Read Lashi TARHA" TID POIN" 1 Bible Online

TARHA" TID POIN" 1 - Lashi bible

TARHA" TID POIN" 1

¹He: jhoem: pug gi Israela byumyu" yi Yodan gyid lang bidthu shoid dain" pyoid yoo moo nyid da" uri nyangnu" ri Moshe gi tid da" dang: joem nghoid. Nyangnu" gi dashoid khyoo: Paran voo yo' thang: dashoid khyoo: Tophela- Laban- Hazerod yo' Dizahab voo joem: agyoo: moo jo, da" Supha voogung nam mo Yodan gyid langkhung" moo nyid boem. (

²Edom boem moug: khyoo: khyo" yhe: ri Sina boem mo Kadesha Barnea khyoo: ju" sho' daxe: danyid" soo" ca" da:.)

³Nyangnu" Egutu mo thu lo thang: myid: xi: zain lhammoo" daxe: dakhyab xang: shi" nyid" ein: nyid" ri Moshe gi ASEING wigi nyang: ri byumyu" yiri tid kyoo" wa amyeing" byid: to" da" gu: ja: khang" moo" ri byumyu" yiri tid kyo" da:.

⁴He: zigi Heshbon voogung ri vhoeb da" Amori khokham Sihon yo' Ashtarod yo' Edrei voogung joem ri vhoeb da" Bashan khokham Oga ri ASEING wigi ung: pyam thang: ri bui" zi nghoid.

⁵Byumyu" yi Yodan gyid lang bidthu shoid mo Moba mougkyoo" moo nyid nyid boem uri Moshe gi ASEING tarha" joem yo' jhoug" shid khyoo: ri tid sho' kyoo" bye:. Nyang: gi

⁶«Ngoonu" Sina boem moo nyid nyid uri ngoonu" ASEING Mangsoo ngoonu" ri ‹Nanu" he: boem moo nyid nyid zi gye" myang" bye:.

⁷Dab ri phyo' lho: to' loo" loo: ge'. Amori boem moug: yo' hau: lheing khoem mo Yodan lang: khung" boem moug: nyoem" moug: mougpyi: shoid khyoo: we' Meing: gung panglai: gyid yam cang khyoo: yhi: ge'. Khanan mung" yo' Lebanon boem lid wigi Uphrad gyid lang ju" sho' yhi: ge'.

⁸He: zi dangain" gi ngoo ASEING wigi nanu" phoug" phyid" nghoid da" Abraham- Isag- Yaku yo' nyangnu" da" amyed ashen yiri byid: wa ga: dangsoo" byid: to" da" mougmyid nghoid. Hau: ziri yhe: seing: yu ge'›» ga: tid da:.

⁹Moshe byumyu" yiri «Nyhang" Sina boem moo nyid shi" uri ngoo nanu" ri vhu" she: da" yoovoin gi nga" shid re" gye" yoovoin lid: ein: nanu" ri tid bye:. He: moo" zoo" ri ngoo nyang: kyeing" ayo" zei: nghoid da:.

¹⁰Nanu" ASEING Mangsoo gi nanu" ri mougkhung: mo kyi: joem yhang: ti" myoo: nhang: abye:.

¹¹Nanu" phoug" phyid" da" ASEING Mangsoo gi dangsoo" to" ziyo' dakhyoo" ti" khyeing" su: myoo: sho' myo: lug ri" nhang: wigi nyid gi yab gi nhang: abye:.

¹²Nghoid loug we' nanu" tid ngeug byo, go" da" moo" ri tid sho' byid: wa yoovoin moo" ri ngoo dayug kyeing" khasu" yo" voin vu, wa lha".

¹³Byu kung: khang" moo" mo phajhi" bo- lasi laleug bo- thung" shoug" khyoo: myo: mo, dayham" ri khyen: ge'. Ngoo nyangnu" ri nanu" adang moo vhujhung: koid nhang: wa ein: tid bye:.›

¹⁴Houg: lho: he: zigi koid ge moo" nghoid ga: nanu" myid veing" boem ago".

¹⁵Houg: yoomo nanu" byu kung: yi mo nanu" khyen: byid: da" phajhi" bo thung" shoug" khyoo: myo: da" vhujhung: yiri ngoo shu" yu wigi ngoo gi nyangnu" ri nanu" adang moo vhoebkhang" wa shid re" moo" byid: bye:. Dayham" gi byu dakhyeing" adang moo dayham" gi byu dasho: adang moo dayham" gi byu wim: xi: adang moo dayham" gi byu daxi: adang moo yoovoin yu nhang: bye:. Ngoo gi gootu: moo" voin bang: ri we' byu kung: yi mo khyen: too" bye:.

¹⁶«Hau: ayo, ri ngoo gi nyangnu" ri ‹Nanu" byumyu" yi khoug: moo bui" thu' re" da" ngeig go" khyoo: ri tam" gyoo: ge'. Nanu" byumyu" yi khoug: moo za: anghoid nanu" akhoug: moo nyid da" tungbau byu yi moo nghoid loug we' tid ngeig go" da" ja: khang" moo" moo nyeing" za: tarha" dang: phyed byid: ge'.

¹⁷Nanu" myid phyed jang" moo myonhoo: akhyen: goo". Nyangnu" hang" nghoid loug nghoid yugkhang" moo" ri dakhyoo" kyeing" dang: phyed byid: ge'. Hang" ri we' agyug goo". Ciwim ga: ri nanu" myid phyed zigi Mangso jang" mo lo zi nghoid. Moo" daja: ja: nanu" shid re" gye" yau: nghoid rigi nga" jang" khyoo: ci: ri" ge'. Hau: ziri ngoo dang: phyed byid: wa.

¹⁸Dalheing: dam nanu" koid wa khyoo: ja: khang" moo" ri ngoo nanu" ri jhau" byid: bye:.

¹⁹Ngoonu" ASEING Mangsoo ngoonu" ri dangsoo" byid: khyoo: ri ngoonu" koid loo bye:. Ngoonu" gi Sina boem mo thu lho: damung" dadain: nghoid da" gyoug pho" dain" pyoid yoo khyo" lid phyed lo" wigi Amori boem moug: khyoo: ju" da" khyoo: khyo" yhe: lo" boem bye:. Ngoonu" Kadesha- Barnea khyoo: ju" uri

²⁰Ngoo nanu" ri ‹Akhid" nanu" gi nanu" da" phoug" phyid" yi da" Mangsoo nghoid da" ngoonu" ASEING Mangsoo wigi ngoonu" ri byid: wa nghoid da" Amori boem moug: khyoo: yo" ju" nyid bye:. Yu" ge'. Nanu" da" ASEING Mangsoo gi nanu" ri he: mougmyid ri byid: bye:. Yhe: lho: nyang: amyeing" byid: to" ziyo' dayhang: ti" hau: ziri seing: yu ge'. Axei' nyid goo" gyoug we' agyug nyid goo"› ga: tid.

²¹

²²«Nghoid loug we' nanu" nga" jhang re" wigi ‹Ngoonu" ri ge thang da" khyoo: ri yo" khyen: yu wa yo' houg: moo cite" da" voogung joem jo, ziri ngoonu" ri yo" tid kyoo" wa shid re" hau: mougmyid ri joo" yo" yu" wa nanu" shid vhu" khyoo: byu yiri nhang: kaid shang ga:› tid ago".

²³«Hougsu" koid rigi gi wa yoomo byumyu" kung: khang" moo" mo dayug yug khyo" wigi byu daxe: eig yug ri ngoo khyen: yu bye:.

²⁴Nyangnu" gi boem moug: Eshkhola lang: khung" khyoo: ju" sho' yhe: lho: hau: ziri yhe: jooyu" ago".

²⁵Nyangnu" houg: moo yhe: myang da" shi" dayham" ri ngoonu" jhang phyo' dang lo wigi ngoonu" ASEING Mangsoo ngoonu" ri byid: wa nghoid da" mougmyid gi myid xu: gye bo khyoo: ri lo tid kyo" ago".

²⁶Nghoid loug we' nanu" gi nanu" da" ASEING Mangso amyeing" dang: ri thougtheung yoomo hau: moug: khyoo: avang yhi: nghoid da:.

²⁷Nanu" dayug yo' dayug nu go" nyid zigi ‹ASEING gi ngoonu" ri ngheing" abye:. Ngoonu" ri Amori byumyu" yi wigi said pyam baja" ga: he: Amori byumyu" yi lo, moo ab byid: wa shid re" nyang: gi ngoonu" ri Egutu mung" mo shu" thu lo zi nghoid da:.

²⁸Ngoonu" ciwim yoomo houg: khyoo: yhi: ca" wa lha". Ngoonu" gyoug da:. Houg: moo nyid da" byu yigi ngoonu" tho' je yoem: bo je gyi: je myang: mo, nghoid ziyo' nyangnu" gi mougkhung: ri myhi: da" vang khyam: bo voo moo" joem moo nyid boem go" da" khyoo: ri nanu" wigi nhang: kaid da" bang: wigi ngoonu" ri lo tid kyo" boem ago". Nyangnu" gi houg: moo byu gyi: byu zeing joem ri yhe: myang ago"›» ga: tid boem.

²⁹«Nghoid loug we' ngoo gi nanu" ri ‹Hau: mung" byu yiri agyug adain goo".

³⁰Nanu" da" ASEING Mangsoo gi nanu" ri khyoo: shid vhu" she: wigi Egutu mung" yo' dain" pyoid yoo moo nyang: khasu" koid bye: ziri nanu" myang bye: ziyo' dayhang: ti" nyang: gi nanu" shid re" gyi bo said byid: wa zi nghoid.

³¹Nya: phoo gi nya: zoo: ri vu, ci: ziyo' dayhang: ti" he: joyoo khyoo: ju" sho' khyoo: cang wigi nyang: nanu" ri goug: nyu: tung" za: shu" lo ziri nanu" myang lo abye:.›

³²Nghoid loug we' nyang: gi khanham we' nanu" shid vhu" khyoo: yhe: wigi nanu" theing: wa da" joyoo yhe: shoo: byid: nyid ein: ngoo tid rilang" nanu" ASEING ri akhid" ju" sho' aloem, jeing" nghoid da:. Nanu" da" khyoo: ri toin" shed wa shid re" myen" ri myi: nyid" ri jhoemmoug" khyo" nyang: gi nanu" shidkhoin" moo yhe: lo" da:.

³³

³⁴ASEING gi nanu" myeing" myo: da" thui: ri shau" gyo: lho: nheig yo: da:. Hougsu" yoomo nyang: gi

³⁵he: akhyeing" da" byu yi mo nanu" dayug we' nanu" phoug" phyid" yiri byid: wa ein: ngoo nang ri dangsoo" byid: to' myid xu: ge da" moug: khyoo: ayo" vang yhi: goo" wa.

³⁶Yephune da" yuggi zoo: Khaleb za: houg: khyoo: yo" vang yhi: wa. Nyang: gi ngoo ri dang: zung" nyid wigi ngoo gi nyang: joo" yhe: yu" da" mougmyid nyang: yo' nya: amyed ashen yiri byid: wa› ga: no, mo tid too" bye:.

³⁷Nanu" gang mo ASEING gi ngoo ri nheig yo: wigi ‹Moshe- nang lang" hau: moug: khyoo: ayo" vang yhi: wa.

³⁸Nghoid loug we' nang ri pang" thoug byid: yug Nun da" nya: zoo: Yoshu da" myid phyed khyoo: ri yoem: boo nhang: we'. Nyang: gi hau: moug: ri yhe: seing: yu wa shid re" Israela byumyu" yiri vhu" shi: wa zi nghoid› ga: tid.

³⁹«Hau: thang: ASEING gi ngoonu" dangain" mo, ri ‹Jo ziyo' shoid ziri se' kho' wa soung ngi shi" da" nanu" nya: zoo: yigi hau: moug: khyoo: vang wa zi nghoid. Hau: zoo: yigi gyivoo yi wigi myeug pyam shoug" wa ga: nanu" tid bye: nghoid loug we' ngoo gi nyangnu" ri hau: mougmyid ri byid: wigi nyangnu" hau: ziri yo" seing: yu wa zi nghoid.

⁴⁰Nghoid loug we' byumyu" yi nanu" doem tau" wigi Thoem" Ni khyoo: ju" da" khyoo: deing mo dain" phyoid yoo khyoo: doem tau" yhi: ge'› ga: tid.

⁴¹«Nanu" gi ‹Moshe we"- ngoonu" gi ASEING ri yooboo shoid bye:. Nghoid loug we' akhid" ASEING wigi ngoonu" ri dangsoo" byid: to" ziyo' dayhang: ti" gyi yhe: zain: wa› ga zi nghoid. Hau: thang: nanu" yugkhang" moo" gi boem moug: khyoo: jhen" vang yhi: wa shid re" lei wa ga: myid jho: wigi gyi khaid wa jen" jen" soin' ci: ago".

⁴²«Nghoid loug we' ASEING ngoo ri ‹Nyangnu" ri gyi ayhe: zain: wa khyo" tid poin" we'. Ciwim gari ngoo gi nyangnu" yo' dage" nyid wa zi anghoid. Nyangnu" da" gyivoo yigi nyangnu" ri oung: pyam wa› ga: tid.

⁴³ASEING tid da" dang: ngoo nanu" ri tid kyoo" bye:. Nghoid loug we' nanu" atam" gyoo: goo" nghoid da:. Nyang: ri thougtheung lho: nghoid boin: da" myid yo' boem moug: khyoo: to' yhe: lo" ago".

⁴⁴Hau: thang: hau boem joem moo nyid boem da" Amori byumyu" yigi byoo: phung: yo' dakhyo" nanu" ri gyi re" koid bye:. Nyangnu" gi nanu" ri Horma ju" sho' cang khaid wigi Edom boem moug: moo nanu" ri oung: pyam bye: ago".

⁴⁵Houg: yoomo nanu" gi bo pang" wa shid re" ASEING ri mho' yoid ago". Nghoid loug we' nyang: gi nanu" ri atam" gyoo: byid: loo: alheing: yu" loo: nghoid da:.

⁴⁶«Houg: yoomo ngoonu" Kadesha moo nyid zi gye" myang" thang: ri.