Read Lashi TARHA" TID POIN" 11 Bible Online

TARHA" TID POIN" 11 - Lashi bible

TARHA" TID POIN" 11

¹«Nanu" ASEING Mangsoo ri jheddab wigi nya: tarha" dangain" ziri khanham we' cang nyid ge'.

²ASEING nanu" ri jhau" shed loo bye: khyoo: ri nanu" jhau" yu boem bye: ziri akhid" nyid" boin: so" nyid ge'. Houg: bang: gi nanu" da" zoo: du yi anghoid nanu" nyang: nghoid da:. Nanu" gi ASEING da" gyi: sheung: khyoo: nya: yoem: so' nya: myhang: thang khyoo:

³nya: mau" pho" alhoo: again joem ri myang boem bye:. Nyang: gi Egutu khokham ri yo' nya: mungdain: goin" ziri khasu" koid lo ziri nanu" myang boem bye:.

⁴Nyangnu" nanu" ri cang khaid zain: uri nyangnu" ri Thoem" Ni moo noeb shid: loo" nhang: da" khyo" nyangnu" myang: joem yo' gyi myang: rheing" joem yo' dage" Egutu gyiphung: ri ASEING wigi bain sho' khasu" said toem" pyam ziri nanu" myang lo boem bye:.

⁵Nanu" hid: khyoo: aju" loo shi" uri dain" pyoid yoo moo nanu" shid re" ASEING cikoid bye: ziri nanu" se' boem abye:.

⁶Nyang: gi Ruben kung: mo Eliab da" yuggi zoo: tang: Datham yo' Abiram ri cikoid bye: ziri nanu" xoem" boem ashi". Yugkhang" moo" da" shidkhoin" moo myidjang gi go, lo wigi nya: eig yug da" yhoem: byu yi nyangnu" da" dab joem nyangnu" da" dei zoo: yi yo' gougnyhoug joem yo' dage" nyangnu" ri myhau: pyam bye:.

⁷Nghoid bye:. ASEING koid bye: da" gyi: sheung: moo" zeing dangain" ri myang mo, gi nanu" nyang: nghoid abye: go".

⁸«Akhid" nyid" nanu" ri ngoo byid: da" amyeing" ja: khang" moo" ri cang nyid ge'. Houg: lang" nanu" gi gyid lang ri yo" gu: dab yhe: wigi nanu" vang yhi: loo wa zi danghoid lo: da" mungdain: ri yhe: yo" seing: yu boem goo" wa.

⁹Houg: lho: ASEING wigi nanu" phoug" phyid" yiri yo' nyangnu" amyed ashen yiri byid: wa ga: dangsoo" byid: to" da" joeb byeung" ziyo' mougmyid nu" da" mungdain: moo nanu" apyaid sheing: sho' yo" nyid loo goo" wa.

¹⁰Nanu" yhe: seing: yu loo wa za: danghoid lo: da" mungdain: gi shid phyang" nanu" nyid lid lo da" Egutu mung" yhang: ti" anghoid da:. Houg: moo nanu" shivoo: shiloem zhung" uri yoothung" joem moo gyid kaid wa shid re" yoem: gye" kaid ca" ago".

¹¹Nghoid loug we' nanu" vang yhi: loo wa za: danghoid lo: da" mungdain: gi bouggung langkhoug: moug: vo wigi moug: gyid yo" da" mungdain: nghoid da:.

¹²Nanu" ASEING Mangsoo gi he: mungdain: ri yu" goin coung: byid: ziyo' zain goin" hau: ziri zung" yu" nyid da:.

¹³«Houg: yoomo akhid" nyid" ngoo nanu" ri byid: to" da" amyeing" dang: joem ri cang nyid ge'. Nanu" ASEING Mangsoo ri jheddab wigi nanu" emyed nheigloem: dangain" yo' nyang: ri dei byid: nyid ge'.

¹⁴Nanu" cang boem nghoid rigi ca" da" ayo, nghoid da" xung" yo' zain vang khoem" ri nyang: gi nanu" da" mungdain: moo moug: voo nhang: wa. Houg: lang" nanu" shid re" gug zoo shivoo zabyid yhid: yo' zhainloin: xu: thu byid: wa nghoid.

¹⁵Nanu" da" goug: nyhoug shid re" mhain" yug ri" nhang: wa. Nanu" vho: da" zoo: noem dangain" we' nanu" shoug" yu loo goo" wa.

¹⁶Gootu: phara" ri no' wa yo' dei byid: wa shid re" nanu" nya: gung ri su be" wigi ASEING mo aphug loo" nhang: goo".

¹⁷Nanu" hougsu" koid boem nghoid rigi ASEING gi nanu" ri nheig yo: loo wa. Nyang: gi moug: vo ziri toem' pyam wigi nanu" mougmyid gi shivoo: ayo" yug sho' gye" kyug hei' loo" wa zi nghoid. Houg: lang" nyang: nanu" ri byid: da" mungdain: gi mougmyid gi nghoid loug: nanu" gi hau: mung" moo amyang" ri shid: lo" byug boem wa.

¹⁸«He: amyeing" dang: joem ri myid boin: wigi hau: ziri nheigloem: moo: kaid too" ge'. Tid poin" nyid da" jonu" khyo" hau: joem ri nanu" lo, pu' moo tei" tab ci: wigi nanu" ngilang: moo we' tei" tab ci: ge'.

¹⁹Houg: joem ri nanu" zoo: du yiri jhau" byid: ge'. Nanu" gi yhoem: moo nyid uri vi: khyoo: so" lo" uri dau no: nyid uri moo" zei: nyid uri hau: dang: ri tid kyoo" ge'.

²⁰Houg: dang: ri nanu" yhoem: khoem" bung joem yo' vang khyam: khoem" zeing joem cang lhid" tab too" ge'.

²¹Houg: lang" nanu" phoug" phyid" yiri byid: wa ga: nanu" ASEING Mangsoo dangsoo" byid: to" da" mungdain: moo nanu" yo' nanu" nya: zoo: yigi apyaid sheing: sho' shoug" nyid boem goo" wa. Nanu" gi hau: mungdain: moo mougmyid atho' mo mougkhung: dajo, jo, myhang shoug" dei nyid boem wa.

²²«Ngoo nanu" ri amyeing" byid: to" da" ja: khang" moo" ri dang: zung" cang yhe: nyid ge'. Nanu" ASEING Mangsoo ri jheddab nyid ge'. Nya: amyeing" dang: ja: khang" moo" ri cang khoid wigi nyang: ri dang: zung" nyid ge'.

²³Houg: lang" nanu" shid vhu" khyoo: jhen" yhe: lo" uri hau: byumyu" joem ri nyang: khaid thu pyam byid: loo wa. Houg: lho: nanu" tho' je myo: ziyo' je yoem: bo da" byumyu" yi seing: da" mungdain: ri yo" seing: yu loo goo" wa.

²⁴Nanu" nang: lid lo" da" myidgung dangain" gi nanu" myidgung bue" loo wa. Nanu" mougkyoo" gi mougpyi: shoid dain" pyoid yoo mo zi mougzhung: shoid Lebanon boem joem: ju" sho' bidthu shoid Uphrad lang mo bidvang shoid Meing: gung panglai: ju" sho' jhen" lam lo" wa zi nghoid.

²⁵Nanu" ASEING Mangsoo gi nyang: dangsoo" byid: to" ziyo' dakhyo" hau: mungdain: khoug: moo nanu" yhe: lo" da" joyoo khang" moo" mo byumyu" yi nanu" ri gyoug boem wa. Nanu" ri hang" we' ayo" toem' pyam wa.

²⁶«Akhid" nyid" nanu" ri ngoo mainkaid jeju" yo' nheing" khoin" ri khyen: yu wa shid re" byid: too" bye:.

²⁷Akhid" nyid" nanu" ri ngoo byid: da" nanu" ASEING Mangso da" amyeing" dang: ri nanu" cang nyid nghoid rigi mainkaid jeju" yoo" wa.

²⁸Nghoid loug we' hau: amyeing" dang: ri nanu" acang yi: lho: za: nanu" shid phyang khanham we' ano' yu" da" gootu: yu phara" ri no' wa shid re" lheing: thu lo nghoid rigi nheing" khoin" zang" wa zi nghoid.

²⁹Nanu" yhe: seing: yu wa nghoid da" mungdain: khyoo: ASEING wigi nanu" ri shu" vang yhi: lang" nanu" gi mainkaid jeju" dang: ri Gerizim boem mo tid fu" wigi nheing" khoin" rigi Ebala boem mo tid fu" ca" wa zi nghoid.

³⁰(He: boem eig loem: gi Yodan lang: khung" moo nyid boem da" Khanan byumyu" yi da" moug: mo Yodan gyid lang bidvang shoid moo jo, da:. Hau: boem joem gi bidvang shoid khyoo: shu: to" wigi Gigala voogung nham mo gyeung" shang: da" More seiggam joem yo' atung" ve: jang" moo jo, da:.)

³¹Nanu" gi nanu" ASEING Mangso wigi nanu" ri byid: da" mungdain: ri Yodan gyid lang gu: dab yhe: wigi yhe: seing: yu wa zi za danghoid lo:. Nanu" hau: ziri yhe: seing: yu wigi houg: moo yhe: de: nyid lang"

³²akhid" nyid" ngoo nanu" ri byid: da" tarha" dangain" ri cang ca" ein: ziri ato" myhed myid boin: nyid ge'.