga" tarha" ri shaug" gyoo: mo, nanu" ri ngoo tid da" zigi nyang: nya: da" gyivoo ri jheddab ge'. Nanu" ri anoug: mo, ri jeju" koid: ge'.

²⁸Nheing" mo, ri jheddab ge' Rui" mo, shid' re" akyu" mho' byid: ge'.

²⁹Nanu" da" boo yam dashoid moo pyug byid: su: ri thei: dashoid moo we' pyug nhang: shi" we'. Re" da" atho' byi: yu loo" su: ri akhoug: mo shid" goo byi: ri we' yu loo" nhang: shi" we'.

³⁰Nang ri re" mho' mo dangain ri byid: we' re" da" zi lhoid yu loo" mo, jang" mo adoem mho' yu loo.

³¹Nang ri subi" zei: byid: zi vhoo: yhangti" subi" ri we' nang houg: su" zei: byid: we'.

³²Nang ri jheddab mo, ri za: te: doem jheddab nghoid rigi Mangso da" mainkaid da" jeju" ri nanu" khasu" se' kham: yu wa lha". Yooboo shoid vhang: nyid mo, lang" Nyang: ri jheddab mo, ri za: date: se' jheddab boem.

³³Nanu" ri jeju" koid: mo, ri jeju" te: doem phoug nghoid rigi khasu" wigi Mangso da" mainkaid jeju" se' yo" kham: yu goo" wa lha". yooboo yoo" mo, we' houg: su" za: date: se' koid: boem.

³⁴Hau: tho' moo gootu: doem yo" xab byid: wa ga: myid: loem: su: ri za: Nanu" te: jhid" te: nghoo" byid: rigi Mangso da" mainkaid jeju" ri khasu" koid: se' kham: zo: wa. Yooboo yoo" mo, we' doem yo" xab byid: wa ga: myid: loem: mo, ri za date: jhid" byid: nghoo" byid: ago".

³⁵Nanu" gi gyivoo yi ri jheddab ge' Jeju" koid: ge' daja: ja: khyalhang" doem yo" yu abe ein: amyid nyid loo:- jhid" byid: nghoo" byid: ge'. Houg: su" koid: nghoid rigi Nanu" gyi: thang da" jhungshug ri yo" yu wigi myhang: thang da" Mangso da" nya: zoo: yi nghoid boem wa. Hau: Aseing: gi jeju" ase' boin: mo, yo"- akhyeing" ashoeb mo, ri jeju" koid: nyid.

³⁶Nanu" da" nya: phoo Mangsoo gi jheddab nheig se' khyeig yhangti"- nanu" we' jheddab nheig khyeig go" nyid ge'.

³⁷Subi" ri joid tab yooboo afoin: goo"- houg: su" nghoid lang" Mangsoo gi nanu" ri joid atab yooboo afoin: loo: nyid wa. subi" ri gam vhoo: akhyo, goo"- houg: su" lang" she- Mangsoo gi nanu" ri gam vhoo: akhyoo loo: nyid wa zi nghoid. Subi" da" yooboo ri khyoid pyam byid: ge' houg: su" lang" she- Mangsoo gi nanu" da" yooboo ri kyoid pyam byid: wa.

³⁸Subi" ri lid: lid: zoo: byid: ge'- houg: su" nghoid lang" she- Mangsoo we' Nanu" ri lid lid zoo: doem byid: wa. Byeing" shoin: sho' main" da" tang: yo"- nanu" da" lo, moo doin: jheung: byid: boem wa. Khasu" wim gari Nanu" nyang: leig byid: da" tang mo doem leig byid: wa ga: tid.

³⁹Hau: thang: ri Yesu gi houg: bang: ri dangtu' yu lho: myo, amyang su: gi gootu: myo, amyang su: ri khyoo: shed wa zigi ge bui" wa la". Hau: eig yug goin" su:- duang: khuang" moo byid gyoo" loo" wa zi anghoid la".

⁴⁰Cangzoo: gi sara: tho' moo aje gyi:- nghoid loug we' Phajhi" bain jhau" yu lang" gi cangzoo: we' sara: yhangti" bui" wa nghoid.

⁴¹Nangnu" ciwim wigi nyang: nya: da" myojid" moo bo da" thang" toem zeing rigi amyang lho: mang: nhung" phoo da" myojid" moo bo da" phei" lhoug: ri myang go" lha".

⁴²Ci: yoomo mang: nhung" phoo ri Re" myojid" mo phei" lhoug: ri yu pyam byid: wa ein: lhoug: tid go. Nheugloem: fain" bo su: we"- Re" da" myojid" mo thang" toem zeing ri xang: shed" keing" khyo pyam we'. Hau: thang: ri she- nang gi Re" mang: nhung" phoo da" myojid" mo phei" lhoug: ri goo" lhoo: myang lho: yo" yu pyam byid: wa nghoid ga: tid.

⁴³Agam ge zigi ashi" age zi ayo" zei:- age da" agam gi ge da" ashi" ri ayo" zei:-

⁴⁴Ashi" ri myang lang" agam ri se'- Lafoem shi" ri shilhang" byab mo zabyid shi" ri zu: kyen: byab mo byu yi alhoung: shau" phyo' yu.

⁴⁵Gi su: gi ge da" ziyoo yo"- byeung" shoin: da" nheigloem: boin" khoug: mo ge da" ziri za: thoid shug se. Akhyeing" ashoeb su: gi akhyeing" ashoeb ziyo' byeung" jo, da" nheigloem: boin" khoug: mo age da" zi joem ri za: te: thoid shug se' nyid, ci: yoomo gari nheigloem: khoug: moo byeung" jo, da" ziri nhoid moo tid thu' ri" si' yoomo nghoid.

⁴⁶Nanu" gi nga" dang: lang" atam" gyo: zi ci: koid: ngoori- Aseing: we" Aseing: we" ein: yoid nyid go".

⁴⁷Nga" jang" moo re" lho: nga" da" mungdang: tarha" ri shau" gyo: thang: ri cang loo" su: ri dangtu' khyo" tid kyoo" ba.

⁴⁸Hau: yug gi myidjang: ri no" no, du: lho: Lug boem tho' moo ayang: qei" wigi yhoem: ri zhug too" su: yo" du nyid. Gyid je: lo uri gyid gi hau: yhoem: ri lo thoung"- nghoid loug we' gyid gi hau: yhoem: ri ayo" doin: lheing. Khasu" wim gari hau: yhoem: gi Lung: moo" boem tho' moo geing" geing: zhoug too" yoomo nghoid.

⁴⁹Nghoidloug we' Nga" da" tarha" mungdang: ri shau" gyo: thang: ri acang loo" su: gi myidjang: moo za: adu: zhug loo: za: myid tho' moo te: koid: too" su: yo" du nyid. Gyid je: lo wigi hau: yhoem: ri lo thung" lang" gi dalheing: dam byo lheing lo. Hau: byo lheing lo" zigi mhoin' nyang: kaid bye:- ga: tid kyo.